WƖAA DƖ-SUOMUŊ 31

Jekɔb fá Labaŋ nɩsɩŋ lɛ

1Ŋɩɩ nɛ Jekɔb nɩɩ Labaŋ biiriŋ ka bʋl, “Jekɔb laa la nyɩmma dʋa kala a ŋaa kɩaa tɩɩna.” 2Ŋɩɩ nɛ Jekɔb na arɩ Labaŋ wʋŋaalaa bɩra bɩ zɔŋ ʋ teeŋ arɩ ba fa sɩ zɔmɔ ŋɩɩ.

3Ŋɩɩ nɛ La TƖƖNA bʋla pɩ Jekɔb, “Mɩɩra mʋ ŋ nyɩmma arɩ ŋ naambiiriŋ tinteeŋ, mɩ jaŋ hɛ ŋ teeŋ.”

4Ŋɩɩ nɛ Jekɔb tɩma yɩrɛ ʋ haala Rakɛl arɩ Liya dɩ ba kɔ pɔkɔŋ nyuŋ, lee-la ʋ pʋsʋŋ sɩ hɛ. 5Ʋ bʋla pɩba, “Mɩ na arɩ ma nyɩmma wʋŋaalaa bɩra bɩ faafaa-la naga mɩ teeŋ, ama mɩ nyɩmma Wɩa nɛ chɩŋ mɩ harɩŋ. 6Ma kala jɩma arɩ mɩ kɛŋ mɩ doluŋ kala nɛ a tɩma pɩ ma nyɩmma. 7Ama ma nyɩmma ha gʋrɩmɛ nɛ woruŋ a kɛŋ mɩ time bɩrɩmɛ naansɩɩŋ fii. Arɩ ŋɩɩ kala Wɩa ha bɩ leŋe ʋ ŋaa wʋbɔŋ mɩ lɛ. 8Dɩ Labaŋ nɛ sɩ pʋsʋ-la kala sɩ ŋaa ŋmʋna-ŋmʋna jaŋ ŋaa mɩ time, pʋsʋ-la kala yie lʋl bii-ŋmʋŋmʋnaa nɛ, dɩ ʋ nɛ bɩra sɩ pʋsʋ-la sɩ lagɩsa nɛ jaŋ ŋaa mɩ time, ba kala yie lʋl biiri-la sɩ lagɩsa lagɩsa nɛ. 9Wɩa nɛ laa ma nyɩmma pʋsʋŋ a pɩmɛ.

10Ʋ kʋ yi bʋa kʋbala, pʋsʋ-la sɩɩ chɛ ba jɩl, mɩ duosi a na arɩ gbuŋgbogusu-la sɩɩ chɛ dɩ ba jɩl bʋ-haala-la kala lagɩsa, aŋ pɛ ŋaa ŋmʋna-ŋmʋna. 11Mɩ duoso-la tʋɔŋ, Wɩa tɩndaara yɩrɛmɛ, ‘Jekɔb.’ Ŋɩɩ nɛ mɩ sɛɩ, ‘Namɛ nɛ ŋ-la.’ 12Ŋɩɩ nɛ Wɩa tɩndaarʋ-la bʋl, ‘Bee-na dɩ gbuŋgbogusu-la kala sɩɩ jɩl bʋʋna-la ŋaa ŋmʋna-ŋmʋna nɛ aŋ pɛ lagɩsa, bɛɛ wɩaa mɩ na wɩalɩŋ kala Labaŋ sɩ ŋaa ŋ lɛ nɛ. 13Mɩ nɛ ŋaa Wɩa-la sɩ kɛŋ mɩ tɩtɩa kʋ dagɩŋ Bɛtɛl lɛ. Nɩmɛ nɛ ŋ joŋ tabɩɩŋ pɛ ʋ nagɛ jebiiŋ ŋ joŋ nʋʋŋ bɩsa wurisi. Nɩmɛ nɛ ŋ ta niiŋ a pɩmɛ. Lɛɛlɛ sii tinteeŋ deeŋ lɛ lɩma lɩma a mɩɩra mʋ ŋ jaŋ.’ ”

14Ŋɩɩ nɛ Rakɛl arɩ Liya pɩɛsɛ, “La ma ha bɩra kɛŋ kpaal nɛ la nyɩmma sɩ jaŋ sʋʋ aŋ ka dʋa-la tʋɔŋ? 15Ʋ bɩ bene dɩ la ŋaa nʋhʋɔraa nɛ ʋ jonla yallɛɛ? Ʋ bɩ naga arɩ ʋ yallɛla dʋndʋŋ nɛ, ama ʋ dii kɩalɩŋ ʋ sɩ laa la bʋbʋɔŋ lɛ kala nɛ. 16Wʋtɩtɩɩ, dʋa-la kala Wɩa sɩ laa la nyɩmma teeŋ ŋaa la dɩ la biiriŋ dʋa nɛ. Ŋɩɩ wɩaa, wɩɩ-la kala Wɩa sɩ dagɩŋ, ŋaa ŋɩɩ.”

17Ŋɩɩ nɛ Jekɔb joŋ ʋ biiriŋ arɩ ʋ haalaa a hɛ bʋntaŋŋaba nyuŋ 18a kiri ʋ pʋsʋŋ kala hɛ ʋ sɩpaaŋ arɩ kɩalɩŋ kala ʋ sɩ dʋa Mesopotemia tinteeŋ dɩ ʋ mʋ Kɛnaŋ tinteeŋ, ʋ nyɩmma Aɩzɩk leriŋ.

19Labaŋ sɩ mʋa dɩ ʋ kɛ ʋ piesee pʋnaa, Rakɛl jʋʋ gaa paa ʋ nyɩmma tɔŋŋɔɔ. 20Jekɔb ma nyɩsɛ Labaŋ, Siiria tɩɩna-la aŋ bɩ bʋla pʋ arɩ ʋ fá viviiri nɛ. 21Ŋɩɩ nɛ ʋ kɛŋ ʋ dʋa kala fá a chol fuo-la ba sɩɩ yɩrɛ Yufireti a chaasɛ Gɩlɩad tintee-la peelee sɩ yʋga a mʋ.

Labaŋ kiri Jekɔb harɩŋ

22Jekɔb sɩ lɩɩ fá, chɛ-tori chɛɛŋ ba bʋla pɩ Labaŋ arɩ Jekɔb fá nɛ. 23Labaŋ kɛŋ ʋ naambiiriŋ ba kiri Jekɔb harɩŋ tapʋlaa balɩpɛ a mʋ puu Gɩlɩad tintee-la peelee sɩ yʋga leriŋ. 24Ŋɩɩ nɛ Wɩa kɔ Labaŋ, Siiria tɩɩna-la teeŋ tɩtaŋɩŋ duosoo tʋɔŋ a bʋla pʋ, “Pɔ dɩ ŋ sɩ́ wɩɩkala bʋl Jekɔb teeŋ, wʋzɔŋ koo wʋbɔŋ.”

25Jekɔb hɛ ʋ lɛbɩŋ Gɩlɩad tintee-la peelee sɩ yʋga lɛ, aŋ ka Labaŋ arɩ ʋ naambiiriŋ kʋ puuba a ma hɛ ba lɛbɩŋ lee-la tɩtɩa. 26Ŋɩɩ nɛ Labaŋ pɩɛsɛ Jekɔb, “Bɛɛ nɛ ŋ ŋaa ŋ-la? Ŋ nyɩsɛmɛ nɛ a paa mɩ toloo a nagɛ yosuŋ ba sɩ yuo laalɩŋ kɛsɛ. 27Bɛɛ nɛ tɩɩ ŋ lʋara fá aŋ bɩ bʋla pɩmɛ? Dɩ ŋ nɛ fa bʋla, mɩ fa jaŋ leŋ dɩ ba du chenniŋ a chɩgɩsɛ chɩnchɩgɩsɩŋ a yɩɩ yɩɩlaa a kɛnɩŋ lɩɩ hɛ wombiiŋ lɛ arɩ tʋɔtɔrʋŋ. 28Bɛɛ kʋŋ wʋyaayaa nɛ ŋ ŋaa ŋɩɩ ŋ sɩ bɩ leŋe mɩ guori mɩ nihee arɩ mɩ toloo a taba? 29Mɩ kɛŋ doluŋ mɩ fa sɩ jaŋ wuo ŋaa wʋbɔŋ kala ŋ lɛ, ama dɩa tɩtaŋɩŋ Wɩa-la sɩ ŋaa ŋ nyɩmma Wɩa bʋla pɩmɛ arɩ mɩ pʋpɔ mɩ sɩ́ wɩɩkala bʋl ŋ teeŋ, wʋzɔŋ koo wʋbɔŋ. 30Lɛɛlɛ ŋ cho dɩ ŋ viiri nɛ, bɛɛ wɩaa ŋ nyɩmma dɩa hɩɛnɩŋ kɛnɩŋ nɛ. Bɛɛ nɛ saa tɩɩ ŋ pɛ gaa paa mɩ tɔŋŋɔɔ?”

31Ŋɩɩ nɛ Jekɔb bʋla pɩ Labaŋ, “Fawʋllʋŋ nɛ fa kɛmmɛ. Mɩ bɩɩna arɩ ŋ jaŋ kɛŋ ŋ toloo laa mɩ teeŋ arɩ doluŋ. 32Dɩ ŋ nɛ na ŋ tɔmɔ-la la kʋŋkala teeŋ, sɩ́ leŋe dɩ tɩɩna kɛŋ mɩɩsɩŋ. La naambiiriŋ deemba sɩpaaŋ, beŋ dɩ ŋ nɛ na ŋ kʋŋkala la teeŋ, ŋ jaŋ wuo laa ŋ kʋa.” Ama Jekɔb fa bɩ jɩŋ arɩ Rakɛl nɛ gaa paa tɔmɔ-la.

33Ŋɩɩ nɛ Labaŋ jʋʋ Jekɔb lɛbɩŋ, a jʋʋ Liya ma kʋa, ʋ jʋʋ ketie-la balɩamɩŋ lɛŋŋɛɛ a bɩ kʋŋkala na. Ʋ sɩ lɩɩ Liya lɛbɩŋ kʋ lɩɩ, ŋɩɩ nɛ ʋ jʋʋ Rakɛl ma lɛbɩŋ. 34Ama Rakɛl joŋ tɔmɔ-la a hɛ bʋntaŋŋa kpasa bʋbʋɔŋ a jɩla hɔŋ ba nyuŋ, ka Labaŋ beŋ lɛŋŋɛ-la tʋɔŋ a bɩ kʋŋkala na.

35Ŋɩɩ nɛ Rakɛl bʋla pɩ ʋ nyɩmma, “Mɩ tɩɩna, sɩ́ leŋe dɩ ŋ baanɩŋ sii mɩ nyuŋ a tɩŋ mɩ sɩ bɩ jaŋ wuo sii chɩŋ ŋ sɩpaaŋ, mɩɩ na mɩ hakɩaa nɛ.” Labaŋ sɩ gbille, ʋ bɩ kʋŋkala na.

36Jekɔb na baanɩŋ Labaŋ nyuŋ a pɩɛsʋ, “Bɛɛ nɛ mɩ ŋaa cheyiŋ? Mɩ wʋcheeliŋ nɛ bɛɛ a maga dɩ ŋ kire to mɩ harɩŋ? 37Ŋ sɩ beŋ mɩ kɩaa kala tʋɔŋ, ŋ na ŋ kʋŋ ba tʋɔŋ? Kʋ-la kala ŋ sɩ na ʋ ŋaa ŋ kʋŋ, kaa kʋ bil la kala sɩpaaŋ dɩ ba jɩma pɩla.

38Jɩsɩŋ mara-la kala mɩ sɩ hɛ ŋ teeŋ, ŋ pʋsʋŋ kʋŋkala bɩ chee ta, mɩ ha bɩ ba kʋŋ ma gaa dii. 39Dɩ baga kʋŋ nɛ kɛŋ pʋsʋ-la kʋŋ, ʋ yie ŋaa mɩ wɩɩ nɛ, mɩ tɩtɩa nɛ yie tiŋ. Dɩ kʋŋ ma nɛ ba gaa wɩɩhɛyɛ koo tɩtaŋɩŋ, ŋ yie leŋ mɩ tiŋ nɛ. 40Hɛɛ-la mɩ sɩ na nɛ ŋ-la: Wɩɩhɛyɛ, wɩa yie kpʋmɛ nɛ woruŋ, tɩtaŋɩŋ ma waarɩŋ ma yie kpʋmɛ nɛ woruŋ, mɩ bɩ doŋ ka pɩŋ. 41Jɩsɩŋ mara-la kala mɩ fa sɩ hɛ ŋ dɩa lɛ, ŋ-la nɛ ŋaa mɩ lɛ. Mɩ tɩŋ jɩsɩŋ fii arɩ banɛsɛ nɛ pɩŋ aŋ laa ŋ toloo balɩa, aŋ bɩra tɩŋ jɩsɩŋ balɩdʋ dɩ mɩ laa pʋsʋŋ, ka ŋ kɛŋ mɩ time bɩrɩmɛ naansɩɩŋ fii. 42Dɩ mɩ nyɩmma Abɩraham Wɩa arɩ Aɩzɩk sɩɩ fá Wɩa-la fa bɩ mɩ harɩŋ chɩna, ŋ fa jaŋ lemmi ta arɩ na-hɩllɩŋ. Ama Wɩa na hɛɛ-la mɩ sɩ na nɛ ŋ nɩsɩŋ lɛ, ŋɩɩ nɛ tɩɩ Wɩa laa pɛ mɩ lɛ a dɩa bʋl wɩaa pɩŋ tɩtaŋɩŋ ŋɩɩ.”

43Ŋɩɩ nɛ Labaŋ bʋl, “Haalaa deemba ŋaa mɩ toloo nɛ, biiri-la ŋaa mɩ biiriŋ, pʋsʋ-la ma ŋaa mɩ pʋsʋŋ nɛ, kɩaa deemba kala ŋ sɩ na ŋaa mɩ kɩaa nɛ. Ama wʋbɛɛ nɛ mɩ jaŋ ŋaa pɛ mɩ toloo deemba arɩ ba biiriŋ deemba ba sɩ lʋla lɛ jɩnɩŋ? 44Lɛɛlɛ, leŋ dɩ la bil niiŋ a pɩ dɔŋɔ dɩ ʋ ŋaa wɩɩ la pɛgɛ.”

45Ŋɩɩ nɛ Jekɔb joŋ tabɩɩŋ a pɛ ʋ nagɛ jebiiŋ. 46Ŋɩɩ nɛ ʋ bʋla pɩ ʋ dɩa nɩaa, “Má paa tabɩaa hɛ dɔŋɔ lɛ.” Ŋɩɩ nɛ ba paa a hɛ dɔŋɔ lɛ ba chʋɔrɛ, ba hɔŋ nɩmɛ a dii kʋdiilee. 47Ŋɩɩ nɛ Labaŋ hɛ lee-la yɩrɩŋ Jega-Sahaduta, Jekɔb ma kɛŋ lee-la aa yɩrɛ Galeed.

48Ŋɩɩ nɛ Labaŋ bʋl, “Tabɩa-la sɩ chʋɔrɛ leriŋ deeŋ ma bɩra jaŋ ŋaa la dɩŋ pɛgɛ magɩl. Ŋɩɩ nɛ tɩɩ mɩ kɛŋ lee-la yɩrɛ Galeed.” 49Ʋ bɩra kɛŋ lee-la yɩrɛ Mɩzɩpa, aŋ bʋl, “La TƖƖNA jaŋ benla dɩ la nɛ pɔrɛ dɔŋɔ lɛ ma. 50Dɩ ŋ nɛ dɔgɩsɛ mɩ toloo koo dɩ ŋ nɛ bɩra jaa haalaa dɔnsʋŋ a pɛ ba lɛ, nʋʋkala tuo daha a na. Ama jɩŋ arɩ Wɩa-naa beŋ la kala nɛ.”

51Ŋɩɩ nɛ Labaŋ bɩra bʋla pɩ Jekɔb, “Na tabɩa-la la sɩ chʋɔra, na jebii-la ma sɩ hɛ la pɛgɛ nɛ ŋaa la magɩlɩŋ. 52Tabɩaa deemba sɩ chʋɔra arɩ tabɩɩ-la sɩ pɛ nɛ ŋaa la magɩlɩŋ arɩ mɩ bɩ jaŋ kieli tabɩaa deemba arɩ jebiiŋ deeŋ a kʋ ŋaaŋ wʋbɔŋ, ŋ ma bɩ jaŋ kieli jebii-la a kɔ mɩ teeŋ a ŋaamɛ wʋbɔŋ. 53Abɩraham Wɩa, Nahɔ Wɩa, arɩ ba nyɩmma Wɩa nɛ jaŋ jɩŋ la wɩɩŋ deeŋ pɩla.”

Ŋɩɩ nɛ Jekɔb ŋmɩɛsɛ Wɩa-la ʋ nyɩmma Aɩzɩk sɩɩ fá. 54Ŋɩɩ nɛ Jekɔb kpʋ pʋna a sʋl Wɩa peele-la tʋɔŋ a ŋaa kʋdiilee a yɩrɛ ʋ dɩa nɩaa ba kʋ dii. Ba sɩ dii kʋdiile-la dɛrɛ, ba chʋa peele-la tʋɔŋ.

55Chʋchʋɔ-fɩɛla Labaŋ sii guori ʋ nihee arɩ ʋ toloo a sʋl Wɩa pɩba, aŋ lemba aŋ mʋ dɩa.

Currently Selected:

WƖAA DƖ-SUOMUŊ 31: SIS

Highlight

Copy