Mark 4
4
Ekici için örnek
1İisus enidän başladı üüretmää insanı göl boyunda. Yanına toplandıydı ölä çok insan, ani İisus, pinip, oturdu bir kayık içinä su boyunda, ama hepsi insannar kaldılar kenarda.
2İisus başladı onnarı üüretmää örneklärlän çok işlär için. Üürederäk onnarı, İisus söledi bu örnää:
3«Sesleyin. Tä ekici çıktı toom ekmää.
4Açan ekärdi, razgeldi, ani toomnardan birazı düştü yol boyuna. Kuşlar kondular da idilär onnarı.
5Başka toomnar taşlık erä düştülär, neredä az toprak vardı. Toomnar tez filizlendi, zerä toprak diildi derin.
6Ama açan güneş çıktı, onnar sörpeştilär da kurudular, zerä kökleri suvadaydı.
7Taa başka toomnar çalılar içinä düştülär. Çalılar büüdülär da buulttular filizleri, onnar verämedilär bereket.
8Ama kalan toomnar ii topraa düştülär. Büüdülär, başak verdilär da bereket getirdilär: birisi otuz, öbürü altmış, taa öbürü üz katına».
9Sora dedi onnara: «Kimin var kulaa işitmää deyni, ko işitsin!»
10Açan İisus insandan ayırıktı, oniki üürenicisi hem kalan izleyicileri sordular Ona bu örnek için.
11O cuvap etti onnara: «Sizä verildi, annayasınız Allahın Padişahlıının saklılıını, ama kalan insana hepsi sölener örneklärlän.
12Ölä ki, „onnar gözlerinnän bakêrlar, ama görmeerlär; kulaklarınnan işiderlär, ama annamêêrlar, ki birtürlü dönmesinnär Allaha, da baaşlansın günahları“».
13Sora sordu onnara: «Annamêêrsınız bu örnää mi? Ozaman nesoy annayacenız kalan örnekleri?
14Ekici eker Allahın sözünü.
15Kimi insannar benzeer toomnara, ani düşer yol boyuna, neredä o söz ekiler. Onnar sözü işittiynän, tez geler şeytan da çalêr sözü, ani ekiliydi üreklerindä.
16Toomnar, ekilmiş taşlık erä, onnardır, angıları, sözü işidip, çabuk kablederlär sevinmäklän,
17ama yok kökleri hem az vakıt tutunêrlar. Açan geler zorluk eki koolamak Allahın sözü için, onnar tez atılêrlar.
18Başka toomnar, ekilmiş çalılar içinä, onnardır, kim işider sözü,
19ama bu zamanın kahırları, zenginniin aldangaçlıı hem başka hamellär, girip onnara, buuldêrlar sözü, da onnar bereket getirämeerlär.
20Toomnar, ekilmiş ii topraa, onnardır, kim, işidip sözü, kablederlär da bereket getirerlär: birisi otuz, öbürü altmış, taa öbürü üz katına».
Şafk görünär erdä
21Sora İisus dedi onnara: «Şafkı getirerlär, ki koysunnar küp altına osa pat altına mı? Diil mi koysunnar deyni kandillik üstünä?
22Yok bişey örtülü, ani açılmasın, hem yok bişey saklı, ani üzä çıkmasın.
23Kimin var kulaa, işitmää deyni, ko işitsin».
24Hem dedi onnara: «Bakın, ne işidersiniz. Ne ölçüylän ölçeceniz, o ölçüylän Allahtan ölçülmüş olacenız, salt taa zeedelenmiş.
25Zerä kimdä var, ona taa çok verilecek, ama kimdä yok, ondan alınacek, neyi dä var».
Filiz salverän toom için örnek
26Sora dedi: «Allahın Padişahlıı benzeer ona, nicä bir adam eker toom tarlasına.
27Gecä uyuyêr, gündüz uyanık durêr, ama toom filiz salverer, büümää başlêêr. Netürlü bu olêr, adam hiç bilmeer.
28Toprak kendiliindän bereket verer: ilkin bir eşil filiz, sora başak, bitkidä başak dolu teneylän.
29Açan bereket olgun olêr, işä hiç oyalanmayarak, oraa koyêr, zerä geldi biçmäk vakıdı».
Hardal toomu için örnek
30Sora dedi: «Neylän benzedelim Allahın Padişahlıını, ne örneklän açıklayalım onu?
31O benzeer hardal toomuna, ani, ekildiynän toprak içinä, taa küçük hepsi toomnardan er üstündä.
32Ama ekildiktän sora büüyer da olêr taa büük hepsi eşilliklerdän. Onun dalları büüyer ölä, ki gök kuşları var nicä yuvalarını yapsınnar onun gölgesindä».
33İisus bunun gibi çok örneklärlän nasaat etti Allahın sözünü onnara, nekadar onnar annayabildilär.
34Lafetmärdi örneksiz. Sora, açan kalardı yalnız üürenicilerinnän, hepsini açıklardı.
İisus boranı uslandırêr
35O günü avşamnen İisus dedi onnara: «Geçelim gölün öbür tarafına».
36Üürenicilär, salverip insanı, götürdülär Onu kayıklan, angısında O bulunurdu. Onunnan bilä vardı başka kayıklar da.
37Başladı esmää bir büük boran, dalgalar fırladardı su kayık içinä, da kayık dolardı suylan.
38Ama İisus kayıın geerisindä uyuyardı, yastık başı altında. Üürenicilär uyandırdılar Onu da dedilär: «Üüredici, ne Senin yok kasavetin, ani biz kaybeleriz?»
39O kalktı, azarladı lüzgeri da gölä dedi: «Sus, da işidilmesin sesin!» Lüzgär durdu da büük usluluk oldu.
40Sora dedi üürenicilerinä: «Neçin ölä korkaksınız? Ne, sizdä taa yok mu inan?»
41Onnarı bastı bir büük korku. Biri-birinnän lafedärdilär: «Kimdir Bu, Angısını lüzgär hem dalgalar sesleerlär?»
Currently Selected:
Mark 4: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
