JOHN 20

Jesus Eset ke Ŋkpa

(Mt 28.1-10; Mk 16.1-8; Lk 24.1-12)

1EDI ke akpa usen urua Mary Magdalene abak edi ke udi ke ŋkim-ŋwaŋa usenubɔk, onyuŋ okut ete ekemen itiat esio ke udi. 2Ntre ke enye efehe edi ke ɔtɔ Simon Peter ye mbet eken emi Jesus amade, onyuŋ ɔdɔhɔ mmɔ ete, Ekemen Ɔbɔŋ efep ke udi, ndien nnyin ifiɔkke ɔtɔ nte enimde Enye. 3Ntem ke Peter ye mbet eken oro ewɔŋɔ eka udi. 4Mmɔ mbiba efehe itɔk ntre, edi mbet eken oro efehe ebe Peter edibem iso osim udi; 5onyuŋ ɔnuhɔ ese, okut ɔfɔŋ linen nte anade do; edi enye idukke. 6Ndien Simon Peter etiene enye ke edem edi, onyuŋ oduk ke udi; 7enye onyuŋ okut ɔfɔŋ linen nte anade do ye ɔfɔŋ emi ekadade ebɔp Enye ibuot, nte minaŋa ye ɔfɔŋ linen, edi ema efut enye enim ke ɔtɔ kiet ke idem esie. 8Ekem mbet eken ŋko, emi ekebemde iso osim udi, oduk, onyuŋ okut onyuŋ onim ke akpanikɔ. 9Koro mmɔ ifiɔkke kaŋa se ewetde ete, Enye enyene ndiset ke mkpa. 10Ntre ke mbet oro edaha efiak enyɔŋɔ ufɔk.

11Edi Mary osuk ada ekpere udi atua, eyet. Ntre nte enye atuade, enye ɔnuhɔ, ɔnyuŋɔ esit udi, 12onyuŋ okut angel iba ye afia edisine-ŋkpɔ, nte etiede, kiet ke ibuot-ibuot, kiet ke ukot-ukot, ke ɔtɔ emi okpo Jesus akanade do. 13Ndien mmɔ ete enye, Ŋwan, nsinam atuade? Enye ete mmɔ, Ekemen Ɔbɔŋ mi efep, ndien mfiɔkke ebiet eke ekenimde enye do. 14Ke ama eketiŋ ntem, enye ɔwɔŋɔre idem, onyuŋ okut Jesus adade do edi idiɔŋɔke ite edi Jesus. 15Jesus ete enye, Ŋwan, nsinam atuade? oyom anie? Mary ese ete edi ekpeme-iŋwaŋ, onyuŋ ɔbɔrɔ enye ete, Ɔbɔŋ, edieke ekemende okpo efep, sian mi ebiet eke okonimde enye, ndien ami ndibiom enye nnyɔŋ. 16Jesus ete enye, Mary. Enye ɔwɔŋɔde ada okot Enye ke usem Hebrews ete, Rabboni, oro edi, Andikpep. 17Jesus ete enye, Kutuk Mi; koro ndɔkke kaŋa ntiene Ete; edi bine nditɔ-ete Mi kɔdɔhɔ mmɔ ete, Mmɔŋ ndidɔk ntiene Ete Mi ye Ete mbufo, Abasi Mi ye Abasi mbufo. 18Mary magdalene edi edidɔhɔ mbet ete, Mmokut Ɔbɔŋ; Enye onyuŋ etiŋ mme ikɔ oro ye imɔ.

19Ke mbubreyo usen oro, akpa usen urua, kini ema ekeberi usuŋ ke ebiet emi mbet Jesus ebonode, ɔnɔ ndik mme Jew, Jesus edi edida ke ufɔt mmɔ, onyuŋ ɔdɔhɔ mmɔ ete, Emem osuk odu ye mbufo. 20Ndien ke Enye ama eketiŋ ntem, owut mmɔ ubɔk Esie ye ŋkaŋ Esie. Ntem ke mbet edat esit ke ini mmɔ ekutde Ɔbɔŋ. 21Jesus ɔtɔŋɔ ntak ɔdɔhɔ mmɔ ete, Emem osuk odu ye mbufo. Nte Ete okosiode Mi ɔdɔŋ, kpa ntre ke Ami nnyuŋ nsio mbufo ndɔŋ. 22Ndien ke Enye ama eketiŋ ntem, ɔduɔk mmɔ ibifik ke idem, onyuŋ ɔdɔhɔ mmɔ ete, 23Ebɔ Edisana Spirit: owo ekededi eke mbufo efende mme idiɔk-ŋkpɔ, emefen mmɔ mme idiɔŋ-ŋkpɔ mmɔ; owo ekededi eke mbufo emumde mme idiɔk-ŋkpɔ enim, emum mme idiɔk-ŋkpɔ mmɔ enim.

24Edi Thomas, owo kiet ke otu duopeba, emi ekotde enye Didymus, iduhe ye mmɔ ke ini Jesus edide. 25Ntre ke mbet eken esian enye ete, Nnyin imokut Ɔbɔŋ. Edi enye ɔdɔhɔ mmɔ ete, Ndinimke ke akpanikɔ ibɔhɔke ini ŋkutnde ɔkpɔ-ukwak ke ubɔk Esie, nnyuŋ nsin nnuenubɔk mi ke nde ɔkpɔ-ukwak, nnyuŋ nsin ubɔk mi ke ŋkaŋ Esie. 26Ŋko ke usen itiaita ema ekebe, mbet Jesus etɔŋɔ ntak ebono ke ufɔk, Thomas onyuŋ odu ye mmɔ. Ke ema ekeberi usuŋ, Jesus edi edida ke ufɔt mmɔ, onyuŋ ɔdɔhɔ mmɔ ete, Emem osuk odu ye mbufo. 27Ndien Enye edidɔhɔ Thomas ete, Nyan nnuenubɔk fo, se ubɔk Mi; nyuŋ nyanare ubɔk fo sin ke ŋkaŋ Mi: kunyuŋ unana mbuɔtidem, edi nim ke akpanikɔ. 28Thomas ɔbɔrɔ Enye ete, Ɔbɔŋ mi ye Abasi mi. 29Jesus ete enye, Sia ama okokut Mi, omonim ke akpanikɔ? Ɔfɔfɔn ɔnɔ mmɔ emi mikekwe, edi enimde ke akpanikɔ.

30Jesus okonyuŋ anam ediwak mme idiɔŋɔ eŋwen ke iso mbet Esie, emi miwetke isin ke ŋwed emi. 31Edi ewet mmɔ emi, man mbufo enim ke akpanikɔ ete Jesus edi Christ, Eyen Abasi; man ke erinim ke akpanikɔ, mbufo ekpenyene uwem ke enyiŋ Esie.

Currently Selected:

JOHN 20: ENA

Highlight

Copy