APOSTOLO MAGA 8

1Go naaleatia wanogoe nakopaleleana warua sikai e pakilina dip̃a ekalesia waina eu doko Yerusalem; go eu pei tea taperaverakiana puti paki sara tokora ni Yudea go Samaria, apostolo maga eu sikida doko. 2Go naatam̃oli tapep̃ia maga eu ova ki Stefano, po mari natagisiana warua asa. 3Ma Saul e mari sa sa ki ekalesia, e do paki ekopu ni sara nasum̃a po do dosagi naanoai maga go nagoroi maga po pitua ki da paki nasum̃a ni navavaiana.

4Go tea maga waina eu pei tea taperaverakiana eu surata usuraki po do dogorogo ki navasaana wia. 5Go Filipo e siwo paki natokoana ni Samaria pano, po dogorogo ki Kristo paki da. 6Go taua maga ni naatam̃oli maga eu dogo parati ki tea maga waina Filipo e noa ra nap̃op̃oda sikai maau asa, ragi waina eu dogo, po punusi navaivaiana maga waina e mari ra. 7Nalakena naatana loa maga eu dave m̃elu dua ki tea laapa waina eu peani ra, eu pioso ki nadaleo kasua sikai: go tea sarumate laapa, go tea laapa waina eu pei pito, eu pei tea maripauriana. 8Go nalaelaeaana warua e doko natokoana wanogoe.

9Ma naatam̃oli sikai e doko, nagisana Simon, waina e mari nakikita natokoana wanogoe sala vea, po mari naka ni Samaria eu saram̃akoto, e dum̃ana noa e naga nae e pei te naata warua sikai: 10waina eu mamau puti dogo parati ki nia, pae tea kiki pa pa paki tea warua kakada, eu naga, Naatam̃oli waia e pei nakasuaana ki Sup̃e waina e pei tea sosoana ki Tea Warua. 11Go eu dogo paratiki nia, nalakena ragi varau e mari ra eu saram̃akoto ki nakikita aneana maga. 12Ma ragi waina eu saralomau narogorogoana wia waina Filipo e dogorogo ki nia nalo ni namarakiana ki Sup̃e go nagisa ni Yesu Kristo, eu pei tea bapetisoana, naanoai maga go nagoroi maga. 13Go Simon nae ma e saralomau: go ragi waina e pei tea bapetisoana sua e do sikoti Filipo pitip̃atip̃a: go ragi waina e do leopunusi navaivaiana maga go namariana kasua warua maga waina eu do pei tea mariana, e saram̃akoto.

14Go ragi waina apostolo maga waina eu doko Yerusalem eu dogo naga Samaria e dape navasaana ki Sup̃e, eu dip̃aki lua Petero go Yoane ero pa punusi ra: 15go nara, ragi waina ero siwo umai sua, ero madeada dapasavasa, naga euga veani Naatana Tapu: 16nalakena e ko da lawo tea sikai kakada mau: eu pei tea bapetisoana sikai maau paki nagisa ni Nawota Yesu. 17Ragi wanogoe ero pusake nam̃elearuda ara, go eu peani Naatana Tapu. 18Go ragi waina Simon e punusi naga Naatana Tapu e pei tea vituakiana pae navusakeana ni nam̃elearu ni apostolo maga, e sai ki m̃ane dua ra, 19po naga, Koroga tua au naveinawotaana waia, naga naata waina aga vusake nam̃elearugu maga asa, ega veani Naatana Tapu. 20Ma Petero e noa ki nia, e naga, Silver anigo ega sikoti ko paki namatepuoliana pano, nalakena ku midoaki nia naga p̃a talua navituam̃olikiana ki Sup̃e pae m̃ane. 21Ku da peani te matele kite te gole ni naleo waia mau: nalakena nap̃op̃om̃a e da leana narae ni Sup̃e mau. 22Nalakena tea wanogoe p̃a midoaki doa m̃elu dua ki nasigisigileoana anigo waia, po dapasavasa pavarani Yehovah, mase namidodoana ni nap̃op̃om̃a e pe wo manigo pei tea midoakikorokoroana. 23Nalakena a punusi naga ku doko nakokonae ni nakokonaana go napu ni namarinaleotageleana. 24Go Simon e pasa dara po naga, Nimu koroga maginau dapasavasa pavara paki Yehovah, naga tea maga waina ku po noa ra sikai kakada ega ta pakilina ki nau mau.

25Nalakena tea wanogoe nara, ragi waina ero noa sokisoki kasua sua po pasa sua navasaana ki Yehovah, ero liliu paki Yerusalem, po dogorogo ki narogorogoana wia paki natokoana kiki laapa ki naka ni Samaria.

26Ma agelo ki Yehovah sikai e pasa ki Filipo, po naga, P̃a tuleana, po surata paki sauth pano paki napua waina e pae Yerusalem siwo paki Casa: napua wanogoe e pei masop̃alo. 27Go e duleana po surata pano: go kuga leo, naatam̃oli ni Ethiopia sikai, atavau ni naveinawotaana warua sikai ki Kandake, nawota nagoroi ki naka ni Ethiopia, waina e leo paratiki naloriki tauakiana aneana maga mamau puti, waina e umai paki Yerusalem naga ega lotu; 28go e moro do liliu po dasake kariot aneana, go e do peve profeta Isaiah. 29Go Naatana e noa ki Filipo, e naga, P̃a vaki m̃aladigi, po liko kariot waia. 30Go Filipo e sava pano punusi a, po dogoe epeve profeta Isaiah, go e naga, Ku midoaki atae tea waina ku peve a kite? 31Go e naga, Te naata sikai e pe ta piseiki nau mau, a pe mari atae midoaki atae dapale sava? Go e pavarani Filipo naga ega vagi sake po dasake sikoti a. 32Go matele ni navasaana midiriana waina e peve a e pei tea waia,

E pei tea viragiluaana dakiusi shiip sikai paki namaripunueana;

Go dakiusi waina shiip natuna sikai e pusa narae ni tea waina e alati a,

Dapala nogoe nae e punuta doko:

33E pei tea tapeluaana pae nariesokiana go navasap̃otaeana.

Tagona aneana sei ega wo dogorogo ki nia?

Nalakena namauriana aneana e pei tea tapeluaana m̃elu dua ki maramana.

34Go atavau e pasa dara Filipo, po naga, A pavarani ko, profeta e noa tea waia nalo ni sei? E dum̃ana noa e, kite e noa te naata p̃ota sikai? 35Go Filipo e p̃olagati nawokana, po atulake pae navasaana midiriana wanogoe, po dogorogo ki Yesu paki nia. 36Go ragi waina eu do surata pae napua eu rumai paki noai sikai; go atavau e naga, P̃a leo, noai nea; nasava e dugoro au naga aga ta pei tea bapetisoana mau? 37Go Filipo enoakinia enaga ku mariatae pei tea bapetisoana waina kupe saralomau ki napopoma mamau.Go enaga "Kinau a saralomau naga Yesu Kristo pei naatuni supe." 38Go e dip̃a ki kariot naga ega tu dorogo: go ero dua siwo paki noai, Filipo go atavau: go e bapetiso kinia. 39Go ragi waina ero m̃elu dua ki noai sake umai, Naata ni Yehovah e pua lua Filipo; go atavau e da moro punusi a mau, nalakena e surata pae napua aneana po laelaea pano. 40Ma Filipo e pei tea vap̃aiana Asoto: go e surata duaduru po dogorogo ki narogorogoana wia paki natokoana maga mamau puti, pa pa e umai paki Kaisarea.

Currently Selected:

APOSTOLO MAGA 8: NTB

Highlight

Copy