UTOM MME APOSTLE 8

Saul Osobo Ikɔt Abasi

1EDI Saul onyime ewot enye. Ke usen oro akwa isin-enyin onyuŋ otibe ye ufɔk Abasi emi odude ke Jerusalem; kpukpru mmɔ enyuŋ esuana ke edem Judaea ye Samaria, ke mibɔhɔke mme, apostle. 2Edi owo emi ebakde Abasi ebuk Stephen, enyuŋ etuaŋa enye eti-eti. 3Edi Saul osobo ufɔk Abasi, asaŋa ke ufɔk ke ufɔk, oduri iren ye iban ɔwɔrɔ ekesin mmɔ ke ufɔk-ŋkpɔkɔbi.

4Mmɔdo mmɔ eke esuanade esaŋa ke ebiet ke ebiet ekwɔrɔ gospel. 5Philip onyuŋ ɔsuhɔre aka ke obio Samaria ɔkɔkwɔrɔ Christ ɔnɔ mmɔ. 6Ndien mme otu owo ekpaŋ utɔŋ ye esit kiet enɔ se Philip etiŋde, ke ini mmɔ ekopde enyuŋ ekutde mme idiɔŋɔ eke enye anamde. 7Koro ndidehe spirit efiori ke ɔkpɔsɔŋ uyo ewɔŋɔ ekpɔŋ ediwak owo emi enyenede mmɔ: ediwak mmɔ eke edɔŋɔde akpa-ubeŋ, ye mmɔ eke edide mbuŋɔ, enyuŋ ekop nsɔŋidem. 8Akwa idara onyuŋ odu ke obio oro.

9Edi owo kiet odu do, emi ekerede Simon, emi ekebemde iso ebre idiɔŋ ke obio, anam idem akpa mbon Samaria, owut idem nte akwa owo: 10ndien kpukpru mmɔ ekpaŋ utɔŋ enɔ enye, ɔtɔŋɔde ke ata ŋkpri owo tutu osim ata ikpɔ, enyuŋ edɔhɔ ete, Owo emi edi odudu Abasi emi ekerede Akwa Odudu. 11Mmɔ enyuŋ ekpaŋ utɔŋ enɔ enye, koro toto anyan ini enye ama ada idiɔŋ esie anam idem akpa mmɔ. 12Edi ke adaŋemi mmɔ enimde eti etop Philip emi enye ɔkwɔrɔde abaŋa Ubɔŋ Abasi ye enyiŋ Jesus Christ ke akpanikɔ, mmɔ ena baptisim, iren-owo ye iban ŋko. 13Smon ke idem esie ŋko onim ke akpanikɔ: ndien ke enye ama akana baptism, enye osuk odu ye philip; idem onyuŋ akpa enye ndikut mme idiɔŋɔ ye ikpɔ odudu eke Philip anamde.

14Edikem, ke ini mme apostle emi edude ke Jerusalem ekopde ete mbon Samaria ema ebɔ ikɔ Abasi, mmɔ edɔŋ Peter ye John ke ɔtɔ mmɔ: 15ndien ke ini mmɔ oro esuhɔre eka, ekpe ubɔk enɔ mmɔ, man mmɔ ebɔ Edisana Spirit: 16koro Enye midoroke mmɔ ndomo owo kiet kaŋa ke idem: edi ekonim mmɔ baptism ke enyiŋ Ɔbɔŋ Jesus: ukure edi oro. 17Ekem mme apostle edori mmɔ ubɔk, mmɔ enyuŋ ebɔ Edisana Spirit. 18Ke ini Simon okutde ete enɔ Edisana Spirit oto ke eridori ubɔk emi mme apostle edoride owo, enye ada okuk ɔsɔk mmɔ, onyuŋ ɔdɔhɔ mmɔ ete, 19Enɔ mi nde odudu emi, man owo ekededi eke ndidoride enye ubɔk ɔkpɔbɔ Edisana Spirit. 20Edi Peter ɔbɔrɔ enye ete, Okuk fo etiene fi atak, koro afo ekerede ete iyeda okuk idep enɔ Abasi. 21Afo unyeneke udeme ye nsaŋa ke ŋkpɔ emi: koro esit fo minenke ke iso Abasi. 22Kabare esit ndien, kpɔŋ idiɔk ido fo emi, nyuŋ kpe Ɔbɔŋ ubɔk, me ndusuk enye eyedahado ɔnɔ fi ke se ekerede ntem ke esit fo. 23Koro ŋkut nte afo etie ke ata ndot-ndot itie ye ke uruk ukwaŋkpɔ. 24Edi Simon ɔbɔrɔ ete, Ekpe Ɔbɔŋ ubɔk enɔ mi, ete, se mbufo etiŋde baba kiet okusim mi.

25Ntre ke mmɔ ema ekɔnɔ ikɔ-ntiense, enyuŋ ekwɔrɔ ikɔ Ɔbɔŋ, mmɔ efiak enyɔŋɔ ke Jerusalem, enyuŋ ekwɔrɔ gospel enɔ ediwak obio-iŋwaŋ nditɔ Samaria.

26Edi angel Jehovah ɔdɔhɔ Philip ete, Daha ke enyɔŋ, saŋa ke edem usuk-usuk, kosim usuŋ emi otode ke Jerusalem ɔsuhɔre aka Gaza; emi edide desert. 27Ndien enye adaha aka: ndien sese, owo Ethiopia, akamba eunuch, emi odude ke idak Candace ɔbɔŋ-aŋwan mbon Ethiopia onyuŋ akamade ofuri inyene esie, okonyuŋ edide ke Jerusalem ndituak ibuot nnɔ Abasi: 28enye ke ɔnyɔŋ esiemɔ etie ke chariot okot ŋwed prophet Isaiah. 29Edi Spirit ɔdɔhɔ Philip ete, Saŋa kpere kadiana chariot oro. 30Ntre ke Philip efehe okosim enye, okop nte enye okotde ŋwed prophet Isaiah, onyuŋ obup enye ete, Nte ɔmɔfiɔk se ikɔ oro okotde ɔwɔrɔde? 31Enye ete, Ŋkeme didie ke owo mitemeke mi? Ntre ke enye ebeŋe Philip ete ɔdɔk editie ye imɔ. 32Itie emi enye okotde ke ŋwed Abasi edi emi,

Eda enye nte eyen erɔŋ eka ndiwot;

Ndien kpa nte eyen-erɔŋ misioroke uyo ke iso andifat enye idet,

Kpa ntre enye inyuŋ itatke inua esie:

33Ke akwa usuhɔre esie ebiat ikpe esie efep:

Anie edibuk emana esie?

Koro esibede uwem esie efep ke isɔŋ.

34Eunuch obup Philip ete, Mbɔk, prophet etiŋ emi abaŋa anie? mme etiŋ abaŋa idem esie, mme etiŋ abaŋa owo efen? 35Ndien Philip atat inua esie, ɔtɔŋɔ ke ikɔ ŋwed Abasi emi, ɔkwɔrɔ Jesus ɔnɔ enye. 36Edi nte mmɔ ekade iso ke usuŋ mmɔ, mmɔ edisim mmɔŋ; 37ndien eunuch oro ete, Se mmɔŋ mi; nso ibiɔŋɔ mi ndina baptism? 38Ndien enye ɔnɔ uyo ete chariot atuak ada: mmɔ mbiba, Philip ye eunuch oro, enyuŋ esuhɔre eduk ke mmɔŋ; ndien Philip onim enye baptism. 39Edi ke adaŋemi mmɔ etode ke mmɔŋ ewɔrɔ edɔk, Spirit Jehovah ada Philip adaha, eunuch inyuŋ ikwe enye aba, koro enye ɔnyɔŋ esie ke idaresit. 40Edi ekut Philip ke Azotus: enye onyuŋ asaŋa do ebe, ɔkwɔrɔ gospel ɔnɔ kpukpru mme obio tutu enye osim Caesarea.

Currently Selected:

UTOM MME APOSTLE 8: ENA

Highlight

Copy