SIONE 4

I Jisas mo kwaha mana vavine Sameria

1A Varisi* rau rongo kwara i Jisas u lavi na tangaloi mo bavtaesira u rusa siletira hinea i Sione mo bavtaesira. 2Vae i Jisas sibona he bavtaes na tangaloi tea kwara te katukwale, aia a nona ngwalagelo aira rau vai a bavtaes. #Sione 3.22,26 3I Jisas mo rongo na leo hi ramo toko vitiviti huri, mo tiraki na vanua Sutia mo vano taliku vaki Galili*. 4Lo halana hi vae ne vano lalahi na vanua Sameria*. #Mat 10.5; Luk 9.52; 17.11 5Mo vanamai vaki lo gwatuivanua katukwale Sameria a hinaki Saeka, he vakahao tea tina talu hi i Sekov mo betea lakwai natuna i Sosev. #Jen 33.19; 48.22; Jos 24.32 6A kwalu na kwai mei Sekov aia takwahini. Hikani i Jisas u lakao vae u ngwahia u rongo u keokeo, mo hugu mana kwalu na kwai hi. Lo taro hi a mataniaho aulu. #Sione 4.12 7-8Vae a nona ngwalagelo rau vano ba vaki lolo vanua kwara rana voli hinaka.

Vunu a vavine Sameria u vanamai kwara ne utu kwai. I Jisas mo kwaha maia mo viti kwara, “Ko bete te kwai na inu.”

9A vavine hi mo daraki mo viti kwara, “I nigo a ngwera Sutia, i nau a vavine Sameria. ?Kworoho komo uduhuri a inuinu kiau?” U viti kwehi huri a ngwera Sutia rahe kanikani te lo laha katukwale mana ngwera Sameria. #Esra 4.3; 9.1—10.44; Luk 9.52-53

10I Jisas mo daraki mo viti kwara, “Kohe kikilai na hilehile te hi i God mo toko bete, vake kohe kikilai tea kwara i nau ihe nomo uduhuri na inuinu kinigo. Kwara vae diko ku kikilai, kona uduhuri kiau vae nana bete na kwai na ahiana lakwako.” #a Sione 4.26; b Sione 7.37-38; Rev 21.6; 22.17

11Hikani a vavine hi mo kwaha mo viti kwara, “Kohe hago te kaiutu na kwai. A kwalu na kwai hika u bua. ?Vae i nigo kona hagwe na kwai na ahiana ave? 12I tubuda i Sekov aia u bete na kwalu na kwai hika lakwakita. Aia, i raranatuna, mana bulana boboroa rau inu luna aira vunu. ?Vae i nigo ku lakua sileti i tubuda i Sekov?” #Sione 8.53

13I Jisas mo daraki mo viti kwara, “Ihe hi ne inumi na kwai hika ne madoku taliku. 14Vae ihe hi ne inumi na kwai hi i nau nari betea lakwae, nehe madoku lai te taliku vohoki, huri a kwai hini na betea lakwae ne mule ki kwai mauri lolona, hokinia neri hile na ahiana vaki tuai lakwae.” #a Sione 6.35; b Sione 7.38

15A vavine hi mo kwaha maia mo viti kwara, “Ko bete na kwai hi lakweau, vae nahe madoku te taliku diko nahe vanamai te taliku kwara na utu kwai.”

16Hikani i Jisas mo kwaha maia mo viti kwara, “Ko vano ko kware i tuamu ngwarasea kuru vanamai hike.”

17A vavine hi mo viti lakwae kwara, “I nau tuagu ngwarasea tikei.”

I Jisas mo daraki lakwae taliku mo viti “Ku viti kareaki. I tuamu ngwarasea tikei. 18Vae i nigo ku laki kina ngwera kailima ba, vae aia hika komo hugu maia, hete i tuamu ngwarasea bakotoki. Ku viti kareaki.”

19Vunu a vavine hi mo viti lakwae kwara, “Nu kikilai utuhakinigo kwara i nigo a tangaloi* duruduruki. #Mat 21.46; Sione 7.40; 9.17 20I ratubumai a ngwera Sameria rau kaluhaki God lo vuti hika, vae i kamu a ngwera Sutia tulu viti kwara Serusalem a tanotano bakotoki kwara tana kaluhaki God takwa-hi.” #a Dut 11.29; Jos 8.33; b Dut 12.5-14; Sam 122.1-5

21I Jisas mo viti lakwae kwara, “Tubui, ko hauhuri lo leogu. A taroki ne vanamai a tangaloi ranahe kaluhaki Tamada tea lo vuti hika diko lo gwatuivanua Serusalem. 22I kamu a ngwera Sameria tulu he kikilai bakotoki tea kwara tulu kaluhaki ihe. I kami keu kikilai kwara keu tuku kaluhaki ihe, huri a hala na ahiana u vanamai tikami. #Aes 2.3; Rom 9.3-4 23Vae a taro mo toko vanamai hika, aia hike ba, kwara a tangaloi na kaluhakiana bakotoki rana kaluhaki na Tamaki kina domi mavakiana, vunu vake kina huirana na Tanungwe Kokona lo hala hinea rau kikilai kwara aia i God kareaki, huri a Tamaki u soro haro na tangaloi hokinira hi kwara rana kaluhakinia. 24I God aia a Tanungwe, vae u taritarisa kwara aira hi rau kaluhakinia kina domi mavakiana rana kaluhakinia kina huirana na Tanungwe Kokona lo hala hinea rau kikilai kwara aia i God kareaki.” #a 2 Kor 3.17; b Vil 3.3

25A vavine hi mo viti lakwae Jisas kwara, “I nau nu kikilai kwara i Vurae*, aia hi u kwareki i Kraes, #4.25: Kraes. Kona tagai VURAE lo Deksenare lo buku hika takuni. vae ne vanamai. Vake lo taro hi ne vanamai aia ne viti matangwasaraki na kinau vunuhia lakwakami.” #a Sione 1.41; b Sione 14.26

26I Jisas mo daraki lakwae mo viti kwara, “I nau hika #4.26: I nau hika. Lo Leo Harikiana Karagwa lo leo nona ngwera Gris hinea rau uli na buku hi luna tomua halaradu, a leo hi i Jisas mo vitia hike, vunu vake lo ves tuaki vake lo buku hika, u taritarisa mana leo hinea i God mo vitia tuai, lolona hi mo viti a hinana lakwai Mosis lui Eksodas 3.14-16 hinea u viti kwara, “I nau i Tatoka.” I Jisas mo toko viti na leo hi mo vosangi kwara aia i God. nomo toko kwahakwaha maiko.” #Mak 14.61-62; Sione 9.37

27Lo taroki hi a ngwalagelo noi Jisas ramo mulemai taliku ramo tagaia mo toko kwahakwaha mana vavine hi. Rau idila haburu vae hete kwara te katukwale tiura u kwaha mana natu vavine hi kwara, “?Ku lenga naha?” Vake hete kwara te katukwale u uduhuri ki Jisas kwara, “?Kworoho komo toko kwaha mana natu vavine hika?”

28Vunu a vavine hi mo tau terekaki na nona laha na kwai, mo mule taliku vaki na vanua, mo viti lakwa na tangaloi maira takwa-hi kwara, 29“Tulu vanamai tulu tagai na tangaloi hike, u viti vataha na kinau hinea nomo toko vaira. Diko aia i Vurae.” #Mat 12.23; Sione 7.26 30Hikani ramo tiraki na vanua hini ramo vano vaki mai Jisas.

I Jisas u tavatavalui leo huri na hinaka

31Lo taroki aia hini a ngwalagelo noi Jisas ramo kwaha maia ramo seseaka luna ramo viti kwara, “Tisa, ko kani te kinau.”

32Aia mo daraki lakwara mo viti “A kagu hinaka eia kwara na kani i kamu tulu he kikilai tea.”

33Hokinia a nona ngwalagelo ramo uhiuhira ramo viti kwara, “?Diko te tangaloi rau bete hinaka lakwae ba?”

34I Jisas mo viti lakwara kwara, “A kagu hinaka aia hi, kwara na rongohuri na lengalengaiana nona hinea mo horeau, kwara vae na vai vunuhi na boloki hi mo betera lakweau kwara na vai. #a Sione 5.30; 6.38; b Sione 5.36; 17.4 35A nomiu leo katukwale u viti kwara ‘A vula kaivati radu vunu a taro na makuria.’ Na viti lakwakamu, tulu tagai na agoago*. A rivurivu rau sea ba, hika kwara ne makurikiana. #Mat 9.37; Luk 10.2 36A tangaloi hini u makuriki u lai kaivolina ba, vae u vileki na hinaka huri na ahiana vaki tuai. Hokinia a tangaloi hini mo rivu, mana tangaloi hini mo makuriki, ne havutirarua tabulutaki. 37A vitivitiki tuai hi u kareaki, hi mo viti kwara, ‘A tangaloi katukwale u rivu, a tangaloi dolua u makuriki.’ #Maeka 6.15 38Nu horakamu kwara tulu ne makuriki na hinaka lolo agoago hinea i kamu tulu he boloki te luna. A tangaloi dolua aira rau boloki takwa-hi, vae i kamu tulu ne rongo karea tulu ne lai hinaka huri na noga bolokiana.”

A ngwera Sameria u rusa rau hauhuri lui Jisas

39A ngwera Sameria* u rusa lengalenga lolo vanua hini ramo hauhuri lui Jisas huri na leo na vavine hinea mo viti kwara, “Aia u viti vunuhi na kinau hinea i nau nomo toko vaira.” 40Hokinia hini a ngwera Sameria ramo vanamai vaki maia ramo seseaka luna kwara ne hugu maira. I Jisas mo hugu maira a rani kairua.

41Hikani a tangaloi u rusa vake nga ramo hauhuri luna huri ramo rongo na nona leo. 42Ramo viti lakwa na vavine hi kwara, “Hika keu hauhuri, hete huri hi komo viti lakwakami, vae huri hi i kami sibomai keu rongoa. Vae keu kikilai kwara aia kareaki a Kaivakahi na tangaloi na varamana.” #1 Sione 4.14

I Jisas mo vakahiki na natu na tangaloi lakua

43I Jisas u hugu a rani kairua takwa-hi vunu mo tiraki na vanua hi mo mule vaki lo vanua Galili*, #Sione 4.40 44huri i Jisas aia u viti tomua ba kwara, “A tangaloi* duruduruki, a tangaloi rahe domi mavakinia tea lo vanuana.” #Mat 13.57; Mak 6.4; Luk 4.24 45Lolona mo maravuti lo vanua Galili, a tangaloi takwa-hi ramo vai hahavakinia, huri aira rau vano vaki Serusalem huri na Kanikani* na Tivekiana, ramo taga vatavataha na kinau hinea mo toko vaira lo taro aia hi. #Sione 2.23

46Hikani i Jisas mo mulemai taliku vaki lo gwatuivanua Kena lo vanua Galili, a gwatuivanua hi tuai mo bohiki na kwai mo mulemai kina waen eia. A tangaloi lakua nona kavman takwahini, i natuna a ngwera u lenga lo gwatuivanua Kavaneam. #Sione 2.1-11 47Mo rongo kwara i Jisas u vanamai tina vanua Sutia vaki Galili, mo vano vaki maia mo uduhuri kinia kwara ne vano vaki lo gwatuivanua Kavaneam ne vakahiki natuna, huri u garagarani kwara ne mate. #Mat 8.5-6; Luk 7.1-3 48I Jisas mo kwaha maia mo viti kwara, “Hete kwara te katukwale tikamu ne hauhuri, vae kehekeheki tulu ne tagai na kaivosangi lalakua mana idilakiana vunu tulu neri hauhuri.” #Dan 4.2,37; Mak 13.22; 1 Kor 1.22

49A tangaloi hi mo daraki lakwai Jisas mo viti kwara, “Ko huriau heheri vae i natugu ne mai mate.”

50I Jisas mo kwaha maia mo viti kwara, “Ko mule, i natumu u ahi.” A tangaloi hi mo hauhuri lo leo noi Jisas, mo mule. #Mat 8.13; Mak 7.29 51Mo mule, vae aia lo mahaoi-hala radu nga, a nona tangaloi boloki ramo hagwea, ramo kwaha maia ramo viti kwara, “I natumu u ahi.”

52Mo uduhuri kinira kwara lo hava taro hini i natuna mo rongo karea taliku. Aira ramo daraki lakwae, ramo viti kwara, “Noinoa lo mataniaho dori a mahakita mo tirakinia.” 53Vunu i tamana mo domihagwe kwara lo taroki aia hini vohoki i Jisas mo viti lakwae kwara “I natumu u ahi.” Vae aia mana nona vakabela doluaki ramo hauhuri lui Jisas. #Bol 11.14; 16.14-15,31

54Hika a kaivosangi lakua noi Jisas vakairuaki mo vai lolona mo mulemai tina vanua Sutia vaki Galili. #Sione 2.11

Currently Selected:

SIONE 4: HWT

Highlight

Copy