Mark 6
6
İisus paasızlanêr Kendi memleketindä
1İisus oradan gitti da geldi Kendi memleketinä. Üürenicilär gittilär Onun ardına.
2Cumertesi günü İisus başladı üüretmää sinagogada. Çoyu, ani seslärdilär Onu, şaşmaklan sorardılar: «Neredän hepsi bunnar var Onda? Nesoy aariflik verili Ona? Nesoy Onun ellerindän olêr bu kudretli işlär?
3Diil mi O dülger, Mariyanın oolu, İakovun, İosifin, İudanın hem Simonun kardaşı? Diil mi Onun kızkardaşları bizim aramızda?» Bu beterä İisus için şüpeyä düştülär.
4İisus dedi onnara: «Bir dä prorok diil paasızlandırılmış ölä, nicä kendi memleketindä, kendi hısımnarında hem kendi evindä».
5Yapamadı orada bir dä kudretli iş, sade nekadar birkaç hastayı, koyup ellerini, alıştırdı.
6O şaşardı onnarın inansızlıına. Sora gitti dolay küülerä da orada üüredärdi.
7Çaardı Kendinä oniki üürenicisini da başladı yollamaa ikişär-ikişär. Verdi onnara zaabitlik fena duhların üstünä
8da sımarladı onnara: «Bişey almayın yol için, sopadan kaarä. Almayın ne ekmek, ne hiybä, ne dä para.
9Ayaklarınıza giiyin sandali, sırtınıza giimeyin iki kat ruba».
10Sora dedi: «Angı evä gireceniz, o evdä kalın, oradan gidincä.
11Eer bir erdä insan sizi kabletmärseydi eki seslämärseydi, çıkıp oradan, artık tozları da ayaklarınızdan silkin, azar gibi onnara karşı. Dooru söleerim sizä: daava günündä Sodoma hem Gomorraya olacek taa ilin, nekadar o kasabaya».
12Onnar gittilär da nasaat ettilär, ani insan dönsün günahlarından Allaha.
13Çok fena duhları uurattılar hem çok hastaları alıştırardılar, yaalayıp zeytin yaayınnan.
İoan Vaatizedicinin ölümü
14Padişah İrod işitti İisus için, zerä Onun adı hererdä anılardı. Kimisi deyärdi: «İoan Vaatizedici ölüdän dirildi, onuştan yapabiler kudretli işlär».
15Başkaları deyärdilär: «O İliya», taa başkası deyärdi: «O bir prorok, evel vakıttan proroklardan biri gibi».
16Bunu sesleyip, İrod dedi: «Bu – İoan, angısının kafasını aldım. O dirildi ölüdän».
17Zerä İrod kendisi yolladıydı, tutsunnar da kapasınnar İoanı zındana, İrodiadanın beterinä, angısı Filipin, İrodun kardaşının, karısıydı, ama İrod ona evlenmişti.
18İoan deyärdi ona: «Düşmeer yaşayasın senin kardaşının karısınnan».
19Onuştan İrodiada kin güdärdi İoana da bakardı öldürtmää onu, ama yoktu kolaylıı.
20İrod korkardı İoandan, ama koruyardı onu, zerä bilärdi, ani o dooru hem ayoz bir adam. Onu seslärkän, hiç bilmärdi, ne yapsın, ama hep okadar mayıllıklan seslärdi onu.
21Bir uygun gün oldu, açan İrod kendi duumak günün yortusunda yaptı konuş öndercilerinä, asker zaabitlerinä hem Galileyadan büüklerä.
22İrodiadanın kızı girdi da oynadı. Beendirdi kendini İroda hem konaklara. Ozaman padişah dedi kıza: «İstä bendän, ne istärseydin, da bän verecäm sana».
23Baalandı eminnän: «Ne dä istärseydin bendän, verecäm sana, artık istärseydin padişahlıımın yarısını da».
24Kız çıktı dışarı da sordu kendi anasına: «Ne isteyim?» O cuvap etti: «İstä İoan Vaatizedicinin kafasını».
25Kız çabuk gitti padişaha da dedi: «İsteerim, şindi veräsin bana bir çini içindä İoan Vaatizedicinin kafasını!»
26Padişah çok güçlendi, ama atılmaa istämedi, zerä emin ettiydi konakların önündä.
27Yolladı bir cellat asker da sımarladı, getirsin İoanın kafasını.
28Asker gitti da aldı İoanın kafasını, getirdi bir çini içindä da verdi kıza, kız da verdi kendi anasına.
29Açan İoanın üürenicileri işittilär bunu, gelip, aldılar onun güüdesini da mezar içinä koydular.
Beş bin adam doyurulêr
30Apostollar döndülär geeri İisusa da annattılar Ona hepsini, ne yaptılar hem nicä üürettilär insanı.
31İisus dedi: «Gelin Benimnän bir sapa erä yalnız da dinnenin biraz». Zerä vardı çokluk, ani gelärdilär hem gidärdilär, da onnarın yoktu kolaylıkları artık ekmek isinnär.
32Gittilär kayıklan bir sapa erä, ki olsunnar yalnız.
33İnsan gördü onnarı gidärkän da tanıdı. Herbir kasabadan kaçtılar orayı yayan da etiştilär onnarın önneri sora.
34Açan çıktı kayık içindän, İisus gördü çok insan. Canı acıdı onnara, zerä onnar nicä güdücüsüz koyunnardı. Başladı onnarı üüretmää hertürlü işlär.
35Çünkü vakıt hayli geçmişti, üürenicilär yaklaştılar İisusa da dedilär: «Burası çol er, vakıt şindän sora geç.
36Kolver insanı, gitsinnär dolay küülerä hem kırdakı evlerä da satın alsınnar kendilerinä bişey imää, /zerä yok ne isinnär/».
37«Siz verin onnara imää», – dedi İisus. Ama üürenicilär cuvap ettilär: «Var mı nicä ikiüz dinarlan gidelim da satın alalım ekmek, ki doyurabilelim onnarı?»
38İisus sordu onnara: «Ya gidin da bakın, kaç ekmek sizdä var?» Annadıktan sora cuvap ettilär: «Var beş ekmek hem iki balık».
39Ozaman sımarladı, oturtsunnar hepsini bölük-bölük eşil çimen üstünä.
40İnsan oturdu erä sıra-sıra ellişär hem üzär kişi bir sırada.
41İisus aldı beş ekmää hem iki balıı, kaldırdı bakışını gökä, iisözledi da kırıp ekmekleri, verdi üürenicilerinä, ki onnar payetsinnär insana. İki balıı da böldü hepsinä.
42Hepsi idi da doyundu.
43Topladılar oniki sepet, dolu ekmek parçasınnan hem ne balıklardan kaldıydı.
44Hepsi, kim idi, vardı beş bin adam.
İisus gezer su üstündä
45İisus çalıştırdı üürenicilerini, tez girsinnär kayık içinä da önü sora geçsinnär gölün öbür tarafına, Vifsaida kasabasına. Bu vakıt Kendisi lääzımdı salversin insanı.
46Açan söledi insana «kal saalıcaklan», gitti bir bayır üstünä, ki dua etsin.
47Açan avşam oldu, kayık gölün ortasındaydı, ama İisus yalnız bulunardı kenarda.
48Gördü, ani onnar savaşêrlar kürek çekeräk, zerä lüzgär karşı esärdi. Onuştan gecenin dördüncü bekçiliindä#6:48 Sabaa karşı saat 3-6. İisus geldi onnara, gideräk su üstündä, da geçmää istedi onnarın yanından.
49Onnar, görüp Onu gideräk su üstündä, Onu bir tılsım sandılar da keskin seslän baardılar.
50Zerä hepsi, görüp Onu, korktular. Ozaman İisus dedi onnara: «Uslanın, bu Bänim, korkmayın!»
51Sora, gelip onnara, pindi kayık içinä, da lüzgär durgundu. Onnar sarp çok şaştılar.
52Çünkü ürekleri uyvaşıktı, onnar annamadıydılar ekmeklärlän meraklı işi.
Gennisaret erindä
53Suyu geçtiynän, onnar etiştilär kenara, Gennisaret erinä.
54Açan çıktılar kayık içindän, kenarda insan hemen tanıdı İisusu.
55Kaçtılar hepsi dolay erlerä da hererdä, neredä işittilär Onun için, başladılar getirmää yataklar üstündä hastaları orayı, neredä O bulunurdu.
56Angı kasabalara, küülerä hem kırdakı evlerä girärdi İisus, hererdä çıkarırdılar meydannara hastaları da yalvarardılar, braksın, ki diisinnär baarlem Onun rubasına. Hepsi, kim Ona diiyärdi, alışardı.
Currently Selected:
Mark 6: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
