Tɩntɩŋŋaa 8

Sɔɔl to naasɩŋ dɔgɩsɛ nɩalɩŋ sɩ laa Yesu wɩaa dii aa hilimi

1Sɔɔl ma sɛɩ arɩ ba kpʋ Sɩtɩɩvɩŋ. Chɛɛ-la ba suomo to naasɩŋ a dʋdɔgɩsɛ nɩalɩŋ sɩ laa Yesu wɩaa dii aa hilimi Jerusalɛm lɛ. Ba kala pɩsɛ Judiya arɩ Samarɩa tinteeŋ kala lɛ, see Yesu nanzɔɔba-la dʋndʋŋa nɛ ka. 2Nɩalɩŋ sɩɩ fá Wɩa joŋ Sɩtɩɩvɩŋ a hugi aŋ yel ʋ yoho woruŋ.

Ba bʋl Wɩa wʋzɔmɔ-la Samarɩa lɛ

3Sɔɔl faa chɛ dɩ ʋ pugi nɩalɩŋ sɩ laa Yesu wɩaa dii, a to naasɩŋ dʋdɔgɩsɛba. Ʋ to dii-niiriŋ a kɛsɛ baalaa arɩ haala-la sɩ laa Yesu wɩaa dii, a lɛrɛba lɩɩ ba dɩɩsɩŋ lɛ, aŋ leŋ ba kɛmba kaa mʋ tɔ bɩnɩŋ dɩa. 4Nɩalɩŋ fa sɩ pɩsa, ba mʋ gɔllɛ lee-kala a bʋbʋl Wɩa niiŋ wɩaa. 5Fɩlɩp sii mʋ taŋ kʋbala baa yɩrɛ Samarɩa, a bʋl Kirisito wɩaa pɩ nɩalɩŋ sɩ hɛ nɩmɛ. 6Nɩ-daŋ-la kala sɩ nɩɩ wɩalɩŋ Fɩlɩp sɩ bʋla a na ʋ wʋmagɩla-la ʋ sɩ ŋaa, ba kala joŋ ba nyuŋ hɛ wɩalɩŋ ʋ sɩɩ bʋl lɛ. 7Fɩlɩp sɩ bʋl wɩaa ŋɩɩ, jɩŋ-bɔŋŋɔɔ fa kɛŋ nɩaa a yʋgɛ, ba lemba. Dɩ ba nɛ lemba, ba yie lɩɩ a faasa yiyel. Nɩaa ma yʋga a gbɛrɩgɛ, dɔnsʋŋ kɛŋ naasʋʋnʋŋ arɩ na-sʋʋnʋŋ, ba ma kala duori. 8Samarɩa tɩŋŋaa kala tʋɔŋ faasa tɔrɛ.

9Taŋ-la lɛ baal kʋbala ma nɛ fa hɛ nɩmɛ, baa yɩrɛ Saamɔŋ. Ʋ fa kɛŋ daalusuŋ nɛ a ŋɩŋaa wʋkpuŋkperisiŋ taŋ-la lɛ nɩaa nɩna, a dɩdagɛ arɩ ʋ nɛ kɛŋ doluŋ. 10Nɩbalaa arɩ nɩbiisiŋ kala joŋ ba nyuŋ hɛ ʋ wʋŋaalaa lɛ a bʋl, “Baala deeŋ nɛ ŋaa wɩa. Ʋ kɛŋ doluŋ, dol-la ba sɩɩ yɩrɛ Wɩa dol-balɩŋ.” 11Ʋ sɩ ŋaa wʋkpuŋkperisiŋ deemba nɩaa na ʋ diene, ŋɩɩ nɛ tɩɩ nɩaa joŋ ba nyuŋ kala hɛ ʋ wʋŋaalaa lɛ. 12Ama Fɩlɩp sɩ bʋl Wɩa wʋzɔmɔ-la a tɩgɛ Wɩa kuorii-la lɛ, a bʋl Yesu Kirisito ma wɩaa, ba laa wɩalɩŋ dii, ba foba Wɩɩchʋɔlɛ lɩɩŋ, baalaa arɩ haalaa kala. 13Saamɔŋ tɩtɩa kʋ laa wɩalɩŋ dii, ba fou ma Wɩɩchʋɔlɛ lɩɩŋ, ka ʋ mɛrɛ Fɩlɩp lɛ. Ʋ sɩ na wʋkpuŋkperisi-la arɩ wʋmagɩlaa Fɩlɩp sɩɩ ŋaa, ʋ ŋaaʋ wʋkpuŋkpere.

14Yesu nanzɔɔba-la sɩ hɛ Jerusalɛm lɛ aŋ nɩɩ arɩ Samarɩa tɩŋŋaa laa Wɩa wɩaa dii, ŋɩɩ nɛ ba tɩŋ Pɩɩta arɩ Jɔɔŋ dɩ ba mʋ ba teeŋ. 15Ba mʋ a chʋɔlɛ Wɩa pɩba dɩ Wɩa joŋ ʋ Dɩŋ-zɔmʋŋ pɩba, 16bɛɛ wɩaa bʋa-la lɛ Wɩa Dɩŋ-zɔmʋŋ ha bɩ ba kʋŋkala lɛ hɛ. La Tɩɩna Yesu yɩrɩŋ dʋndʋŋa lɛ nɛ ba fa foba Wɩɩchʋɔlɛ lɩɩŋ. 17Pɩɩta arɩ Jɔɔŋ joŋ ba nɩsaa daŋ ba lɛ, ŋɩɩ nɛ Wɩa Dɩŋ-zɔmʋŋ kʋ tuu hɛba lɛ. 18Saamɔŋ sɩ na dɩ Yesu nanzɔɔba-la joŋ ba nɩsaa daŋ ba lɛ Wɩa Dɩŋ-zɔmʋŋ kʋ hɛ ba lɛ, ʋ joŋ moribiee pɩba, 19aŋ bʋl, “Má pɩmɛ ma doluŋ deeŋ dɩ mɩ ma nɛ joŋ mɩ nɩsɩŋ daŋ nʋʋkala lɛ, dɩ Wɩa Dɩŋ-zɔmʋŋ kʋ hɛ tɩɩna lɛ.” 20Ŋɩɩ nɛ Pɩɩta bʋla pʋ, “Ŋ bɩɩna ŋ jaŋ wuo joŋ moribiee yɔɔ Wɩa sɩ joŋ kʋa dii zile nɩaa lɛɛ? Ŋ dɩ ŋ moribiee kala jaŋ jʋʋ nyiniŋ. 21Ŋ bɩ toru kala kɛnɛ tɩntɩmɩŋ deeŋ lɛ. Ŋ bɩ ŋ tʋɔŋ pʋlla Wɩa teeŋ. 22Bɩrɩma lɩɩ wʋbɔmʋŋ deeŋ lɛ, aŋ sʋl La Tɩɩna Wɩa dɩ ʋ joŋ ŋ tʋɔbɩɩnaa deemba ŋ sɩ kɛnɛ ŋ tʋɔŋ lɛ a chɛŋ. 23Mɩ na dɩ ŋ kɛŋ yarɩ-bieri kɩŋkɛŋ nɛ, wʋbɔŋŋɔɔ ma mɩlɩŋ kpɛrɛ.” 24Ŋɩɩ nɛ Saamɔŋ bʋl, “Má chʋɔlɛ Wɩa pɩmɛ dɩ wɩaa deemba kala ma sɩ bʋla sɩ́ mɩ lɛ ŋaa.”

25Ba sɩ bʋl La Tɩɩna Yesu wʋzɔmɔ-la arɩ wɩalɩŋ kala ʋ sɩ ŋaa pɩba dɛrɛ, ba sii dɩ ba mɩɩra mʋ Jerusalɛm. Ba sɩɩ mʋ Jerusalɛm ŋɩɩ, ba bʋl Yesu wʋzɔmɔ-la Samarɩa tinteeŋ tabiisiŋ ma lɛ a yʋgɛ.

Fɩlɩp cheŋ baal-la sɩ lɩɩ Itoopia tinteeŋ

26Ŋɩɩ nɛ La Tɩɩna Wɩa tɩndaarʋ kʋbala kʋ bʋla pɩ Fɩlɩp, “Sii mʋ taŋ-bʋbʋɔŋ a mʋ wombii-bɩnɩɩ-la sɩ lɩɩ Jerusalɛm a mʋmʋ Gaza.” 27Ʋ sɩ lɩa dɩ ʋ mʋ, ʋ cheŋ baal kʋbala dɩ ʋ lɩɩ Itoopia tinteeŋ. Ʋ ŋaa bafere nɛ a tɩma pɩpɩ Itoopia kuoro ba sɩɩ yɩrɛ Kandaasɩ. Kandaasɩ fa ŋaa haal nɛ. Ba-fere-la nɛ faa beŋ ʋ kɩaa kala. Ʋ fa mʋ Jerusalɛm nɛ a chʋɔlɛ Wɩa aŋ hɔŋ ʋ toruko nyuŋ, 28a mɩɩra mʋmʋ dɩa. Ʋ fa sɩɩ vɛŋ ŋɩɩ nɛ ʋ kɩkarɩmɛ Wɩa teniŋ sɛmɛ dɔŋɔ, Wɩa wʋlaabʋlla Azaaya sɩ ŋmʋnsa. 29Ŋɩɩ nɛ Wɩa Dɩŋ-zɔmʋŋ bʋla pɩ Fɩlɩp, “Mʋ a chɩna kpagɛ toruko-la.” 30Fɩlɩp fá mʋ kpagʋ a nɩɩ dɩ ʋʋ karɩmɛ Wɩa teŋ-la sɛmɛ dɔŋɔ Wɩa wʋlaabʋlla Azaaya fa sɩ ŋmʋnsa. Fɩlɩp pɩɛsʋ, “Ŋ jɩŋ wɩalɩŋ ŋ sɩɩ karɩmʋ bʋbʋɔŋ nɛɛ?” 31Ŋɩɩ nɛ baal-la bʋl, “Mɩ bɩ jaŋ wuo jɩŋ ba bʋbʋɔŋ, see dɩ nʋʋ dagɛmɛ.” Ŋɩɩ nɛ aŋ yɩrɛ Fɩlɩp dɩ ʋ jɩla hɔnɔ pɛ ʋ lɛ. 32Wɩa niiŋ wɩalɩŋ bafere-la fa sɩɩ karɩmʋ nɛ ŋ-la:

“Ʋ tɔrɛ ʋ niiŋ a nagɛ piese ba sɩ kaa mʋ dɩ ba kpʋ,

a bɩra nagɛ pie-bie ma sɩ tɔrɛ ʋ niiŋ, ka ba kɩkɛ ʋ pʋnaa nɛ.

Ʋ bɩ ʋ niiŋ suro.

33Ba hɩɩsʋ nɛ, a kpaa kʋsɩŋŋaa vɔmʋ.

Nʋʋkala bɩ ʋ doho naasɩŋ wuo to,

bɛɛ wɩaa ba lɩɩsɛ ʋ mɩɩsɩŋ nɛ dʋnɩa lɛ.”

34Ŋɩɩ nɛ bafere-la pɩɛsɛ Fɩlɩp, “Kʋbɛɛ wɩaa nɛ Wɩa wʋlaabʋllʋ-la bʋbʋl ŋɩɩ? Ʋ tɩtɩa wɩaa nɛ koo nʋʋ ma dɔŋ wɩaa nɛ?” 35Ŋɩɩ nɛ Fɩlɩp suomi Wɩa niiŋ wɩalɩŋ Wɩa teniŋ sɛmpɛɛ-la tɩtɩa lɛ, a bʋl Wɩa wʋzɔmɔ-la sɩ tɩgɛ Yesu lɛ. 36Ba fa sɩ joŋ wombii-la a mʋmʋ, ba mʋ yi lee kʋbala dɩ ʋ kɛŋ lɩɩŋ. Ŋɩɩ nɛ baal-la bʋla pɩ Fɩlɩp, “Na lɩɩŋ nɛ ŋ-la. Bɛɛ nɛ jaŋ kɛrɛmɛ dɩ ŋ sɩ́ mɩ Wɩɩchʋɔlɛ lɩɩŋ fo?” 37Ŋɩɩ nɛ Fɩlɩp bʋla pʋ, “Dɩ ŋ nɛ laa Yesu wɩaa dii arɩ ŋ tʋɔŋ kala, mɩ jaŋ foŋ Wɩɩchʋɔlɛ lɩɩŋ.” Ŋɩɩ nɛ baal-la bʋl, “Mɩ laa dii arɩ Yesu Kirisito nɛ ŋaa Wɩa Bie.” 38Ŋɩɩ nɛ bafere-la ŋaa janɩ-la fa sɩɩ lɛrɛ toruko-la chɩŋ. Ʋ dɩ Fɩlɩp kala tuu a jʋʋ lɩɩ-la. Fɩlɩp fou Wɩɩchʋɔlɛ lɩɩŋ. 39Ba sɩ kʋ lɩɩ lɩɩ-la tʋɔŋ, La Tɩɩna Dɩŋ-zɔmʋŋ guu kʋ joŋ Fɩlɩp kaa lɛl. Baal-la bɩra bɩ Fɩlɩp na aŋ joŋ ʋ wombiiŋ vɩvɛŋ, a kala ŋaa tʋɔtɔrʋŋ. 40Fɩlɩp ŋaa dɩ ʋ chɩŋ dɩ ʋ hɛ taŋ kʋbala baa yɩrɛ Azotus (Asɩdɔd) lɛ. Ʋ gɔllɛ tabiisi-la kala sɩ hɛ nɩmɛ a bʋbʋl Wɩa wʋzɔmɔ-la. Ʋ ŋaa ŋɩɩ nɛ a mʋ yi taŋ kʋbala baa yɩrɛ Sɩzarɩya.

Currently Selected:

Tɩntɩŋŋaa 8: SIS

Highlight

Copy