JENESIS 8
8
1Go Sup̃e e midoa ki Noah, go sara nalo mila, go katel mamau puti waina eu sikoti a doko ekopu ni areka; go Sup̃e e mari nalagi e sau pae maramana, go noai maga eu dosa; 2Go namata noai maga ni epua go namata leo maga ni nakoroatelagi eu p̃ono, go usa waina e pae nakoroatelagi umai e sina; 3Go noai maga eu do liliu m̃elu dua ki navanua pano: go ragi waina naaleatia p̃onotia sikai rualima takuna lima eu nopu, noai maga eu po kiki. 4Go atelagi kelarua, naaleatia kerualima tamate kelarua ni atelagi, areka e gona tava maga ni Ararat. 5Go noai maga eu do pano po kiki pa pa atelagi kerualima: atelagi kerualima, naaleatia vea ni atelagi, nap̃au ni tava maga eu pakilina. 6Go ragi waina naaleatia rualima pati eu nopu, Noah e p̃olagati namata leo ni areka waina e mari a: 7Go e dip̃aki lua reven sikai paki katama, go e dave pano po do liliu doa, pa pa noai maga eu dap̃a m̃elu dua ki navanua. 8Go e dip̃aki lua tokopea sikai paki katama m̃elu dua ki nia pano, naga ega vunusi noai maga eu po masalesale m̃elu dua ki narae ni natano kite? 9Ma tokopea e da pap̃ai te tokora waina nam̃elena ega lawo asa mau, go e liliu umai punusi a paki ekopu ni areka, nalakena noai maga eu doko narae ni navanua mamau: go e sai ki nam̃elearuna paki katama, po puati a, po piragi a umai punusi a paki ekopu ni areka. 10Go e ko doko naaleatia larua p̃ota sikai; go e moro dip̃aki lua tokopea paki katama m̃elu dua ki areka pano; 11Go tokopea e umai paki ekopu punusi a ragi melu; go p̃a leo, naulu ni oliva sikai waina e dae lua e, e doko nagolena: go Noah e atae naga noai maga eu po masalesale m̃elu dua ki navanua. 12Go e ko moro doko naaleatia larua p̃ota sikai; po dip̃aki lua tokopea paki katama; go e da moro liliu umai punusi a mau. 13Go e pakilina natau p̃onotia kelatesa tamate sikai, atelagi vea, naaleatia vea ni atelagi, noai maga eu dap̃a m̃elu dua ki navanua: go Noah e dape lua wogoro ni areka, po leo punusi, go p̃a leo, narae ni natano e garagara. 14Go atelagi kerua, naaleatia rualima kerua tamate kelarua ni atelagi, navanua e lologara.
15Go Sup̃e e pasa ki Noah, e naga, 16P̃a tave m̃elu dua ki areka, nimu ma am̃agoroi, go natum̃a naanoai maga, go sulim̃a maga, kuga mamau puti. 17P̃a viragi paki katama sara nalo mauri ni sara nap̃okasi, waina eu sikoti ko doko, manu maga, go katel maga, go sara nalo kakaravi waina eu kakaravi navanua; naga euga visola p̃arua navanua; naga euga vavakawora po laapa navanua. 18Go Noah e paki katama, nara ma natuna naanoai maga, go anagoroi, go sulina maga, eu mamau: 19Sara nalo tuavati, sara nalo kakaravi, go sara manu, tea mamau puti waina eu parivari navanua, pae naworada maga, eu dave m̃elu dua ki areka. 20Go Noah e magi Yehovah davagi wede ni naviriana sikai; po dape seara ni sara nalo tuavati tautau, go seara ni sara manu tautau, po pitua ki naviriana tap̃arakiana maga wede ni naviriana. 21Go Yehovah e sidogo nap̃ona wia; go Yehovah e noa nap̃op̃ona, e naga, Aga wo da moro pasasa ki natano nalakena naatam̃oli mau, nalakena namidodoaana ni nap̃op̃o ni naatam̃oli e pei tea sa pae ragi waina e pei piakiki pa pa pa; go aga wo da moro atugi sara nalo mauri mau, dakiusi waina a po mari a. 22Ragi waina navanua ega wo doko, ragi ni nalalawoana go ragi ni nalolovaeana, go namaladiana go navivitinuana, go naaleatia go nap̃ogiana euga wo da makoto mau.
Currently Selected:
JENESIS 8: NTB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Bible Society of the South Pacific