Mark 7
7
İhtärların adetleri
1Fariseylär hem birkaç bilgiç, gelmä İerusalimdän, toplandılar İisusun dolayına.
2Onnar gördülär üürenicileri iyärkän diil pak#7:2 Diil pak – iudey dinin adetlerinä görä., başka laflan, yıkanmadık ellän.
3Fariseylär hem hepsi iudeylär, ihtärların adetlerinä görä, imeerlär, islää yıkamayınca ellerini.
4Gelip panayırdan, imeerlär, yıkamayınca ellerini. Hem çok başka adetlär tamannêêrlar, nicä: çölmek, küp, bakır hem pat yıkamakları.
5Fariseylär hem bilgiçlär sordular İisusa: «Neçin senin üürenicilerin tutmêêrlar ihtärların adetlerini da iyerlär yıkanmadık ellän?»
6İisus cuvap etti onnara: «İkiüzlülär! Dooru prorokluk etti sizin için İsaya, nicä var yazılı: „Bu insan ikramnêêr Beni sade aazınnan, ama üreklerinnän uzak Bendän durêr.
7Naafilä Bana baş iilderlär, zerä adam sımarlamaklarını üürederlär, sansınnar ani Allahın üüretmekleri“.
8Siz braktınız Allahın sımarlamasını da tutêrsınız adetleri, ani erleştirildi insandan, /nicä küp hem çölmek yıkamakları, hem yapêrsınız çok başka işlär bunnara benzär/».
9Sora dedi onnara: «Ne kolay atılêrsınız Allahın sımarlamasından, ki erleştiräsiniz kendi adetlerinizi!
10Moisey dedi: „İkramna bobanı hem ananı“ hem: „Kim bobasını eki anasını kötüleyecek, ölümnän cezalı olsun“.
11Ama siz deersiniz: „Kim deer bobasına eki anasına: Ne lääzımdı sana vereyim, şindi korvan (annaması baaşış Allaha)“,
12onu brakmêêrsınız, yardım etsin kendi bobasına yada anasına.
13Butürlü paasızlandırdınız Allahın sözünü kendi adetinizlän. Hem yapêrsınız çok taa başka işlär buna benzär!»
14Sonda enidän topladı insanı dolayına da dedi: «Hepsiniz sesleyin da annayın Beni.
15Ne girer adam içinä dışandan, yok nasıl mındarlasın onu, ama ne çıkêr adamdan, o mındarlêêr adamı.
/ 16Kimin var kulaa işitmää deyni, ko işitsin!/»
17Brakıp insanı, açan girdi bir ev içinä, üürenicileri yalvardılar, annatsın bu örnää.
18O dedi: «Ne, siz dä mi ölä aar kafalıysınız? Annamêêrsınız mı, ani ne girer adam içinä, yok nasıl mındarlasın onu?
19Zerä o girmeer üreenä, ama karnına, sora dışarı uuradılêr».
20Sora dedi: «Ne çıkêr adamdan, o mındarlêêr adamı.
21Zerä adamın içindän, üreendän, çıkêr fena neetlär, orospuluk, hayırsızlık, öldürmäk,
22hırsızlık, tamahlık, fenalık, şalvirlik, utanç işlär, kıskançlık, kötülemäk, şişkinnik, akılsızlık.
23Hepsi bu fena işlär çıkêrlar içyandan da mındarlêêrlar adamı».
Siriya-finikiyalı karının inanı
24İisus gitti oradan Tir /hem Sidon/ kasabasının tarafına. Girdi bir evä da istämärdi, kimsey bilsin bunu. Ama saklanamadı.
25Çok geçmedi, bir karı, angısının kızı fena duhtan tutulmuştu, işitti İisus için da, gelip Ona, düştü Onun ayaklarına.
26Bu karı urumca lafedärdi, ama kendisi Siriya-finikiyalıydı. O yalvarardı, çıkarsın fena duhu onun kızından.
27İisus dedi: «Brak, ilkin doyunsun uşaklar, zerä diil islää almaa ekmää uşaklardan da atmaa köpeklerä».
28«Ölä, Saabi, – cuvap etti bu karı. – Ama köpeklär dä iyerlär kırıntıları, ani düşer uşakların sofrasından».
29Ozaman İisus dedi: «Çünkü bölä cuvap ettin, şindi git, fena duh çıktı senin kızından».
30Karı, açan etişti evä, buldu uşaa patta yatarkan. Fena duh çıkmıştı ondan.
Saar hem mutu adam alıştırılêr
31İisus ayırıldı Tir erlerindän, enidän gitti Sidon aşırı Dekapolis erlerin ortasından Galileya gölünä.
32Getirdilär Ona bir saar, angısı zor lafedärdi, da yalvardılar, koysun elini onun üstünä.
33İisus aldı onu bir tarafa insandan, koydu parmaklarını adamın kulaklarına da, tükürüp, diidi onun dilinä.
34Kaldırdı bakışını gökä, derindän soludu da dedi: «Effata», annaması «Açıl».
35Birdän açıldı kulakları hem çözüldü dilin düünükleri, da o lafetti açık.
36İisus sımarladı onnara, kimseyä sölämesinnär, ama nekadar sıkı sımarlardı, okadar taa çok dandana edärdilär.
37Onnar pek çok şaşardılar da deyärdilär: «Hepsi, ne yapêr, – islää. Artık saarlara da işitmäk verer, mutuların da dillerini çözer».
Currently Selected:
Mark 7: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
