SIONE 5

I Jisas mo vakahiki na tangaloi katukwale lo kwai Betsata

1Takuni tiua hini a vileki-tabulutakiana nona gwaloana noi Isrel* lo gwatuivanua Serusalem, vae huri hi i Jisas mo vano tagaulu vaki maira. 2Takwa-hi Serusalem, a kwai toka katukwale u garagarani mana matakihala u kwareki a Matakihala na Sivsivi. Takwa-hi a ingwa na hilihili kailima a tagwatagwaki tikei. Lo leo Hibru*, a leo nona gwaloana noi Isrel, rau kwareki na tanotano hi Betsata. 3A lengeana rusa rau ngwalulu tavuti na hilihili vano hi, a matadodo, a lukuluku, maira hi a tarabehiga rau mate. Rau hugu tara na kwai hi kwara ne kilukilu, 4huri lo taroki a kaihora tina taetae nona Hugwe u tuku hivo tilolo kwai toka hi mo kilukinia. A kwai hi mo kilukilu, vunu ihe te u hivo tomuaki tilolona vae a hava lengeana tea hinea mo eno luna ne rovo tiua. #5.3-4: Lo Buku Kokona rusa hinea a tangaloi rau ulira tuai, a leo aira vano hi lo gweregwere ves 3 u tinakaki lo leo hi “Rau hugu” vaki lo gweregwere ves 4 rau tikei luga. 5A tangaloi katukwale takwa-hi u lenga a hukao ngavu kaitolu dongwaki kaikwalu. 6I Jisas mo tagaia mo ngwalulu takwa-hi u kikilai kwara u lenga u tuai ba. Hokinia mo uduhuri kinia mo viti kwara, “?Ku lengaia kwara kona ahi?”

7A tangaloi hi u lenga mo daraki mo viti kwara, “A kwai hika lo tarona mo kilukilu, a tangaloi tikei takwahini kwara ne tauau tilolona. Vae nomo toko vai kwara na hivo tilolona a tangaloi dolua va vano koroau.”

8I Jisas mo kwaha maia mo viti kwara, “Maraka, ko kwali heremu ko lakao.” #Mat 9.6; Mak 2.11; Luk 5.24 9A tangaloi hi mo ahi taliku bulu maia nga mo kwali herena mo lakao.

Lo rani hi a Rani* na Mabuana. #a Mak 2.12; Luk 5.25; b Luk 13.14; Sione 9.14 10Hikani a kaitomuaki nona gwaloana noi Isrel ramo viti lakwa na tangaloi hi mo ahi taliku, rau viti “Hika a Rani na Mabuana. He taritarisa tea kwara kona kwali na heremu. Hi ku galo lo noda Tangwata*.” #Jer 17.21

11Aia mo daraki lakwara mo viti kwara, “A tangaloi hi mo vaiau nomo ahi taliku, u viti lakweau kwara, ‘Ko kwali heremu ko lakao.’ ”

12Ramo uduhuri kinia ramo viti “?Ihe tangaloi hi mo viti lakwako kwara kona kwali heremu kona lakao?”

13Vae a tangaloi hi he kikilai tea kwara aia ihe. I Jisas u vano ba, huri a vao u rusa lo vanua takwa-hi. #Sione 9.11

14Takuni tiua, i Jisas mo hagwea lolo Vanua* Kokona noi God mo kwaha maia mo viti kwara, “!Ko rongo! Hika ku rongo karea taliku. Ko hatu vaivai hati taliku. Diko hetea, a kinau ne vaiko ne hati vakevake siletia hika.”

15A tangaloi hi mo vano tiua mo viti lakwa na kaitomuaki nona gwaloana noi Isrel kwara, “A tangaloi hi mo vakahikiau, i Jisas.” #Sione 9.11

16Hokinia a kaitomuaki nona gwaloana noi Isrel ramo tinakaki ramo vai bulakiki Jisas huri mo toko vai na kinau aira kwehi lo Rani na Mabuana. 17Hikani i Jisas mo viti lakwara kwara, “I Tamagu u boloki tigwaravu, vae i nau nana boloki vake.”

18Huri na leona hi a kaitomuaki nona gwaloana noi Isrel a domiga mo huira vakevake kwara rana kwohi mateia. Hete kehekeheki huri mo galo lo tangwata na Rani na Mabuana, vae vake huri mote kwareki i God ki Tamana vohoki. Hokinia hi mo viti kwara i rarua mai God, raru taritarisa. #a Mat 14.5; 26.4; Mak 14.1; Sione 7.1,25; 8.37,40; 11.53; b Sione 10.30,33

I Jisas a nona bakotoana eia huri aia i Natu i God

19I Jisas mo daraki lakwara mo viti kwara, “Na viti bakotoki lakwakamu, i nau a Natuki nahe vai lai te kinau sibogu, kehekeheki hi nu tagai Tamagu mo vai, i nau nomo vai vake. A havakinau hi i Tamagu i God mo vai, i nau i Natuna nu vai hokinia vake. #Sione 5.30; 8.28 20I Tamagu u lagwa maiau haburu, u vosangiau kina kinau vatahae hinea mo toko vaira. Aia neri vosangiau kina kinau lalakua siletira hika kwara nana vaira, vae ne vaikamu tulu ne tukutukui kinira. #Sione 3.35; 10.17; 15.9; 17.23-24 21Hokinia i Tamagu u rakati na mateana u bete na ahiana lakwara, vae hokinia hi i nau i Natuna nu bete na ahiana lakwara hinea nu lengaira kwara rana ahi. #a Rom 4.17; Eves 2.5; b Sione 11.25 22Vake i Tamagu he kwaheki na doridori na tangaloi tea kwara te katukwale. Vae u tau na bolokiana hi doluaki tilo kabagu, i nau i Natuna, #Sione 3.17; 5.27; 9.39; 12.47; Bol 10.42; 17.31 23huri vae rana domi mavakiau hokinia hi ramo domi mavaki i Tamagu. A tangaloi he domi mavakiau tea, i nau i Natuna, he domi mavaki i Tamagu te vake hinea mo horeau. #a Vil 2.10-11; b Luk 10.16

24“Kareaki na viti lakwakamu, ihe hi u rongo na leogu, vunu u hauhuri luna hinea mo horeau, ne ahi vaki tuai. Nanahe arekinia tea, vae u kauutu ba tina mateana vaki lo ahiana. 25Kareaki na viti lakwakamu, lo taro hika mo toko vanamai, a tangaloi hinea rau mate ba rana rongo na dilaogu, i nau i Natu i God, vae aira hinea rau rongoa rana ahi. A taro hi u maravuti ba, aia hika. #Mak 5.41; Luk 7.14; 8.54; Sione 5.28; 11.43 26Hokinia i Tamagu aia sibona a gwataki na ahiana, vae hokinia hi mo tirakinia lakweau, i nau i Natuna, nomo kwareki na gwataki na ahiana vake. #Sione 1.4 27I God u rivukiau kwara na kwaheki na doridori na tangaloi huri i nau a Natu* na Tangaloi. #Sione 5.22; 9.39; Bol 10.42; 17.31 28Tulu hatu idila kina kinau hi, huri a taroki ne vanamai aira hinea lolo tabu rana rongo na dilaogu, 29ranari maraka tina tabuga. Aira hinea rau vai kinau karea, rana maraka taliku vaki lo ahiana, aira hinea rau vai kinau hati, rana maraka taliku tilo arekiana.” #Sione 5.25; 11.43 #Dan 12.2; Bol 24.15

A hagoleo rusa huri Jisas

30Vunu i Jisas mo viti vake kwara, “I nau nahe vai lai te kinau sibogu lo nogu bakotoana. I nau nu kwaheki na doridori na tangaloi kehekeheki lo halaki i God u viti lakweau. Vae a domidomigu u bakoto, huri nahe soro haro na nogu lengalengaiana tea, vae kehekeheki a lengalengaiana nona hinea mo horeau. #a Sione 5.19; b Luk 22.42; Sione 4.34; 6.38

31“Diko nu hago leo huriau sibogu, a nogu leo hi nehe tu lai tea. #Sione 8.13-14 32Vae a tangaloi dolua u hago leo huriau, vae nu kikilai kwara a nona hagoleo hi huriau u bakoto. #a Sione 1.15,34; 3.26; 5.36,37,39; 8.18; 10.25; 15.26; 1 Sione 5.6-9; b Sione 19.35; 21.24 33I kamu tulu hora nomiu tangaloi vaki mai Sione, vae i Sione u hago leo u viti huri na kinau hinea rau kareaki lakwara. #Sione 1.19-27 34Kareaki i nau nahe domi te haburu lo tangaloi na varamana kwara rana hago leo huriau, vae i nau nu viti kwehi kwara vae i kamu tulu ne ahi. #1 Sione 5.9 35I Sione aia hoki na laeti hi u sea u vavarama, vae lo taro gwanugwanu tulu rarai kwara tulu ne lagwalagwa lo nona vavarama. 36Vae i nau a nogu hagoleo eia u lakua sileti na hagoleo noi Sione. A hagoleo hi aira a nogu boloki hinea i Tamagu mo tirakinira tilo kabagu kwara na vaira. A boloki hi nu vaira rau hago leo huriau, rau matangwasaraki kwara i Tamagu aia u horeau. #a 1 Sione 5.9; b Sione 10.25,38; 14.11 37Vunu i Tamagu aia vake u hago leo huriau, vae tulu he rongo na leona te vohoki, tulu he taga na nakona te vohoki. #Mat 3.17; Mak 1.11; Luk 3.22; Sione 5.32; 8.18; 1 Sione 5.9 38Tulu he kwiribibi na leona te lolo domimiu, huri tulu he hauhuri te lugu. Vae i Tamagu aia u horeau. #a 1 Sione 2.14; b Sione 6.29 39Tulu tuku kakahi lolo Uliuli* Kokona huri tulu domi kwara tulu ne hagwe na ahiana vaki tuai luga. Vae a Uliuli Kokona aira hi rau hago leo huriau. #Luk 24.27,44; Bol 13.27; 1 Pita 1.10-11 40Aia vae i kamu tulu he lengaia tea kwara tulu ne vanamai vaki maiau kwara vae tulu ne ahi.

41“I nau nahe taga vovohi na tangaloi tea kwara rana kalukiau. #Sione 12.43 42Vae nu kikilaikamu kwara lolo domimiu tulu he lagwa te mai God vohoki. #1 Sione 3.17 43Nu vanamai lo hina i Tamagu, vae i kamu tulu he lai tabetabekiau tea. Kwara vae diko te tangaloi dolua ne vanamai lo hinana sibona tulu ne lai tabetabekinia. 44?I kamu tulu ne hauhuri kworohokinia? Tulu domi hurikamu sibomiu kwara tulu ne toko kalukikamu muleki vae tulu he domi huri i God tea, aia hi katukwale vohoki kwara ne kalukikamu. #Sione 12.43 45Tulu hatu domi kwara i nau na viti na nomiu hatiana lakwai Tamagu. I Mosis aia hini tulu mo toko domidomi tiluna, aia ne vitikamu. #Dut 31.26-27 46Kwara vae diko tulu hauhuri lui Mosis kareaki, vae tulu ne hauhuri lugu vake, huri i nau hi i Mosis mo uli huriau lo nona uliuli. #Dut 18.15; Luk 24.27; Bol 3.22; 7.37 47I kamu tulu he hauhuri tea lo nona uliuli, vae huri hi a hala tikei vohoki kwara tulu ne hauhuri lo nogu leo.” #Luk 16.29-31

Currently Selected:

SIONE 5: HWT

Highlight

Copy