WƖAA DƖ-SUOMUŊ 33
33
Jekɔb cheŋ Ɛsɔ
1Ŋɩɩ nɛ Jekɔb beŋ sɩpaaŋ a na Ɛsɔ dɩ ʋʋ kɔ arɩ nɩaa zɔɔ-banɛsɛ ʋ harɩŋ. Ŋɩɩ nɛ ʋ kɛŋ ʋ biiriŋ kpaa a pɩ Liya, Rakɛl arɩ ba ketie-la balɩamɩŋ. 2Ʋ leŋ ketie-la arɩ ba biiriŋ laa sɩpaaŋ, Liya arɩ ʋ biiriŋ tɩtɩgɛ ba lɛ, ka Rakɛl arɩ Josɛf tuto harɩŋ. 3Jekɔb tɩtɩa nɛ laa sɩpaaŋ mʋ. Ʋ sɩɩ mʋ, ʋ kpirimi naansɩɩŋ bʋlɩpɛ aŋ-na yi ʋ naambie.
4Ŋɩɩ nɛ Ɛsɔ fá a mʋ chemu a guoru. Ba guori dɔŋɔ a lɩlaarɛ dɔŋɔ aŋ pɛ yiyel. 5Ɛsɔ beŋ sɩpaaŋ a na haalaa arɩ ba biiriŋ a pɩɛsɛ Jekɔb, “Kʋbɛɛba ma nɩɩ to ŋ harɩŋ ŋɩɩ?”
Ŋɩɩ nɛ Jekɔb bʋl, “Biiri-la Wɩa sɩ joŋo dii zile mɩ-na ŋ tɩntɩnna lɛ nɛ.” 6Ŋɩɩ nɛ ketie-la arɩ ba biiriŋ ma kʋ yi a tuu kpirimi. 7Liya arɩ ʋ biiriŋ ma kʋ yi a tuu kpirimi. Ʋ harɩŋ Josɛf arɩ Rakɛl ma kɔ a ma tuu kpirimi.
8Ŋɩɩ nɛ Ɛsɔ pɩɛsɛ, “Ka nɩalɩŋ arɩ kʋdaŋ-la mɩ sɩ laa sɩpaaŋ cheŋ, ʋ bʋbʋɔŋ nɛ bɛɛ?”
Ŋɩɩ nɛ Jekɔb bʋl, “Mɩ nɩhɩaŋ, mɩɩ chɛ dɩ ŋ tʋɔŋ tɔrɛ mɩ nyuŋ nɛ.”
9Ŋɩɩ nɛ Ɛsɔ bʋl, “Mɩ sɩ kɛŋ kɩalɩŋ, ba maga nɛ mɩ naambii, ŋ ma kɛŋ ŋ kɩaa.”
10Ŋɩɩ nɛ Jekɔb bʋl, “Aɩ, mɩɩ sʋlʋŋ dɩ ŋ tʋɔŋ nɛ tɔrɛ mɩ nyuŋ, laa mɩ chɔgɩta deeŋ, bɛɛ wɩaa mɩ sɩ naŋ, ʋ naga Wɩa nɛ mɩ na, a tɩŋ ŋ sɩ laamɛ arɩ tʋɔtɔrʋŋ. 11Mɩɩ sʋlʋŋ, laa chɔgɩta deeŋ mɩ sɩ kaa kɔ dɩ mɩ pɩŋ, bɛɛ wɩaa Wɩa dii zile nɛ woruŋ mɩ lɛ a pɩmɛ mɩ kʋchɛɛlɛɛ kala.” A tɩŋ Jekɔb sɩ pɛsɛ ŋɩɩ, ʋ laa kɩalɩŋ.
12Ŋɩɩ nɛ Ɛsɔ bʋl, “Má sii dɩ la mʋ, mɩ jaŋ to ma harɩŋ mʋ.”
13Ŋɩɩ nɛ Jekɔb bʋl, “Mɩ nɩhɩaŋ, ŋ jɩma hambiisi-la muuro, piese-la arɩ nɛsɩ-la ma kɛŋ bii-mulluŋ a magɛ dɩ mɩ beŋ ba nyuŋ woruŋ. Dɩ la nɛ sɩ dɩ la faasa kiriba vɛŋ chɛ-bala, ba kala jaŋ sʋʋ. 14Mɩ nɩhɩaŋ, laa mɩ-na ŋ tɩntɩnna sɩpaaŋ, ka dɩ mɩ kɛŋ pʋsʋ-la arɩ hambiisi-la fɩɛla vɛŋ mʋa mʋa kʋkɔ ŋ teeŋ Sɛɛ lɛ, Ɛdɔm tinteeŋ.”
15Ŋɩɩ nɛ Ɛsɔ bʋl, “Mɩ jaŋ leŋ mɩ nɩalɩŋ dɔnsʋŋ ŋ teeŋ.”
Ŋɩɩ nɛ Jekɔb pɩɛsɛ, “Bɛɛ nɛ tɩɩ ŋ chɛ ŋ ŋaa ŋɩɩ? Mɩ nɩhɩaŋ, nɩalɩŋ-na bɩ wɩɩ tɔ, ŋ-na leŋ dɩ ŋ tʋɔŋ tɔrɛ mɩ nyuŋ.”
16Ŋɩɩ nɛ Ɛsɔ sii mɩɩra mʋ Sɛɛ sɩ hɛ Ɛdɔm tinteeŋ tapʋlɩɩ-la tɩtɩa. 17Ka Jekɔb mʋ Sʋkɔf a saa dɩa nɩmɛ aŋ hɛ nɛ-dɩɩsɩŋ ma a hɛ ʋ pʋsʋŋ, ŋɩɩ nɛ tɩɩ ba yɩyɩrɛ lee-la Sʋkɔf ŋɩɩ.
18Ŋɩɩ harɩŋ lɛ Jekɔb sii lɩɩ Mesopotemia tinteeŋ a kɔ tabal-la ba sɩɩ yɩrɛ Sɛkɛm a hɛ Kɛnaŋ tinteeŋ lɛ a hɔŋ lee-la a kpagɛ taŋ-la. 19Ŋɩɩ nɛ ʋ yɔɔ tinteeŋ Hamɔ biiriŋ teeŋ warɩpʋla zɔlɔ a hɛ ʋ lɛbɩŋ nɩmɛ. Hamɔ ŋaa Sɛkɛm nyɩmma nɛ. 20Ʋ saa Wɩɩsʋllɩ koruŋ nɩmɛ a hɛ ʋ yɩrɩŋ Ɛl-Ɛlɔhɩ Iziral.
Currently Selected:
WƖAA DƖ-SUOMUŊ 33: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
