Tɩntɩŋŋaa 9

Sɔɔl kʋ laa Yesu wɩaa dii

1Ŋɩɩ nɛ Sɔɔl ha fufugisi La Tɩɩna Yesu harɩ-tooro-la arɩ ʋ jaŋ kpʋba, a sii mʋ Wɩɩsʋllɩ sɩpaalaaraa kʋhɩaŋ teeŋ, 2a sʋlʋ dɩ ʋ ŋmʋnsɛ tenniŋ pʋ dɩ ʋ kaa mʋ taŋ kʋbala baa yɩrɛ Damasɩkʋs a kpaa Wɩɩchʋɔlɛ dɩɩsɩŋ lɛ. Ʋ ŋaa ŋɩɩ, dɩ ʋ nɛ na nʋʋ na-kala sɩɩ to wombii-la nɩmɛ, baal koo haal, dɩ ʋ wuo kɛŋ doluŋ a kɛsɛba kaa kɔ Jerusalɛm. 3Sɔɔl sɩ lɩɩ joŋ wombiiŋ a mʋmʋ Damasɩkʋs a kʋ kpagɛ taŋ-la, pʋlʋmʋŋ guu lɩɩ wɩa-nyuŋ a faasa chaana hɛ ʋ lɛ. 4Ʋ tuu tel tinteeŋ. Ka ʋ nɩɩ nʋʋ yikoro. Ʋʋ bʋl ʋ teeŋ, “Sɔɔl, Sɔɔl, bɛɛ nɛ tɩɩ ŋ to naasɩŋ a dʋdɔgɩsɛmɛ ŋ-la?” 5Ŋɩɩ nɛ Sɔɔl pɩɛsɛ, “Kʋbɛɛ nɛ tɩɩna?” Yikoro-la bʋl, “Mɩ nɛ ŋaa Yesu, nɩɩ-la ŋ sɩ to naasɩŋ a dʋdɔgɩsɛ. 6Sii jʋʋ tabal-la tʋɔŋ. Nɩmɛ ba jaŋ dagɩŋ wɩɩ-la ŋ sɩ jaŋ ŋaa.” 7Sɔɔl arɩ nɩalɩŋ fa sɩɩ vɛŋ chɩna tʋa-bibeŋ, ba nɩɩ yikoro-la, ama ba bɩ nʋʋkala na. 8Sɔɔl nyaga sii a suri ʋ sɩaa. Ʋ bɩ kʋŋkala wuo na. Ba kɛŋ ʋ nɩsɩŋ lɛ nɛ a lɛrɛ jʋʋ Damasɩkʋs. 9Ʋ nyʋlɩmɛ a hɛ nɩmɛ ʋ tapʋlaa batori. Ʋ bɩ kʋŋkala die, ʋ bɩ lɩɩŋ ma nyʋa.

10Yesu harɩ-tooru kʋbala ma fa hɛ Damasɩkʋs lɛ, baa yɩrɛ Ananɩas. La Tɩɩna Yesu yɩrʋ a nagɛ duosoo tʋɔŋ a bʋl, “Ananɩas!” Ŋɩɩ nɛ ʋ sɩ, “Namɛ, mɩ Tɩɩna.” 11Ŋɩɩ nɛ La Tɩɩna Yesu bʋla pʋ, “Sii mʋ wombii-la ba sɩɩ yɩrɛ wombii-tegi tegi a mʋ baal kʋbala dɩa ʋ yɩrɩŋ nɛ Judas, a pɩɛsɛ chɛ baal-la sɩ lɩɩ taŋ kʋbala baa yɩrɛ Taasɩs. Baal-la yɩrɩŋ nɛ Sɔɔl, ʋʋ chʋɔlɛ Wɩa nɛ lɛɛlɛ ŋ-la.” 12Ŋɩɩ nɛ Yesu bɩra bʋla pɩ Ananɩas, “Sɔɔl sɩɩ chʋɔlɛ Wɩa ŋɩɩ, ʋ na arɩ duosoo tʋɔŋ, ŋ-na Ananɩas, dɩ ŋ kʋ jʋʋ a joŋ ŋ nɩsɩŋ daŋ ʋ lɛ dɩ ʋ sɩaa bɩra suri.” 13Ŋɩɩ nɛ Ananɩas bʋl, “Mɩ Tɩɩna, nɩaa yʋga kɩŋkɛŋ a bʋla pɩmɛ arɩ baala deeŋ ŋaa wʋbɔŋŋɔɔ ŋ nɩaa sɩ hɛ Jerusalɛm lɛ. 14Wɩɩsʋllɩ sɩpaalaaraa kʋhɩasɩŋ pʋ doluŋ taŋ deeŋ lɛ dɩ ʋ kɛsɛ nɩalɩŋ kala sɩɩ chʋɔlʋŋ vɔɔ.” 15La Tɩɩna Yesu bʋla pɩ Ananɩas, “Sii mʋ, mɩ nɛ lɩɩsʋ dɩ ʋ tɩma pɩpɩmɛ. Ʋ jaŋ mʋ bʋl mɩ wɩaa pɩ nɩalɩŋ sɩ bɩ Juu tɩŋŋaa ŋaa, arɩ ba kuoroo, arɩ Iziral nɩaa teeŋ. 16Mɩ nɛ jaŋ dagʋ hɛɛŋ magɛ ŋɩɩ ʋ sɩ jaŋ na a tɩŋ mɩ wɩaa.” 17Ŋɩɩ nɛ Ananɩas sii mʋ dɩa-la Sɔɔl sɩ jʋa. Ʋ jʋʋ a joŋ ʋ nɩsaa daŋ Sɔɔl lɛ aŋ bʋl, “Mɩ naambie Sɔɔl, La Tɩɩna Yesu-la ŋ sɩ na wombiiŋ lɛ ŋ sɩɩ kɔ daha, ʋ nɛ tɩmmɛ. Ʋ tɩmmɛ dɩ mɩ kɔ dɩ ŋ sɩaa wuo suri, ka dɩ Wɩa Dɩŋ-zɔmʋŋ ma hɛŋ lɛ.”

Sɔɔl bʋl Wɩa wɩaa a pɩ nɩaa Damasɩkʋs lɛ

18Ʋ sɩ bʋl ŋɩɩ, dɩ kɩaa nagɛ chenfiliŋ kerikee guu lɩɩ Sɔɔl sɩaa lɛ a tel, ka ʋ bɩra wuo nɩna. Ʋ sii, ba fou Wɩɩchʋɔlɛ lɩɩŋ. 19Ʋ dii kɩaa a bɩra dol. Ʋ hɛ Damasɩkʋs lɛ a jʋʋ Yesu harɩ-tooro-la sɩ hɛ Damasɩkʋs tʋɔŋ tapʋlaa baŋmɛnɛ. 20Ʋ sɩ hɛ nɩmɛ, ʋ guu sii mʋ Wɩɩchʋɔlɛ dɩɩsɩŋ a suomo bʋbʋl Yesu wɩaa a pɩpɩ nɩaa, a bʋl dɩ ʋ nɛ ŋaa Wɩa Bie. 21Nɩalɩŋ kala sɩ nɩɩ wɩalɩŋ ʋ sɩ bʋla, ʋ ŋaaba wʋkpuŋkpere. Baa pɩɛsɛ dɔŋɔ, “Baala deeŋ dee fa bɩ Jerusalɛm lɛ hɛ aa kpʋ nɩalɩŋ sɩɩ to Yesu deeŋ ŋɩɩ? Ŋ-la wɩaa saa dee ʋ bɩra kɔ daha, dɩ ʋ kɛsɛba kaa mʋ Wɩɩsʋllɩ sɩpaalaaraa kʋhɩasɩŋ teeŋ?” 22Sɔɔl fa sɩɩ bʋl wɩalɩŋ ŋɩɩ, ʋ wasa kɛŋ doluŋ a kɩɩ bumbuŋ-la. Ʋ wuo dagɛ arɩ Yesu nɛ ŋaa Kirisito, nɩɩ-la Wɩa sɩ lɩɩsa. Ʋ paala faasa bʋl ŋɩɩ, Juu tɩŋŋaa sɩ hɛ Damasɩkʋs lɛ, ba nandaasɩŋ kala yʋɔrɛ.

23Ʋ hɛ nɩmɛ a dieni, ŋɩɩ nɛ chɛɛ kʋbala Juu tɩŋŋaa vʋʋrɛ dɩ ba kpʋʋ. 24Sɔɔl kʋ nɩɩ. Ba yie pɔ taŋ-la boi-baalɩŋ wɩɩhɛyɛ arɩ tɩtaŋɩŋ kala nɛ dɩ ba kpʋʋ.

Sɔɔl hɛ Jerusalɛm lɛ

25Tɩtaŋ kʋbala Sɔɔl harɩ-tooroo joŋu hɛ sime tʋɔŋ a kɛŋ ŋmɛnɩŋ vɔɔ, a lɛrʋ ʋ kieli jee-la a tuu jeeŋ harɩŋ, a lɩɩ mʋ Jerusalɛm.

26Sɔɔl sɩ mʋ Jerusalɛm, ʋ chɩchɛ dɩ ʋ jʋʋ Yesu harɩ-tooro-la tʋɔŋ. Ba bɩ laa dii arɩ ʋ ŋaa Yesu harɩ-tooru nɛ. Ba fɩfáʋ. 27Yesu nanzɔɔba-la dɔŋɔ ba sɩɩ yɩrɛ Banabas nɛ pɛ ʋ lɛ a kɛnʋ kaa mʋ Yesu nanzɔɔba-la teeŋ. Ʋ nɛ bʋla pɩba ŋɩɩ Sɔɔl sɩ na La Tɩɩna Yesu wombiiŋ lɛ, La Tɩɩna bʋl wɩaa pʋ. Banabas nɛ saa bɩra bʋla pɩba ŋɩɩ Sɔɔl sɩ kɛŋ nyuduoŋ a bʋl Yesu wɩaa pɩ nɩaa Damasɩkʋs lɛ. 28Ba sɛɩ Sɔɔl jʋʋ ba tʋɔŋ a gʋgɔllɛ ʋ tʋɔtɔrʋŋ lɛ Jerusalɛm lɛ, 29a bʋbʋl Wɩa wɩaa arɩ nyuduoŋ La Tɩɩna Yesu yɩrɩŋ lɛ. Ʋ dɩ Juu tɩmma-la sɩɩ bʋl Giriik tɩŋŋaa wʋbʋlʋŋ, ba kɛŋ wɩaa lɩlɛrɛ. Ba wʋwalɩmɛ dɩ ba kpʋʋ. 30Ʋ naambiiri-la sɩ nɩɩ wɩɩŋ deeŋ, ba kɛnʋ kaa mʋ Sɩzarɩya a ŋaa ʋ mʋ Taasɩs.

31Ŋɩɩ harɩŋ lɛ nɩalɩŋ sɩ laa Yesu wɩaa dii aa hilimi Judiya arɩ Galilii arɩ Samarɩa tinteeŋ lɛ kala na wiese, a wasa laa Wɩa dii, a to La Tɩɩna Yesu a fɩfáʋ. Wɩa Dɩŋ-zɔmʋŋ ma pɛ ba lɛ. Ba pʋŋa pɛ.

Pɩɩta mʋ Lida arɩ Jɔpa

32Pɩɩta fa gɔllɛ leree kala nɛ. Tapʋlɩɩ kʋbala ʋ sii mʋ taŋ-la ba sɩɩ yɩrɛ Lida dɩ ʋ na Wɩa nɩaa nɩmɛ. 33Ʋ sɩ mʋ nɩmɛ, ʋ na baal kʋbala baa yɩrɛ Anɩyas dɩ ʋ gbɛrɩgɛ pɩŋ dɩa lɛ jɩsɩŋ chori. 34Ŋɩɩ nɛ Pɩɩta bʋla pʋ, “Anɩyas, Yesu Kirisito vaarɩŋ nɛ, sii chuoli ŋ bɔsɔ.” Ʋ guu sii a duori. 35Nɩalɩŋ kala sɩ hɛ Lida arɩ Sarɔŋ lɛ a na wɩɩ-la, ba ma bɩrɩma to La Tɩɩna Yesu.

36Haal kʋbala nɛ fa hɛ Jɔpa lɛ. Ʋ faa to Yesu nɛ. Ʋ yɩrɩŋ nɛ Tabɩta. (Giriik tɩŋŋaa ka yɩrʋ Dɔkas nɛ. Ʋ bʋbʋɔŋ nɛ ‘bagɩl’.) Ʋ kɛŋ zile kɩŋkɛŋ a pɩpɛ summoo lɛ. 37Bʋa-la lɛ ʋ wʋwɩɩlɛ a sʋʋ. Ba fou lɩɩŋ a kaa jɩla bil lusuŋ nyuŋ dɩa lɛ. 38Jɔpa arɩ Lida fa bɩ bol. Nɩalɩŋ sɩ laa Yesu wɩaa dii a hɛ Jɔpa lɛ nɩɩ arɩ Pɩɩta hɛ Lida lɛ. Ba tɩŋ nɩaa balɩa ʋ teeŋ dɩ ba sʋlʋ a bʋl, “Hɛ doluŋ aŋ kɔ la teeŋ lɩma lɩma.” Ba mʋ a bʋla pʋ. 39Pɩɩta sii to ba harɩŋ mʋ. Ʋ sɩ mʋ nɩmɛ, ba kɛnʋ jɩl lusuŋ nyuŋ dɩa-la. Yo-haalaa kala chɩna gollu a yiyel, a paa gɛrɩ-laalaa arɩ gɛrɩ-vɔbɩa-la Dɔkas sɩ yɛrɛ ʋ fa sɩ hɛ ʋ mɩɩsɩŋ lɛ, a dɩdagɛ Pɩɩta. 40Pɩɩta ŋaa ba kala lɩɩ dɩa-la tʋɔŋ. Ba sɩ lɩa, ʋ tuu kpirimi a chʋɔlɛ Wɩa. Ŋɩɩ nɛ aŋ bɩrɩmɛ sʋʋ-la teeŋ a bʋl, “Tabɩta, sii.” Ʋ suri ʋ sɩaa. Ʋ sɩ na Pɩɩta, ʋ sii hɔŋ. 41Pɩɩta mʋ yiu a kɛŋ ʋ nɩsɩŋ lɛ ʋ sii. Ŋɩɩ nɛ ʋ yɩrɛ nɩalɩŋ sɩ laa Yesu wɩaa dii arɩ yo-haala-la a joŋu pɩba. Ba kala naʋ dɩ ʋ bɩra weye. 42Wɩɩŋ deeŋ teeli Jɔpa kala nɛ. Nɩaa yʋgɛ a kʋ laa La Tɩɩna Yesu wɩaa dii. 43Pɩɩta hɛ puri-tɩsɩrʋ kʋbala dɩa lɛ nɛ Jɔpa lɛ a dieni. Ʋ yɩrɩŋ nɛ fa Saamɔŋ.

Currently Selected:

Tɩntɩŋŋaa 9: SIS

Highlight

Copy