JOHN 21

Jesus Owut Mbet Esie Idem

1KE ŋkpɔ emi ema ekebe, Jesus ɔtɔŋɔ ntak owut Idem Esie ɔnɔ mbet Esie ke inyaŋ Tiberias; ndien Enye owut Idem Esie ke usuŋ emi. 2Simon Peter, ye Thomas emi ekotde Didymus, ye Nathanael eyen Cana obio Galilee, ye nditɔ Zebedee, ye mbet Esie iba efen, ekedu ɔtɔ kiet. 3Simon Peter ete mmɔ, Mmɔŋ ndika ɔkɔ. Mmɔ ete enye, Nnyin iyetiene fi ika. Mmɔ edaha ewɔŋɔ ekediere ke ubom; ndien okoneyo oro mmɔ imumke baba ŋkpɔ kiet. 4Edi ke ini eyo oyomde ndisiere, Jesus ke ada ke esuk: edi mbet idiɔŋɔke ite edi Jesus. 5Ntre ke Jesus obup ete, Nditɔ, nte mbufo emenyene se ediade? Mmɔ ebɔrɔ Enye ete, Inyeneke. 6Edi Enye ɔnɔ mmɔ uyo ete, Eduɔk iyire ke ŋkaŋ nnasia ubom, ndien mbufo eyekut ŋkpɔ. Ntre ke mmɔ eduɔk iyire, ndien ke emi mmɔ ikemeke ndikot iyire aba sia iyak ewawak ntem. 7Ntre ke mbet oro Jesus amade ɔdɔhɔ Peter ete, Edi Ɔbɔŋ. Edi ke ini simon Peter okopde ete edi Ɔbɔŋ, enye ɔbɔbɔ ɔfɔŋ ke idem (koro enye eketie iferi), onyuŋ ɔduɔk idem ke inyaŋ. 8Edi mbet eken edudi iyire ye iyak edi ke ekpri ubom oro (koro mmɔ iyomke usuŋ ye obot, edi edu ko adaŋa nte esit aba ye duop). 9Ntre ke ini mmɔ edɔkde obot, mmɔ ekut ikaŋ ukaŋ do, ye iyak nte odorode ke esit, ye uyo. 10Jesus ete mmɔ, Eda ndusuk iyak eke mbufo emumde idahemi edi. 11Ntem ke Simon oduk ke ubom okodudi iyire ɔdɔk obot; iyire onyuŋ ɔyɔhɔ ye ikpɔ iyak, ikie ye aba ye duopeta; ndien okposuk edi nte iyak ewakde ntem, iyire iwahake. 12Jesus ete mmɔ, Edi edidia ŋkpɔ. Mbet baba kiet idehede ibup Enye ete, afo edi anie? koro mmɔ efiɔkde ete edi Ɔbɔŋ. 13Jesus edi edimen uyo ɔnɔ mmɔ, ye iyak nde. 14Emi edi ɔyɔhɔ utim ikata eke Jesus owutde Idem Esie ɔnɔ mbet, ke Enye ama ekeset ke mkpa.

15Ntre ke mmɔ ekedia ŋkpɔ, Jesus obup Simon Peter ete, Simon, eyen John, nte ama Mi akan mmɔ emi? Peter ɔdɔhɔ Enye ete, Edi ntre, Ɔbɔŋ. Afo ɔmɔfiɔk ete mmama fi. Jesus ete enye, Bɔk nditɔ-erɔŋ Mi. 16Jesus ɔtɔŋɔ ntak obup enye utim ikaba, ete, Simon eyen John, nte ama Mi? Simon ete Enye, Edi ntre Ɔbɔŋ, Afo ɔmɔfiɔk ete mmama Fi. Jesus ete enye, Kpeme mme erɔŋ Mi. 17Jesus obup enye ɔyɔhɔ utim ikata, ete, Simon eyen John nte amama Mi? Peter ɔfuhɔ, koro Enye obupde ɔyɔhɔ ikata, ete, Nte amama Mi? Enye onyuŋ ɔdɔhɔ Jesus ete, Ɔbɔŋ, ɔmɔfiɔk kpukpru ŋkpɔ; Afo ɔmɔfiɔk ete mmama Fi. Jesus ete enye, Bɔk mme erɔŋ Mi. 18Ke akpanikɔ ke ndɔhɔ fi, ke ini edide akparawa, afo akam esibɔbɔ mbɔbɔ, asaŋa aka ɔtɔ nte amade: edi ke ini edisɔŋde, eyenyanare ubɔk fo, ndien owo eŋwen eyebɔp fi mbɔbɔ, onyuŋ ada fi aka ɔtɔ nte mudumaŋa ndika. 19Enye etiŋ ntem owut oruk mkpa eke Simon edidade ɔnɔ Abasi ubɔŋ. Ndien ke Jesus ama eketiŋ ntem, ete Peter, Tiene Mi. 20Peter ɔwɔŋɔre, okut mbet emi Jesus amade nte asaŋade etiene mmɔ, kpa mbet oro ekebeherede ana ke ikpanesit Jesus ke itie-udia okonyuŋ obupde ete, Ɔbɔŋ, anie edida Fi ɔnɔ? 21Ke ini Peter okutde enye oro, enye obup Jesus ete, Ɔbɔŋ, owo emi edinyuŋ anam nso? Jesus ete enye, 22Edieke nyomde enye osuk odu tutu ndi, nso mbubehe ke enyene do? afo kam tiene Mi. 23Ntem ke etop asuana ke otu nditɔ-ete, ete mbet oro idikpaha. Edi Jesus ikɔdɔhɔke Simon ite, mbet oro idikpaha; edi ɔkɔdɔhɔ ete, Edieke nyomde enye osuk odu tutu ndi, nso mbubehe ke enyene do?

24Emi edi mbet emi etiede ntiense abaŋa mme ŋkpɔ emi, onyuŋ ewetde mme ŋkpɔ emi, nnyin imonyuŋ ifiɔk ite ikɔ ntiense esie edi akpanikɔ.

25Ediwak ŋkpɔ eŋwen enyuŋ edu emi Jesus akanamde: ndien edieke ekpewetde mmɔ kpukpru, etie mi nte kpa idem ererimbot ikpekemeke ndikɔhɔ se ewetde.

Currently Selected:

JOHN 21: ENA

Highlight

Copy