UTOM MME APOSTLE 10

Cornelius Okot Peter Ete Edi Ufɔk Imɔ

1OWO kiet okodu ke Caesarea emi ekerede Cornelius; enye edi centurion udim mbon-ekɔŋ emi ekerede eke Italy. 2Ndien enye edi owo emi eteŋede Abasi onyuŋ abakde Abasi ye ofuri ufɔk esie, onyuŋ ɔnɔde mme ubuene ediwak ŋkpɔ-mfɔn, onyuŋ ɔbɔŋde akam ɔnɔ Abasi kpukpru ini. 3Ke ini ekperede hour ita ke uwemeyo, enye otim okut ke ŋkukut nte angel odukde etiene enye, onyuŋ ɔdɔhɔde enye ete, Cornelius. 4Edi ke ini enye owukde enyin ese angel, ndik anam enye, enye onyuŋ ɔdɔhɔ ete, Nso, Ɔbɔŋ? Edi angel ɔdɔhɔ enye ete, Mkpe-ubɔk fo ye ŋkpɔ-mfɔn eke ɔnɔde mme ubuene ema edɔk edi ke iso Abasi, nte ŋkpɔ eke Enye adade eti fi. 5Dɔŋ owo eka Joppa ndien ekada Simon, emi ekotde ekedian Peter, edi: 6enye adaŋ ye Simon akwat-ikpa, emi ufɔk esie odude ke mben inyaŋ. 7Ekem ke adaŋemi angel emi ɔdɔhɔde enye ntem ama adaha, Cornelius okot nditɔ ufɔk esie iba, ye owo-ekɔŋ kiet emi eteŋede Abasi, ke otu mmɔ emi enamde ŋkpɔ enɔ enye kpukpru ini; 8ndien ke enye ama okobuk kpukpru ŋkpɔ emi ɔnɔ mmɔ, enye osio mmɔ ɔdɔŋ ke Joppa.

9Ke ndaŋ-nsiere, nte mmɔ esaŋade ke usuŋ, etɔŋɔ ndikpere obio, Peter ɔdɔk aka ke ɔkɔm ufɔk ndibɔŋ akam ke ekperede ufɔt uwemeyo: 10ndien enye okop biɔŋ, onyuŋ ɔdɔŋ enye ndidia ŋkpɔ; edi nte mmɔ etemde udia, etie enye nte esiode enye ke ikpɔkidem; 11Enye onyuŋ okut nte enyɔŋ ɔkibɔrede, ye nte ŋkpɔ ɔsuhɔrede, eke ebietde akwa ɔfɔŋ, eke emumde ke utit mbinaŋ eyak enim ke isɔŋ; 12ndien kpukpru oruk unam ukot-inaŋ ye se inyɔnide ke isɔŋ ye mme inuen enyɔŋ edu ke esit. 13Uyo onyuŋ osim enye ete, Peter, daha ke enyɔŋ, wot, ta. 14Edi Peter ɔdɔhɔ ete, Baba, Ɔbɔŋ, koro akananam ntaha se misanake ye se ebetde ibet. 15Ndien uyo ɔtɔŋɔ ntak osim enye utim ikaba, ete, Kubat se Abasi anamde asana ke ibet. 16Enam ntem utim ikata: ndien ekot ŋkpɔ oro ini kiet edɔk ke enyɔŋ.

17Edi nte esit otimerede Peter abaŋa se ŋkukut oro enye okutde ɔwɔrɔde, sese, mme isuŋutom Cornelius ekeyom ufɔk Simon; enyuŋ eda ke enyin-usuŋ, 18emenere uyo ebup, mme Simon, emi ekotde ekedian Peter, adaŋ do. 19Edi nte Peter ekerede ŋkukut oro, Spirit ɔdɔhɔ enye ete, Sese, owo ita ke eyom fi. 20Daha ke enyɔŋ, suhɔre, saŋa ye mmɔ, kunyuŋ uyik: koro edi Ami ŋdɔŋ mmɔ. 21Ndien Peter ɔsuhɔre etiene mmɔ, ete mmɔ, Sese, ami ndi owo emi mbufo eyomde: nsidi ntak eke mbufo edide? 22Ndien mmɔ ete, Edisana angel eteme Cornelius centurion, emi edide eti owo onyuŋ abakde Abasi, emi onyuŋ ɔwɔrɔde eti etop ke ofuri oruk mme Jew, ete, enye ɔdɔŋ edikot fi edi ke ufɔk esie, onyuŋ okop ikɔ ke inua fo. 23Ntre ke enye ɔdɔhɔ mmɔ eduk edi, onyuŋ ɔnɔ mmɔ itie emi edaŋde do.

Ke ndaŋ-nsiere enye adaha asaŋa ye mmɔ aka, ndusuk nditɔ ete enyuŋ eto ke Joppa esaŋa ye enye. 24Ndien ke ndaŋ-nsiere enye oduk ke Caesarea. Cornelius ke etie ebet mmɔ, enye ama onyuŋ okot iman esie ye ata mme ufan esie obon ɔtɔ kiet. 25Edikem ke ini Peter odukde, Cornelius edisobo ye enye, onyuŋ ɔduɔ enye ke ukot, atuak ibuot ɔnɔ enye. 26Edi peter emenere enye ete, Daha ke enyɔŋ; ami ke idem mi ndi owo. 27Ndien nte mmɔ enemede ntem, Peter oduk ke ufɔk okut ediwak owo ebonode ɔtɔ kiet: 28enye onyuŋ ɔdɔhɔ mmɔ ete, Mbufo ke idem mbufo emefiɔk ete ibet akpan owo emi edide Jew ndidian idem ndinyuŋ nsaŋa ŋkpere owo emi otode idut efen; edi Abasi okowut mi, ete, ŋkukot baba owo kiet obukpo me edidehe: 29ntre ke ndi, mmemfaŋake, ke ini edɔŋde edikot mi ndi. Mmobup ndien nte, Nso idi ntak emi afo ɔdɔŋde edikot mi ndi? 30Ndien Cornelius ɔdɔhɔ ete, Mfin adaŋemi anam usen inaŋ nte mbɔŋde akam ke ɔyɔhɔ hour ita uwemeyo ke ufɔk mi: ndien sese, owo emi esinede edisem ɔfɔŋidem ɔbiɔŋɔre mi ke iso, ete mi, 31Cornelius, ema ekop akam fo, enyuŋ eti ŋkpɔ mfɔn eke ɔnɔde mme ubuene ke iso Abasi. 32Dɔŋ ndien eka Joppa ekokot Simon enɔ fi, emi ediande enyiŋ Peter; enye adaŋ ke ufɔk Simon akwat-ikpa ke mben inyaŋ. 33Mmɔdo idaha oro ndɔŋ ebine fi; ndien omotim anam emi ama edi. Mmɔdo ke emi kpukpru nnyin idu mi ke iso Abasi, man ikop kpukpru se Jehovah ɔdɔhɔde fi etiŋ. 34Ndien Peter atat inua esie ete,

35Ke akpanikɔ mmokut nte Abasi iteŋeke owo enyin: edi ke kpukpru idut Enye adadara owo ekededi eke abakde Enye onyuŋ anamde nti ido. 36Enye ɔkɔnɔ ikɔ Esie esɔk nditɔ Israel, ke erikwɔrɔ gospel emem emi Jesus Christ ɔkwɔrɔde, emi edide Ɔbɔŋ kpukpru owo; 37mbufo emefiɔk nte etop oro ɔtɔŋɔde ke Galilee asuana osim ke ofuri Judaea, ke baptism emi John ɔkwɔrɔde ama ekebe, ete 38Abasi okonim Jesus eyen Nazareth ke Edisana Spirit ye odudu, man enye asaŋa ke ebiet ke ebiet anam ufɔn ɔnɔ owo, onyuŋ anam kpukpru mmɔ emi Satan ɔtuhɔrede ekop nsɔŋidem; koro Abasi odude ye Enye. 39Nnyin inyuŋ idi mme ntiense kpukpru ŋkpɔ eke Enye akanamde ke isɔŋ mme Jew ye ke Jerusalem; edi mmɔ ekɔŋ Enye ke eto ewot. 40Abasi anam Enye eset ke mkpa ke ɔyɔhɔ usen ita, 41onyuŋ ɔnɔ Enye ete owut Idem, idige ke enyin kpukpru owo edi ke enyin mme ntiense emi Abasi ekebemde iso emek, oro edi nnyin, emi ikadiade inyuŋ iŋwɔŋde ŋkpɔ ye Enye ke Enye ama ekeset ke mkpa. 42Abasi onyuŋ ɔnɔ nnyin uyo ete ikwɔrɔ inɔ mbio-obio, inyuŋ idi ntiense ite Emi edi Enye emi Abasi okonimde ete edi Ebierikpe ɔnɔ mme odu-uwem ye mme akpa-mkpa. 43Kpukpru mme prophet eketiŋ ikɔ nte ntiense ebaŋa Enye, ete, owo ekededi eke ɔbuɔtde idem ye Enye eyebɔ erifen mme idiɔk-ŋkpɔ ke enyiŋ Esie.

44Ke adaŋemi Peter osuk etiŋde ntem, Edisana Spirit ɔduɔ odoro kpukpru mmɔ emi ekopde ikɔ Abasi ke idem. 45Ndien idem akpa kpukpru mbon mbobi emi enimde ke akpanikɔ, emi ekesaŋade ye Peter edi, koro eŋwaŋade Edisana Spirit enɔ mme Gentile ŋko. 46Koro mmɔ ekopde nte mmɔ oro esemde nsio-nsio usem, enyuŋ etorode Abasi. 47Ekem Peter obup ete, Nte owo ekededi ekeme ndikpan ete ekuda mmɔŋ enim mmɔ baptism, sia mmɔ ema ekɔbɔ Edisana Spirit kpa nte nnyin? 48Ndien enye ɔnɔ uyo ete enim mmɔ baptism ke enyiŋ Jesus Christ. Ekem mmɔ ebeŋe enye ete tie ye mmimɔ ndusuk usen.

Currently Selected:

UTOM MME APOSTLE 10: ENA

Highlight

Copy