YouVersion Logo
Search Icon

APOSTOLO MAGA 9

9
1Ma Saul, waina e do maromaro ki navasadip̃akotoviana go ki namaripunueana dip̃a tea vasapiseikiana maga ki Nawota, 2e pa punusi tea viri warua liu, po datagovi a ki tusi maga paki Damaseko paki nasum̃a ni nasaisaiana maga, naga e pe vap̃ai te naata seara waina eu pei tea ni Napua, te naanoai kite te nagoroi, ega viragi ra euga vei tea soliana umai paki Yerusalem. 3Go ragi waina e do surata, e pakilina naga e umai paki m̃aladigi ki Damaseko: go namarama sikai waina e pae nakoroatelagi umai e m̃araverave maramalaga dalivirigoro e: 4go e dowo paki natano, po dogo nadaleo sikai waina e noa ki nia, e naga, Saul, Saul, ekasana ku kopalele au? 5Go e naga, Ku pei sei, Nawota? Go nae e naga, Kinau a pei Yesu waina nigo ku kopalele asa: 6ma p̃a tuleana, po paki natokoana, go ega wo pei tea noaana paki‐go tea waina e one ako one naga p̃a mari a. 7Go naatam̃oli maga waina eu surata sikoti a eu lawodu punuta du, eu dogo nadaleo wanogoe, ma eu da punusi te naata mau. 8Go Saul e duleana pae natano, go ragi waina e leleo, e da punusi te navatuna mau: go eu puati nam̃elearuna surata, po piragi a umai paki Damaseko. 9Go e kesa doko naaleatia dolu, po da ganikani po da munu mau.
10Go tea vasapiseikiana sikai e doko Damaseko, nagisana Anania; go Nawota e noa ki nia pae navunusiana sikai, e naga, Anania. Go nae e naga, P̃a leo, kinau nea, Nawota. 11Go Nawota e noa ki nia, e naga, P̃a tuleana, po surata paki napua waina e pei tea sosoana ki Leana, po pusuusu nasum̃a ki Yuda ki naatam̃oli sikai nagisana Saul, tea ni Tarso: nalakena p̃a leo, e dapasavasa; 12go e po punusi naatam̃oli sikai nagisana Anania e umai paki ekopu, po pusake nam̃elearuna maga asa, naga ega moro leo sai. 13Ma Anania e pasa dara, e naga, Nawota, a dogo pae tea laapa nalo ni naatam̃oli wanogoe, dapala waina e mari sa ki p̃arua ki tea tautau anigo maga waina eu doko Yerusalem: 14go tokora waia e peani naveinawotaana m̃elu tea viri warua maga naga ega soli tea maga mamau puti waina eu pioso paki nagisam̃a. 15Ma Nawota e noa ki nia, e naga, Pa surata pano: nalakena e maginau pei lasa matadoaana sikai, naga ega tapetape nagisagu paki narae ni tea ni nalauna p̃ota maga go ni nawota maga, go ni Israel natuna maga: 16nalakena kinau aga wo piseiki nia naleo laapa waina e one asa one naga ega sua ra nalakena nagisagu. 17Go Anania e pano, po paki ekopu ni nasum̃a wanogoe; go e pusake nam̃elearuna maga asa, po naga, Taigu Saul, Nawota, Yesu waina e pakilina ki‐go napua waina ku pae asa umai, e po dip̃aki lua au umai naga p̃a moro leo sai, go naga p̃a vei tea vakavuroana ki Naatana Tapu. 18Go tea tapala namuna maga eu m̃araverave dowo m̃elu namatana maga, go e moro leo sai; go e duleana po pei tea bapetisoana; go e ganikani po kasua.
19Go e doko sikoti tea vasapiseikiana maga waina eu doko Damaseko naaleatia seara. 20Go e m̃araverave dogorogo ki Yesu ekopu ni nasum̃a ni nasaisaiana maga, naga e pei Sup̃e Natuna. 21Go tea maga mamau puti waina eu dogo e eu saram̃akoto, po naga, Tea waia e da pei tea waina e marisa sa sa ki tea maga waina eu pioso paki nagisa waia Yerusalem kite? Go e umai paki nea nalakena tea waia, naga ega viragi lua ra euga vei tea soliana euga vaki narae ni tea viri warua maga. 22Ma Saul e do disu p̃arua ki nakasuaana, po mari nap̃op̃o ni tea ni Yudea maga waina eu doko Damaseko doko e pinovinoi, e do noa saisai ki naga nae e pei Kristo.
23Go ragi waina naaleatia laapa eu nopu, tea ni Yudea eu seke naga euga mari punue a: 24ma nasekeana adeada e pei tea ataeana paki Saul. Go eu pavaigoro namata‐pua maga aleati go p̃ogi naga euga mari punue a: 25ma tea vasapiseikiana aneana maga eu puati a p̃ogi, po doro e pakitano darave nakoro, eu doro e pakitano doko nalasai sikai.
26Go ragi waina e umai paki Yerusalem, e mari dogo naga ega vuluti tea vasapiseikiana maga: go eu mamau puti matau ki nia, eu da saralomau mau naga e pei tea vasapiseikiana sikai. 27Ma Barnaba e puati a, po piragi a umai punusi apostolo maga, po dogorogo paki da dapala waina e punusi Nawota napua, go naga e pasa ki nia, go dapala waina e piviari pasa pae nagisa ni Yesu Damaseko. 28Go e sikoti ra doko e do paki ekopu po do paki katama Yerusalem, 29e do piviari pasa pae nagisa ni Nawota: go e pasa po pululu dip̃a tea ni Yudea waina eu pasa pae Hellas; ma eu mari dogo naga euga mari punue a. 30Go ragi waina taigida maga eu atae a, eu piragi a siwo paki Kaisarea, po dip̃aki lua e paki Tarso.
31Raga wanogoe ekalesia usuraki Yudea mamau go Calilea go Samaria eu peani natam̃ateana, po pei tea tavagiana; go eu surata namatau‐ki Yehovah‐ana go navakavakaleana ki Naatana Tapu, po disu po laapa.
32Go e pakilina, ragi waina Petero e do surata usuraki sara tokora, e siwo umai punusi tea tautau maga waina eu doko Lidda doko. 33Go e pap̃ai naatam̃oli sikai tokora wanogoe nagisana Ainea, waina e one nawewele one natau latolu; nalakena e sarumate. 34Go Petero e noa ki nia, e naga, Ainea, Yesu Kristo e mari pauri ko: p̃a tuleana, po p̃elesa ki nawewelem̃a. 35Go e duleana m̃araverave. Go tea maga mamau puti waina eu doko Lidda go Saron doko eu punusi a, go eu maradoa paki Nawota.
36Go tea vasapiseikiana nagoroi sikai e doko Yoppa, nagisana Tabitha, waina e pei tea vasadoaana sosoana ki Dorka: nagoroi wanogoe e pura ki nawosiana wia maga go ki navituam̃olikiana maga waina e mari ra. 37Go e pakilina naaleatia maga wanogoe, naga e sasana, po mate: go ragi waina eu sarue sua e, eu doropusi a e one em̃ago sikai ni tagona ni elagi. 38Go nalakena Lidda e pei m̃aladigi ki Yoppa, go tea vasapiseikiana maga eu dogo naga Petero e doko asa, eu dip̃aki lua naatam̃oli dua ero pa punusi a, po pavarani a, eu naga, P̃a ta mari daliali surata umai punusi gami mau. 39Go Petero e duleana po surata sikoti ra pano. Go ragi waina e umai, eu piragi a sake paki ekopu ni em̃ago ni tagona ni elagi: go nagoroi malepu maga eu mamau puti lawodu pisari a eu dagi, po piseiki sugoro maga go sugoro kovagoro maga waina Dorka e mari ra ragi waina e sikoti ra doko. 40Ma Petero e mari ra eu paki katama puti, po ditip̃atua, po dapasavasa; go e dum̃ana doa e paki nap̃atokona, po naga, Tabitha, p̃a tuleana. Go nae e leleo; go ragi waina e punusi Petero e doko leana. 41Go e dua e nam̃elearuna, po sike a; go e soso tea tautau maga, go nagoroi malepu maga, po mari a e lawodu naraeda e mauri. 42Go tea wanogoe e pei tea ataeana usuraki Yoppa mamau: go tea laapa eu saralomau Nawota. 43Go e pakilina, naga e doko Yoppa doko naaleatia laapa sikoti tea sikai Simon tea wosiwosi nawili maga.

Currently Selected:

APOSTOLO MAGA 9: NTB

Highlight

Share

Copy

None

Want to have your highlights saved across all your devices? Sign up or sign in