WƖAA DƖ-SUOMUŊ 37

Josɛf duoso

1Jekɔb hɔŋ Kɛnaŋ tinteeŋ lɛ nɛ, nɩmɛ nɛ ʋ nyɩmma ma fa hɔŋ.

2Jekɔb arɩ ʋ doho nɩaa wɩaa nɛ ŋ-la:

Josɛf fa ŋaa jɩsɩŋ fii arɩ balɩpɛ nɛ, ka ʋ dɩ ʋ naambiiriŋ fa dɩdaa pʋsʋŋ. Ʋ naambiiri-la naamba nɛ fa Biliha arɩ Zilipa, ʋ nyɩmma haalaa. Ŋɩɩ nɛ Josɛf kʋ bʋl wʋbɔŋ a mʋ tɩgɛ ʋ naambiiriŋ lɛ a pɩ ba nyɩmma.

3Iziral fa cho Josɛf nɛ a kɩɩ ʋ biiri-la kala, bɛɛ wɩaa ʋ fa hɩɛsa nɛ aŋ lʋlʋ. Ŋɩɩ nɛ ʋ yɛrɛ gɛrɩ-zɔŋ kʋbala a pʋ. 4Josɛf naambiiriŋ sɩ na arɩ ba nyɩmma chou a kɩɩba, ba bɛrʋ a bɩ wʋzɔŋ kala bʋlaa pʋ.

5Tapʋlɩɩ kʋbala Josɛf pɩŋ doŋ a duosi a sii bʋla pɩ ʋ naambiiriŋ, ba wasa bɛrʋ woruŋ. 6Ʋ bʋla pɩba, “Má jegile mɩ duoso-la mɩ sɩ duoso. 7Mɩ dɩ ma nɛ kʋŋ mɩaa baga lɛ a vɔɔ hɩhɛ dɔŋɔ, ŋɩɩ nɛ mɩ kʋa guu sii chɩŋ tegi tegi, ka ma kɩaa kʋ chɩna golli mɩ kʋa a kpirimi ʋ sɩpaaŋ.”

8Ŋɩɩ nɛ ʋ naambiiri-la pɩɛsʋ, “Ŋ saa bɩɩna ŋ nɛ jaŋ ŋaa la tʋɔŋ kuoro, koo ŋ nɛ jaŋ bibenla?” Ŋɩɩ nɛ ba wasa bɛrʋ woruŋ a tɩŋ duoso-la wɩaa ʋ sɩ bʋla pɩba.

9Ŋɩɩ nɛ Josɛf bɩra duosi, a bɩra bʋla pɩ ʋ naambiiriŋ. Ʋ sɩ, “Má jegile nɩɩ, mɩ bɩra duoso nɛ, lɛɛlɛ mɩ duoso a na arɩ wɩɩpɔsʋŋ arɩ chɛnɛ arɩ chɛnwʋlaa fii arɩ kʋbala, dɩ ba kala kpirimi mɩ sɩpaaŋ.”

10Ʋ sɩ bʋla pɩ ʋ nyɩmma, ŋɩɩ nɛ ʋ nyɩmma kpɩaʋ lɛ a bʋl, “Bɛɛ kʋŋ duoso nɛ ŋ duosi ŋɩɩ?” Mɩ dɩ ŋ naaŋ arɩ ŋ naambiiriŋ jaŋ sɛnɛ kʋ kpirimi tinteeŋ ŋ sɩpaaŋ? 11Josɛf naambiiriŋ yaraa fa bibieri ʋ nyuŋ woruŋ, ka ʋ nyɩmma-na joŋ wɩɩ-la hɛ ʋ nyuŋ lɛ.

Josɛf naambiiriŋ joŋu yallɛ

12Ŋɩɩ nɛ Josɛf naambiiriŋ kɛŋ ba nyɩmma pʋsʋŋ kaa mʋ kʋdaalɩŋ a kpagɛ Sɛkɛm. 13Ŋɩɩ nɛ Iziral bʋla pɩ Josɛf, “Ŋ naambiiriŋ mʋ kʋdaalɩŋ nɛ a kpagɛ Sɛkɛm, kɔ dɩ mɩ tɩmɩŋ ba teeŋ.” Josɛf sɛɩ.

14Ŋɩɩ nɛ ʋ bʋla pʋ, “Mʋ na ŋ naambiiriŋ arɩ pʋsʋ-la, dɩ wɩɩ nɛ jʋʋba, ŋ mɩɩra kʋ bʋla pɩmɛ.” Ŋɩɩ nɛ ʋ nyɩmma tɩmʋ ʋ lɩɩ Hɛbʋrɔŋ fuonaa-la lɛ a mʋ.

Josɛf sɩ mʋ yi Sɛkɛm, 15ŋɩɩ nɛ baal kʋbala naʋ dɩ ʋʋ gɔllɛ ŋmaŋkaa-la lɛ. Ʋ pɩɛsʋ, “Bɛɛ kʋŋ nɛ ŋ chɩchɛ?”

16Ŋɩɩ nɛ ʋ bʋl, “Mɩɩ chɛ mɩ naambiiriŋ nɛ. Ŋ jaŋ wuo dagɛmɛ lee-la ba sɩ hɛ aa daa ba pʋsʋŋ?”

17Ŋɩɩ nɛ baal-la bʋla pʋ, “Ba sʋrɩsɛ daha nɛ. Mɩ nɩa dɩ ba sɩ baa chɛ dɩ ba mʋ Dotaŋ nɛ.”

Ŋɩɩ nɛ Josɛf kiri ba harɩŋ a mʋ naba Dotaŋ lɛ. 18Ŋɩɩ nɛ ʋ naambiiriŋ naʋ dɩ-bolii a vʋʋrɛ dɩ ba kpʋʋ, ka ʋ ha bɩ ba yie. 19Ba bʋla pɩ dɔŋɔ, “Na duduo-suru-la nɩɩ kɔ.” 20Má leŋ dɩ la kpʋʋ a joŋu hɛ vilee deemba dɔŋɔ tʋɔŋ aŋ bʋl dɩ gɩrɩŋ kʋŋ nɛ kaa chaŋ, ka dɩ la na ʋ duoso-la bʋbʋɔŋ sɩ jaŋ chɩŋ ŋɩɩ.

21Ama Rubiŋ sɩ nɩɩ wɩɩ-la ba sɩ vʋʋra, ʋ chɩchɛ dɩ ʋ laa Josɛf ta ba nɩsɩŋ lɛ. Ŋɩɩ nɛ ʋ bʋl, “Má sɩ́ leŋe la kpʋʋ.” 22Má sɩ́ leŋe dɩ chal kala jaasɛ. Má joŋu yuo hɛ viliŋ deeŋ tʋɔŋ gɩrɩŋ deeŋ lɛ, ama má sɩ́ leŋe la kpʋʋ. Rubiŋ faa bʋl wɩaa deemba kala aa chɛ ʋ laa Josɛf ta nɛ a kɛnʋ mɩɩra mʋ pɩ ʋ nyɩmma.

23Josɛf sɩ kʋ yi ʋ naambiiriŋ, ba gurigu a wuri ʋ gɛrɩ-zɔŋ-la ʋ fa sɩ laala. 24Ŋɩɩ nɛ ba joŋu a yuo hɛ vil-la tʋɔŋ. Lɩɩŋ koo kʋŋkala fa tuo vil-la tʋɔŋ.

25Ba sɩ hɔnɔ dɩ ba dii kɩaa, ba na dɩ Ɩsɩmɛl doho nɩaa kɛŋ ba bʋntaŋŋaba kɩɛla to dɔŋɔ a lɩɩ Gɩlɩad tinteeŋ dɩɩrɩŋ a kʋkɔ. Ba bʋntaŋŋaba fa chʋŋ tegisiŋ nɛ, nʋʋ-sʋɔrʋsʋŋ, tɩɩ-kel-zɔŋŋɔɔ arɩ tɩɩ-nɛŋ-zɔŋŋɔɔ ba sɩ yie joŋo hɛ kʋdiilee lɛ ba sɩŋ a kaa mʋmʋ Ijipiti tinteeŋ.

26Ŋɩɩ nɛ Juda bʋla pɩ ʋ naambiiriŋ “Bɛɛ nyʋʋrɩɩ nɛ la jaŋ na dɩ la nɛ kpʋ la naambie aŋ bʋl la bɩ ʋ sʋʋŋ lɛ jɩŋ? 27Má leŋ la yallʋ pɩ Ɩsɩmɛl tɩŋŋaa aŋ sɩ́ wʋbɔŋ kala ŋaa ʋ lɛ, bɛɛ wɩaa ʋ ŋaa la naambii nɛ a ŋaa la tɩtɩa chalɩŋ.” Ŋɩɩ nɛ ba sɛɩ ʋ nii-la.

28Ɩsɩmɛl doho nɩaa bayalɩa-la sɩ kʋʋ bal, ŋɩɩ nɛ Josɛf naambiiriŋ kɛnʋ lɩɩsɛ vil-la tʋɔŋ a yallʋ warɩpʋla mara a pɩba ba kɛnʋ mʋ Ijipiti tinteeŋ.

29Rubiŋ sɩ mɩɩra kɔ vil-la leriŋ dɩ Josɛf tuo vil-la tʋɔŋ. Ʋ tʋɔŋ chei, ʋ kɛŋ ʋ gɛnnɩŋ kɩɛsɛ. 30Ŋɩɩ nɛ ʋ mɩɩra mʋ ʋ naambiiriŋ teeŋ a bʋla pɩba, “Bile tuo vil-la tʋɔŋ, bɛɛ nɛ mɩ jaŋ ŋaa?” 31Ŋɩɩ nɛ ba kpʋ bʋʋna a kɛŋ Josɛf gɛrɩŋ yuu ʋ chalɩŋ.

32Ŋɩɩ nɛ ba mʋ dɩa a joŋ gɛrɩ-la arɩ chal-la a kaa mʋ dagɛ ba nyɩmma aŋ bʋl, “Gɛrɩŋ deeŋ nɛ la na, bee na ŋ nanʋal-la gɛrɩŋ dee?” 33Ŋɩɩ nɛ ʋ beŋ aŋ bʋl, “Oo, ʋ nɛ. Gɩrɩŋ kʋŋ nɛ kɛnʋ chaŋ, kʋŋ nɛ sɛnɛ kɛŋ Josɛf pʋɔsɛ.”

34Ŋɩɩ nɛ Jekɔb kɛŋ ʋ gɛrɩŋ kɩɛsɛ a tɩŋ ʋ tʋɔŋ sɩ cheye aŋ paa tʋɔ-chei gɛnnɩŋ laalɛ aŋ yel ʋ nanʋala wɩaa tapʋl-daŋ. 35Ŋɩɩ nɛ ʋ hambolibiisiŋ arɩ ʋ toloo kala pʋ kenyiri dɩ ʋ leŋ, ama ʋ vɩa aŋ yiyel aŋ bʋl, “Mɩ jaŋ yel ŋɩɩ a mʋ sʋʋ a mʋ mɩ bie teeŋ, aŋ ha yiyel ʋ wɩaa.” 36Ŋɩɩ nɛ Ɩsɩmɛl doho nɩaa kɛŋ Josɛf mʋ yalla pɩ Pɔtɩfa, Ijipiti tinteeŋ lɛ. Pɔtɩfa fa ŋaa laalɩyuoro-la sɩɩ pɔ Ijipiti tinteeŋ kuoro nɩhɩaŋ nɛ.

Currently Selected:

WƖAA DƖ-SUOMUŊ 37: SIS

Highlight

Copy