MARK 6

Esin Jesus Ke Obio Esie Nazareth

(Mt 13.53-58; Lk 4.16-30)

1EKEM Enye ɔwɔrɔ ɔkpɔŋ ɔtɔ oro, onyuŋ edi ke obio Esiemɔ; mbet Esie enyuŋ esaŋa ye Enye. 2Ndien ke osimde sabbath, Enye ɔtɔŋɔ ndikpep owo ŋkpɔ ke synagogue; ediwak mmɔ eke ekopde Enye enyuŋ edu ke mkpa-idem, ete, Owo emi ada ŋkpɔ emi ke mmɔŋ? Ɔniɔŋ eke enɔde owo emi edi nso, ye oruk utom odudu emi ubɔk Esie anamde? 3Nte Enye idige anamusɔ, eyen Mary, ye eyen-eka James ye Joses ye Judas ye Simon? Nte nditɔ-eka Esie iban inyuŋ iduhe ye nnyin? Ndien mmɔ eduɔ ke ntak Esie. 4Edi Jesus ɔdɔhɔ mmɔ ete, Prophet inanake ukpono ke mibɔhɔke ke obio esie, ye ke otu iman esiemɔ, ye ke ufɔk esiemɔ. 5Ndien Enye ikemeke ndinam utom odudu do ibɔhɔke ndidori ndusuk mbon udɔŋɔ ubɔk nnyuŋ nnam mmɔ ekop nsɔŋidem 6Ndien Enye eyik abaŋa unana mbuɔtidem mmɔ.

Jesus Osio Mbet Esie Duopeba Ɔdɔŋ Utom

(Mt 10.5-15; Lk 9.1-6)

Ekem Enye asaŋa akanare obio-iŋwaŋ ekpep owo ŋkpɔ.

7Ndien Enye okot mbet Esie duopeba edi, onyuŋ ɔtɔŋɔ ndisio mmɔ iba iba ndɔŋ mmɔ utom: onyuŋ ɔnɔ mmɔ odudu ndikan ndidehe spirit. 8Enye onyuŋ ɔnɔ mmɔ uyo ete, Ekukama ŋkpɔ ke isaŋ ke mibɔhɔke esaŋ ikpɔŋ; ekukama uyo, mme ekpat-isaŋ, mme okuk ke ubɔp-isin; 9edi esine ikpa-ukot ke ukot; ekunyuŋ esine ɔfɔŋidem iba. 10Enye onyuŋ ɔdɔhɔ mmɔ ete, Ke ebiet ekededi eke mbufo edukde ke ufɔk, etie do tutu mbufo enyɔŋɔ ke ebiet oro. 11Ndien ebiet ekededi eke midinyimeke ndidara mbufo, minyuŋ ikopke uyo mbufo, nte mbufo ewɔŋɔde do, ekeŋ ntan ikpat mbufo enɔ mmɔ nte ŋkpɔ ntiense. 12Mbet edaha ekɔkwɔrɔ ete, Ekabare esit. 13Mmɔ enyuŋ ebin ediwak demon eduɔk, enyuŋ eyet ediwak mbon udɔŋɔ aran, enyuŋ enam udɔŋɔ ekure mmɔ.

14Ekem edidem Herod okop; koro enyiŋ Jesus ɔwɔrɔde etop: Herod onyuŋ ɔdɔhɔ ete, John Baptist emeset ke mkpa, mmɔdo mme odudu emi enamde utom enye ke idem. 15Edi owo efen ete, Edi Elijah: mmɔ efen edɔhɔ ete, Edi prophet emi etiede nte owo kiet ke otu mme prophet. 16Edi ke ini Herod okopde, enye ɔdɔhɔ ete, John emi ŋkebigide, enye emeset. 17Koro Herod ke idem esie ɔkɔdɔŋ ekomum John, onyuŋ ɔkɔbi enye ke ufɔk-ŋkpɔkɔbi ke ntak Herodias, ŋwan Philip, eyen-ete esie: koro Herod ama ɔkɔdɔ ŋwan oro. 18Koro John ɔdɔhɔde Herod ete, Inenke fi ndida ŋwan eyen-usɔ ndɔ. 19Edi Herodias ayat esit ye John, onyuŋ oyom ndiwot enye: 20edi ikemeke: koro Herod efefehe John, sia ɔfiɔkde ete enye edi edinen ye edisana owo, onyuŋ ekpeme enye. Ndien ke ini enye okopde uyo John, ekikere otimere enye; enye onyuŋ okop uyo oro ke inemesit. 21Ekem ke ini usen eke ekemde ama edi, Herod anam akwa udia ke usen emana esie ɔnɔ mbɔŋ esie, ye mme etubom-ekɔŋ esie, ye ikpɔ owo Galilee; 22eyen Herodias aŋwan onyuŋ oduk edinek unek, enem Herod ye mmɔ emi etiede ye enye ke itie-udia esit; ndien edidem ɔdɔhɔ eyen-aŋwan oro ete, Beŋe mi ŋkpɔ ekededi eke amade, ndien nyenɔ fi. Herod ɔŋwɔŋɔ ɔnɔ enye ete, 23Ŋkpɔ ekededi eke edibeŋede ke nyenɔ fi, ekpedi idem ubak edem kiet ubɔŋ. 24Ndien enye oro ɔwɔrɔ okobup eka esie ete, Nso ke ŋkpebeŋe? Enye ɔbɔrɔ ete, Ibuot John Baptist. 25Ekem kpa idaha oro eyen-aŋwan awara oduk ke ɔtɔ edidem, ebeŋe ete, Nyom afo ɔnɔ mi ibuot John Baptist idahemi ke usan. 26Edidem ayat esit eti-eti; edi ke ntak uŋwɔŋɔ esie, ye mmɔ emi etiede ye enye ke itie-udia, enye imaŋa ndisin eyen-aŋwan ebeŋe esie. 27Ndien idaha oro edidem osio owo-ekɔŋ kiet ke otu mme andikpeme enye, ɔdɔŋ, ɔnɔ uyo ete eda ibuot John edi: owo oro onyuŋ aka ekebigi enye ke ufɔk-ŋkpɔkɔbi, 28ada ibuot esie ke usan edi edinɔ eyen-aŋwan oro, ndien eyen-aŋwan ada ɔnɔ eka esie. 29Ekem ke ini mbet John ekopde, mmɔ edi edimen okpo esie, eka ekebuk ke udi.

30Ekem mme apostle ebono etiene Jesus, esian Enye kpukpru ŋkpɔ, se ededi mmɔ ekanamde, ye se ededi mmɔ ekekpepde. 31Ndien Enye ɔdɔhɔ mmɔ ete, Edi ke idem mbufo ke ebiet desert ediduɔk odudu esisit. Koro ediwak owo ke ededi enyɔŋyɔŋɔ, mmɔ inyuŋ ikwe ifet kpa ndidia ŋkpɔ. 32Ekem mmɔ ediere ke ubom edaha eka ke ebiet desert ke idem mmɔ ikpɔŋ. 33Edi owo ekut mmɔ nte ekade, ediwak enyuŋ ediɔŋɔ mmɔ, enyuŋ eto ke kpukpru obio, efehe ukot-ukot ebem mmɔ iso ekesim ebiet oro. 34Ndien Jesus ɔwɔrɔ ke ubom okut akwa otu owo, onyuŋ atua mmɔ mbɔm, koro mmɔ ebietde mme erɔŋ eke minyeneke andikpeme: Enye onyuŋ ɔtɔŋɔ ndikpep mmɔ ediwak ŋkpɔ. 35Edi ke ini ekperede mbubreyo, mbet Esie etiene Enye, ete, Ebiet emi edi desert, onyuŋ ekpere mbubreyo ke emi; 36dɔŋ mmɔ enyɔŋɔ, man mmɔ eka ke iŋwaŋ ye obio-iŋwaŋ ke ŋkan-ŋkuk ekedep udia enɔ idem mmɔ. 37Edi Enye ɔbɔrɔ mmɔ ete, Mbufo enɔ mmɔ ŋkpɔ edia. Mmɔ edɔhɔ Enye ete, nte nnyin idika ikedep uyo ke okuk ikie iba inɔ mmɔ edia? 38Edi Enye ete mmɔ, Enyene uyo ifaŋ? Eka ekese. Ndien ke ini mmɔ efiɔkde, mmɔ ete, uyo ition ye iyak iba. 39Enye ɔnɔ uyo ete kpukpru owo esuhɔre etetie ke udim ke udim ke awawa mbiet. 40Mmɔ etetie udim-udim, owo ikie ikie, ye aba ye duop aba ye duop. 41Ndien Enye emen uyo ition ye iyak iba oro, emenere enyin ese enyɔŋ, ɔdiɔŋ mmɔ, onyuŋ obuŋ uyo, ayak ɔnɔ mbet, ete enim mbio-obio ke iso: Enye onyuŋ edeme iyak iba oro ɔnɔ mmɔ kpukpru. 42Kpukpru mmɔ enyuŋ edia eyuhɔ. 43Mmɔ enyuŋ etaŋ mbubek uyo, edɔŋ ke akpan duopeba eyɔhɔ, ye iyak ŋko. 44Ndien mmɔ emi ediade uyo edi thousand owo ition.

45Ndien idaha oro Enye enyik mbet Esie ediere ke ubom, ete ebem Imɔ iso eka ke Bethsaida ke edem eken, tutu Imɔ ke Idem Imɔ idɔŋ otu owo enyɔŋɔ. 46Ekem ke Enye ama ɔkɔkpɔŋ mmɔ, Enye adaha aka ke akamba obot ndibɔŋ akam 47Ke ini osimde mbubreyo, ubom odu ke ufɔt inyaŋ, Enye onyuŋ odu ikpɔŋ ke obot. 48Ekem ke ini Enye okutde nte ɔsɔŋde mmɔ idem ndiwat, koro ofim ɔbiɔŋde mmɔ, ke ɔyɔhɔ efen inaŋ ke okoneyo, Enye asaŋa ke enyɔŋ inyaŋ etiene mmɔ: Enye okponyuŋ oyom ndisaŋa mbe. 49Edi ke ini mmɔ ekutde Enye asaŋade ke enyɔŋ inyaŋ, ese ete edi ekpo, enyuŋ esio mkpo. Koro kpukpru mmɔ ekut Enye, esit onyuŋ otimere mmɔ: 50Edi idaha oro Enye etiŋ ye mmɔ, onyuŋ ɔdɔhɔ ete, Esɔŋ esit: edi Ami: ekufehe ndik. 51Ndien Enye etiene mmɔ ediere ke ubom; ndien ofim odobo: 52idem onyuŋ akpa mmɔ eti-eti; koro mmɔ mitimke ifiɔk ibaŋa uyo, edi esit mmɔ ɔsɔsɔŋ.

53Ekem ke ini mmɔ ebede inyaŋ esim obot, mmɔ ebehe ke isɔŋ Gennesaret, enyuŋ eyiri ubom ke esuk. 54Ndien ke ini mmɔ ema ekɔwɔŋɔ ke ubom, idaha oro mbio-obio ediɔŋɔ Enye, 55enyuŋ efehe ekanare ofuri edem oro, etɔŋɔ ndibiom mbon udɔŋɔ ke mkpana ŋka ɔtɔ nte mmɔ ekopde ete Enye ke odu. 56Ndien ebiet ekededi eke Enye odukde, mme obio-iŋwaŋ, mme ikpɔ obio, mme iŋwaŋ, mmɔ enim mbon udɔŋɔ ke aŋwa-urua, enyuŋ ekpe Enye ubɔk ete mmɔ oro etuk ekpedi nnyeriye ɔfɔŋidem Esie. Ndien adaŋa ibat owo nte etukde Enye ekop nsɔŋidem.

Currently Selected:

MARK 6: ENA

Highlight

Copy