Matfey 27
27
İisusu götürerlär kullanıcı Pilata
1Açan sabaa oldu, büük popazlar hem halk aksakalları annaştılar İisusu öldürsünnär.
2Baalayıp Onu, götürdülär da verdilär kullanıcı Pontiy Pilata.
İuda asılêr
3Açan İuda, ani sattı İisusu, annadı, ani İisusu daavaya verdilär, pişman oldu. Getirdi geeri otuz gümüşü da verdi büük popazlara hem aksakallara.
4O dedi: «Günaha girdim, zerä kabaatsız adam kanı sattım». «Bizä ne? Sän kendin bak», – cuvap etti onnar.
5İuda attı gümüşleri Ayoz bina içinä, sora gitti da asıldı.
6Büük popazlar topladılar gümüşleri da dedilär: «Düşmär koymaa bu parayı Ayoz binanın haznasına, zerä bu kan parası».
7Annaştılar bu paraylan çölmekçinin tarlasını satın alsınnar, mezar eri olsun, yabancıları gömmää deyni.
8Onuştan büünkü günä kadar bu tarlanın adı: «Kan tarlası».
9Ozaman tamannandı, ne haberlediydi prorok İeremiya, angısı deer: «Aldılar otuz gümüşü, paa kuruşunu, ani İzrail oolları kurdu Onun için,
10da verdilär çölmekçinin tarlası için, nicä bana Saabi söledi».
İisus Pilatın önündä
11İisus çıktı kullanıcının önünä, angısı sordu Ona: «Sänsin mi İudeylerin Padişahı?» «Ölä, nicä söleersin», – cuvap etti İisus.
12Ama büük popazların hem aksakalların amazlarına hiç cuvap etmedi.
13Ozaman Pilat dedi Ona: «Ne, işitmeersin mi, nekadar çok kabaatlandırêrlar Seni?»
14İisus ona hiç bir dä laf cuvap etmedi. Kullanıcı buna pek şaştı.
İisus hem Varavva
15Her Paskellä yortusunda kullanıcı, adetinä görä, kolverärdi kapancılardan birisini, kimi insan istärdi.
16O vakıt kapalıydı bir anılmış adam, adı Varavva.
17Açan hepsi topluydular, Pilat sordu onnara: «Kimi isteersiniz kolvereyim? Varavvayı mı osa İisusu mu, Angısına dener Hristos?»
18Zerä bilärdi, ani haseetlik beterinä verdilär İisusu onun elinä.
19Açan Pilat taa oturardı daava skemnesindä, onun karısı yolladı ona, sölesinnär: «Bak yapmayasın bişey bu dooru adama. Bu gecä çok zeet çektim, açan Onu düşümdä gördüm».
20Büük popazlar hem aksakallar kızıştırdılar insanı istesinnär Varavvayı, ama İisusu öldürsünnär.
21Kullanıcı sordu onnara: «Angısını onnarın ikisindän kolvereyim?» «Varavvayı!» – baardılar onnar.
22Pilat dedi onnara: «Ne yapayım İisuslan, Angısına dener Hristos?» «Gerilmiş olsun stavroza!» – baardılar onnar.
23Kullanıcı dedi: «E ne kötülük yaptı?» Ama onnar çekettilär taa pek baarmaa: «Gerilmiş olsun stavroza!»
24Açan Pilat gördü, ani bişey yapamêêr, buna karşı, kalabalık debreşer, aldı su, yıkadı ellerini insanın önündä da dedi: «Bän diilim kabaatlı bu dooru Adamın kanı için. Bakın kendiniz!»
25Hepsi insan cuvap etti: «Onun kanı düşsün bizim üstümüzä hem bizim uşaklarımızın üstünä».
Askerlär gülmää alêrlar İisusu
26Ozaman Pilat kolverdi Varavvayı, ama İisusu kamçılayıp, verdi, ki gersinnär stavroza.
27Sora kullanıcının askerleri götürdülär İisusu Pretoriuma#27:27 Pretorium – kullanıcının rezidenţiyası.. Onun dolayına toplandılar hepsi askerlär.
28Soyundurdular Onun rubalarını da giidirdilär kırmızı üst ruba.
29Ördülär tikenni çalıdan bir feneţ da koydular Onun başına, sora verdilär bir sopa saa elinä. Diz çökürdülär önündä da, gülmää alıp, deyärdilär: «Seläm Sana, İudeylerin Padişahı!»
30Tükürürdülär Onun üstünä, sora alıp sopayı, kafasına ururdular.
31Gülmää aldıktan sora soyundurdular kırmızı üst rubayı, giidirdilär Kendi rubalarını da götürdülär Onu, stavroza germää.
İisusu gererlär stavroza
32Kasabadan çıkarkan, karşı geldilär kirineli bir adamnan, adı Simon. Onu zorladılar, götürsün İisusun stavrozunu.
33Açan etiştilär o erä, ani adı Golgofa, annaması «baş kemii eri»,
34verdilär içsin şarap, karışık acı bişeylän, ama İisus, dadıp, istämedi içsin.
35Gerdiktän sora, attılar çetelä da payettilär Onun rubalarını.
36Sora oturdular da yanında bekçilik edärdilär.
37Başı üstündä taktılar kabaatını, yazılı: «İisus – İudeylerin Padişahı».
38Onunnan barabar stavroza gerdilär iki haydut: birisini saa, öbürünü dä sol tarafına.
39Oradan geçennär kötülärdilär Onu da, başlarını sallayarak, deyärdilär:
40«Sän, ani yıkêrsın Ayoz binayı da üç gündä enidän yapêrsın, eer Sän Allahın Oolusaydın, kurtar Kendini da in erä stavrozdan!»
41Hep ölä büük popazlar, bilgiçlär hem aksakallar /fariseylärlän barabar/ gülmää alardılar Onu da deyärdilär:
42«O başkalarını kurtardı, ama Kendini kurtaramêêr! Eer O İzrailin padişahıysa, insin erä stavrozdan, da biz inanacez Ona!
43Umutlanardı Allaha, ko şindi kurtarsın Onu Allah, eer Onu sevärsä. Zerä O Kendi deyärdi: „Bän Allahın Ooluyum!“»
44Haydutlar, ani geriliydilär Onunnan, hep ölä kötülärdilär Onu.
İisus öler
45Altıncı saattan dokuzuncu saada kadar#27:45 Saat 12-dän 15-ä kadar. oldu karannık bütün memlekettä.
46Dokuzuncu saadın dolayında İisus baardı büük seslän: «Eli! Eli! Lema şevaktani?» Annaması: «Allahım! Allahım! Neçin Beni braktın?»
47Orada durannardan kimisi, işidip bu lafları, dedilär: «O çaarêr İliyayı!»
48Birisi kaçtı, çabuk aldı bir sünker, bandırdı onu iişi şarap içinä da, takıp bir sopaya, verdi, içsin.
49Ama kalanı deyärdilär: «Durun, bakalım, gelecek mi İliya, kurtarsın Onu?»
50İisus enidän baardı büük seslän da verdi duhunu.
Ayoz binanın perdesi yırtılêr
51Birdän Ayoz binanın içindä perdä yırtıldı iki parçaya, yukardan aşaa kadar. Er tepredi, taşlar çatladılar,
52mezarlar açıldılar. Çok ayozların güüdeleri, ani öldüydülär#27:52 Öldüydülär – urumca, «uyumuştular»., dirildilär
53da, mezarlar içindän çıkıp, Onun dirilmesindän sora girdilär ayoz kasabaya#27:53 Ayoz kasaba – İerusalim. da çoyuna gösterildilär.
54Asker üzbaşı hem askerlär, ani bekçilik edärdilär İisusun yanında, açan gördülär er tepremesini hem hepsini, ne oldu, pek korktular da dedilär: «Hakına, O Allahın Ooluydu!»
55Orada vardı çok karı, angıları uzaktan siiredärdilär, hem angıları Galileyadan gittiydilär İisusun ardına, izmet ederäk Ona.
56Onnarın arasında Mariya Magdalina hem Mariya, İakovun hem İosifin anaları, hem Zevedeyin oolların anaları.
İisusu gömerlär
57Avşamnen geldi bir zengin adam, adı İosif, Arimafeya kasabasından, hep İisusun üürenicilerindän.
58Gitti Pilata da istedi İisusun güüdesini. Pilat izin etti, versinnär ona.
59İosif aldı güüdeyi da sardı biyaz keten çarşaflan,
60erleştirdi Onu kendi mezarı içinä, angısını oymuştu kanarada. Sora devirdi bir büük taş mezarın kapusuna da gitti.
61Oradaydı Mariya Magdalina hem öbür Mariya. Onnar otururdular mezara karşı.
Bekçilär mezarda
62Ertesi günü, cumaa günündän sora, büük popazlar hem fariseylär toplandılar Pilatın önünä da dedilär:
63«Çorbacı, biz aklımıza getirdik, ani o aldadıcı, taa yaşarkan, dedi: „Üçüncü günü dirilecäm“.
64Onuştan sımarla, beklenilsin mezar üçüncü günä kadar, ki birtürlü gelmesinnär Onun üürenicileri gecä da çalmasınnar güüdesini, sora demesinnär insana, ani dirildi ölüdän. Bu son yalan olacek taa kötü ilkinkisindän».
65Pilat dedi: «Var bir bölük bekçiniz, gidin da koruyun mezarı, nicä bilersiniz».
66Onnar gittilär da korudular mezarı bekçilärlän, mühürleyip taşı.
Currently Selected:
Matfey 27: GagNTL
Highlight
Share
Copy
Want to have your highlights saved across all your devices? Sign up or sign in
© Bіblіyayı çevіrän İnstіtut, Moskva, 2006
