JOHN 19

Ebiere Ikpe Mkpa Enɔ Jesus Enyuŋ Ewot Enye ke Eto-Mkpa

(Mt 27.32-44; Mk 15.21-32; Lk 23.26-43)

1EKEM Pilate ada Jesus akamia. 2Mbon-ekɔŋ enyuŋ edɔk anyanya ŋkukim eyara Enye ke ibuot, enyuŋ esine Enye ididuot ekura. 3Mmɔ enyuŋ esaŋa ekpere Enye ete, Etia, Edidem mme Jew: mmɔ enyuŋ eyibi Enye ufia. 4Ndien Pilate ɔtɔŋɔ ntak ɔwɔrɔ ɔkɔdɔhɔ mme Jew, ete, Sese, mmada Enye ŋwɔrɔ nsɔk mbufo, man mbufo efiɔk ete, ŋkwe Enye idiɔk ke idem. 5Ntem ke Jesus ɔwɔrɔ edi, ayara anyanya ŋkukim, onyuŋ esine ididuot ekura. 6Pilate ete mmɔ, Se Enye owo oro do. Ke ini ikpɔ oku ye mme asaŋutom ekutde Enye, mmɔ efiori ete, Wot Enye ke cross, wot Enye ke cross. Pilate ete mmɔ, mbufo ke idem mbufo eda Enye ewot ke cross: koro ami ŋkwe Enye idiɔk ke idem. 7Mme Jew ebɔrɔ enye ete, Nnyin imenyene ibet, ndien nte ibet oro owukde, Enye odot ndikpa; koro Enye onimde Idem Esie ke Eyen Abasi. 8Ke ini Pilate okopde ikɔ emi, ndik ɔdɔdiɔŋ anam enye; 9ndien enye ɔtɔŋɔ ntak oduk okobup Jesus ete, Afo oto mmɔŋ? 10Edi Jesus inɔŋɔ enye ibɔrɔ. Ntre ke Pilate ete Enye, Ubɔrɔke mi ikɔ? nte ufiɔkke ete mmenyene odudu ndisana Fi nyak, mmonyuŋ nnyene odudu ndiwot Fi ke cross? 11Jesus ɔbɔrɔ enye ete, Ukpenyeneke odudu ndinam Mi ŋkpɔ, ke Abasi mikpetiehe ke enyɔŋ inɔ fi odudu: mmɔdo idiɔk-ŋkpɔ owo emi adade Mi edisin fi ke ubɔk okpon akan. 12Ke ntak emi Pilate oyom ndisana Enye nyak: edi mme Jew efiori ete, Edieke asanade owo emi ayak, udige ufan Caesar; kpukpru owo eke enimde idem ke edidem eŋwana ye Caesar. 13Ke adaŋemi Pilate okopde ikɔ emi, enye ada Jesus ɔwɔrɔ, onyuŋ ɔsuhɔre etetie ke itie-ikpe, ke ɔtɔ emi ekotde Isɔŋ-itiat, edi ekerede Gabbatha ke usem Hebrew. 14Ekedi ke usen emi etimde ŋkpɔ ebeŋe passover, ke adaŋa nte ɔyɔhɔde ufɔt uwem-eyo. Pilate onyuŋ ɔdɔhɔ mme Jew ete, Sese, Edidem mbufo do. 15Edi mmɔ efiori ete, Men Enye fep, men Enye fep, wot Enye ke cross. Pilate ete mmɔ, Nte ŋwot Edidem mbufo ke cross? Ikpɔ oku ebɔrɔ ete, Nnyin inyeneke edidem efen ibe Caesar. 16Ekem enye ayak Jesus ɔnɔ mmɔ ete eda ekewot ke cross.

17Ntem ke mmɔ eda Jesus: ndien Enye ɔwɔrɔ obiom cross Esiemɔ, aka ke ebiet emi ekerede Itie-Mkpɔkpɔrɔ, onyuŋ ekerede Golgotha the usem Hebrew. 18Ke ɔtɔ oro mmɔ ekɔŋ Jesus ke cross, ɔkɔrɔ ye owo iba eŋwen, kiet ke ubɔk kiet, kiet, ke ubɔk eken, edi Jesus ke ufɔt. 19Ndien Pilate ewet enyiŋ emi edoride Enye akadian ke cross. Ndien ewet ete, JESUS-A-NAZARETH, EDIDEM MME JEW. 20Ediwak mme Jew enyuŋ ekot enyiŋ emi edoride enye: koro ebiet emi ekɔŋde Jesus ke cross ekpere obio; ndien ewet enyiŋ emi ke Hebrew, ye Latin, ye Greek 21Ntem ke ikpɔ oku mme Jew edɔhɔ Pilate ete, Kuwet ete, Edidem mme Jew; edi wet ete, Enye ɔkɔdɔhɔ ete, 22Imɔ idi Edidem mme Jew. Pilate ɔbɔrɔ ete, Se mma ŋkewet, mmewewet.

23Ndien ke ini mbon-ekɔŋ ema ekɔkɔŋ Jesus ke cross, mmɔ emen edisine-ŋkpɔ Esie ebahare enim ke itie inaŋ, enɔ owo-ekɔŋ kiet kiet itie kiet: ye ekpri ɔfɔŋidem Esie ŋko: edi ekpri ɔfɔŋidem inyeneke ituak; etɔŋɔ ke enyɔŋ edɔk enye ntre ofuri. 24Ntem ke mmɔ eneme ye kiet eken ete, Eyak nnyin ikusiak enye emi, edi isin afia, man ifiɔk owo eke edinyenede enye: man okposu nte ewetde, ete,

mmɔ edeme edisine-ŋkpɔ Mi ke otu idem mmɔ,

Enyuŋ esin afia ebaŋa ɔfɔŋ-idem Mi.

25Ntem ke mbon-ekɔŋ enam ŋkpɔ emi. Edi eka Jesus, ye eyen-eka eka Esie, Mary ŋwan Clopas, ye Mary Magdalene ke eda ekpere cross Jesus. 26Ke ini Jesus okutde eka Esie ye mbet emi Enye amade nte edade do, Enye ɔdɔhɔ eka Esie, ete Ŋwan, sese eyen fo do. 27Ekem Enye onyuŋ ɔdɔhɔ mbet oro, ete, sese, eka fo do. Toto ke ini oro mbet oro ada Mary ɔnyɔŋ ufɔk esiemɔ.

28Ke ŋkpɔ emi ama ekebe, sia Jesus ɔfiɔkde ete kpukpru ŋkpɔ ekure, man se ewetde osu, Enye ɔdɔhɔ ete, Itɔŋ ke asat Mi. 29Ema enim otu eke vinegar ɔyɔhɔde do: ntre ke mmɔ eda ndɔbɔ emi ɔyɔhɔde ye vinegar oro, ewuk ke hyssop, emen edian ke inua Esie. 30Ndien ke adaŋemi Jesus ɔbɔde vinegar, Enye ete, Okure: ndien onuk ibuot, onyuŋ ayak ukpɔŋ Esie.

31Ekem sia usen oro edide usen mbeŋe-idem, mbak mme okpo edisuk ekɔŋɔ ke cross ke sabbath (koro sabbath oro edide akwa usen), mme Jew ebeŋe Pilate ete ebuŋ mmɔ ukot, enyuŋ ekɔŋɔre mme okpo efep. 32Ntre ke mbon-ekɔŋ edi edibuŋ ukot akpa owo, ye ukot owo eken, emi ekɔŋde ke cross ye Enye; 33edi ke ini mmɔ esimde Jesus enyuŋ ekutde ete Enye akakpa ama, mmɔ etre ndibuŋ Enye ukot. 34Edi owo kiet ke otu mbon-ekɔŋ oro ada eduat okim Enye ke ŋkaŋ, ndien idaha oro iyip ye mmɔŋ eto do ewɔrɔ. 35Ndien owo emi okokutde ŋkpɔ emi edi ntiense, ndien ikɔ-ntiense esie edi se owo ekpenimde ke akpanikɔ: enye onyuŋ ɔfiɔk ete imɔ itiŋ akpanikɔ, man mbufo ŋko enim ke akpanikɔ. 36Koro mme ŋkpɔ emi ewɔrɔ, man okposu nte ewetde, ete, Idibuŋde ndomo ɔkpɔ Esie kiet. 37Enyuŋ ewet ke ebiet efen, ete, Mmɔ eyese Enye emi ekekimde.

38Ndien ke ŋkpɔ emi ema ekebe, Joseph owo Arimathaea, emi edide mbet Jesus, edi edi mbet ke ndibe ɔnɔ ndik mme Jew, edibeŋe Pilate ete imen okpo Jesus ifep: ndien Pilate onyime. Ntre ke enye edi edimen okpo Esie efep. 39Nicodemus onyuŋ edi ŋko, emi ekedide ke eritɔŋɔ edisobo ye Jesus ke okoneyo; ndien enye asaŋa ye mbuaha myrrh ye aloes, emi udop esie ekpere pound ikie. 40Ntre ke mmɔ emen okpo Jesus, enyuŋ eda ɔfɔŋ linen ye ufuɔŋkpɔ kesit ewaŋ enye, nte ido ubuk-owo mme Jew edide. 41Iŋwaŋ mfri odu do ke ebiet oro ekowotde Enye ke cross, ndien ke iŋwaŋ oro obufa udi odu, emi akananam mibukke owo ke esit. 42Mmɔ enim Jesus do ke ntak usen mbeŋe-idem mme Jew, koro udi oro ekperede.

Currently Selected:

JOHN 19: ENA

Highlight

Copy