APOSTOLO MAGA 3

1Go Petero go Yoane ero sake paki nasum̃a tapu aura ni natapasavasaana, aura keloveti. 2Go naatam̃oli sikai waina e pei pito pae nap̃ele ni p̃ilana e pei tea tapetapeana, waina eu doropusi a sara naaleatia e one pisari namata ni nasum̃a tapu, waina e pei tea sosoana ki Tea leom̃atakiana, naga ega tatagovi tea maga waina eu paki roara ni nasum̃a tapu ki nadodomiana; 3go ragi waina e punusi Petero go Yoane ero naga eroga vaki roara ni nasum̃a tapu, e datago naga ega tape nadodomiana sikai. 4Go Petero e leosoki a, nara ma Yoane, po naga, P̃a leo paki gami. 5Go nae e midoakisoki ra, e midoaki nia naga ega tape te navatuna kiada. 6Ma Petero e naga, Silver go kold a dika ara; ma tea waina a peania adua ko asa. Pae nagisa ni Yesu Kristo ni Nasareth, p̃a surata. 7Go e puati nam̃elearuna ni matua, po sike a: go nam̃elena maga go navatu ni nakurukuna maga eu kasua m̃araverave. 8Go e sokamidi duleana, po lawodu, po pae asa surata; go e sikoti ra paki ekopu ni nasum̃a tapu, e surata, po sokamidi, po pasa samasamani Sup̃e. 9Go narei mamau eu punusi a e surata po pasa samasamani Sup̃e: 10go eu loatae a naga nae e pei tea waina e do natano raki nadodomiana pisari Namata‐pua Leom̃atakiana ni nasum̃a tapu; go eu pei tea vuatiana ki namagaana go ki nasaram̃akotoana nalakena tea waina e pakilina ki nia.

11Go ragi waina nae e do pua soki Petero go Yoane, narei mamau eu sava saisai punusi ra, natara‐taup̃a waina e pei tea sosoana ki tea ki Solomon, eu maga p̃arua. 12Go ragi waina Petero e punusi a, e pasa dara paki narei, e naga, Naatam̃oli ni Israel maga, ekasana ku maga nalo ni naatam̃oli waia? Kite ekasana ku siko gami, dapala waina au pe mari a e surata ki nakasuaana aginami kite ki nawiaana aginami? 13Sup̃e ki Abraham, go ki Isaak, go ki Yakob, Sup̃e ki tamagida, e paka samasamani Tea Suasua aneana Yesu; waina nimu ku pitua ki nia, po pasa goro e narae ni Pilato, ragi waina nae e midoaki p̃otae naga ega veresi a. 14Ma nimu ku pasa goro Tea Tapu go Tea Leana, po datago naga naatam̃oli mari punue sikai ega vei tea vituakiana paki mu, go ku mari punue Nawota ni namauriana; 15waina Sup̃e e sike a e duleana m̃elu dua ki tea mate; waina kinami au pei tea noasokisoki kakana. 16Go nagisana nalakena nasaralomauana ni nagisana, e mari naatam̃oli waia e kasua, waina ku leo punusi a po atae a: io, nasaralomauana waina e pae asa e dua e nawialuaana waia naraemu mamau puti. 17Go ragi waia, tai maga, a atae naga ku mari a nalakena naveisap̃oana, dakiusi waina tea maraki animu maga ma eu mari a. 18Ma tea maga waina Sup̃e e pea noa sai a pae nawoka ni profeta maga mamau puti, naga Kristo aneana ega sua navitinumateana, e mari a e lolomana dapala nogoe. 19Nalakena tea wanogoe kuga midoaki doa, po moro maradoa, naga namarinaleosaana animu maga euga vei tea kasiluaana, naga ragi ni namaromaroana maga euga tapala nogoe pae narae ni Yehovah umai; 20go naga ega tip̃aki lua Kristo umai, waina e manimu pei tea tawonakiana, 21Yesu, waina e one nakoroatelagi one naga ega viragi a pa pa paki ragi maga ni natapeliliuakiana ni naleo maga mamau puti, waina Sup̃e e pasa ara pae nawoka ni profeta tautau aneana maga pae ragi vea ni maramana pa pa. 22Moses e noa lomau, e naga, Yehovah Sup̃e ega wo manimu mari profeta sikai m̃elu taimu maga ega vakilina, dakiusi au; kuga wo dogo paratiki nia nalo ni naleo maga mamau puti waina ega wo pasa paki mu ara. 23Go ega wo doko naga sara naatam̃oli waina euga wo da dogo paratiki profeta wanogoe mau, euga wo pei tea maripuolikiana m̃elu dua ki narei. 24Io, go profeta maga mamau puti pae Samuel go tea maga waina eu edakugoro pa pa, tea maga waina eu pasa, nara ma eu dogorogo ki naaleatia maga waia. 25Nimu ku pei natu ni profeta maga, go ni navasasokiana waina Sup̃e e pasa soki tamamu maga asa, e noa ki Abraham, e naga, Go naworam̃a nalauna maga mamau puti ni maramana euga wo pei tea vasap̃iakiana asa. 26Sup̃e e mari Tea Suasua aneana e pakilina, e dip̃aki lua e umai pea punusi mu, naga ega vasa p̃ia ki mu, ega vua doa sara naata kakamu m̃elu dua ki namarinaleotageleana animu maga.

Currently Selected:

APOSTOLO MAGA 3: NTB

Highlight

Copy