WƖAA DƖ-SUOMUŊ 30
30
1Rakɛl sɩ na arɩ ʋ bɩ bii lʋla pɩ Jekɔb, ʋ yaraa bibieri ʋ malɩma nyuŋ. Ŋɩɩ nɛ ʋ bʋla pɩ Jekɔb, “Pɩmɛ bie, dɩ ŋɩɩ dee mɩ jaŋ sʋʋ.”
2Ŋɩɩ nɛ Jekɔb baanɩŋ sii Rakɛl nyuŋ ʋ bʋl, “Mɩ nɛ ŋaa Wɩa a kɛŋ ŋ lʋlá tɔ dɩ ŋ sɩ́ biiriŋ lʋl?”
3Ŋɩɩ nɛ Rakɛl bʋl, “Na mɩ ketiiŋ Biliha nɛ ŋ-la, leŋ dɩ ma pɛ bɔsɔ dɩ ʋ lʋl biiriŋ, dɩ mɩ ma to ʋ lɛ a kɛŋ doho.”
4Ŋɩɩ nɛ Rakɛl joŋ ʋ ketiiŋ Biliha pɩ Jekɔb ʋ ŋaa ʋ haal. Jekɔb arɩ Biliha pɛ bɔsɔ, 5Biliha kɛŋ luoruŋ a lʋl hambolibie pɩ Jekɔb. 6Ŋɩɩ nɛ Rakɛl bʋl, “Wɩa laa mɩ sʋla nɛ, ʋ jegile nɩɩ mɩ bunso nɛ a pɩmɛ hambolibie.” Ŋɩɩ wɩaa, ʋ hɛ ʋ yɩrɩŋ Daŋ.
7Rakɛl ketiiŋ Biliha bɩra kɛŋ luoruŋ lɩamɩŋ lɛ, a lʋl hambolibie pɩ Jekɔb. 8Ŋɩɩ nɛ Rakɛl bʋl, “Mɩ dɩ mɩ malɩma Liya lobo nɛ woruŋ, ama mɩ lobo diiu nɛ.” Ŋɩɩ nɛ ʋ hɛ bile yɩrɩŋ Nafɩtalɩ.
9Liya sɩ na dɩ ʋ bɩra bɩ lʋl, ʋ joŋ ʋ ketiiŋ Zilipa a pɩ Jekɔb ʋ ŋaa ʋ haala. 10Liya ketiiŋ Zilipa lʋl hambolibie pɩ Jekɔb. 11Ŋɩɩ nɛ Liya bʋl, “Mɩ nyuŋ sɩma nɛ,” ʋ hɛ ʋ yɩrɩŋ Gad.
12Zilipa bɩra lʋl hambolibii-lɩamɩŋ pɩ Jekɔb. 13Ŋɩɩ nɛ Liya bʋl, “Na mɩ tʋɔŋ sɩ tɔrɛ ŋɩɩ, haalaa jaŋ yɩrɛmɛ tʋɔtɔrɛ tɩɩna.” Ŋɩɩ nɛ ʋ hɛ bile yɩrɩŋ Asa.
14Bʋa-la lɛ ba sɩɩ kʋŋ mɛmpɛ, Rubiŋ mʋ baga a na tɩɩ-pugu-bie kʋbala ba sɩ kaa ŋaa lʋlá daalusuŋ, a kere kaa kʋ pɩ ʋ naaŋ Liya. Ŋɩɩ nɛ Rakɛl bʋl, “Mɩɩ sʋlʋŋ, keri ŋ bie sɩ kɛŋ lʋlá daalusu-la kʋ pɩŋ mʋa pɩmɛ.”
15Liya bʋla pʋ, “Ŋ bɩɩna wʋbie nɛ ŋ ŋaa ŋɩɩ? Dɩ ŋ laa mɩ bala, aŋ bɩraa chɛ dɩ ŋ laa mɩ bie lʋlá daaŋ maa?”
Ŋɩɩ nɛ Rakɛl bʋl, “Dɩ ŋ nɛ sɛyɛ a pɩmɛ ŋ bie lʋla daa-la, mɩ jaŋ leŋ ŋ dɩ Jekɔb pɛ bɔsɔ tɩtaŋɩŋ deeŋ.”
16Jekɔb sɩ lɩɩ baga kɔ dɩdaanɩŋ, Liya lɩɩ chemu a bʋl, “Mɩ laaŋ nɛ ŋ haala teeŋ jɩnɩŋ arɩ mɩ bie lʋlá daaŋ. Mɩ dɩŋ nɛ jaŋ pɩŋ tɩtaŋɩŋ deeŋ.” Ŋɩɩ nɛ Jekɔb kɛnʋ pɩŋ tɩtaŋ-la.
17Ŋɩɩ nɛ Wɩa laa Liya sʋla ʋ kɛŋ luoruŋ a lʋl ʋ hambolibii-nɔŋ a pɩ Jekɔb. 18Ŋɩɩ nɛ Liya bʋl, “Wɩa timmi nɛ a tɩŋ mɩ sɩ joŋ mɩ ketiiŋ pɩ mɩ bala.” Ŋɩɩ nɛ ʋ hɛ ʋ yɩrɩŋ Ɩsaka.
19Liya bɩra kɛŋ luoruŋ a lʋl ʋ hambolibii-dʋ a pɩ Jekɔb. 20Ŋɩɩ nɛ Liya bʋl, “Wɩa joŋ kʋyuŋi nɛ a dii zile pɩmɛ. Bʋa deeŋ lɛ, mɩ bala jaŋ zizilmi, bɛɛ wɩaa mɩ lʋl hambolibiisiŋ balɩdʋ nɛ pʋ.” Ŋɩɩ nɛ ʋ hɛ bile ma yɩrɩŋ Zebuluŋ.
21Ʋ ŋɩɩ harɩŋ lɛ ʋ bɩra kɛŋ luoruŋ a lʋl hantolibie a hɛ ʋ yɩrɩŋ Daana.
22Ŋɩɩ nɛ Wɩa liisi Rakɛl wɩaa a laa ʋ sʋla a suri ʋ lʋlá. 23Ʋ kɛŋ luoruŋ a lʋl hambolibie aŋ bʋl, “Wɩa tɔ mɩ hɩɩsɩŋ nɛ.” 24Ŋɩɩ nɛ ʋ hɛ bile yɩrɩŋ Josɛf aŋ bʋl, “La TƖƖNA jaŋ pɛ dɩ mɩ bɩra lʋl hambolibie.”
Jekɔb pʋsʋŋ pʋŋa
25Rakɛl sɩ lʋl Josɛf ʋ harɩŋ lɛ, Jekɔb bʋla pɩ Labaŋ, “Tamɛ dɩ mɩ mɩɩra mʋ mɩ jaŋ. 26Joŋ mɩ haala-la mɩ sɩ tɩma laa ŋ teeŋ arɩ mɩ biiriŋ pɩmɛ dɩ mɩ viiri. Ŋ jɩŋ ŋɩɩ mɩ sɩ tɩma magɛ a pɩŋ nɛ.”
27Ŋɩɩ nɛ Labaŋ bʋla pʋ, “Dɩ ŋ tʋɔŋ nɛ tɔrɛ mɩ nyuŋ, ŋɩɩ-na leŋ dɩ la hɔŋ. Mɩ chɛ a na arɩ Wɩa to ŋ lɛ nɛ a pɛ mɩ lɛ. 28Dagɛ magɛ ŋɩɩ ŋ sɩ jaŋ laa, dɩ mɩ time pɩŋ.” 29Ŋɩɩ nɛ Jekɔb bʋla pʋ, “Ŋ jɩŋ ŋɩɩ mɩ sɩ tɩma pɩŋ nɛ, ŋ pʋsʋŋ pʋŋ mɩ nɩsɩŋ lɛ nɛ. 30Pʋsʋŋ mʋa nɛ ŋ kɛŋ ka mɩ-na kɔ ŋ teeŋ, ama ba pʋŋa nɛ woruŋ. Wɩa pɛ ŋ lɛ nɛ ŋ dʋa, bʋa-la kala mɩ sɩ hɛ ŋ teeŋ. Ama lɛɛlɛ tamɛ dɩ mɩ mʋ a chɛ mɩ tɩtɩa kɩaa.”
31Ŋɩɩ nɛ Labaŋ pɩɛsɛ, “Bɛɛ kʋŋ nɛ ŋ chɛ dɩ mɩ pɩŋ?”
Ŋɩɩ nɛ Jekɔb bʋl, “Mɩ bɩ time ka chɛ, ama dɩ ŋ nɛ jaŋ sɛɩ a ŋaa wɩɩŋ deeŋ pɩmɛ, mɩ ha jaŋ bibeŋ ŋ pʋsʋŋ. 32Leŋ dɩ mɩ gɔllɛ ŋ pʋsʋŋ kala tʋɔŋ jɩnɩŋ a tʋɔsɛ pie-ŋmʋŋmʋnaa, pie-bel-bisiŋ, arɩ bʋ-ŋmʋŋmʋnaa. Kɩalɩŋ kala mɩ sɩɩ chɛ nɛ ŋɩɩ. 33Ŋ-la lɛ nɛ ŋ maachie jaŋ to jɩŋ arɩ mɩ kɛŋ wʋtɩtɩɩ, dɩ ŋ nɛ maachie na bʋʋŋ koo piesu dɩ ʋ bɩ lagɩsa koo pie-bie sɩ bɩ kʋbine ŋaa mɩ pʋsʋŋ tʋɔŋ, jɩŋ arɩ mɩ ŋaa gaarʋ nɛ.”
34Ŋɩɩ nɛ Labaŋ bʋl, “Mɩ sɛyɛ nɛ. La jaŋ ŋaa ŋɩɩ ŋ sɩ daga.” 35Tapʋlɩɩ-la tɩtɩa Labaŋ jʋʋ tʋɔsɛ gbuŋgbogusuŋ arɩ bʋnɩɩnɩ-la kala sɩ tagɩsɛ kʋpʋllʋŋ arɩ pie-bii-bisiŋ kala pɩ ʋ hambolibiisiŋ dɩ baa daa. 36Ŋɩɩ nɛ Labaŋ leŋ ʋ hambolibiisiŋ kɛŋ pʋsʋ-la mʋ hɔŋ dɩ-bolii. Ba dɩ Jekɔb pɛgɛ magɛ tapʋlaa batori vɛnɩŋ, ka Jekɔb dɩdaa Labaŋ pʋŋ-kaanaa.
37Ŋɩɩ nɛ Jekɔb keri tɩɩ-naakel duduobiisiŋ a lɩɩ tɩɩ-doho doho lɛ a hige ta aŋ ka ba lagɩsɛ kʋpʋllʋŋ, ʋ leŋ dɩ-pʋla-la nyɩsɛ, 38ʋ joŋo hɛ pʋsʋ-la dɩ-nyʋalʋŋ lɛ, dɩ pʋsʋ-la nɛ kɔ dɩ ba nyʋa lɩɩŋ a jɩjɩl dɔŋɔ, a chaasɛ daasɩ-la, 39dɩ ba nɩɩ chɛ dɩ ba lʋl, ba yie lʋl biiri-la dɩ ba lagɩsa lagɩsa. 40Ŋɩɩ nɛ Jekɔb pɔrɛ pie-bisi-la aŋ leŋ pie-kaanaa chaasɛ pʋsʋ-la sɩ bire arɩ kɩalɩŋ sɩ tagɩsa a ŋaa Labaŋ kɩaa. Ŋɩɩ nɛ ʋ ŋaa a kɛŋ ʋ tɩtɩa pʋsʋŋ. Ʋ bɩ ba joŋo guoli Labaŋ pʋsʋŋ lɛ. 41Dɩ pʋŋ-duoru-la jɩlɩŋ nɛ kʋ yi na-kala, Jekɔb yie joŋ daasɩ-la hɛ pʋsʋ-la dɩ-nyʋalʋŋ lɛ dɩ ba jɩla kpagɛ daasɩ-la. 42Ama dɩ pʋsʋ-la nɛ bɩ pʋŋ-duori ŋaa, ʋ bɩ daasɩ-la joŋo bil ba sɩpaaŋ. Kʋduori-la ŋaa Jekɔb kɩaa, ka pʋŋ-pʋgʋnʋ-la ŋaa Labaŋ kɩaa. 43Ŋɩɩ nɛ Jekɔb kɛŋ kɩaa woruŋ. Ʋ kɛŋ nɛsɩŋ arɩ piesee, bʋntaŋŋaba arɩ kakusuŋ, tɩntɩnnaa, baalaa arɩ haalaa.
Currently Selected:
WƖAA DƖ-SUOMUŊ 30: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
