UTOM MME APOSTLE 3

Peter ye John Enam Owo Mbuŋɔ Emi Ekedide Ebeŋe Ebeŋe ke Enyin usuŋ temple Asaŋa

1EKEM Peter ye John edɔk eka ke temple ke ini akam, emi edide hour ita uwemeyo. 2Ndien emen owo kiet, emi edide mbuŋɔ toto ke emana esie, edinim ke usen ke usen ke enyin usuŋ temple emi ekotde Ediye, man enye ebeŋe mmɔ emi edukde ke temple ŋkpɔ. 3Ntre ke ini enye okutde Peter ye John nte eyomde ndiduk ke temple, ebeŋe mmɔ ŋkpɔ. 4Edi Peter owuk enyin ese enye, ye John, onyuŋ ɔdɔhɔ enye ete, Se nnyin. 5Ndien enye ese mmɔ, odori enyin ete eyenɔ imɔ ŋkpɔ. 6Edi Peter ɔdɔhɔ ete, Nnyeneke silver ye gold; edi se nnyenede ke nnɔ fi oro. Ke enyiŋ Jesus Christ emi otode ke Nazareth, daha, saŋa. 7Ndien Peter omum enye ke ke ubɔk nnasia, emenere enye ke enyɔŋ: ndien idaha oro enye okop odudu ke ukot esie ye ɔkpɔ itɔŋ-ukot esie. 8Enye onyuŋ obumere adaha ke enyɔŋ, adada, onyuŋ ɔtɔŋɔ ndisaŋa: onyuŋ etiene mmɔ oduk ke temple, asaŋa onyuŋ ɔfrɔ, onyuŋ otoro Abasi. 9Ndien kpukpru owo ekut enye asaŋade onyuŋ otorode Abasi: 10mmɔ enyuŋ efiɔk enye, ete edi owo oro akam etie ke Ediye Inua-otop temple ebeŋe ŋkpɔ: ndien se ikɔwɔrɔde inɔ enye enyene mmɔ ndyɔ, mkpa-idem onyuŋ omum mmɔ.

11Ekem nte owo oro omumde Peter ye John, kpukpru mbio efeŋe etiene mmɔ ke etehe emi ekotde Etehe Solomon, ke ɔkpɔsɔŋ mkpa-idem. 12Edi ke ini Peter okutde emi, enye ɔbɔrɔ mmɔ ete, Mbufo nditɔ Israel, nsinam idem akpade mbufo abaŋa owo emi? nsinyuŋ inam mbufo ewukde enyin ese nnyin, nte edide nnyin ida odudu idem nnyin mme uteŋe eke nnyin iteŋede Abasi inam enye asaŋa? 13Abasi Abraham ye eke Isaac ye eke Jacob, Abasi mme ete nnyin, amada ubɔŋ ɔnɔ Owo Esie Jesus; emi mbufo ekedade enɔ, enyuŋ ekaŋde ke iso Pilate, ke ini enye aduakde ndisana Enye nyak. 14Edi mbufo ekaŋ Enye emi asanade onyuŋ enende, enyuŋ ebeŋe ete eyak owo obom enɔ mbufo, enyuŋ ewot Ɔbɔŋ uwem; 15edi Abasi amanam Enye eset ke mkpa; emi nnyin idide mme ntiense. 16Ndien oto koro owo emi ɔbuɔtde idem ke enyiŋ Esie, enyiŋ Esie ama anam owo emi mbufo ekutde enyuŋ efiɔkde okop nsɔŋidem: ke akpanikɔ, mbuɔtidem emi otode ke enye ama ɔnɔ owo emi ɔyɔhɔ nsɔŋidem ntem ke iso mbufo kpukpru. 17Ndien nditɔ-ete, mmɔfiɔk nte mbufo ekenam emi ke unana ifiɔk, nte mme andikara mbufo enyuŋ enamde. 18Edi ke usuŋ emi, Abasi anam se Enye ekebemde iso ada inua kpukpru mme prophet etiŋ osu, ete Christ Imɔ eyekut ukut. 19Ekabare esit ndien, enyuŋ efiak edem, man esɔhi mme idiɔk-ŋkpɔ mbufo efep; man oto do ini eridemere edito ke iso Jehovah osim mbufo; 20man Enye onyuŋ ɔdɔŋ Christ emi ekenimde enɔ mbufo edi, kpa Jesus: 21emi heaven enyenede ndibɔ kaŋa ŋkama, tutu osim ini emi edinamde kpukpru ŋkpɔ etɔŋɔ ntak efɔn ema, kpa ini emi Abasi eketiŋde abaŋa enye ke inua ndisana prophet Esie, emi ekodude toto ke eritɔŋɔ ererimbot 22Ke akpanikɔ Moses ɔkɔdɔhɔ ete, Jehovah Abasi eyenam prophet eke edibietde mi adaha ada ɔnɔ mbufo ke otu nditɔ-ete mbufo; mbufo edikop Enye ke kpukpru se Enye editiŋde ɔnɔ mbufo. 23Edi ama ekem eyesibe kpukpru owo eke midikopke uyo prophet oro efep ke otu mbio-obio. 24Kpukpru mme prophet ŋko emi eketiŋde ŋkpɔ, ɔtɔŋɔde ke Samuel ye mmɔ emi etienede enye ke edem, enyuŋ etiŋ ebaŋa mme usen emi. 25Mbufo edi nditɔ mme prophet ye nditɔ ediomi oro Abasi okodukde ye mme ete mbufo, ke adaŋemi Enye ɔdɔhɔde Abraham ete, Ndien oto ke ubon fo kpukpru oruk owo ke ererimbot eyekut ufɔn. 26Sia Abasi ama akanam Owo Esie adaha ada, Enye ebem iso ɔdɔŋ Enye ete edidiɔŋ mbufo, ke erinam mbufo kpukpru ewɔŋɔre ekpɔŋ mme idiɔk-ŋkpɔ mbufo.

Currently Selected:

UTOM MME APOSTLE 3: ENA

Highlight

Copy