UTOM MME APOSTLE 2

Abasi Ɔnɔ Edisana Spirit Ɔsɔk Ikɔt Esie

1EKEM ke ini osimde usen Pentecost, kpukpru mmɔ edu ɔtɔ kiet. 2Ndien idaha kiet uyom oto ke enyɔŋ edi, ebiet uyom ata ɔkpɔsɔŋ oyobio eke ofimede, enye onyuŋ ɔyɔhɔ ofuri ufɔk oro mmɔ etiede ke esit. 3Mmɔ enyuŋ ekut mme edeme eke esakde ikaŋ, nte edemede idem edoro mmɔ ke ibuot, edeme kiet ke owo kiet, edeme kiet ke owo kiet. 4Ndien Edisana Spirit ɔyɔhɔ kpukpru mmɔ ke idem, mmɔ enyuŋ etɔŋɔ ndisem nsio-nsio usem, nte spirit ɔnɔde mmɔ ukeme nditiŋ.

5Edi mme Jew, eke ekponode Abasi, eto ke kpukpru mme idut ke idak ikpa-enyɔŋ edi ediduŋ ke Jerusalem. 6Ke ini mmɔ ekopde uyom emi, otu owo ebono ɔtɔ kiet, idem onyuŋ akpa mmɔ, koro mmɔ kiet kiet ekopde nte mmɔ oro esemde usem mmɔ. 7Ndien enyene kpukpru mmɔ ndyɔ, mmɔ enyuŋ eyik, ete, Sese, nte kpukpru mmɔ emi etiŋde tiŋ idige nditɔ Galilee? 8Nsidi ntak ndien eke kpukpru nnyin ikopde nte mmɔ esemde usem eke ikamanade ke esit? 9Mme Parthian ye mme Mede ye mbon Elam, ye mme andiduŋ ke Mesopotamia, ye ke 10Judaea ye ke Cappadocia, ye ke Pontus ye ke Asia, ye ke Phrygia ye ke Pamphylia, ye ke Egypt ye ke edem Libya emi ekperede Cyrene, ye mbon Rome emi edaŋde ke Jerusalem, mme Jew ye mme Gentile emi enamde ŋkpɔ enɔ Abasi ke ido mme Jew, 11ye mbon Crete ye eke Arabia, nnyin imokop mmɔ etiŋ ata mkpɔsɔŋ utom Abasi ke usem emana nnyin. 12Ndien idem akpa mmɔ kpukpru, mmɔ inyuŋ ifiɔkke se ekpekerede, enyuŋ edɔhɔ kiet eken ete, Ŋkpɔ emi edi nso? 13Edi mmɔ efen esak, ete, Eyuhɔ obufa wine.

14Edi Peter adaha ke enyɔŋ ye mbet duopekiet, emenere uyo esie, ɔdɔhɔ mmɔ ete,

Mbufo mbon Judaea, ye kpukpru mbufo emi eduŋde ke Jerusalem, efiɔk emi, enyuŋ ekpaŋ utɔŋ ekop ikɔ mi. 15Koro mmɔ emi ikpaha mmin nte mbufo ekerede; sia edide hour usukkiet usenubɔk. 16Edi emi edi se prophet Joel eketiŋde, ete,

17Abasi ɔdɔhɔ ete, Ama ekem ke ukperedem ini,

Nyeŋwaŋa Spirit Mi ndori kpukpru obukidem:

Ndien nditɔ-iren mbufo ye nditɔ mbufo iban eyetiŋ prophecy,

Mkparawa mbufo eyekut ŋkukut,

Mbiowo mbufo eyenyuŋ edaba ndap:

18Ke eyo oro nyeŋwaŋa Spirit Mi

Ndori ifin iren Mi ye ifin iban Mi;

Mmɔ eyenyuŋ etiŋ prophecy.

19Ndien nyenɔ mme utibe ŋkpɔ ke ikpa-enyɔŋ ke enyɔŋ,

Ye mme idiɔŋɔ ke isɔŋ ke idak;

Iyip ye ikaŋ ye uye nsuŋikaŋ:

20Utin eyekabare edi ekim

Ɔfiɔŋ eyenyuŋ akabare edi iyip,

Ndien akwa usen Jehovah emi ɔwɔrɔde etop edidi:

21Ama ekem, eyenyaŋa kpukpru owo eke esemde ekot enyiŋ Jehovah.

22Mbufo nditɔ Israel, ekop ikɔ emi: Jesus eyen Nazareth, owo emi Abasi onyimede ke otu mbufo ke mkpɔsɔŋ utom ye mme utibe ŋkpɔ ye mme idiɔŋɔ eke Abasi adade ubɔk Esie anam ke otu mbufo, nte mbufo ke idem mbufo efiɔkde; 23ke ɔkpɔsɔŋ uduak ye mbe-iso ifiɔk Abasi ke ekeda kpa Jesus emi eyak ke ubɔk mme anana-ibet, ekɔŋ ke cross ewot. 24Edi Abasi amatat ubiak mkpa anam Enye eset: koro mkpa mikemeke ndimum Enye ŋkama. 25Koro David ɔdɔhɔ abaŋa Enye ete,

Mmokut Jehovah ke iso Mi kpukpru ini;

Koro Enye odude Mi ke ubɔk nnasia, mbak edisehere mi:

26Mmɔdo esit adatde mi, edeme mi onyuŋ adarade;

Obukidem mi eyenyuŋ etie ke idori-enyin:

27Koro Afo udukpɔŋke ukpɔŋ mi ke obio ekpo,

Udunyuŋ uyakke Edisana Owo Fo okut mbiara.

28Afo omowut mi usuŋ uwem;

Eyenam mi nnyene ɔyɔhɔ idaresit ke iso Fo.

29Nditɔ-ete, mmekeme nditiŋ ŋkpɔ uko-uko nnɔ mbufo mbaŋa akwa ete nnyin David. Enye ama akpa, ema enyuŋ ebuk enye, ndien udi esie mɔdo ye nnyin tutu osim emi. 30Mmɔdo, sia enye ekededi prophet, onyuŋ ɔfiɔkde ete Abasi ama ɔŋwɔŋɔ ɔnɔ imɔ, ete iyeda mfri idem esie idori ke ebekpo esie; 31enye ebem iso okut, onyuŋ etiŋ abaŋa eriset Christ ke mkpa, ete, ikpɔŋke ukpɔŋ Esie ke obio ekpo, obukidem Esie inyuŋ ikwe mbiara. 32Abasi akanam Jesus emi eset ke mkpa, nte nnyin kpukpru idide mme ntiense. 33Mmɔdo sia ubɔk nnasia Abasi ama emenere Enye onim ke enyɔŋ, Enye ama onyuŋ ɔbɔ Ete Edisana Spirit emi ekɔŋwɔŋɔde ndinɔ, Enye aŋwaŋa se mbufo ekutde enyuŋ ekopde. 34Koro David ikɔdɔkke ikoduk ke heaven; edi enye ɔdɔhɔ ke idem esie ete,

Jehovah ɔdɔhɔ ye Ɔbɔŋ mi, ete,

Tie Mi ke ubɔk nnasia,

35Tutu nda mme asua Fo nnim Fi ke udori-ukot.

36Mmɔdo yak ofuri ufɔk Israel etim efiɔk ete, Abasi ama anam Enye edi ɔbɔŋ ye Christ, kpa Jesus emi mbufo ekewotde ke cross.

37Kadaŋemi mmɔ ekopde ikɔ emi, esit amia mmɔ, mmɔ enyuŋ edɔhɔ Peter ye mme apostle eken ete, Nditɔ-ete, inam didie? 38Edi Peter ɔbɔrɔ mmɔ ete, Mbufo ekabare esit, enyuŋ ena bpatism, kpukpru mbufo, ke enyiŋ Jesus Christ, man efen mme idiɔk-ŋkpɔ mbufo; ndien mbufo eyebɔ Edisana Spirit nte enɔ. 39Koro uŋwɔŋɔ oro enyene mbufo ye nditɔ mbufo ye kpukpru mmɔ emi edude nsan-nsan, adaŋa owo nte Jehovah Abasi nnyin edikotde etiene Enye. 40Peter onyuŋ emen ediwak ikɔ efen etiŋ ɔnɔ mmɔ, onyuŋ akpak mmɔ ete, Enyaŋa idem mbufo esio ke ŋkwaŋa emana emi. 41Ntre ke mmɔ emi enyimede ikɔ esie ena baptism: ndien usen oro adaŋa nte thousand owo ita ediana ye mmɔ. 42Mmɔ oro enyuŋ edɔdiɔŋ esin ifik ke erikpep ye nsaŋa mme apostle, ye ke eribuŋ uyo ye ke akam.

43Edi ndik odoro kpukpru owo ke idem; mme apostle enyuŋ enam ediwak mme utibe-ŋkpɔ ye mme idiɔŋɔ. 44Ndien kpukpru mmɔ emi enimde ke akpanikɔ edu ɔtɔ kiet, enyuŋ ebuana kpukpru ŋkpɔ; 45mmɔ enyuŋ enyam inyene mmɔ ye ŋkpɔ mmɔ, edeme enɔ kpukpru owo, adaŋa nte owo ekededi ananade. 46Ndien ke usen ke usen mmɔ enyene iwuk edu ke temple ye esit kiet, enyuŋ ebuŋ uyo ke ufɔk, mmɔ edia udia ke idaresit ye esit kiet, etoro Abasi; kpukpru owo enyuŋ enen iso ye mmɔ. 47Ndien Ɔbɔŋ ada mmɔ emi ke enyanyaŋa adian ye mmɔ ke usen ke usen.

Currently Selected:

UTOM MME APOSTLE 2: ENA

Highlight

Copy