WƖAA DƖ-SUOMUŊ 32

Jekɔb kɛŋ ʋ tɩtɩa hɛ dɔŋɔ dɩ ʋ cheŋ Ɛsɔ

1Jekɔb sɩ sii mʋmʋ, Wɩa tɩndaaraa chemu wombiiŋ lɛ. 2Jekɔb sɩ naba, ʋ bʋl, “Daha nɛ Wɩa hɛ.” Ŋɩɩ nɛ ʋ hɛ lee-la yɩrɩŋ Mahanem.

3Ŋɩɩ nɛ Jekɔb tɩŋ tɩndaaraa ba laa sɩpaaŋ mʋ bʋla pɩ ʋ naambie Ɛsɔ sɩ hɛ Sɛɛ lɛ, Ɛdɔm tinteeŋ. 4Jekɔb bʋl, “Dɩ ma nɛ mʋa, má bʋl ŋ-la a pɩ mɩ malɩma Ɛsɔ: ‘Ŋ ŋaana Jekɔb nɛ tɩa tɩndaarɩŋ deeŋ. Mɩ hɔŋ Labaŋ teeŋ a dieni nɛ a kʋʋ yi bʋa deeŋ lɛ. 5Mɩ kɛŋ nɛsɩŋ, kakusuŋ, piesee arɩ bʋʋnaa, tɩntɩnnaa, baalaa arɩ haalaa, mɩɩ pɩŋ tɩndaarɩŋ deeŋ dɩ ŋ tʋɔŋ tɔrɛ nɛ mɩ nyuŋ.’ ”

6Tɩndaara-la sɩ mɩɩra kɔ Jekɔb teeŋ, ba bʋla pʋ, “La mʋ ŋ naambie Ɛsɔ teeŋ nɛ. Ʋʋ kɔ dɩ ʋ chemiŋ nɛ arɩ nɩaa zɔɔ-banɛsɛ.”

7Ŋɩɩ nɛ fawʋllʋŋ faasa kɛŋ Jekɔb ʋ tʋɔŋ chei. Ʋ kɛŋ nɩalɩŋ sɩ hɛ ʋ teeŋ kaa kpaa leree balɩa, a kɛŋ ʋ pʋsʋ-la arɩ bʋntaŋŋaba kala ma kpaa ŋɩɩ tɩtɩa. 8Ʋ bɩɩnɛ ʋ tʋɔŋ lɛ, “Dɩ Ɛsɔ nɛ kɔ a yuo leriŋ dɔŋɔ, dɔŋɔ jaŋ fá.”

9Ŋɩɩ nɛ Jekɔb sʋl Wɩa a bʋl, “Mɩ nyɩmma Abɩraham Wɩa, mɩ nyɩmma Aɩzɩk Wɩa, ŋ nɛ bʋla pɩmɛ, dɩ mɩ mɩɩra mʋ mɩ tinteeŋ mɩ nɩaa teeŋ, dɩ ŋ jaŋ pɛ mɩ lɛ dɩ mɩ nɩsɩŋ jʋʋ woruŋ. 10Zile arɩ wʋtɩtɩɩ-la ŋ sɩ joŋo ŋaa mɩ-na ŋ tɩntɩnna lɛ, mɩ bɩ ŋɩɩ maga ka ŋ joŋo ŋaa mɩ lɛ. Dantɩga dʋndʋŋ nɛ mɩ kori a kieli Jɔdaŋ fuo-la, ama lɛɛlɛ mɩ kɛŋ pʋsʋŋ arɩ nɩaa leree balɩa nɛ. 11Mɩɩ sʋlʋŋ dɩ ŋ laamɛ ta mɩ naambie Ɛsɔ nɩsɩŋ lɛ. Mɩɩ fáʋ nɛ arɩ ʋ jaŋ kʋ yuo mɩ dɩ mɩ haalaa arɩ mɩ biiriŋ. 12Ama ŋ nɛ bʋla arɩ ŋ jaŋ pɛ mɩ lɛ a leŋ dɩ mɩ doho nɩaa pʋŋ a nagɛ hagɩlɩ-bumbugulo sɩ hɛ mʋgʋ-balɩŋ niiŋ nʋʋ sɩ bɩ jaŋ wuo dɩɩsɛ.”

13Jekɔb chʋa nɩmɛ tɩtaŋ-la. Kɩalɩŋ ʋ sɩ kɛnɛ ʋ tʋɔsɛ dɔnsʋŋ dɩ ʋ pɩ ʋ naambie Ɛsɔ: 14Bʋ-nɩɩnɩŋ zɔɔ-balɩa, gbuŋgbogusuŋ mara, pie-nɩɩnɩŋ zɔɔ-balɩa arɩ pie-belliŋ mara. 15Bʋntaŋŋɩ-nɩɩnɩŋ arɩ ba biiriŋ mara arɩ fii, nɛ-nɩɩnɩŋ mahɩŋ balɩa, nɛ-belliŋ fii, kaku-nɩɩnɩŋ mara arɩ kaku-belliŋ fii. 16Ʋ joŋ kɩaa deemba a hɛ ʋ tɩntɩnnaa nɩsɩŋ lɛ dɩ ba kire vɛŋ dabaŋ dabaŋ, aŋ bʋla pɩba, “Má laa sɩpaaŋ a kiri kɩalɩŋ vɩvɛŋ, aŋ ka wuoluŋ hɛ ba pɛgɛ.”

17Ʋ bʋla pɩ tɩntɩnnʋ-la sɩ laa sɩpaaŋ a bʋl, “Dɩ mɩ naambie Ɛsɔ nɛ chemiŋ a pɩɛsɩŋ a bʋl, ‘Ma nɛ kʋbɛɛba, nɩɩ nɛ maa mʋ? Kʋbɛɛ nɛ tɩɩ pʋsʋŋ deemba ma sɩ kire vɩvɛŋ?’ 18Má bʋl, ‘Ŋ tɩntɩnna Jekɔb nɛ tɩɩba. Ʋ sɩ dɩ la kaa mʋ dii zile pɩ ʋ nɩhɩaŋ Ɛsɔ nɛ. Ʋ nɛ hɛ la harɩŋ kʋkɔ.’ ”

19Ŋɩɩ tɩtɩa nɛ ʋ bʋla pɩ nɩlɩamɩŋ, nɩ-torimuŋ arɩ nɩkaanaa kala sɩɩ to pʋsʋ-la harɩŋ a bʋl, “Ŋ-la nɛ ma kala maga dɩ ma bʋla pɩ Ɛsɔ dɩ ma nɛ chemu. 20Má bʋla pʋ arɩ ʋ tɩntɩnna Jekɔb-na ha hɛ harɩŋ nɛ.” Ʋ sɩ bʋl ŋɩɩ, ʋ bɩɩna ʋ tʋɔŋ lɛ, “Mɩ kɛŋ kɩaa deemba kala laa sɩpaaŋ kaa mʋ dɩ mɩ sʋlʋ nɛ, ka dɩ ʋ laamɛ.” 21Ŋɩɩ nɛ ba kɛŋ Jekɔb chɔgɩta-la ʋ sɩ kaa mʋ dɩ ʋ pɩ Ɛsɔ laa sɩpaaŋ, ka ʋ chʋa lee-la.

Jekɔb arɩ Wɩa lobo Pɛnɩɛl lɛ

22Tɩtaŋ-la tɩtɩa nɛ Jekɔb sii kɛŋ ʋ haalaa balɩa arɩ ba ketiee balɩa arɩ ʋ biiriŋ fii arɩ kʋbala ba kieli Jabɔk fuoŋ. 23Ʋ sɩ kɛmba chol fuo-la ŋɩɩ, ʋ kɛŋ ʋ kʋŋkala ʋ sɩ kɛnɛ ma chol. 24Ŋɩɩ nɛ aŋ ka ʋ-na Jekɔb dʋndʋŋa fuo-la cholo. Baal kʋbala kʋ kɛnʋ ba loo ŋɩɩ halɩɩ taŋ pʋl. 25Baal-la sɩ na dɩ ʋ bɩ Jekɔb wuo, ʋ yi ʋ kɛrɛ lɛ, kɛrɩ-sɩɩŋ lɩɩ. 26Ŋɩɩ nɛ baal-la bʋl, “Jommi ta mɩ viiri, bɛɛ wɩaa taŋ pʋla nɛ.”

Ama Jekɔb bʋl, “Mɩ bɩ jaŋ leŋ dɩ ŋ mʋ, see dɩ ŋ sʋl Wɩa pɩmɛ.”

27Ŋɩɩ nɛ baal-la pɩɛsɛ, “Ŋ yɩrɩŋ nɛ bɛɛ?” Jekɔb bʋl, “Mɩ yɩrɩŋ nɛ Jekɔb.” 28Ŋɩɩ nɛ baal-la bʋl, “Ŋ yɩrɩŋ bɩra bɩ jaŋ ŋaa Jekɔb. Ŋ yɩrɩŋ nɛ Iziral, bɛɛ wɩaa ŋ kɛŋ Wɩa arɩ nuhuobiinee loo nɛ a lobo dii.”

29Ŋɩɩ nɛ Jekɔb bʋl “Mɩɩ sʋlʋŋ, dagɛ ŋ yɩrɩŋ pɩmɛ.” Ŋɩɩ nɛ baal-la bʋl, “Bɛɛ nɛ tɩɩ ŋ chɩchɛ dɩ ŋ jɩŋ mɩ yɩrɩŋ?” Ʋ bʋl ŋɩɩ aŋ sʋl Wɩa pʋ nɩmɛ.

30Ŋɩɩ nɛ Jekɔb kɛŋ lee-la yɩrɛ Pɛnɩɛl, aŋ bʋl “Mɩ na Wɩa nɛ arɩ mɩ sɩɩ-biiŋ aŋ bɩ sʋba.”

31Wɩa pɔsɔ jɩl nyuŋ dɩ Jekɔb lɩɩ Pɛnɩɛl lɛ a jujusi a tɩŋ ʋ kɛrɛ sɩ lɩa wɩaa. 32Ŋ-la wɩaa nɛ tɩɩ Iziral tɩŋŋaa bɩ nammɩa-la sɩ tɔ kʋŋkala kɛrɩ-sɩɩŋ ka chaŋ arɩ jɩnɩŋ kala, bɛɛ wɩaa Jekɔb lee-la nɛ baal-la yi lɩɩsɛ ŋɩɩ.

Currently Selected:

WƖAA DƖ-SUOMUŊ 32: SIS

Highlight

Copy