JENESIS 9
9
1Go Sup̃e e pasa m̃ata ki Noah go natuna naanoai maga, po noa ki da, e naga, Kuga vavakawora, po laapa, po moro pakavuro navanua. 2Go namatau‐ki‐mu‐ana go namatakilakila‐ki‐mu‐ana ega wo doko sara nalo tuavati ni navanua, go sara manu ni namalopa; go tea mamau puti waina eu kakaravi natano, go naika mamau puti ni natasi, eu pei tea vituakiana paki nam̃elearumu. 3Sara nalo varivari waina eu mauri euga wo pei navinaga animu; dakiusi nataputea malakesa a po pitua ki puti ra paki mu. 4Ma nap̃okasi waina e pilake namauriana kakana, nadana, kuga ta gani a mau. 5Go lomau nadamu, nada ni namauriana animu, aga wo datago asa; aga wo datago asa paki nam̃elearu ni sara nalo mauri: go aga wo datago namauriana ki naatam̃oli paki nam̃elearu ni naatam̃oli, paki nam̃elearu ni tai ni sara naam̃eleatam̃oli. 6Naata waina e mari nada ni naatam̃oli e doroa, naatam̃oli euga mari nada ni naata wanogoe ega moro doroa: nalakena e mari naatam̃oli e pei, nunu ni Sup̃e. 7Go nimu, kuga vavakawora, po laapa; kuga visola p̃arua navanua, po laapa asa.
8Go Sup̃e e pasa ki Noah, go natuna naanoai maga waina eu sikoti a doko, 9e naga, Go kinau, p̃a leo, kinau a lawosoki navasasokiana aginau paki mu, go paki naworaworamu waina euga wo edaku ki mu; 10Go paki sara nalo mauri waina eu sikoti mu doko, manu maga, katel maga, go sara nalo mila ni navanua waina eu sikoti mu doko; pae tea mamau puti waina eu dave m̃elu dua ki areka, pa pa paki sara nalo mila ni navanua. 11Go aga wo lawosoki navasasokiana aginau paki mu; go sara nap̃okasi euga wo da moro pei tea taeluaana ki noai maga ni natave mau; go natave ega wo da moro pakilina naga ega mari sa ki navanua mau. 12Go Sup̃e e noa, Tea waia e pei navaivaiana ni navasasokiana waina a mari a namawota kakagu go nimu go ni sara nalo mauri waina eu sikoti mu doko, sara tagona go sara tagona: 13A po lawo ki asoara aginau napopouru, go ega wo pei navaivaiana ni navasasokiana namawota kakagu go ni navanua. 14Go ega wo pakilina, ragi waina aga wo piragi napopouru sikai umai elagi ni navanua, naga asoara ega wo pei tea vunusiana napopouru, 15Go aga wo midoa ki navasasokiana aginau, waina e doko namawota kakagu go nimu go ni sara nalo mauri ni sara nap̃okasi; go noai maga euga wo da moro pei natave naga ega mari sa ki sara nap̃okasi mau. 16Go asoara ega wo doko napopouru; go aga wo leo punusi a, naga aga midoa ki navasasokiana waina e du du po du mau du namawota kaka ni Sup̃e go ni sara nalo mauri ni sara nap̃okasi waina eu doko navanua. 17Go Sup̃e e noa ki Noah, e naga, Tea waia e pei navaivaiana ni navasasokiana waina a po lawosoki a namawota kakagu go ni sara nap̃okasi waina eu doko navanua.
18Go Noah natuna naanoai maga, waina eu dave m̃elu dua ki areka, eu pei Shem, go Ham, go Yafeth: go Ham e pei tama ni Kanaan. 19Nara dolu eu pei Noah natuna naanoai maga: go nara naworaworada eu sokapule maramana mamau.
20Go Noah e atulake pei naatam̃oli kili natano, po lawo roara ni vaine sikai: 21Go e munu waine seara, po matamaloku; go e m̃alam̃ala ekopu ni tap̃aup̃au aneana. 22Go Ham, tama ni Kanaan, e punusi nam̃alam̃alaana ni tamana, po noa ki taina dua asa katama. 23Go Shem go Yafeth ero dape sugoro sikai, po doropusi a napauda, po sukasuka pano, po kulugoro nam̃alam̃alaana ni tamada; go namatada ero leo kitaku, go ero da punusi nam̃alam̃alaana ni tamada mau. 24Go Noah e darapa marua ki waine aneana, po atae tea waina natuna takariki e mari a paki nia. 25Go e naga,
Kanaan ega vei tea vasasakiana;
Ega wo magi taina maga pei tea suasua ki tea suasua maga.
26Go e naga,
Yehovah, Sup̃e ki Shem, ega vei tea vasam̃atakiana;
Go Kanaan ega vei tea suasua aneana.
27Sup̃e ega mari Yafeth ega vei tea welewelea,
Go ega toko tap̃aup̃au maga ki Shem;
Go Kanaan ega vei tea suasua aneana.
28Go Noah e mauri edaku ki natave natau p̃onotia dolu rualima takuna lima. 29Go naaleatia mamau puti ki Noah eu pei natau p̃onotia loveti rualima takuna lima: go e mate.
Currently Selected:
JENESIS 9: NTB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
