WƖAA DƖ-SUOMUŊ 38

Juda arɩ Tama

1Bʋa-la lɛ, Juda leŋ ʋ naambiiriŋ aŋ mʋ hɛ Adulam tɩɩna kʋbala teeŋ baa yɩrɛ Hira. 2Nɩmɛ nɛ Juda na Kɛnaŋ tɩŋŋaa tolo kʋbala, ʋ nyɩmma yɩrɩŋ nɛ Sʋa. Ʋ jaaʋ ba pɛ bɔsɔ. 3Ʋ kɛŋ luoruŋ a lʋl hambolibie pʋ. Ʋ hɛ ʋ yɩrɩŋ Ɛɛ. 4Haal-la bɩra kɛŋ luoruŋ a lʋl hambolibie a hɛ ʋ yɩrɩŋ Onaŋ. 5Ŋɩɩ nɛ ʋ ha bɩra lʋl hambolibie a hɛ ʋ yɩrɩŋ Sɛla. Juda fa hɛ Kɛzɩb tinteeŋ lɛ nɛ, ka ba lʋl Sɛla.

6Ŋɩɩ nɛ Juda jaa haala pɩ ʋ bii-hɩaŋ Ɛɛ. Ʋ yɩrɩŋ nɛ Tama. 7Ama Ɛɛ fa ŋaa nɩbɔŋ nɛ La TƖƖNA teeŋ, ŋɩɩ nɛ La TƖƖNA kpʋʋ.

8Ŋɩɩ nɛ Juda bʋla pɩ Onaŋ, “Joŋ ŋ malɩma haala jaa dɩ ma lʋl biiriŋ a pɩ ŋ malɩma.” 9Ama Onaŋ sɩ jɩma arɩ ʋ dɩ Tama nɛ lʋl biiriŋ bɩ jaŋ ŋaa ʋ kɩaa, dɩ ʋ dɩ haal-la nɛ pɛ bɔsɔ na-kala, ʋ yie fɩɩ bafɩɩrɩŋ tɩta tinteeŋ nɛ dɩ ʋ sɩ́ biiriŋ lʋla pɩ ʋ malɩma. 10La TƖƖNA na wɩɩ-la ʋ sɩ ŋaa, dɩ ʋ ŋaa wʋbɔŋ nɛ, ŋɩɩ nɛ ʋ kpʋ ʋ ma.

11Ŋɩɩ nɛ Juda bʋla pɩ ʋ bii-haala Tama, “Mʋ hɔŋ ŋ nyɩmma dɩa lɛ a ŋaa yo-haal, ka dɩ mɩ bie Sɛla waa.” Juda fa bɩɩna arɩ Sɛla ma nɛ jaaʋ, ʋ jaŋ sʋʋ arɩ ʋ malɩmaba sɩ sʋʋ ŋɩɩ. Ŋɩɩ nɛ Tama mʋ hɔŋ ʋ nyɩmma dɩa lɛ.

12Ʋ sɩ diene kʋ magɛ ŋɩɩ, Juda haala sʋʋ. Ʋ fa ŋaa Sʋa tolo nɛ. Juda sɩ yel yoho dɛrɛ, ŋɩɩ nɛ ʋ mʋ taŋ-la ba sɩɩ yɩrɛ Tɩmɩna, baala-la sɩɩ kɛ ʋ pie-pʋnaa teeŋ, ʋ dɩ ʋ nandɔŋɔ Hira, Adulam tɩɩna-la.

13Ba sɩ bʋla pɩ Tama arɩ ʋ bala nyɩmma ka mʋ Tɩmɩna dɩ ʋ kɛ ʋ pie-pʋnaa, 14ʋ sii wuri ʋ yoha-gɛnnɩŋ a bil aŋ joŋ nyu-bɛlɛ tɔ ʋ tɩtɩa, dɩ Juda sɩ́ ʋ jɩŋ. Ŋɩɩ nɛ aŋ lɩɩ hɔŋ wombii-la sɩɩ jʋʋ Enem a mʋmʋ Tɩmɩna, bɛɛ wɩaa ʋ na dɩ Sɛla waa nɛ, ka ba bɩ ʋ joŋo pʋ dɩ ʋ ŋaa ʋ bala.

15Juda sɩ na dɩ Tama tɔ nyu-bɛlɛ ŋɩɩ, ʋ bɩɩnɛ arɩ hachɔrʋŋ nɛ. 16Ʋ bɩ jɩŋ arɩ ʋ bii-haala nɛ ŋɩɩ, ŋɩɩ nɛ ʋ mʋ ʋ teeŋ a bʋla pʋ, “Leŋ dɩ mɩ kɛnɩŋ pɩŋ.”

Ŋɩɩ nɛ tolo-la pɩɛsɛ, “Bɛɛ kʋŋ nɛ ŋ jaŋ pɩmɛ?”

17Ŋɩɩ nɛ ʋ sɩ, “Mɩ jaŋ lɩɩsɛ bʋ-bie mɩ bʋʋna tʋɔŋ a pɩŋ.”

Tama bɩra pɩɛsɛ, “Bɛɛ kʋŋ nɛ ŋ jaŋ joŋo bil bʋbʋɔŋ aŋ-na kɛŋ bʋʋŋ-la kɔ?”

18Juda pɩɛsɛ, “Bɛɛ kʋŋ nɛ ŋ chɩchɛ mɩ joŋo bil bʋbʋɔŋ?”

Ʋ sɩ, “Lɩɩsɛ ŋ nenii-pɩrɩ-la ŋ yɩrɩŋ sɩ hɛ ʋ lɛ arɩ ʋ ŋmɛnɩŋ arɩ ŋ dantɩga a pɩmɛ.” Ŋɩɩ nɛ ʋ joŋ ba kala pʋ aŋ kɛnʋ pɩŋ ʋ kɛŋ luoruŋ. 19Tama sii mʋ puri ʋ nyu-bɛlɛ-la bil aŋ joŋ ʋ yoha-gɛnnɩŋ laalɛ.

20Ŋɩɩ nɛ Juda mʋ dɩa a kɛŋ bʋʋŋ-la pɩ ʋ nandɔŋɔ Adulam tɩɩna-la dɩ ʋ kaa mʋ pɩ haal-la aŋ laa kɩalɩŋ ʋ sɩ joŋo bil bʋbʋɔŋ. Ama ʋ sɩ mʋa ʋ bɩ ʋ na. 21Ŋɩɩ nɛ ʋ pɩɛsɛ baala-la sɩ hɛ lee-la,

“Nɩɩ nɛ hachɔrʋŋ-la fa sɩ hɔŋ Enem wombiiŋ niiŋ hɛ?” Ŋɩɩ nɛ ba bʋl, “Hachɔrʋŋ kala tuo daha.”

22Ʋ mɩɩra mʋ Juda teeŋ a bʋl, “Mɩ bɩ ʋ na, ŋɩɩ nɛ mɩ pɩɛsɛ baala-la ma sɩ hɛ lee-la. Ba ma sɩ hachɔrʋŋ kala tuo daha.”

23Juda bʋl, “Leŋ dɩ ʋ kɛŋ kɩalɩŋ, dɩ ŋɩɩ dee la hɩɩsɩŋ jaŋ lɩɩ dɩ nɩaa mʋmɔnla. Mɩ folo tɩmɩŋ ŋ kɛŋ bʋʋŋ-la mʋ dɩ ŋ puu, ama ŋ bɩ ʋ na.”

24Chɛnsɩŋ batori sɩ kʋ bal, ba bʋla pɩ Juda, “Ŋ bii-haala Tama ŋaa hachɔrʋŋ wɩaa nɛ a kɛŋ luoruŋ.” Ŋɩɩ nɛ Juda bʋl, “Má kɛnʋ kaa kʋ lɩɩ nyɩgɛ dɩ ʋ sʋʋ.”

25Ba sɩ kɛnʋ kaa kʋ lɩɩ, ŋɩɩ nɛ ʋ tɩma yɩrɛ ʋ bala nyɩmma a bʋl, “Baal-la sɩ tɩɩ kɩaa deemba nɛ hɛ luoruŋ deeŋ pɩmɛ. Bee na, ŋ jaŋ wuo jɩŋ nɩɩ-la sɩ tɩɩ nenii-pɩrɩŋ deeŋ sɩ kɛŋ yɩrɩŋ arɩ ʋ ŋmɛnɩŋ arɩ dantɩga deeŋ?”

26Ŋɩɩ nɛ Juda beŋ a jɩmba aŋ bʋl, “Ʋ nɛ kɛŋ wʋtɩtɩɩ a kɩɩmɛ, bɛɛ wɩaa mɩ nɛ vɩa dɩ mɩ joŋu pɩ mɩ bie Sɛla dɩ ʋ jaa.” A lɩɩ ŋɩɩ harɩŋ ʋ dɩ Juda bɩra bɩ bɔsɔ pɛ.

27Ʋ lʋlʋŋ sɩ yie, ba na dɩ hambolibii-daalɩarɩŋ nɛ hɛ ʋ tʋɔŋ lɛ. 28Ʋ sɩ kʋʋ lʋl, dɔŋɔ kɛŋ ʋ nɩsɩŋ kʋ lɩɩ, ŋɩɩ nɛ hachagɩra joŋ ŋmɛŋ-fɩaŋ a vɔɔ ʋ nɩsɩ-la lɛ aŋ bʋl, “Deeŋ nɛ laa sɩpaaŋ kʋ lɩɩ.” 29Ama bile kɛŋ ʋ nɩsɩŋ mɩɩra jʋʋ, ka dɔŋɔ-la mɩɩra laa sɩpaaŋ kʋ lɩɩ. Ŋɩɩ nɛ hachagɩrʋ-la bʋl, “Ɛɛ nɛ ŋ ŋaa kʋ lɩɩ?” Ŋɩɩ nɛ ba hɛ ʋ yɩrɩŋ Pɛrɛs. Ʋ bʋbʋɔŋ nɛ gɩrɩma lɩɩ. 30Ŋɩɩ nɛ ʋ naambile ma ba fa sɩ joŋ ŋmɛŋ-fɩaŋ vɔɔ nɩsɩŋ ma kʋ lɩɩ. Ba hɛ ʋ yɩrɩŋ Zɛra.

Currently Selected:

WƖAA DƖ-SUOMUŊ 38: SIS

Highlight

Copy