UTOM MME APOSTLE 9

Ɔbɔŋ Jesus Omum Saul

(Acts 22.6-16; 26.12-18)

1EDI Saul ke osuk ofime ikɔ-ndikhe ye ikɔ-nsobo adian mbet Ɔbɔŋ; 2enye onyuŋ adaha etiene akwa oku okobup enye, ete ɔnɔ imɔ ŋwed ida isɔk mme synagogue emi edude ke Damascus, man imɔ ima ikut owo ekededi eke esaŋade ke Usuŋ oro, ye mmɔ edide irenowo ye edide iban, ikpada mmɔ ke ebuka idi ke Jerusalem. 3Edikem, nte enye asaŋade, enye ekpere Damacus: ndien idaha oro uŋwana oto ke enyɔŋ ayama akanare enye okuk: 4ndien enye ɔduɔ ke isɔŋ, onyuŋ okop uyo nte ɔdɔhɔde ete, Saul, Saul, nsinam afo ɔkɔbɔde Mi? 5Edi enye ete, Afo edi anie, Ɔbɔŋ? Ndien Ɔbɔŋ ete, Ndi Jesus emi afo ɔkɔbɔde. 6Edi daha ke enyɔŋ, duk ke obio, ndien eyesian fi se afo enyenede ndinam. 7Mmɔ emi esaŋade ye enye etuak eda, ikemeke ndisioro uyo, koro mmɔ ekopde uyo, edi mikwe baba owo kiet. 8Edi Saul adaha ke isɔŋ; ndien ke ini atatde enyin, enye ikwe usuŋ; ntre ke mmɔ emum enye ke ubɔk, eda eduk ke Damascus. 9Ndien enye ikwe usuŋ ke usen ita, idiaha ŋkpɔ inyuŋ iŋwɔŋke ŋkpɔ.

10Edi mbet kiet odu ke Damascus, emi ekerede Ananias; ndien Ɔbɔŋ okot enye ke nkukut, ete, Ananias. Enye ɔbɔrɔ ete, Se ami mi, Ɔbɔŋ. 11Edi Ɔbɔŋ ɔdɔhɔ enye ete, Daha, ka ke efak emi ekotde Nnen-nnen kobup ke ufɔk Judas baŋa owo emi ekerede Saul, owo Tarsus: koro sese, enye ke ɔbɔŋ akam; 12omonyuŋ okut owo emi ekerede Ananias, nte odukde edi edidori enye ubɔk, man enye okut usuŋ. 13Edi Ananias ɔbɔrɔ ete, Ɔbɔŋ, mmokop mbaŋa owo emi ke inua ediwak owo, adaŋa akwa ibak ke enye akanam nti ikɔt Fo ke Jerusalem; 14ikpɔ oku ema enɔ enye odudu ke edem emi ŋko ndisin kpukpru mmɔ emi esemede ekot enyiŋ Fo ke ebuka. 15Edi Ɔbɔŋ ete enye, Kam ka: koro enye edi anam-utom eke mmekde, nte akama enyiŋ Mi aka ke iso mme Gentile ye mbɔŋ, ye nditɔ Israel: 16koro ami nyewut enye adaŋa ediwak ŋkpɔ nte enye enyenede ndikut kabaŋa enyiŋ Mi. 17Ntre ke Ananias adaha, aka okoduk ke ufɔk oro, onyuŋ odori Saul ubɔk, ete, Eyen-ete mi Saul, Ɔbɔŋ Jesus, emi okowutde fi idem nte asaŋade ke usuŋ edi, ke ɔdɔŋ mi ndi man afo okut usuŋ onyuŋ ɔyɔhɔ ye Edisana Spirit. 18Ndien ini kiet ŋkpɔ adianare ke enyin esie ɔduɔ nte mkpaŋ, enye onyuŋ okut usuŋ; ndien enye adaha ke enyɔŋ ana baptism, 19onyuŋ adia udia okop nsɔŋidem.

Ekem enye etie ye mbet emi edude ke Damascus ke ndusuk usen. 20Ndien kpa idaha oro enye ɔkwɔrɔ Jesus ke mme synagogue ete, Enye edi Eyen Abasi. 21Edi mkpa-idem omum kpukpru mmɔ eke ekopde ikɔ esie, mmɔ enyuŋ edɔhɔ ete, Nte emi idige owo emi okosobode mmɔ eke esemede ekot enyiŋ Jesus ke Jerusalem? enye okonyuŋ edi mi, man ada mmɔ ke ebuka aka ke iso ikpɔ oku. 22Edi Saul ɔdɔdiɔŋ okop odudu akan, etiŋ ikɔ tutu ekikere oyo mme Jew emi eduŋde ke Damascus, eneŋere owut ete Jesus edi Christ.

23Edi ke adaŋemi ediwak usen ema ekebe, mme Jew eduk odu ete iwot enye: edi Saul ɔfiɔk odu mmɔ. 24Mmɔ enyuŋ etie ekpeme mme inua-otop ke uwemeyo ye ke okoneyo ndiwot enye; edi 25mbet esie eda enye ke okoneyo esin ke akpasa, esuhɔre ke ibibene.

26Ke adaŋemi enye osimde Jerusalem, enye odomo ndidian idem ye mbet Jesus: edi kpukpru mmɔ efehe enye, koro mmɔ minimke ete enye edi mbet. 27Edi Barnabas ada enye etiene mme apostle akasian mmɔ nte enye okokutde Ɔbɔŋ ke usuŋ, ye nte Ɔbɔŋ eketiŋde ikɔ ye enye, ye nte enye okonyuŋ ɔkwɔrɔde ikɔ uko-uko ke enyiŋ Jesus ke Damascus. 28Ndien enye etie ye mmɔ ke Jerusalem, ododuk ɔwɔwɔrɔ ye mmɔ, onyuŋ ɔkwɔrɔ ikɔ uko-uko ke enyiŋ Ɔbɔŋ: ndien enye etiŋ ikɔ Abasi, 29onyuŋ eneni eneni ye mme Jew emi esemde usem Greek; edi mmɔ eyom usuŋ nte ekpewotde enye. 30Edi ke adaŋemi nditɔ-ete efiɔkde ŋkpɔ emi, mmɔ eda enye esuhɔre edi ke Caesarea, enyuŋ edɔŋ enye ɔnyɔŋ ke Tarsus.

31Ntre ke ufɔk Abasi ke ofuri Judaea ye Galilee ye Samaria okut ifure, onyuŋ ɔkɔri ke uwem Abasi; mbon Ufɔk Abasi enyuŋ esaŋa ke uteŋe Jehovah ye ke ndɔŋesit Edisana Spirit, enyuŋ etɔt eti-eti.

32Edikem, nte Peter asaŋade ke kpukpru ebiet, enye onyuŋ ɔsuhɔre edi ndise ikɔt Abasi emi eduŋde ke Lydda. 33Do ke enye okut owo kiet emi ekerede Aeneas, emi akanade ke mkpana esie isua itiaita koro enye ɔdɔŋɔde akpa-ubeŋ 34Ndien Peter ɔdɔhɔ enye ete, Aeneas, Jesus Christ anam udɔŋɔ fo okure; daha ke enyɔŋ, tim mkpana fo. 35Ndien idaha oro enye adaha ke enyɔŋ. Kpukpru mmɔ emi eduŋde ke Lydda ye Sharon ekut enye, enyuŋ ekabare etiene Ɔbɔŋ.

36Edi mbet aŋwan kiet odu ke Joppa, ekere Tabitha, emi ekotde enye ete, Dorcas: ŋwan emi ɔyɔhɔ ye nti utom ye ntarubɔk eke enye anamde. 37Ekem ke mme usen oro enye ɔdɔŋɔ, akpa: ndien ke mmɔ ema ekeyet enye mmɔŋ, emen enye enim ke ubet enyɔŋ. 38Edi sia Lydda ekperede Joppa, mbet enyuŋ ekopde ete Peter mɔdo, mmɔ edɔŋ owo iba ke ɔtɔ esie, edikpe enye ubɔk ete, Kubigi ndibe nsim nnyin idem. 39Ntem ke Peter adaha asaŋa ye mmɔ aka. Ndien ke adaŋemi enye osimde mmɔ, eda enye eduk ke ubet enyɔŋ; ndien kpukpru mme ebe-akpa eda ekpere okpo etua eyet, enyuŋ ewut ɔfɔŋidem ye edisine-ŋkpɔ emi Dorcas okokimde, ke ini enye odude ye mmɔ. 40Edi Peter anam kpukpru mmɔ ewɔŋɔ, onyuŋ ɔtɔŋɔ edɔŋ, ɔbɔŋ akam; ndien akabare ese okpo, ete, Tabitha, daha ke enyɔŋ. Enye atat enyin esie; ndien ke ini enye okutde Peter, enye adaha etetie. 41Peter onyuŋ ɔnɔ enye ubɔk, emenere enye ke enyɔŋ; onyuŋ okot ikɔt Abasi ye mme ebe-akpa edi, ayak enye ɔnɔ mmɔ ye uwem. 42Ndien efiɔk ebaŋa ŋkpɔ emi ke ofuri Joppa: ediwak owo enyuŋ enim Ɔbɔŋ ke akpanikɔ. 43Edikem, Peter etie ediwak usen ke Joppa ye owo kiet emi ekerede Simon, akwat-ikpa.

Currently Selected:

UTOM MME APOSTLE 9: ENA

Highlight

Copy