Tɩntɩŋŋaa 10

Pɩɩta arɩ Kɔnɩɩlɩas

1Baal kʋbala nɛ fa hɛ Sɩzarɩya lɛ, ʋ yɩrɩŋ nɛ Kɔnɩɩlɩas. Ʋ fa ŋaa laalɩyuoro-la ba sɩ kaa kpaa zɔlɔ zɔlɔ ba dɔŋɔ kʋhɩaŋ nɛ, laalɩyuoro-la ba sɩ kaa yɩrɛ Ɩtalɩ laalɩyuoroo. 2Ʋʋ fá Wɩa, ʋ dɩ ʋ dɩa nɩaa kala tuto Wɩa. Ʋ yie pɩpɛ summoo lɛ, a chʋchʋɔlɛ Wɩa ma bʋa na-kala lɛ. 3Wɩɩhɛyɛ kʋbala arɩ kerifi batori bʋa lɛ, Kɔnɩɩlɩas paala chaasa na arɩ duosoo tʋɔŋ dɩ Wɩa tɩndaara kʋbala kʋ jʋʋ a yɩrʋ, “Kɔnɩɩlɩas!” 4Ʋ chaarɛ sɩaa bibeŋ Wɩa tɩndaarʋ-la, fawʋllʋŋ kɛnʋ. Ʋ pɩɛsɛ, “Bɛɛ kʋŋ nɛ mɩ Tɩɩna?” Ŋɩɩ nɛ Wɩa tɩndaarʋ-la bʋla pʋ, “Wɩa nɩɩ ŋ sɩ yie chʋchʋɔlʋ ŋɩɩ nɛ a na ŋ sɩ yie pɩpɛ summo-la ma lɛ ŋɩɩ. A tɩŋ wɩaa deemba wɩaa ʋʋ liisi ŋ wɩaa nɛ. 5Tɩŋ nɩaa lɛɛlɛ dɩ ba mʋ Jɔpa a chɛ yɩrɛ baal kʋbala dɩ ʋ kɔ ŋ teeŋ. Ʋ yɩrɩŋ nɛ Saamɔŋ Pɩɩta. 6Ʋʋ jʋʋ puri-tɩsɩrʋ kʋbala dɩa nɛ, ʋ ma yɩrɩŋ nɛ Saamɔŋ. Ʋ dɩa kpagɛ mʋgʋ-balɩŋ nɛ.” 7Wɩa tɩndaarʋ-la sɩ bʋl wɩalɩŋ dɛrɛ, ʋ mɩɩra viiri. Ŋɩɩ nɛ aŋ ka Kɔnɩɩlɩas yɩrɛ ʋ dɩa tɩntɩnnaa balɩa a pɛ laalɩyuoro kʋbala lɛ. Laalɩyuoru-la ŋaa nɩalɩŋ sɩ yie hʋhɔŋ ʋ bʋbʋɔŋ dɔŋɔ nɛ a fɩfá Wɩa. 8Kɔnɩɩlɩas fa bʋl wɩɩ-la kala ʋ sɩ na nɛ a pɩba aŋ leŋ ba mʋ Jɔpa.

9Taŋ sɩ pʋla, wɩa magɛ nyu-gbaŋa dɩ ba mʋ kpagɛ Jɔpa. Ba sɩɩ mʋ ŋɩɩ, Pɩɩta ma jɩl lusuŋ dɩ ʋ chʋɔlɛ Wɩa. 10Losuŋ fa kɛnʋ ʋ chɩchɛ kʋdiilee dɩ ʋ dii. Ba sii ŋɩŋaa kʋdiilee dɩ ba pʋ. Ba sɩɩ ŋaa kʋdiile-la ŋɩɩ, ʋ na arɩ duosoo tʋɔŋ 11dɩ wɩa-nyuŋ kpaa. Ka kʋŋ nagɛ gɛrɩ-balɩŋ a lɩɩ wɩa-nyuŋ kʋ tuu tinteeŋ. Ba kɛŋ ʋ niipinee banɛsɛ lɛ. 12Ka pʋŋ-dosunuŋ arɩ zaarɩ-dosunuŋ arɩ kɩalɩŋ sɩ kɛŋ bɔyɛ tutuuri tinteeŋ hɛ ʋ tʋɔŋ. 13Ŋɩɩ nɛ ʋ nɩɩ nʋʋ yikoro dɩ ʋ bʋla pɩ Pɩɩta, “Pɩɩta, sii kpʋ a dii.” 14Pɩɩta bʋl, “Aɩ, mɩ Tɩɩna, mɩ ha bɩ kʋ-la kala sɩ kɛŋ disiniŋ die.” 15Yikoro-la bɩra mɩɩra bʋla pʋ, “Kʋ-la kala Wɩa sɩ sɩ ʋ zɔmɔ, bɩra sɩ́ bʋl arɩ ʋ kɛŋ disiniŋ nɛ.” 16Ʋ na kɩaa deemba dɩ ba kʋ tuu naansɩɩŋ butori nɛ, aŋ mɩɩra guu jɩl wɩa-nyuŋ.

17Wɩɩ-la kperi Pɩɩta. Ʋ hɔnɔ kɛŋ wɩɩ-la ʋ sɩ na bʋbʋɔŋ bɩbɩɩnɛ, dɩ nɩalɩŋ Kɔnɩɩlɩas fa sɩ tɩma nɛ pɩɛsa kʋ chɩŋ Saamɔŋ boi-baalɩŋ lɛ ŋɩɩ. 18Ŋɩɩ nɛ ba yɩrɛ a pɩɛsɛ, “Baal kʋbala hɛ dɩa deeŋ tʋɔŋ baa yɩrɛ Saamɔŋ Pɩɩtaa?” 19Pɩɩta fa ha kɛŋ wɩɩ-la ʋ fa sɩ na a bɩbɩɩnɛ. Ŋɩɩ nɛ dɩ Wɩa Dɩŋ-zɔmʋŋ bʋla pʋ, “Bee na baalaa batori nɛ hɛ daha a chɩchɛŋ. 20Sii tuu a sɩ́ logo logo ŋaa, aŋ to ba harɩŋ mʋ. Mɩ nɛ tɩmba ŋ teeŋ.” 21Ŋɩɩ nɛ Pɩɩta sii tuu ba teeŋ a bʋla pɩba, “Mɩ nɛ nɩɩ-la ma sɩɩ chɛ. Bɛɛ nɛ ma kaa chɩchɛmɛ?” 22Ŋɩɩ nɛ ba bʋl, “Laalɩyuoroo kʋhɩaŋ kʋbala, baa yɩrɛ Kɔnɩɩlɩas nɛ tɩnla. Ʋ ŋaa tʋɔpʋl tɩɩna nɛ a fɩfá Wɩa. Juu tɩŋŋaa ma kala zizilu. Wɩa tɩndaarʋ kʋbala nɛ kʋ bʋla pʋ dɩ ʋ yɩrɩŋ dɩ ŋ kɔ ʋ dɩa, dɩ ʋ nɩɩ wɩɩ-la ŋ sɩ jaŋ bʋla pʋ.” 23Ŋɩɩ nɛ Pɩɩta yɩrɛba dɩ ba kʋ jʋʋ chʋa ʋ dɩa lɛ.

Taŋ sɩ pʋla ʋ sii dɩ ba mʋ. Ʋ naambiiri-la dɔnsʋŋ sɩ laa Yesu wɩaa dii Jɔpa lɛ ma pɛ kɛnʋ mʋ. 24Chɛ-lɩamɩŋ chɛɛŋ ba mʋ yi Sɩzarɩya. Nɩmɛ Kɔnɩɩlɩas arɩ ʋ naambiiriŋ arɩ ʋ nandɔnsʋŋ ʋ sɩ yɩra, ba kala hɔnɔ gbɛrʋ. 25Pɩɩta fa sɩ kʋ jʋʋ, Kɔnɩɩlɩas sii chemu, a tuu kpirimi ʋ sɩpaaŋ a chʋɔlʋ. 26Ŋɩɩ nɛ Pɩɩta kɛnʋ aŋ bʋl, “Sii, mɩ ma ŋaa nuhuobiiŋ nɛ.” 27Pɩɩta arɩ Kɔnɩɩlɩas fa haa bʋl wɩaa nɛ aŋ to dɔŋɔ jʋjʋʋ dɩa. Pɩɩta jʋʋ na dɩ nɩaa yʋga a hilimi nɩmɛ. 28Ŋɩɩ nɛ ʋ bʋla pɩba, “Ma tɩtɩa jɩma arɩ Juu tɩŋŋaa kɩsɩŋ nɛ dɩ ba guoli nɩalɩŋ sɩ bɩ Juu tɩŋŋaa ŋaa tʋɔŋ. Ba bɩ ba dɩɩsɩŋ maa mʋ. Ama Wɩa dagɛmɛ dɩ mɩ sɩ́ nʋʋkala kaa yɩrɛ disiŋ tɩɩna. 29Ŋɩɩ nɛ tɩɩ, ba sɩ kʋ yɩrɛmɛ, mɩ bɩ wɩɩkala bʋla aŋ kɔ. Mɩ sɩ kɔ ŋ-la, bʋl wɩɩ-la sɩ tɩɩ ŋ yɩrɛmɛ.”

30Ŋɩɩ nɛ Kɔnɩɩlɩas bʋla pʋ, “Tapʋlaa batori nɛ ŋ-la arɩ bʋa deeŋ tɩtɩa lɛ, mɩɩ chʋɔlɛ Wɩa wɩɩhɛyɛ mɩ dɩa lɛ. Dɩ baal kʋbala nɛ ŋɩɩ a chɩŋ mɩ sɩpaaŋ. Ʋ gɛnnɩŋ faasa tʋtʋl. 31Ʋ bʋla pɩmɛ, ‘Kɔnɩɩlɩas, Wɩa nɩɩ ŋ sɩ yie chʋchʋɔlʋ ŋɩɩ nɛ, a na ŋ sɩ yie pɩpɛ summoo ma lɛ. 32Saa tɩŋ nɩaa dɩ ba mʋ Jɔpa, a chɛ yɩrɛ baal kʋbala dɩ ʋ kɔ. Ʋ yɩrɩŋ nɛ Saamɔŋ Pɩɩta. Ʋʋ jʋʋ puri-tɩsɩrʋ kʋbala dɩa nɛ, baa yɩrɛ Saamɔŋ. Ʋ dɩa kpagɛ mʋgʋ-balɩŋ nɛ.’ ” 33Kɔnɩɩlɩas bɩra bʋl, “Ŋɩɩ nɛ tɩɩ mɩ guu tɩŋ nɩaa, ba kɔ ŋ teeŋ dɩ ba yɩrɩŋ. Ŋ ma hɛ doluŋ ŋ sɩ kɔ ŋ-la. Lɛɛlɛ la kala hilime nɛ Wɩa sɩpaaŋ, a gbɩgbɛrɛ dɩ la nɩɩ wɩɩ-la La Tɩɩna sɩ dagɩŋ dɩ ŋ bʋla pɩla.”

Pɩɩta bʋl Wɩa wɩaa a pɩpɩ nɩaa

34Ŋɩɩ nɛ Pɩɩta suomo bʋbʋl, “Mɩ lɛɛlɛ jɩma arɩ wʋtɩtɩɩ nɛ, Wɩa joŋ nɩaa kala ba ŋaa kʋbala nɛ. 35Nʋʋkala sɩɩ faʋ a ŋɩŋaa wɩaa ba bʋa lɛ, Wɩa laaʋ nɛ. Ʋ sɩpaaŋ tuo doho-la kala ʋ sɩ ŋaa lɛ. 36Ma ma nɩɩ Wɩa wʋzɔmɔ-la ʋ sɩ joŋo pɩ Iziral tɩŋŋaa nɛ. Ʋ fa bʋla pɩba dɩ ba to Yesu Kirisito lɛ a na wiese. Ʋ nɛ ŋaa kʋŋkala Tɩɩna. 37Ma jɩŋ wɩɩ-la sɩ ŋaa Judiya tinteeŋ kala lɛ nɛ a suomi Galilii lɛ, Jɔɔŋ sɩ bʋl Wɩa wɩaa aŋ fo nɩaa Wɩɩchʋɔlɛ lɩɩŋ harɩŋ lɛ. 38Ma nɩɩ Yesu wɩaa nɛ. Wɩa joŋ ʋ Dɩŋ-zɔmʋŋ hɛ ʋ lɛ nɛ a pʋ doluŋ. Ʋ sii mʋ lee-kala, a ŋɩŋaa wʋzɔŋŋɔɔ pɩpɩ nɩaa, aa vaarɛ nɩalɩŋ kala Sɩtaanɩ sɩ nyaga bil. Wɩa fa hɛ ʋ teeŋ, ŋɩɩ nɛ tɩɩ ʋ wuo ŋɩŋaa wɩaa deemba kala. 39Wɩalɩŋ kala ʋ sɩ ŋaa Jerusalɛm arɩ Juu tɩŋŋaa tinteeŋ kala lɛ, la na a ŋaa ba pɛ-naaraa. Ŋɩɩ nɛ ba kpaasʋ mɛrɛ daagɛsɛ nyuŋ ʋ sʋʋ. 40Ama Wɩa chɩsʋ sʋʋŋ lɛ tapʋl-torimuŋ chɛɛŋ a leŋ nɩaa bɩra naʋ. 41Nʋʋkala dee bɩ ʋ na, ama la nɩalɩŋ Wɩa fa sɩ lɩɩsa dɩ la ŋaa ʋ dansɩaba, la nɛ naʋ. Ʋ sɩ sii sʋʋŋ lɛ, la kala hɔŋ dɩ-bala a dii kɩaa. 42Ʋ sɩ dɩ la bʋl Wɩa wɩaa a pɩ nɩaa, a dagɛba arɩ Wɩa lɩɩsʋ nɛ dɩ ʋ ŋaa nɩweyee arɩ nɩsʋʋnʋŋ kala sarɩya diire. 43Ʋ wɩaa nɛ Wɩa wʋlaabʋllaa fa bʋl ŋɩɩ. Ba sɩ nʋʋkala sɩ laa ʋ wɩaa dii, Wɩa jaŋ joŋ tɩɩna wʋbɔŋŋɔɔ chɛʋ ʋ yɩrɩŋ lɛ.”

Wɩa joŋ ʋ Dɩŋ-zɔmʋŋ a hɛ nɩalɩŋ sɩ bɩ Juu tɩŋŋaa ŋaa lɛ

44Pɩɩta ha sɩɩ bʋl wɩaa ŋɩɩ nɛ, Wɩa Dɩŋ-zɔmʋŋ kʋ tuu hɛ nɩalɩŋ kala fa sɩɩ jegili wɩalɩŋ lɛ. 45Ʋ ŋaa Juu tɩmma-la fa sɩ laa Yesu wɩaa dii a lɩɩ Jɔpa a to Pɩɩta harɩŋ kɔ wʋkpuŋkpere Wɩa sɩ joŋ ʋ Dɩŋ-zɔmʋŋ a hɛ nɩalɩŋ sɩ bɩ Juu tɩŋŋaa ŋaa lɛ. 46Ba nɩa arɩ baa bʋl wɩaa yikori wogusuŋ lɛ ba sɩ bɩ jɩŋ a dɩdɛnnɛ Wɩa. Ŋɩɩ nɛ Pɩɩta bʋl, 47“Wɩa sɩ joŋ ʋ Dɩŋ-zɔmʋŋ pɩla ŋɩɩ, ŋɩɩ nɛ ʋ joŋo pɩ nɩaa deemba ma. Bɛɛ nɛ jaŋ wuo tɔ nɩaa deemba dɩ ba sɩ́ Wɩɩchʋɔlɛ lɩɩŋ fo?” 48Ʋ ŋaa ba foba Wɩɩchʋɔlɛ lɩɩŋ Yesu Kirisito yɩrɩŋ lɛ. Ŋɩɩ nɛ ba sʋlʋ dɩ ʋ hɔŋ ba teeŋ tapʋlaa baŋmɛnɛ.

Currently Selected:

Tɩntɩŋŋaa 10: SIS

Highlight

Copy