Matfey 28
28
İisus diriler
1Cumertesi geçtiktän sora, açan aydınnanırdı haftanın ilk günü#28:1 Haftanın ilk günü – pazar günü., Mariya Magdalina hem öbür Mariya geldilär görmää mezarı.
2Birdän oldu bir büük er tepremesi, zerä bir angil Saabidän indi göktän da, gelip, devirdi taşı mezarın aazından da oturdu taş üstünä.
3Onun görümü çimçirik gibiydi. Rubaları biyazdı nicä kaar.
4Bekçilär korkudan titiredilär da ölü gibi erä düştülär.
5Angil dedi karılara: «Korkmayın, zerä bilerim, ani aarêêrsınız stavroza gerilmiş İisusu.
6O yok burada, O dirildi, nicä sölediydi. Gelin, görün erini, neredä Saabi koyuluydu.
7Da hızlı gidin, söleyin Onun üürenicilerinä, ani O dirildi ölüdän. O gider sizdän öncä Galileyaya. Orada göreceniz Onu. Tä bän sizä söledim».
Karılar görerlär Hristozu
8Onnar hızlı çıktılar mezar içindän korkuylan hem büük sevinmäklän, kaçarak gittilär, haber versinnär üürenicilerinä.
9Ama açan gidärdilär, sölesinnär üürenicilerinä, tä, Kendi İisus karşı çıkêr onnara da deer: «Seläm!» Onnar yaklaştılar, sarmaştılar ayaklarına da baş iilttilär Ona.
10Ozaman İisus dedi onnara: «Korkmayın, gidin da söleyin kardaşlarıma, gitsinnär Galileyaya. Orada Beni göreceklär».
Bekçilär satın alınêr
11Açan onnar gidärdilär, kimisi bekçilerdän girdilär kasaba içinä da söledilär hepsi bu oluşlar için büük popazlara.
12Bunnar toplandılar aksakallarlan bireri da, annaşıp, verdilär çok para bekçilerä,
13deyip onnara: «Söleyin bölä: „Onun üürenicileri geldilär gecä, da biz uyuyarkan çaldılar Onun güüdesini“.
14Bu haber etişärseydi kullanıcının kulaana, biz onu inandıracez, da sizi beladan kurtaracez».
15Askerlär aldılar parayı da yaptılar ölä, nicä onnarı üürettilär. İudeylerin arasında bu haber daaldı da etişti büünkü günä kadar.
İisusun bitki sımarlaması
16Onbir üürenici gittilär Galileyaya bayırın üstünä, nereyi İisus sımarladıydı.
17Gördülär Onu da baş iilttilär Ona, ama kimisi şüpeli kaldı.
18İisus, yaklaşıp onnara, dedi: «Bana bütün zaabitlik verildi göktä hem erdä.
19Gidin da hepsi milletleri Bana üürenici yapın, vaatiz edip onnarı Bobanın hem Oolun hem Ayoz Duhun adına.
20Üüredin, hepsini tamannasınnar, ne sizä sımarladım. Da biliniz, Bän olacam sizinnän her gün, zamanın bitkisinädän». /Amin./
Currently Selected:
Matfey 28: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
