WƖAA DƖ-SUOMUŊ 29
29
Jekɔb mʋ Padaŋ Aram
1Ŋɩɩ nɛ Jekɔb vɛŋ wombiiŋ ŋɩɩ a mʋ wɩɩpɔsʋŋ dɩɩrɩŋ nɩaa teeŋ. 2Jekɔb sɩ bene, ʋ na viliŋ nɩmɛ, ka pie-laalɩŋ pɩŋ vil-la sɛmɛ bʋbʋɔ-bugoo batori, bɛɛ wɩaa vil-la lɩɩŋ nɛ piese-la nyʋnyʋa, ka tabɩɩ-jalɩŋ tɔ vil-la niiŋ. 3Dɩ pie-laal-la nɛ kʋ hɛ dɔŋɔ lɛ, pie-daaraa yie kɛŋ tabɩɩ-la suri nɛ a ŋaa lɩɩŋ pɩ piese-la ba nyʋa, dɩ ba nɛ nyʋa dɛrɛ ba bɩra kɛŋ tabɩɩ-la tɔ vil-la niiŋ.
4Ŋɩɩ nɛ Jekɔb pɩɛsɛ pie-daara-la, “Mɩ naambiiriŋ, nɩɩ nɛ ma lɩɩ?”
Ba bʋl, “La lɩɩ Haraŋ tinteeŋ nɛ.”
5Ŋɩɩ nɛ ʋ pɩɛsɛba, “Ma jɩŋ Nahɔ nihiŋ Labaŋ nɛɛ?”
Ba bʋl, “La jɩmʋ nɛ.” 6Ŋɩɩ nɛ ʋ bɩra pɩɛsɛba, “Ʋ yaraa fɩɛlaa?”
Ba bʋl, “Ʋ yaraa fɩɛla nɛ. Na ʋ tolo Rakɛl nɛ kɛŋ ʋ piesee kʋkɔ ŋɩɩ.”
7Jekɔb bʋl, “Má bee na, wɩa ha yʋga nɛ arɩ ma sɩ jaŋ kiri piesee mʋ tɔ. Má leŋ dɩ ba nyʋa lɩɩŋ ka dɩ ma kire mʋ dɩ ba dii yaŋ.”
8Ŋɩɩ nɛ ba bʋl, “La bɩ jaŋ wuo ŋaa ŋɩɩ, see dɩ piesee kala kʋ hɛ dɔŋɔ lɛ dɩ la kɛŋ tabɩɩ-la suri vil-la niiŋ dɩ ba nyʋa lɩɩŋ.”
9Jekɔb arɩ pie-daara-la fa ha sɩɩ bʋl wɩaa ŋɩɩ, dɩ Rakɛl nɛ kiri ʋ nyɩmma piesee a kɔ ŋɩɩ. Rakɛl nɛ faa daa ʋ nyɩmma piesee. 10Jekɔb sɩ na ʋ naaŋ dɩbaala Labaŋ tolo Rakɛl dɩ ʋ kɛŋ piesee kɔ, ʋ mʋ suri tabɩɩ-la vil-la niiŋ aŋ ŋaa lɩɩŋ pɩ ʋ nɩɛra piesee, ba nyʋa. 11Ŋɩɩ nɛ Jekɔb guori Rakɛl aŋ yel, ʋ tʋɔŋ sɩ tɔrɔ. 12Jekɔb bʋla pɩ Rakɛl arɩ ʋ nɛ ŋaa ʋ nyɩmma naambie, Rɩbɛka nɛ ŋaa ʋ naaŋ. Ŋɩɩ nɛ Rakɛl fá mʋ bʋla pɩ ʋ nyɩmma Labaŋ.
13Labaŋ sɩ nɩɩ wʋzɔmʋŋ deeŋ a tɩgɛ ʋ dɩhaala bie Jekɔb lɛ, ʋ fá mʋ chemu a guoru aŋ kɛnʋ kaa kɔ ʋ dɩa. Ŋɩɩ nɛ Jekɔb bʋl wɩalɩŋ kala sɩ ŋaa a pʋ. 14Labaŋ bʋla pʋ, “Ŋ ŋaa mɩ chalɩŋ doho tɩtɩa nɛ.” Jekɔb hɛ ʋ teeŋ chɛŋ-piliŋ.
Jekɔb jaa Liya arɩ Rakɛl
15Ŋɩɩ nɛ Labaŋ bʋla pʋ, “Ŋ sɩ ŋaa mɩ naambii ŋɩɩ, ŋɩɩ bɩ daga dɩ ŋ tɩma pɩmɛ pɛɩ. Baŋmɛɛ nɛ ŋ jaŋ laa?”
16Labaŋ fa kɛŋ toloo balɩa nɛ, kʋhɩaŋ yɩrɩŋ nɛ Liya, kʋbie ma yɩrɩŋ nɛ Rakɛl. 17Liya sɩaa fa zɔmɔ, ama Rakɛl-na yaraa kala nɛ fa chaasa zɔŋ. 18Jekɔb fa cho Rakɛl nɛ, ŋɩɩ nɛ ʋ bʋla pɩ Labaŋ, “Mɩ jaŋ tɩma pɩŋ jɩsɩŋ balɩpɛ aŋ laa ŋ toloo kʋbie Rakɛl.”
19Ŋɩɩ nɛ Labaŋ bʋl, “Dɩ mɩ nɛ joŋu pɩŋ nɛ kpɩa mɩ sɩ joŋu pɩ baal dɔŋ. Hɔŋ mɩ teeŋ daha.” 20Ŋɩɩ nɛ Jekɔb tɩŋ jɩsɩŋ balɩpɛ dɩ ʋ laa Rakɛl. A tɩŋ Jekɔb fa sɩ cho tolo-la ŋɩɩ, jɩsɩŋ balɩpɛ-la nagɛ tapʋlaa baŋmɛnɛ nɛ ʋ teeŋ.
21Ŋɩɩ nɛ Jekɔb bʋla pɩ Labaŋ, “Jɩsɩ-la yie nɛ. Joŋ mɩ haala pɩmɛ dɩ la pɛ bɔsɔ.”
22Ŋɩɩ nɛ Labaŋ yɩrɛ nɩalɩŋ kala sɩ hɛ lee-la a hɛ dɔŋɔ lɛ a ŋaa kɩaa ba dii aŋ gbieli hajaarɩ-gbiele. 23Dɩdaanɩŋ sɩ yie, Labaŋ kɛŋ ʋ tolo Liya mʋ pɩ Jekɔb ba pɛ bɔsɔ. 24Ŋɩɩ nɛ Labaŋ joŋ ʋ dɩa tɩntɩnna Zilipa a daŋ ʋ tolo Liya ʋ ŋaa ʋ ketiiŋ.
25Taŋ sɩ pʋla chʋchʋɔŋ Jekɔb sie dɩ Liya nɛ. Ŋɩɩ nɛ ʋ pɩɛsɛ Labaŋ, “Bɛɛ wɩɩ nɛ ŋ ŋaa mɩ lɛ ŋ-la? Rakɛl wɩaa dee mɩ tɩma pɩŋ, bɛɛ nɛ tɩɩ ŋ nyɩsɛmɛ?” 26Ŋɩɩ nɛ Labaŋ bʋl, “Ʋ ŋaa la kɩsɩŋ nɛ daha dɩ ŋ toli-bie laa sɩpaaŋ jaa bala ka dɩ kʋhɩaŋ hɔŋ. 27Leŋ dɩ hajaarɩ-gbiele deeŋ dɛrɛ yɔbɔ deeŋ lɛ, ka dɩ la joŋ kʋbie-la ma pɩŋ dɩ ŋ nɛ sɛɩ a bɩra tɩŋ jɩsɩŋ balɩpɛ pɩmɛ.”
28Ŋɩɩ nɛ Jekɔb sɛɩ. Hajaarɩ gbiele-la yɔbɔ sɩ dɛrɛ, ŋɩɩ nɛ Labaŋ joŋ ʋ tolo Rakɛl ma pʋ ʋ ŋaa ʋ haala. 29Labaŋ joŋ ʋ dɩa tɩntɩnna Biliha a daŋ ʋ tolo Rakɛl ʋ ŋaa ʋ ketiiŋ. 30Jekɔb arɩ Rakɛl ma bɩra pɛ bɔsɔ. Ʋ cho Rakɛl a kɩɩ Liya. Ŋɩɩ nɛ ʋ bɩra tɩŋ jɩsɩŋ balɩpɛ a pɩ Labaŋ.
Jekɔb lʋl biiriŋ
31La TƖƖNA sɩ na dɩ Jekɔb bɩ Liya cho, ʋ kɛŋ ʋ lʋla suri aŋ kɛŋ Rakɛl lʋla tɔ. 32Liya kɛŋ luoruŋ a lʋl hambolibie a hɛ ʋ yɩrɩŋ Rubiŋ, bɛɛ wɩaa ʋ sɩ, “La TƖƖNA na mɩ hɛɛŋ nɛ. Lɛɛlɛ mɩ bala jaŋ chomi.”
33Ʋ bɩra kɛŋ luoruŋ a lʋl hambolibie a bʋl, “A tɩŋ Wɩa sɩ na arɩ mɩ bala bɩ mɩ cho, ŋɩɩ nɛ tɩɩ ʋ bɩra pɩmɛ bie deeŋ ma.” Ŋɩɩ nɛ ʋ hɛ ʋ yɩrɩŋ Simioŋ.
34Ʋ bɩra kɛŋ luoruŋ a lʋl hambolibie aŋ bʋl, “Bʋa deeŋ-na lɛ, mɩ bala jaŋ kɛŋ ʋ tɩtɩa mɛrɛ mɩ lɛ, bɛɛ wɩaa mɩ lʋl hambolibiisiŋ batori nɛ pʋ.” Ʋ hɛ ʋ ma yɩrɩŋ Levi.
35Ʋ bɩra kɛŋ luoruŋ a lʋl hambolibie. Bʋa deeŋ lɛ ʋ sɩ, “Mɩ jaŋ dɛnnɛ mɩ Tɩɩna.” Ŋɩɩ nɛ ʋ hɛ ʋ yɩrɩŋ Juda, aŋ leŋ biiriŋ lʋlʋŋ.
Currently Selected:
WƖAA DƖ-SUOMUŊ 29: SIS
Highlight
Share
Copy
Want to have your highlights saved across all your devices? Sign up or sign in
©Ghana Institute of Linguistics Literacy and Bible Translation 1984, 2014
