APOSTOLO MAGA 7

1Go tea viri warua liu e naga, Tea maga wanogoe e dapala nogoe kite? 2Go e naga, Maariki maga, tai maga, go mama maga, kuga takidorogo. Sup̃e ni nasamasamaana e pakilina ki tamagida Abraham, ragi waina e doko Mesopotamia doko, ragi waina e ko da doko Haran mau, 3po noa ki nia, e naga, P̃a m̃elu dua ki navanua anigo, go ki namatarau anigo maga pano, po umai paki navanua waina aga wo pisei ki‐go asa. 4Ragi wanogoe e m̃elu dua ki navanua ki naka ni Kaldea, po umai doko Haran: go ragi waina tamana e mate, Sup̃e e piragi lua e pae tokora wanogoe umai paki navanua waia, waina nimu ku doko asa doko ragi waia: 5go e da dua e te matele veaniana asa mau, e da dua e te malo vasiana ni nam̃elena mau: go e sai naga ega wo dua e asa naga ega vei tea veaniana, go naga ega tua naworaworana asa, waina euga wo edakugoro e, go ragi wanogoe e ko dika natuna. 6Go Sup̃e e pasa dapala waia, naga naworaworana euga wo m̃enaki‐atatoko navanua p̃ota, go naga euga wo mari ra euga vei naviti maga, po mari sa ki da, natau p̃onotia pati. 7Go nalauna waina euga wo madeada pei naviti maga aga wo pasap̃otae ra, Sup̃e e noa e: go edaku ki tea maga wanogoe euga wo m̃elu dua ki nia umai, po maginau suasua tokora waia. 8Go e dua e navasasokiana ni natovadaviviana: go dapala nogoe Abraham e pesi Isaak, po dovadavivi a naaleatia kelatolu; go Isaak e pesi Yakob, go Yakob e pesi patriarke rualima sikai tamate dua. 9Go patriarke maga eu doitoi Yosef po sori a paki Ityipt pano: 10go Sup̃e e sikoti a doko, po pua lua e m̃elu dua ki nariesokiana aneana maga mamau puti, po dua e nasaup̃iaana narae ni Faraoh nawota ni Ityipt; go nae e mari a e pei tea maramara dap̃au Ityipt go nasum̃a mamau aneana. 11Go navitoloana sikai e umai usuraki Ityipt mamau go Kanaan, go nariesokiana warua: go tamagida maga eu da pap̃ai te navinaga mau. 12Ma ragi waina Yakob e dogo naga korn e doko Ityipt, e dip̃aki lua tamagida maga pea. 13Go sala kerua Yosef e dum̃ana mari a e pei tea ataeana paki taina maga, go namatarau ki Yosef eu doko lina ki Faraoh. 14Go Yosef e dip̃aki lua, po soso tamana Yakob naga ega umai punusi a, nara ma namatarau aneana maga mamau puti, naatam̃oli rualima larua tamate lima. 15Go Yakob e siwo paki Ityipt pano; go e mate, nara ma tamagida maga; 16go eu pei tea tapetapeluaana paki Shekem, po pei tea toropusiana eu one matigo waina Abraham e pakotovi a paki Hamor natuna maga ki naulu ni silver Shekem. 17Ma dakiusi waina ragi ni nasaiana, waina Sup̃e e sai paki Abraham asa, e pei m̃aladigi, dapala nogoe narei eu disu po p̃arua po laapa Ityipt, 18pa pa nawota p̃ota sikai e pakilina dap̃au Ityipt, waina e da atae Yosef mau. 19Nae e mari manumatua paki namatarau anigida maga, po mari sa ki tamagida maga, naga euga toropusi pipia adeada maga etaku naga euga ta mauri mau. 20Ragi wanogoe Moses e pakilina, po pei rae wia p̃arua liu; go e pei tea vakaleana atelagi dolu nasum̃a ki tamana: 21go ragi waina eu doropusi a etaku, Faraoh natuna nagoroi e dape a, po pakale a naga ega vei natuna aneana. 22Go Moses e pei tea viseikiana sara namanumatuaana ki naka ni Ityipt; go e mari matua ki navasaana aneana maga go ki nawosiana aneana maga. 23Ma ragi waina natau aneana eu m̃aladigi pei rualima pati, nap̃op̃ona e midoaki nia naga ega va punusi taina maga Israel natuna maga. 24Go ragi waina e punusi tea sikai kakada e pei tea maridagelekiana, e p̃alugoro e, po magi tea waina e pei tea marisakiana mari nasikoana, po atugi tea ni Ityipt: 25go e midoaki nia naga taina maga euga midoaki atae naga Sup̃e e dua ra namautipauriana pae nam̃elearuna; ma eu da midoaki atae mau. 26Go matamai ki nia e pakilina ki da ragi waina eu dum̃ada mari ra, po naga ega vua doa ra paki natam̃ateana, e naga, Maariki maga, ku pei tamataimu maga, ekasana ku dum̃amu mari dagele ki mu? 27Ma tea waina e mari dagele ki tea ni m̃aladigi ki nia, e dip̃atip̃a e, po naga, Sei e mari ko ku pei tea maraki sikai go tea vasap̃otae sikai dap̃au gami? 28Ku masauna naga p̃a mari punue au, dakiusi waina ku mari punue tea ni Ityipt nanova kite? 29Go Moses e sava pano nalakena navasaana wanogoe, po pei nam̃enakiatatoko sikai navanua ni Midian, waina e pesi natuna naanoai dua asa. 30Go ragi waina natau rualima pati eu nopu, agelo sikai e pakilina ki nia masop̃alo ni tava Sinai, doko mena ni nakapu ni nakau makalikali sikai. 31Go ragi waina Moses e punusi a, e maga navunusiana wanogoe: go ragi waina e umai paki m̃aladigi naga ega leopunusi, nadaleo ni Yehovah e umai, 32e naga, Kinau a pei Sup̃e ki tamam̃a maga, Sup̃e ki Abraham, go ki Isaak, go ki Yakob. Go Moses e duruuru po da piviari leopunusi mau. 33Go Yehovah e noa ki nia, e naga, P̃a veresi lua nam̃elevasiana maga ni nam̃elem̃a maga: nalakena tokora waina ku lawodu asa e pei natano tapu. 34A punusi lomau narogokitesaana ki narei aginau waina eu doko Ityipt doko, po dogo nagiana adeada, go a po siwo umai naga aga vua lua ra: go ragi waia p̃a umai, aga wo dip̃aki lua ko paki Ityipt pano. 35Moses wanogoe waina eu pasa goro e, po naga, Sei e mari ko ku pei tea maraki sikai go tea vasap̃otae sikai? Nae wanogoe Sup̃e e dip̃aki lua e naga ega vei tea maraki sikai go tea taulua sikai pae nam̃elearu ni agelo waina e pakilina ki nia nakau makalikali. 36Nae wanogoe e piragi lua ra, e mari tea ni namagaana maga go navaivaiana maga Ityipt, go Natasi Miala, go masop̃alo natau rualima pati. 37Nae wanogoe e pei Moses waina e noa ki Israel natuna maga, e naga, Sup̃e ega wo manimu mari profeta sikai ni taimu maga ega vakilina, dakiusi au. 38Nae wanogoe e pei tea waina e doko ekalesia masop̃alo sikoti agelo waina e pasa ki nia tava Sinai, go sikoti tamagida maga: waina e dape natip̃akiana mauri maga naga ega tua gida ara. 39Waina tamagida maga eu karai naga euga rogo parati ki nia, ma eu dip̃adoa e, go nap̃op̃oda liliu paki Ityipt pano, eu noa ki Aaron, 40eu naga, P̃a maginami mari sup̃e seara waina euga vea ki gami pano: nalakena Moses waia waina e piragi lua gami m̃elu dua ki navanua ni Ityipt umai, au da atae tea waina e pakilina ki nia mau. 41Go eu mari kau natuna anoai sikai naaleatia maga wanogoe, po puati naviriana sikai umai dua nasup̃e wanogoe asa, po laelaea nawosiana ni nam̃elearuda maga. 42Ma Sup̃e e maradoa, po pitua ki da naga euga magi taua ni nakoroatelagi suasua; dakiusi waina e pei tea midiriana tusi ni profeta maga,

Ku pitua ki tea maripunueana maga go naviriana maga paki nau

Natau rualima pati masop̃alo, nasum̃a ni Israel, kite?

43Go ku dape dakati tap̃aup̃au ki Molok,

Go m̃asoe ni nasup̃e Refan,

Nunuda maga waina ku mari ra naga kuga lotu ki da;

Go aga wo piragi lua mu paki taleva kerua ni Babelon.

44Tamagida maga eu peani tap̃aup̃au ni nanoasokisokiana masop̃alo, dakiusi waina tea waina e pasa ki Moses e pitip̃aki, naga ega mari a ega vae naatulakeana waina e punusi a. 45Waina tamagida maga ma eu peani pioli ki nia, po dapetape a umai sikoti Yoshua paki tea veaniana ni nalauna maga, waina Sup̃e e kopasi lua ra pa dua ki narae ni tamagida maga, pa pa paki naaleatia maga ki David; 46waina e pap̃ai nasaup̃iaana narae ni Sup̃e, po pavara naga ega magi Sup̃e ki Yakob pap̃ai nasum̃atokoana sikai. 47Ma Solomon e maneana davagi nasum̃a sikai. 48Ma Tea Vakilagi Mau e da doko nasum̃a maga waina eu pei tea mariana ki nam̃elearu maga mau; dakiusi waina profeta e noa e,

49Nakoroatelagi e pei malo tasake aginau,

Go maramana e pei malo vasiana ni nam̃elegu maga:

Nasum̃a waina kuga wo maginau davagi a ega wo dapale sava? Yehovah e noa e:

Kite seve tokora e pei tokora ni namaromaroana aginau?

50Nam̃elearugu e da mari tea maga mamau puti wanogoe kite?

51Tea noakasua maga go tea ta pei tea tovadaviviana nap̃op̃omu go nadaligamu maga mau, nimu ku do dugoro dip̃a Naatana Tapu sara ragi: dakiusi waina tamamu maga eu mari a nimu ma ku do mari a. 52Profeta maga sei kakada tamamu maga eu da kopalele asa mau? Go eu mari punue tea maga waina eu pea noasai nalo ni naumaiana ki Tea Leana; waina nimu ku po pitua ki nia po mari punue a ragi waia; 53nimu waina ku dape nawotaeana pae natawonakiana ki agelo maga, go ku da pavaigoro e mau.

54Go ragi waina eu dogo tea maga wanogoe, eu maeto p̃arua, go eu kati napatida paki nia. 55Ma nae, waina e pura ki Naatana Tapu, e leosoki paki nakoroatelagi, po punusi nasamasamaana ki Sup̃e, go Yesu e lawodu pisari nam̃elearu ni matua ni Sup̃e, 56go e naga, Kuga leo, a punusi nakoroatelagi maga eu pamawota, go naatam̃oli Natuna e lawodu pisari nam̃elearu ni matua ni Sup̃e. 57Ma eu pioso ki nadaleo kasua sikai, po kisi p̃onoti nadaligada maga, po sava paraki nia nap̃op̃oda sikai maau asa; 58go eu nadi ki nia paki etaku ni natokoana, po nadi a ki vatu; go tea noasokisoki maga eu doropusi sugoro adeada maga eu one pisari nam̃ele ni natureai sikai nagisana Saul. 59Go eu nadi Stefano ki vatu, e pioso paki Nawota, po naga, Nawota Yesu, p̃a tape naatagu. 60Go e ditip̃atua, po pioso ki nadaleo kasua sikai, e naga, Nawota, p̃a ta mari namarinaleosaana waia ega liko ara mau. Go ragi waina e noa sua tea wanogoe, e maturu. Go Saul e suasua naga euga mari punue a.

Currently Selected:

APOSTOLO MAGA 7: NTB

Highlight

Copy