APOSTOLO MAGA 5

1Ma naatam̃oli sikai nagisana Anania, nara ma anagoroi Sapfeira, e sori tea veaniana sikai, 2po lawogoro naulu kakana seara, anagoroi ma e atae a, go e dape namagovai sikai kakana umai, po doropusi a pisari nam̃ele ni apostolo maga. 3Ma Petero e naga, Anania, ekasana Satan e pakavuro nap̃op̃om̃a naga p̃a soro Naatana Tapu, go naga p̃a lawogoro naulu ni natano seara kakana? 4Ragi waina e doko, e da pei tea anigo kite? Go ragi waina e pei tea soriana sua, e da doko naveinawotaana anigo kite? Ekasana ku doropusi naleo waia nap̃op̃om̃a? Ku da soro naatam̃oli maga mau, ma ku soro Sup̃e. 5Go Anania ragi waina e dogo navasaana maga wanogoe e dowo po marodua ki namerona: go namatakuana warua e pakilina ki tea maga mamau puti waina eu dogo e. 6Go natureai maga eu duleana po lulugoro e, go eu dapetape a paki katama po ova ki nia.

7Go edaku ki namalopa sikai e alagoro pei aura dolu, anagoroi, waina e da atae tea waina e pei tea mariana mau, e umai paki ekopu. 8Go Petero e pasa dara paki nia, e naga, P̃a noa ki nau, ku sori natano raki tea waina kite? Go e naga, Ioro, raki tea waina. 9Ma Petero e noa ki nia, e naga, Ekasana koro saisai ki nap̃op̃omu naga koroga maridogo Naata ni Yehovah? P̃a leo, nam̃ele ni tea maga waina eu po ova ki am̃awota eu doko pisari namata, go euga wo dapetape ko paki katama. 10Go e dowo m̃araverave pisari nam̃elena maga po marodua ki namerona: go natureai maga eu rumai paki ekopu po pap̃ai a e mate, go eu dapetape a paki katama, po ova ki nia pisari anawota. 11Go namatakuana warua e pakilina ki ekalesia mamau, go tea maga mamau puti waina eu dogo tea maga wanogoe.

12Go navaivaiana laapa go tea ni namagaana laapa eu pei tea mariana pae nam̃elearu ni apostolo maga m̃aleoputo ni narei; go eu mamau puti doko natara‐taup̃a ki Solomon nap̃op̃oda sikai maau asa. 13Ma tea p̃ota maga sikai kakada e da piviari puluti ra mau: ma narei eu dodomadagani ra; 14go tea saralomau laapa eu moro sokari Nawota, taua maga ni naanoai maga go ni nagoroi maga; 15dapala waina eu dapetape tea sasana maga paki katama paki napua welewelea maga, po doropusi ra eu one nawewele maga go nap̃anu maga, naga, ragi waina Petero ega umai pano, meluna ega melugoro seara kakada. 16Go taua ni naatam̃oli maga ni natokoana maga dalivirigoro Yerusalem, nara ma eu do umai saisai, eu do dapetape tea sasana maga, go tea maga waina naatana loa maga eu mari sa ki da: go eu do pei tea maripauriana puti.

17Ma tea viri warua liu e duleana, nara ma tea maga mamau puti waina eu sikoti a doko eu mamau (waina eu pei tagona ni Sadduki maga), 18go eu pura ki naroitoiana, po nadi ki nam̃elearuda apostolo maga, po doropusi ra eu doko ekopu ni nasum̃a ni navavaiana ki tea laapa. 19Ma agelo ki Yehovah sikai e p̃olagati namata maga ni nasum̃a ni navavaiana p̃ogi, po piragi lua ra paki katama, 20po naga, Kuga vano, po lawodu nasum̃a tapu po pasa ki narei navasaana maga mamau puti ni Namauriana waia. 21Go ragi waina eu dogo tea wanogoe, eu paki nasum̃a tapu ragi ni namakotokotoana, po pasapiseiki. Ma tea viri warua liu e umai, nara ma tea maga waina eu sikoti a doko eu mamau, po soso saisai ki nasaisaiana ni navasap̃otaeana, go tea matua maga mamau puti ni Israel natuna maga, po dip̃aki lua paki nasum̃a ni nasolisoliana naga euga viragi ra umai. 22Ma tasiga maga waina eu rumai eu da pap̃ai ra ekopu ni nasum̃a ni navavaiana mau; go eu liliu, po dogorogo, po naga, 23Au pap̃ai nasum̃a ni nasolisoliana e p̃ono kasua, go tea vavai maga eu lawodu pisari namata maga: ma ragi waina au p̃olagati, au da pap̃ai te naata ekopu mau. 24Go ragi waina nawota ki tea vavai maga ni nasum̃a tapu go tea viri warua maga eu dogo navasaana maga wanogoe, eu midoakiputuaki p̃arua nalo kakada, tea wanogoe ega vei nasava? 25Go sikai e umai po dogorogo paki da, e naga, Kuga leo, naatam̃oli maga waina ku doropusi ra ekopu ni nasum̃a ni navavaiana eu doko nasum̃a tapu, eu lawodu po do pasapiseiki narei. 26Ragi wanogoe nawota ki tea vavai maga e pano, nara ma tasiga maga eu mamau, po piragi ra umai, ma eu da mari kasua ki da mau; nalakena eu matauki narei, eu pe vei tea nadiana ki vatu. 27Go ragi waina eu piragi sua ra umai, eu lawo ki da narae ni nasaisaiana ni navasap̃otaeana. 28Go tea viri warua liu e pusuusu paki da, e naga, Au pasa paratiki kasua ki mu naga kuga ta pasapiseiki pae nagisa waina mau: go kuga leo, ku pakavuro Yerusalem ki navasapiseikiana animu, po midoa ki nia naga kuga mari nada ni naatam̃oli waina ega liko gami. 29Ma Petero go apostolo maga eu pasa dara po naga, E one gami one naga auga rogo paratiki p̃arua ki Sup̃e go naga auga rogo paratiki kiki ki naatam̃oli maga. 30Sup̃e ki tamagida maga e sike Yesu e duleana, waina nimu ku mari punue a, ku sara ki nia nakau sikai. 31Nae Sup̃e e dape a pakilagi ki nam̃elearuna ni matua naga ega vei Nawota go Tea Maumau pauri, naga ega tua Israel namidoakidoaana go namidoakikorokoroana ni namarinaleosaana maga. 32Go kinami au pei tea noa sokisoki maga ni tea maga wanogoe; go Naatana Tapu, waina Sup̃e e dua tea maga asa waina eu dogo paratiki nia.

33Ma ragi waina eu dogo tea wanogoe, eu maeto p̃arua, po mdioaki nia naga euga mari punue ra. 34Ma sikai e duleana nasaisaiana ni navasap̃otaeana, Farisi sikai, nagisana Camaliel, tea vasapiseiki sikai ni nawotaeana, waina narei mamau eu dodomadagani a, go e pitip̃aki naga euga mari naatam̃oli maga waia euga tave pano ragi kiki. 35Go e noa ki da, e naga, Naatam̃oli ni Israel maga, kuga tum̃amu leo parati ki mu nalo ni naatam̃oli maga waia, tea waina ku naga kuga mari a. 36Nalakena pea ki naaleatia maga waia Teuda e duleana, po dum̃ana noa e naga e pei te naata; waina taua ni naatam̃oli maga, eu alagoro pei p̃onotia pati, eu puluti a: waina e pei tea maripunueana, go tea maga mamau puti waina eu dogo parati ki nia eu pei taperavera, po pei tea m̃oli. 37Edaku ki naatam̃oli wanogoe Yuda ni Calilea e duleana naaleatia maga ni namidiri‐nagisada‐ana, po piragi lua narei seara kakada eu dausi a: nae ma e mate; go tea maga mamau puti waina eu dogoparatiki nia eu pei taperavera. 38Go ragi waia a noa ki mu, Kuga m̃elu dua ki naatam̃oli maga waia, po doropusi ra euga madoko: nalakena namidoakip̃otaeana waia kite nawosiana waia e pe vei tea ni naatam̃oli maga, e pe wo pei tea rakaiana: 39ma e pe vei tea ni Sup̃e, ku mari sa dakai ra; mase ku pe vei tea vap̃aiana ku marimari Sup̃e. 40Go eu dogo paratiki nia: go ragi waina eu soso sua apostolo maga umai punusi ra, eu parati ra, po pasa dip̃agoro ra naga euga ta pasa pae nagisa ni Yesu mau, go eu suasua ki da naga euga vano. 41Nalakena tea wanogoe eu m̃elu dua ki narae ni nasaisaiana ni navasap̃otaeana pano, po laelaea nalakena eu pei tea midoakiana naga eu pei tea wia naga euga sua namaridaoana nalakena Nagisana. 42Go sara naaleatia, nasum̃a tapu go nasum̃a adeada maga, eu da makoto ki nia mau, ma eu do pasapiseiki po do dogorogo ki Yesu naga e pei Kristo.

Currently Selected:

APOSTOLO MAGA 5: NTB

Highlight

Copy