YouVersion Logo
Search Icon

APOSTOLO MAGA 4

4
1Go ragi waina ero do pasa ki narei, tea viri maga go nawota ki tea vavai maga ni nasum̃a tapu go Sadduki maga eu rumai pa paratiki da, 2nap̃op̃oda e dogokitesa p̃arua nalakena ero do pasa pisei ki narei, po do dogorogo pae Yesu ki namoroduleanaana m̃elu dua ki tea mate. 3Go eu nadi ki nam̃elearuda ara, po doropusi ra ero doko ekopu ni nasum̃a ni navavaiana pa pa paki matamai ki nia: nalakena e po pei ragi melu sua. 4Ma tea maga waina eu dogo navasaana tea laapa kakada eu saralomau; go naveveana ni naanoai maga e alagoro pei manu lima.
5Go e pakilina matamai ki nia, naga tea maraki adeada maga go tea matua maga go tea midiri maga eu pei tea saisaikiana Yerusalem; go Annas tea viri warua liu, 6go Kaiafas, go Yoane, go Alexander, go tea maga waina eu pei namatarau ni tea viri warua liu eu mamau. 7Go eu lawo ki da m̃aleoputo kakada, po pusuusu, eu naga, Nimu ku po mari tea waia ki seve nakasuaana, kite pae seve nagisa? 8Ragi wanogoe Petero, waina e pura ki Naatana Tapu, e noa ki da, e naga, Tea maraki maga ki narei, go tea matua maga, 9kinami aro pe vei tea vuausiana masoso nalo ni nawosiana wia waina e pei tea mariana paki naatam̃oli manainai waia, dapale sava e pei tea maripauriana; 10ega vei tea ataeana paki mu maga mamau puti, go paki narei mamau ni Israel, naga pae nagisa ni Yesu Kristo ni Nasareth, waina nimu ku duri a nakau valadagoto, waina Sup̃e e sike a e duleana m̃elu dua ki tea mate maga, pae naatam̃oli wanogoe naatam̃oli waia e lawodu naraemu e po p̃ia. 11Nae e pei vatu waina e pei tea midoakip̃alokiana pae mu tea tavagi maga, waina e pei tea mariana e pei nap̃au ni naweluki. 12Go namautipauriana e da doko pae tea p̃ota sikai mau: nalakena nagisa p̃ota sikai e da doko etano ni nakoroatelagi mau, waina e pei tea vituakiana m̃aleoputo ni naatam̃oli maga, waina e one gida one naga tuga vei tea mautipauriana pae asa.
13Go ragi waina eu leo punusi naviviariana ki Petero go ki Yoane, po midoaki atae naga ero da pei tea viseikiana mau, ma naga ero pei naatam̃oli m̃oli, eu maga; go eu leo atae ra naga ero sikoti Yesu. 14Go ragi waina eu punusi naatam̃oli waina e pei tea maripauriana e lawodu sikoti ra, eu da peani tea waina euga vasadip̃a e asa mau. 15Ma ragi waina eu dip̃aki sua ra naga eroga tave m̃elu dua ki nasaisaiana pano eu dum̃ada pusuusu paki da, 16po naga, Tuga mari nasava paki naatam̃oli maga waia? Nalakena naga navaivaiana ataeana sikai e pei tea mariana pae ara lomau, e dokolina ki tea maga mamau puti waina eu doko Yerusalem doko, go tu mari sa pasa goro e. 17Ma naga ega ta sokari sokapule m̃aleoputo ni narei mau, tuga vasa dip̃agoro ra naga eroga ta moro pasa ki te naata pae nagisa waia mau. 18Go eu soso ra, po pasa parati ki da naga eroga ta pasa mau go naga eroga ta pasa piseiki pae nagisa ni Yesu mau. 19Ma Petero go Yoane ero pasa dara po noa ki da, ero naga, E pe vei tea leana namata ni Sup̃e naga aroga rogo paratiki p̃arua ki mu po dogo paratiki kiki ki Sup̃e kuga midoaki p̃otae a: 20nalakena kinami aro mari sa punuta tea maga waina aro punusi ra po dogo ra. 21Go nara, ragi waina eu sokari pasa dip̃agoro sua ra, eu suasua ki da naga eroga vano, eu da pap̃ai tea tapala waina euga varati ra mau, nalakena narei: nalakena tea maga mamau puti eu pasa samasamani Sup̃e nalakena tea waina e pei tea mariana. 22Nalakena naatam̃oli waina navaivaiana ni namaripauriana wanogoe e pei tea mariana asa, e pei tea ni natau maga liu rualima pati.
23Go ragi waina ero pei tea suasuakiana naga eroga vano, ero umai punusi tea adeada maga, po dogorogo paki da ki tea maga waina tea viri warua maga go tea matua maga eu noa ki da ara. 24Go nara, ragi waina eu dogo e, eu sike nadaleoda paki Sup̃e, nap̃op̃oda sikai maau asa, po naga, Talakeagami, nigo ku pei tea waina ku mari nakoroatelagi go maramana go natasi, go tea maga mamau puti waina eu doko ara, 25waina ku noa pae Naatana Tapu, nawoka ni tamagami David tea suasua anigo, ku naga,
Ekasana nalauna maga eu midi,
Go narei maga eu midoaki tea p̃alo maga?
26Nawota maga ni maramana eu dum̃ada lawo ki da,
Go tea maraki maga eu pei tea saisaikiana,
Dip̃a Yehovah, go dip̃a Tea Vuvuraikiana aneana:
Nalakena Herod go Pontio Pilato, 27nara ma nalauna maga go narei maga ni Israel, eu pei tea saisaikiana lomau natokoana waia dip̃a Tea Suasua tapu anigo Yesu, waina ku puvurai ki nia, 28naga euga mari tea maga waina nam̃elearum̃a go namidoakip̃otaeana anigo ero pea dawona ki da naga euga vakilina. 29Go ragi waia, Yehovah, p̃a leo punusi navasadip̃akotoviana adeada maga, go p̃a tua tea suasua anigo maga naga euga vasa piviari p̃arua ki navasaana anigo, 30ragi waina p̃a wo sai ki nam̃elearum̃a naga p̃a mari pauri; go naga navaivaiana maga go tea ni namagaana maga euga vei tea mariana pae nagisa ni Tea Suasua tapu anigo Yesu. 31Go ragi waina eu dapasavasa sua, tokora waina eu saisai asa e pei tea parivariakiana; go eu pei tea vakavuroana puti ki Naatana Tapu, go eu pasa piviari ki navasaana ki Sup̃e.
32Go taua ni tea maga waina eu saralomau nap̃op̃oda go naatada ero pei tea sikai maau: go sikai kakada e da noa naga te navatuna sikai ni tea maga waina e peani ra e pei tea aneana mau: ma eu mari sara naleo eu p̃olosi ra. 33Go apostolo maga eu pitua ki nanoasokisokiana adeada ni namoroduleanaana ki Nawota Yesu ki nakasuaana warua: go nasaup̃iaana warua e doko puti ara. 34Nalakena te naata sikai waina e pei tea tika e da doko m̃aleoputo kakada mau: nalakena tea maga waina eu peani natano seara kite nasum̃a seara eu sori ra, po dape naulu maga ni tea maga waina eu pei tea soriana umai, po doropusi ra pisari nam̃ele ni apostolo maga: 35go e pei tea duripituakiana paki sara naata sikasikai e pataka ni waina te naata e pe vei tea tika.
36Go Yosef, waina apostolo maga eu salagisana ki Barnaba (waina e pei tea vasadoaana e pei Natu ni navasapakavakaleana,) tea ni naworawora ni Levi, go ni navanua ni Kupero, 37e peani natano sikai, go e sori a, po dape m̃ane kakana umai po doropusi a pisari nam̃ele ni apostolo maga.

Currently Selected:

APOSTOLO MAGA 4: NTB

Highlight

Share

Copy

None

Want to have your highlights saved across all your devices? Sign up or sign in