UTOM MME APOSTLE 4

Emen Mme Apostle Eka Iso Esop

1EDI nte mmɔ esuk etiŋde ikɔ enɔ mbio-obio, mme oku ye etubom temple ye mme Sadducee edibuat mmɔ, 2esit onyuŋ ayat mmɔ oro, koro mme apostle ekpepde mbio-obio ŋkpɔ, enyuŋ ekwɔrɔde ke Jesus eriset ke mkpa. 3Ndien emum mmɔ esin ke ufɔk-ŋkpɔkɔbi tutu osim ndaŋ-nsiere: koro edi mbubreyo ke emi. 4Edi ediwak mmɔ emi ekopde ikɔ mme apostle enim ke akpanikɔ; ibat ikɔt Abasi onyuŋ ɔkɔri ekpere ndisim thousand owo ition.

5Edikem ke ndaŋ-nsiere, mbɔŋ ye mbio-owo ye mme scribe mmɔ esop idem ɔtɔ kiet ke Jerusalem: 6Annas ɔbɔŋ oku onyuŋ odu do, ye Caiaphas, ye John, ye Alexander, ye kpukpru mmɔ eke edide iman ye ɔbɔŋ oku. 7Ndien mmɔ enam mme apostle eda ke ufɔt, enyuŋ ebup mmɔ ete, Mbufo eda odudu ewe enyuŋ eda enyiŋ anie enam ŋkpɔ emi? 8Ekem Peter ɔyɔhɔ ye Edisana Spirit ɔdɔhɔ mmɔ ete, 9Mbufo mbɔŋ obio ye mbiowo, edieke mbufo ebupde nnyin mbume mfin emi ebaŋa eti ŋkpɔ eke enamde enɔ owo mbuŋɔ emi, ete, owo emi akasaŋa didie okop nsɔŋidem; 10eyak kpukpru mbufo ye kpukpru mbon Israel efiɔk ete, ke enyiŋ Jesus Christ eyen Nazareth, emi mbufo ekewotde ke cross, emi Abasi akanamde eset ke mkpa, edi enyiŋ emi esin owo emi ada ke iso mbufo ye nsɔŋidem. 11Jesus edi itiat emi mbufo mme andibɔp ufɔk ekesinde, emi amakabare edi etubom inuk. 12Erinyaŋa inyuŋ itoho ke baba owo kiet efen: koro enyiŋ baba kiet efen inyuŋ iduhe eke enɔde ke otu owo ke idak ikpa-enyɔŋ, eke enyenede ndida nnyana nnyin.

13Ke adaŋemi mmɔ ekutde uko Peter ye John, enyuŋ efiɔkde ete mmɔ edi mbon emi mikekpepke ŋwed, enyuŋ edide ndisime ke ifiɔk ŋwed, idem akpa mmɔ; mmɔ enyuŋ ekabare efiɔk ete mmɔ oro ekodu ye Jesus. 14Sia mmɔ enyuŋ ekutde owo emi ekanamde idem ɔsɔŋ enye nte adade ye mmɔ, mmɔ ikemeke ndineni. 15Edi mmɔ enɔ uyo ete mmɔ oro ewɔŋɔ ke esa ekada ŋkaŋ kiet, enyuŋ eneme ke otu idem mmɔ ete, 16Nso ke nnyin idinam ye mmɔ emi? koro kpukpru mme andiduŋ Jerusalem ekut ete mmɔ ema enam utibe-ŋkpɔ emi ɔwɔrɔde etop; nnyin inyuŋ ikemeke ndineni. 17Edi man ibiɔŋɔ mbuk emi ndisuana ke otu mbio-obio, eyak nnyin isin mmɔ ndik, inyuŋ ikpan mmɔ, ite ekutiŋ aba ikɔ ye baba owo kiet ke enyiŋ emi. 18Ndien ekot mme apostle edi, enyuŋ ewuk mmɔ ete ekutiŋ ekunyuŋ ekpep baba ŋkpɔ kiet ke enyin Jesus. 19Edi Peter ye John ebɔrɔ mmɔ ete, Mbufo ekam ekere mme enen ke enyin Abasi ndikop uyo mbufo ŋkan eke Abasi: 20koro nnyin mikemeke nditre nditiŋ se nnyin ikokutde inyuŋ ikopde. 21Edi ke mme oku ema ekedian ikɔ-ndikhe, esana mmɔ eyak, sia mikwe ntak eke ekpɔnɔde mmɔ ufen kabaŋa mbio-obio; koro kpukpru owo etorode Abasi ebaŋa se ikotibede. 22Koro owo emi ekedade utibe-ŋkpɔ emi enam enye okop nsɔŋidem ama akadaŋ ebe isua aba.

23Ndien ke ema ekeyak mmɔ, mmɔ edi ke ɔtɔ mme nsaŋa mmɔ edisian mmɔ oro kpukpru se ikpɔ oku ye mbiowo eketiŋ ye mmɔ. 24Edi ke adaŋemi mmɔ oro ekopde, mmɔ emenere uyo ye esit kiet enɔ Abasi, ete, O Ɔbɔŋ, Afo emi edide Andinam enyɔŋ ye isɔŋ ye inyaŋ, ye kpukpru se idude mmɔ ke esit: 25Emi ɔkɔdɔhɔde ke Edisana Spirit, ke inua ete nnyin, kpa owo Fo David, ete,

Nsinam mme idut efutde,

Mbio-obio enyuŋ ekerede ikpikpu ŋkpɔ?

26ndidem ererimbot edaha eda,

Mbɔŋ enyuŋ esop idem ɔtɔ kiet,

Ndiŋwana ye Jehovah, ye Christ Esie.

27Koro ke akpanikɔ ke obio emi, Herod ye Pontius Pilate, ye mme Gentile ye mbon Israel, esop idem ɔtɔ kiet ndiŋwana ye Edisana Owo Fo Jesus, emi Afo okonimde ete edi Christ Fo, 28man mmɔ enam ŋkpɔ ekededi eke ubɔk Fo ye uduak Fo ekebemde iso onim ete ediwɔrɔ osu. 29Ndien ke emi, Jehovah, se ikɔ emi esinde mmɔ ndik eke mmɔ etiŋde; nyuŋ nɔ mme asaŋutom Fo odudu nditiŋ ikɔ Fo ke ofuri uko, 30ke adaŋemi Afo edinyanarede ubɔk ndinam udɔŋɔ okure owo; man enam mme idiɔŋɔ ye mme utibe ŋkpɔ ke enyiŋ Edisana Owo Fo Jesus. 31Ndien ke mmɔ ema ekebɔŋ akam ema, ufɔk emi mmɔ ebonode ke esit enyek; ndien kpukpru mmɔ eyɔhɔ ye Edisana Spirit, enyuŋ etiŋ ikɔ Abasi uko-uko.

32Edi otu mmɔ emi enimde ke akpanikɔ enyene esit kiet ye spirit kiet: baba owo mmɔ kiet inyuŋ idɔhɔke ite ŋkpɔ ekededi eke imɔ inyenede edi eke imɔ; edi mmɔ ebabuana kpukpru ŋkpɔ. 33Mme apostle enyuŋ enɔ ikɔ-ntiense ye akwa odudu ebaŋa eriset Ɔbɔŋ Jesus: akwa mfɔn onyuŋ odoro mmɔ kpukpru. 34Koro owo eke odude ke unana iduhe ke otu mmɔ: koro mmɔ emi enyenede iŋwaŋ mme ufɔk enyam mmɔ, enyuŋ eda ekɔm-urua edi edinim mme apostle ke ukot: 35ndien edeme enɔ owo kiet kiet nte unana esie edide.

36Ndien Joseph, emi mme apostle ekotde ekedian Barnabas (oro ɔwɔrɔ, Eyen ndɔŋesit), emi edide Levite, owo Cyprus, 37enyene iŋwaŋ, onyuŋ anyam enye, ada okuk edi edinim mme-apostle ke ukot.

Currently Selected:

UTOM MME APOSTLE 4: ENA

Highlight

Copy