YouVersion Logo
Search Icon

Mark 5

5
İisus koolêêr fena duhları Gadarada
1Onnar etiştilär gölün öbür tarafına, Gadara#5:1 Gadara: taa geç tekstlerdä «Gerasa». erlerinä.
2Açan İisus indi kayık içindän, mezar laamnarından Ona karşı çıktı bir adam, tutulu fena duhtan.
3Bu adam yaşardı mezar laamnarı içindä. Kimsey artık onu sincirlärlän dä baalayamardı.
4Çok sıra baalardılar onu sincirlärlän hem bukaalarlan, ama sincirleri koparardı, bukaaları kırardı. Kimsey onu uslandıramardı.
5Herzaman, gecä-gündüz, mezar laamnarında hem bayırlar üstündä, baarardı hem taşlarlan kendi-kendini yaralardı.
6O uzaktan gördü İisusu, kaçarak geldi da baş iiltti Onun önündä,
7baararak keskin seslän: «Neyin var Senin benimnän, İisus, Pek üüsek Allahın Oolu? Yalvarêrım Sana Allahın adınnan: zeetlämä beni!»
8Bölä dedi, zerä İisus sımarladı: «Fena duh, çık dışarı bu adamdan!»
9Sora sordu: «Nesoy senin adın?» O cuvap etti: «Benim adım Legion#5:9 Legion – 6000 asker., zerä biz çoklukuz».
10Pek yalvarmaa başladı İisusa, koolamasın onnarı oradan.
11Bayır yamacında bir büük sürü domuz otlardı.
12Fena duhlar yalvardılar: «Brak bizi, girelim domuzlar içinä».
13İisus braktı, girsinnär. Fena duhlar çıktılar bu adamdan da girdilär domuzlar içinä. Bütün sürü hızlandı dik yamaçtan da atladı göl içinä. Yakın iki bin domuz buuldu göl içindä.
14Domuzçular kaçtılar da haberledilär kasabada hem dolay küülerdä. İnsan çıktı görsün, ne oldu.
15Geldilär İisusa da gördülär fena duhtan tutulu adamı, angısının içindä vardı bir legion fena duh, oturarak giiyimni hem aklı başında. Hepsini bir korku aldı.
16Onnar, kim bu oluşu gördülär, söledilär insana hepsini, ne oldu fena duhtan tutulu adamnan hem domuzlarlan.
17Ozaman insan başladı yalvarmaa, ki İisus gitsin onnarın erlerindän.
18Açan İisus girärdi kayık içinä, adam, ani öncä fena duhtan tutuluydu, yalvardı İisusa, alsın onu Kendisinnän.
19Ama İisus kayıl olmadı da dedi: «Git evä da sölä kendikilerinä hepsini, ne Saabi yaptı sana hem nesoy acıdı seni».
20O gitti da başladı Dekapolistä sölemää hepsini, ne yaptı İisus ona. Hepsi şaşardılar.
Kız diriler, hasta karı alışêr
21Açan İisus kayıklan karşı tarafa döndü, göl boyunda çok insan toplandı Onun dolayına.
22Geldi Ona sinagogadan bir önderci, adı İair. Görüp İisusu, düştü Onun ayaklarına
23da pek yalvardı: «Benim kızım ölüm döşeendä. Yalvarêrım, gel da koy ellerini onun üstünä, ki saa olsun da yaşasın».
24İisus gitti onunnan. Onun ardına gidärdi çok insan da her taraftan sıkışardılar.
25Orada vardı bir karı, ani oniki yıldan beeri zeetlenärdi kan akmasından.
26O çok savaşmıştı çok doftorların elindän, harcamıştı hepsini varlıını, ama hiç fayda olmadı, buna karşı, hastalıı olmuştu taa zor.
27O, işidip İisus için, yaklaştı geeridän, insan içindän, da diidi rubasına.
28Zerä düşünärdi: «Sade diisäm Onun rubalarına, alışacam».
29Açan diidi, birdän kan akması durdu. O duydu, ani güüdesi alıştı hastalıktan.
30İisus duydu, ani bir kuvet Ondan çıktı, döndü insana dooru da sordu: «Kim diidi Benim rubama?»
31Üürenicileri cuvap ettilär: «Görmeersin mi, nicä insan her taraftan sıkıştırêr? Sän dä sorêrsın: „Kim diidi Bana?“»
32Ama O bakınardı dolaya, görsün deyni, kim diidi Ona.
33Bu karı korkudan titirärdi, zerä bilärdi, ne oldu onunnan. O yaklaştı da düştü Onun ayaklarına, sora annattı işin aslısını.
34İisus dedi ona: «Kızım! Senin inanın seni alıştırdı, git usluluklan da saa ol senin hastalıından».
35İisus taa lafedärkän, evdän geldilär da sinagoga öndercisinä dedilär: «Kızın öldü, naafilä savaştırma Üürediciyi».
36İisus, esaba koymayarak bu lafları, dedi sinagoga öndercisinä: «Korkma, sade inan».
37O brakmadı, kimsey gitsin Onun ardına, salt Petriyi, İakovu hem İoanı, İakovun kardaşını.
38Gelip sinagoga öndercisinin evinä, gördü orada kalabalık, büük seslän aalamak hem sıralamak.
39Girip orayı, dedi onnara: «Neçin şamata yapêrsınız hem aalêêrsınız? Kız ölmedi, ama uyuyêr».
40Onnar gülmää aldılar Onu. Ama O uurattı hepsini dışarı, aldı kızın bobasını, anasını hem onnarı, kim Onunnandı, da girdi orayı, neredä kız yatardı.
41İisus tuttu kızı elindän da dedi ona: «Talifá kumí», annaması: «Kız, deerim sana, kalk».
42Kız çabuk kalktı da başladı gezinmää. O oniki yaşındaydı. Hepsi görennär şaş-beş kaldı.
43İisus sıkıdan sımarladı onnara, kimseyä bunu sölämesinnär, sora dedi, versinnär kıza imää.

Currently Selected:

Mark 5: GagNTL

Highlight

Share

Copy

None

Want to have your highlights saved across all your devices? Sign up or sign in

Free Reading Plans and Devotionals related to Mark 5

YouVersion uses cookies to personalize your experience. By using our website, you accept our use of cookies as described in our Privacy Policy