Mark 1

İoan Vaatizedici

1İisus Hristozun, Allahın Oolunun, İi Haberi başlantısı.

2Nicä yazılı prorok İsayanın kiyadında: «Tä, Bän yollêêrım habercimi Senin önün sora, angısı hazırlayacek yol Sana».

3«Baaranın sesi çol erdä işidiler: „Saabiyä yolu hazırlayın, yolcaazları uzladın“».

4İoan geldi, çol erdä vaatiz ederäk hem nasaat ederäk, ani insan lääzım dönsün günahlarından Allaha hem vaatiz olsun, ki baaşlamak edensinnär.

5Bütün İudeya erlerindän, İerusalim kasabasından gelärdilär da hepsi vaatiz olardılar ondan İordan deresindä, kendi günahlarını açıklayarak.

6İoan giiyimniydi devä yapaasından rubaylan, kuşanıktı deridän kayışlan, iyärdi çekirgä hem kır arı balı.

7İoan nasaat edärdi: «Benim ardıma geler O, Kim taa kaavi bendän. Bän diilim yakışıklı iilip çözmää Onun ayak kaplarının tasmalarını.

8Bän sizi suylan vaatiz ettim, ama O sizi Ayoz Duhlan vaatiz edecek».

İisus vaatiz olêr, şeytandan denener

9O vakıt Galileyadan, Nazaret kasabasından, geldi İisus, da İoan vaatiz etti Onu İordan deresindä.

10Su içindän çıkarak, O#1:10 Kimi geç tekstlerdä «O» – İoan. hemen gördü, nicä gök açıldı, da Ayoz Duh, bir guguş gibi, Onun üstünä kondu.

11Göklerdän bir ses işidildi: «Sänsin Benim sevgili Oolum, Sendä Benim isleeliim».

12Bundan sora Duh İisusu çol erä çabuk götürdü.

13Çolda O kırk gün bulundu, neredä şeytandan denenmiş oldu. Canavarlar arasında bulunurdu, da angillär Ona izmet edärdilär.

İisusun ilk üürenicileri

14Açan İoanı kapadılar, İisus geldi Galileyaya, nasaat ederäk İi Haberi Allahın Padişahlıı için.

15Da deyärdi: «Vakıt tamannandı, Allahın Padişahlıı yaklaştı. Günahlarınızdan Allaha dönün hem İi Haberi inanın».

16Geçip Galileya gölün boyundan, İisus gördü Simonu hem Andreyi, onun kardaşını. Onnar su içinä süzmeleri atardılar, zerä balıkçıydılar.

17İisus onnara dedi: «Gelin Benim ardıma, sizi insan tutan yapacam».

18Onnar çabuk süzmelerini braktılar da Onun ardına yollandılar.

19Gidip biraz ileri, İisus gördü Zevedeyin oolunu, İakovu, hem kardaşını İoanı, angıları kayık içindä süzmelerini tertiplärdilär.

20İisus hemen çaardı onnarı. Onnar bobalarını, Zevedeyi, kayıkta işçilärlän braktılar da kendileri İisusun ardına gittilär.

Sinagogada fena duhlu adam alıştırılêr

21Kapernaum kasabasına geldilär. Tezdä, cumertesi günü, İisus sinagoga içinä girdi, üüretmää insanı başladı.

22Onun üüretmesinä şaşardılar, zerä üüredärdi onnarı nicä bir adam, angısında var zaabitlik, diil nicä bilgiçlär.

23Taman o vakıt onnarın sinagogasının içindä bulunardı bir adam, angısı fena duhlan tutulmuş. O başladı baarmaa:

24«Ne isteersin bizdän, Nazaretli İisus? Geldin bizi kaybetmää mi? Bilerim, kimsin Sän, Sän Allahın Ayozuysun!»

25Ama İisus takazaladı onu da dedi: «Sus da çık bu adamdan!»

26Ozaman fena duh adamı sarsaladı da sora, bir keskin seslän baarıp, ondan çıktı.

27Hepsi şaş kaldılar da biri-birinä sorardılar: «Nedir bu? Nesoy eni üüretmäktir bu? O artık fena duhlara zaabitliklän sımarlêêr, da onnar Onu sesleer!»

28Galileyanın bütün dolayında İisus için hereri haber çabuk daaldı.

İisus Petrinin kaynanasını alıştırêr

29İisus İakovlan hem İoannan sinagogadan çıktı, Simonun hem Andreyin evinä gitti.

30Simonun kaynanası patta sıtmadan hasta yatardı. Bunun için İisusa çabuk haber verildi.

31İisus, yaklaşıp, tuttu onu elindän da yardım etti, kalksın. Sıtma onu braktı, da karı izmet etmää onnara başladı.

32Avşamnen, gün kauşmasında, hepsi hastaları hem fena duhtan tutulmuşları İisusa getirärdilär.

33Kapu önündä insan bütün kasabadan toplandı.

34Hertürlü hastalıklardan O çok insan alıştırardı. Çıkarardı çok fena duhları da brakmardı sölesinnär, zerä onnar bilirdilär, ani O Hristos.

35Ertesi günü çin-sabaalän İisus kalktı da, çıkıp evdän, bir sapa erä gitti, neredä dua edärdi.

36Simon hem kim onunnandı, gittilär İisusu aaramaa.

37Açan buldular, dedilär Ona: «Hepsi Seni aarêêr».

38O cuvap etti onnara: «Gidelim dolay küülerä /hem kasabalara/, ki orada da nasaat edeyim, zerä bunun için çıkıp-geldim».

39Gitti, nasaat etsin bütün Galileyanın sinagogalarında da fena duhları çıkarsın.

Lepralı hasta paklanêr

40İisusa geldi bir lepralı adam, diz çöktü Onun önündä da yalvardı: «Eer istärseydin, var nasıl beni paklayasın».

41İisusun canı acıdı da, uzadıp elini, diidi ona da dedi: «İsteerim, paklan!»

42Birdän lepra onu braktı, da bu adam paklandı.

43İisus tez yollandırdı onu da sıkıdan sımarladı:

44«Bak, sölämeyäsin kimseyä, ama git da gösteril popaza. Kendi paklanman için getir ne Moisey sıraladı, ki şaatlık olsun insana».

45Bu adam sa, çıkıp oradan, başladı sölemää hem haber vermää bunun için hererdä. Ölä, ani sora İisus hiç bir kasabaya açıkta girämärdi. O dışanda, sapa erlerdä durardı, da insan her taraftan Ona gelärdi.

Currently Selected:

Mark 1: GagNTL

Highlight

Copy