YouVersion Logo
Search Icon

APOSTOLO MAGA 10

10
1Go naatam̃oli sikai e doko Kaisarea, nagisana Kornelio, senturio sikai ni taua ni naatam̃oli maga ni navakalo, waina e pei tea sosoana ki taua ni Italia, 2tea lotu p̃ia sikai, tea matauki Sup̃e nara ma nasum̃a mamau aneana eu mamau, waina e magi narei mari navituam̃olikiana laapa, po dapasavasa paki Sup̃e sara ragi. 3E punusi pae navunusiana marama sikai, e alagoro pei aura keloveti ni naaleatia, agelo ki Sup̃e sikai waina e umai paki ekopu punusi a, po noa ki nia, Kornelio. 4Go nae e leo soki a, go e mataku, po naga, E pe nasava, nawota? Go e noa ki nia, Natapasavasaana anigo maga go navituam̃olikiana anigo maga eu sake paki narae ni Sup̃e naga p̃a vei tea midoakiana ara. 5Go ragi waia p̃a tip̃aki lua naatam̃oli seara euga vaki Yoppa, po pitautau tea sikai Simon waina e pei tea sosoana ki Petero: 6nae e m̃enaki sikoti tea sikai Simon tea wosiwosi ki nawili maga, waina nasum̃a aneana e doko pisari natasi. 7Go ragi waina agelo waina e pasa ki nia e pano, e soso tea suasua maga ni nasum̃a aneana edua kakada, go naatam̃oli ni navakalo lotu p̃ia sikai ni tea maga waina eu do doko raki nia pitip̃atip̃a; 8go e dogorogo paki da ki naleo maga mamau puti, po dip̃aki lua ra paki Yoppa pano.
9Go matamai ki nia, ragi waina eu surata napua, po umai paki m̃aladigi ki natokoana, Petero e sake paki nap̃au ni nasum̃a naga ega tapasavasa, e alagoro pei aura kelatesa: 10go e pitolo, po masauna naga ega kanikani: ma ragi waina eu do marim̃ata ki navinaga, nasaram̃akotoana sikai e pakilina ki nia; 11go e leopunusi nakoroatelagi e pamawota, go lasa sikai e siwo, e dapala nakulukulu p̃elewelea warua sikai, waina e pei tea toroana ki namatap̃agona pati paki maramana: 12waina sara naleo visarasara eu doko asa, tea tuavati maga go tea kakaravi maga ni maramana go manu maga ni nakoroatelagi. 13Go nadaleo sikai e umai paki nia, e naga, P̃a tuleana, Petero; p̃a mari punue po ganikani. 14Ma Petero e naga, Ee, Nawota; nalakena a ko da gani te navatuna waina e pei tea m̃oli go tea loa te naaleatia mau. 15Go nadaleo sikai e moro umai paki nia sala kerua, e naga, Tea waina Sup̃e e mari a e dautau, nigo p̃a ta mari a e pei tea m̃oli mau. 16Go tea wanogoe e pei tea mariana paka tolu: go lasa wanogoe e m̃araverave pei tea tapeana sake paki nakoroatelagi pano.
17Go ragi waina Petero e midoaki putuaki p̃arua nap̃alauna, navunusiana waina e punusi a ega vei nasava? Kuga leo, naatam̃oli maga waina eu pei tea tip̃akiluana pae Kornelio, eu pusuusu ki sua nasum̃a ki Simon, go eu lawodu narae ni namata‐pua, 18po pioso po pusuusu ki Simon waina e pei tea sosoana ki Petero, e m̃enaki tokora waia kite? 19Go ragi waina Petero e do midoaki navunusiana wanogoe, Naatana e noa ki nia, e naga, P̃a leo, naatam̃oli dolu eu laaga ako. 20Ma p̃a tuleana, po siwo, po surata sikoti ra pano, po da midoaki sara mau: nalakena kinau a po dip̃aki lua ra umai. 21Go Petero e siwo punusi naatam̃oli maga wanogoe, po naga, Kuga leo, kinau a pei tea waina ku laaga asa: nasava e pei nalakena ku po umai asa? 22Go nara eu naga, Kornelio senturio sikai, naatam̃oli leana go waina e matauki Sup̃e, go waina e pei tea noasokisokiana pae nalauna mamau ki naka ni Yudea, Sup̃e e noa ki nia pae agelo tapu sikai naga ega vitautau ako paki nasum̃a aneana, go naga ega rogo navasaana maga kiam̃a. 23Nalakena tea wanogoe e soso ra paki ekopu po dua ra nam̃enakiana.
Go matamai ki nia e duleana po dave sikoti ra pano, go taigida maga ni Yoppa seara kakada eu mamau pano. 24Go matamai ki nia eu sili Kaisarea. Go Kornelio e do leogoro ra, e soso saisai ki sua namatarau aneana maga go tana ri wia maga. 25Go ragi waina Petero e paki ekopu, Kornelio e sua e, po dowo paki nam̃elena maga po lotu ki nia. 26Ma Petero e sike a, po naga, P̃a tuleana; kinau ma a pei naatam̃oli sikai. 27Go ragi waina ero dum̃ada pasa ki da, e paki ekopu, po pap̃ai tea laapa waina eu saisia doko: go e noa ki da, 28Nimu ku dum̃amu atae naga naatam̃oli ni Yudea sikai e pe ta sikoti, kite umai punusi tea ni nalauna p̃ota mau; go Sup̃e e pisei ki nau naga aga ta soso te naatam̃oli sikai ki tea m̃oli kite tea loa mau: 29nalakena tea wanogoe a suasua umai ragi waina a pei tea vitautauana. Nalakena tea wanogoe a pusuusu ki tea waina e pei nalakena ku pitautau au umai. 30Go Kornelio e naga, Nam̃ogi pati, pa pa paki aura waia, a do dapasavasa aura keloveti nasum̃a aginau; go p̃a leo, naatam̃oli sikai e lawodu naraegu waina e suni sugoro maramalaga, 31po naga, Kornelio, natapasavasaana anigo e pei tea rogoana, go navituam̃olikiana anigo maga eu pei tea midoakiana namata ni Sup̃e. 32Nalakena tea wanogoe p̃a tip̃aki lua paki Yoppa, po soso Simon, waina e pei tea sosoana ki Petero, ega umai punusi ko; nae e m̃enaki nasum̃a ki Simon tea wosiwosi ki nawili maga, pisari natasi. 33Nalakena tea wanogoe a m̃araverave dip̃aki lua punusi ko, go nigo ku mari p̃ia naga ku umai. Nalakena tea wanogoe ragi waia au mamau puti doko nea namata ni Sup̃e, naga auga rogo naleo maga mamau puti waina eu pei tea tip̃akiana paki‐go pae Yehovah. 34Go Petero e p̃olagati nawokana, po naga.
A midoaki atae lomau naga Sup̃e e da pei tea viragi narae mau: 35ma sara nalauna naata waina e matau ki nia, po mari namarinaleoleanaana, e pei tea viragiana aneana. 36Navasaana waina e dip̃aki lua e dua Israel natuna maga asa, po dogorogo ki narogorogoana wia ni natam̃ateana pae Yesu Kristo (nae e pei Nawota ki tea maga mamau puti) 37nanoaana wanogoe nimu ku dum̃amu atae a, waina e pei tea rogorogokiana usuraki Yudea mamau, e atulake pae Calilea, edaku ki nabapetisoana waina Yoane e dogorogo ki nia; 38Yesu ni Nasareth, dapala waina Sup̃e e puvurai ki nia ki Naatana Tapu go ki nakasuaana: waina e surata usuraki po do mari m̃ataki, po do mari pauri tea maga mamau puti waina eu pei tea marimatuakiana pae diabolo; nalakena Sup̃e e sikoti a doko. 39Go kinami au pei tea noa sokisoki maga ni tea maga mamau puti waina e mari ra navanua ki naka ni Yudea, go Yerusalem; go waina eu mari punue a, eu sara ki nia nakau. 40Nae wanogoe Sup̃e e sike a e duleana naaleatia ketolu, po pitua ki nia naga ega vakilina, 41e da pakilina ki narei mamau mau, ma e pakilina ki tea noa sokisoki seara waina eu pei tea vea matadoaana pae Sup̃e, kinami, waina au ganikani po munu sikoti a edaku ki e duleana m̃elu dua ki tea mate maga. 42Go e dip̃aki gami naga auga dogorogo paki narei, po noa sokisoki kasua naga nae e pei tea waina e pei tea tawonakiana pae Sup̃e naga ega vei Tea Vasap̃otae ni tea mauri go tea mate maga. 43Nae wanogoe profeta maga mamau puti eu maneana noasokisoki, naga sara naata waina eu saralomau asa euga wo dape namidoakikorokoroana ni namarinaleosaana maga pae nagisana.
44Ragi waina Petero e ko do pasa navasaana maga wanogoe, Naatana Tapu e lawo tea maga mamau puti waina eu dogo navasaana. 45Go tea ni natovadaviviana maga waina eu saralomau eu saram̃akoto, tea maga waina eu sikoti Petero umai, nalakena navituam̃olikiana ni Naatana Tapu e pei tea takiana paki tea ni nalauna p̃ota maga. 46Nalakena eu dogo ra eu pasa ki namena maga, po pasa samasamani Sup̃e. 47Ragi wanogoe Petero e pasa dara, e naga, Te naata sikai e mari atae dip̃agoro noai naga nara euga ta pei tea bapetisoana mau, waina eu po dape Naatana Tapu, dakiusi waina kinami ma au dape a kite? Go e dip̃aki da naga euga vei tea bapetisoana pae nagisa ni Yesu Kristo. 48Ragi wanogoe eu pavarani a naga ega toko naaleatia seara.

Currently Selected:

APOSTOLO MAGA 10: NTB

Highlight

Share

Copy

None

Want to have your highlights saved across all your devices? Sign up or sign in