WƖAA DƖ-SUOMUŊ 28

1Ŋɩɩ nɛ Aɩzɩk yɩrɛ Jekɔb a sʋl Wɩa pʋ aŋ bʋla pʋ, “Pʋpɔ dɩ ŋ sɩ́ Kɛnaŋ tɩŋŋaa tolo jaa. 2Sii mʋ Mesopotemia tinteeŋ, ŋ naaŋ nyɩmma Bɛtʋɛl dɩa a jaa ŋ naaŋ dɩbaala Labaŋ toloo dɔŋɔ. 3Wɩa doluŋ kala Tɩɩna jaŋ pɛ ŋ lɛ dɩ ŋ doho nɩaa pʋŋ a yʋgɛ. 4Wɩa jaŋ pɛ ŋ dɩ ŋ doho nɩaa lɛ arɩ ʋ sɩ pɛ Abɩraham lɛ ŋɩɩ. Tintee-la ʋ sɩ joŋo pɩ Abɩraham, ma lɛɛlɛ hɔŋ a ŋaa nʋhʋɔraa, ʋ jaŋ ŋaa ma kʋŋ.” 5Ŋɩɩ nɛ Aɩzɩk leŋ Jekɔb mʋ Mesopotemia tinteeŋ, Labaŋ teeŋ. Labaŋ nyɩmma Bɛtʋɛl ŋaa Siiria tɩɩna nɛ. Labaŋ dɩhaala nɛ Rɩbɛka. Rɩbɛka nɛ lʋl Jekɔb arɩ Ɛsɔ.

6Ɛsɔ sɩ kʋ jɩŋ dɩ Aɩzɩk sʋl Wɩa pɩ Jekɔb aŋ leŋ ʋ mʋ Mesopotemia dɩ ʋ jaa haala nɩmɛ, a bɩra jɩŋ arɩ ʋ sʋl Wɩa pʋ a bʋl, dɩ ʋ pɔ dɩ ʋ sɩ́ Kɛnaŋ tɩŋŋaa tolo jaa, 7a bɩra kʋ jɩŋ arɩ Jekɔb nɩɩ ʋ naaŋ arɩ ʋ nyɩmma niiŋ nɛ a mʋ Mesopotemia, 8ʋ jɩma arɩ ʋ nyɩmma Aɩzɩk bɩ Kɛnaŋ tɩŋŋaa toloo cho. 9Ʋ mʋ jaa Abɩraham nanʋala Ɩsɩmɛl tolo Mahalaf a pɛ haala-la lɛ ʋ sɩ kɛnɛ. Mahalaf ŋaa Nɛbayɔf dɩhaala nɛ.

Jekɔb duoso Bɛtɛl lɛ

10Jekɔb lɩɩ Bɛɛsɩba a mʋmʋ Haraŋ tinteeŋ. 11Ʋ mʋ yi lee-kʋbala dɩ wɩa jʋa, ʋ chʋa lee-la. Ʋ joŋ tabɩɩŋ a bil a kɛŋ ʋ nyuŋ yelle pɩŋ doŋ nɩmɛ. 12Ʋ duoso na lusuŋ-chol duduoŋ kʋbala dɩ ʋ chɩŋ tinteeŋ aŋ jɩla tɩgɛ wɩa-nyuŋ. Wɩa tɩndaaraa to ʋ lɛ a tutuu aŋ jɩjɩl. 13Ka ʋ na La TƖƖNA dɩ ʋ chɩna a chuguli lusuŋ-chol-la nyuŋ a bʋl, “Mɩ nɛ ŋaa ma TƖƖNA, ma nyɩmma Abɩraham arɩ Aɩzɩk Wɩa. Mɩ jaŋ joŋ lee-la ŋ sɩ pɩna a pɩ ŋ dɩ ŋ doho nɩaa. 14Ŋ doho nɩaa jaŋ pʋŋa nagɛ hagɩlɩ-biee a jɛrɛ su lee-kala a hɛ wɩɩpɔsʋŋ, wɩɩjʋʋlʋŋ arɩ taŋ-sɛsɩŋ kala. Ŋ dɩ ŋ doho nɩaa lɛ nɛ mɩ jaŋ to a pɛ dʋnɩa nɩaa kala lɛ. 15Bee-na, mɩ chɩŋ ŋ harɩŋ nɛ aa beniŋ lee-la kala ŋ sɩɩ mʋ. Mɩ jaŋ kɛnɩŋ mɩɩra kɔ tinteeŋ deeŋ. Mɩ bɩ jaŋ leŋiŋ, see mɩ sɩ ŋaa wɩɩ-la mɩ sɩ sɩ mɩ jaŋ ŋaa pɩŋ.”

16Ŋɩɩ nɛ Jekɔb hirige sii doŋ lɛ a bʋl ʋ tʋɔŋ lɛ, “Tɛŋɛ, La TƖƖNA hɛ daha aŋ ka mɩ fa bɩ jɩŋ.” 17Fawʋllʋŋ kɛnʋ, ʋ bʋl, “Ɛɛ nɛ leriŋ deeŋ kɛŋ fawʋllʋŋ ŋɩɩ? Leriŋ deeŋ bɩ lee-kala naga dɩ Wɩa dɩa dee, Wɩa-jaŋ wombiiŋ nɛ ŋ-la.”

18Ʋ taŋ sɩ pʋla chʋchʋɔ-fɩɛla, Jekɔb sii joŋ tabɩɩ-la ʋ sɩ yelle a pɛ ʋ ŋaa jebii-magɩl. Ʋ joŋ nʋʋŋ bɩsa wurisi. 19Ŋɩɩ nɛ ʋ hɛ lee-la yɩrɩŋ Bɛtɛl, ama ba faa yɩrɛ lee-la Lus nɛ.

20Jekɔb ta niiŋ a bʋl, “Dɩ Wɩa nɛ jaŋ chɩŋ mɩ harɩŋ a pɔmɛ wombiiŋ deeŋ mɩ sɩ joŋo lɛ, a pɩmɛ kʋdiilee dɩ mɩ dii arɩ gɛnnɩŋ mɩ laalɛ, 21a leŋ dɩ mɩ mɩɩra kɔ mɩ nyɩmma dɩa arɩ yarɩfɩɛlaa, ŋɩɩ-na La TƖƖNA jaŋ ŋaa mɩ Wɩa. 22Tabɩɩŋ deeŋ mɩ sɩ joŋo pɛ ʋ ŋaa jebii-magɩl jaŋ ŋaa Wɩa dɩa. Kɩalɩŋ kala ʋ sɩ joŋo pɩmɛ, mɩ jaŋ kaa kpaa leree fii a joŋ kʋbala pʋ.”

Currently Selected:

WƖAA DƖ-SUOMUŊ 28: SIS

Highlight

Copy