Tɩntɩŋŋaa 11

Pɩɩta bʋl ʋ tɩntɩŋŋaa wɩaa a pɩ nɩalɩŋ sɩ laa Yesu wɩaa dii aa hilimi Jerusalɛm lɛ

1Yesu nanzɔɔba-la arɩ nɩalɩŋ dɔnsʋŋ sɩ laa Yesu wɩaa dii a lɩɩ Judiya lɛ sɩ nɩa arɩ nɩalɩŋ sɩ bɩ Juu tɩŋŋaa ŋaa ma laa Wɩa wɩaa dii nɛ. 2Pɩɩta sɩ mɩɩra mʋ Jerusalɛm, nɩalɩŋ sɩ cho dɩ ba keri nɩalɩŋ sɩ bɩ Juu tɩŋŋaa ŋaa penee, ka ba-na to Yesu, ba bʋl ʋ teeŋ woruŋ aŋ pɩɛsʋ, 3“Bɛɛ nɛ tɩɩ ŋ mʋ penpuru tɩmma-la sɩ bɩ Juu tɩŋŋaa ŋaa teeŋ, ŋ dɩ ba paala dii kɩaa?” 4Ŋɩɩ nɛ Pɩɩta suomo bʋbʋl wɩɩ-la kala sɩ paala chaasa ŋaa. 5Ʋ bʋla, “Mɩ fa hɛ Jɔpa lɛ nɛ a chʋchʋɔlɛ Wɩa, a na arɩ duosoo tʋɔŋ dɩ kʋŋ a nagɛ gɛrɩ-balɩŋ lɩɩ wɩa-nyuŋ kʋ tuu mɩ teeŋ. Ba kɛŋ gɛrɩ-la niipine-la banɛsɩmɩŋ lɛ. 6Mɩ nyilimi ʋ tʋɔŋ a na pʋsʋŋ arɩ bagɩlaa arɩ kɩalɩŋ sɩ kɛŋ bɔyɛ tutuuri tinteeŋ arɩ diibiisiŋ. 7Ka mɩ nɩɩ nʋʋ yikoro sɩ bʋla pɩmɛ, ‘Pɩɩta, sii kpʋ a dii.’ 8Ŋɩɩ nɛ mɩ bʋl, ‘Aɩ, mɩ Tɩɩna, mɩ ha bɩ kʋ-la kala sɩ kɛŋ disiniŋ die.’ 9Yikoro-la sɩ lɩɩ wɩa-nyuŋ fa bɩra bʋla pɩmɛ, ‘Kʋ-la kala Wɩa sɩ sɩ ʋ zɔmɔ, bɩra sɩ́ bʋl arɩ ʋ kɛŋ disiniŋ nɛ.’ 10Wɩɩŋ deeŋ ŋaa naansɩɩŋ butori nɛ, ka kɩalɩŋ mɩɩra jɩl wɩa-nyuŋ.

11Bʋa-la tɩtɩa lɛ nɛ baalaa batori ba sɩ tɩma mɩ teeŋ a lɩɩ Sɩzarɩya, ba kʋ jʋʋ dɩa-la mɩ fa sɩɩ jʋʋ. 12Wɩa Dɩŋ-zɔmʋŋ bʋla pɩmɛ dɩ mɩ sɩ́ logo logo ŋaa aŋ to ba harɩŋ mʋ, dɩ mɩ joŋ nɩaa kala ba ŋaa kʋbala. Mɩ dɩ mɩ naambiiriŋ deemba balɩdʋ sɩ lɩɩ Jɔpa, la kala nɛ mʋ Sɩzarɩya, a jʋʋ Kɔnɩɩlɩas dɩa. 13Ŋɩɩ nɛ ʋ bʋla pɩla arɩ ŋɩɩ ʋ sɩ na Wɩa tɩndaara dɩ ʋ chɩŋ ʋ dɩa tʋɔŋ a bʋla pʋ, ‘Tɩŋ nɩaa dɩ ba mʋ Jɔpa a yɩrɛ baal kʋbala baa yɩrɛ Saamɔŋ Pɩɩta, dɩ ʋ kɔ. 14Ʋ jaŋ bʋl wɩaa pɩma a dagɛma wɩalɩŋ sɩ jaŋ laa ŋ dɩ ŋ dɩa nɩaa kala ta.’ 15Mɩ sɩ suomo bʋbʋl wɩaa, Wɩa Dɩŋ-zɔmʋŋ kʋ tuu hɛba lɛ, arɩ ʋ fa sɩ laa sɩpaaŋ hɛ la lɛ ŋɩɩ. 16Ŋɩɩ nɛ mɩ liisi wɩɩ-la La Tɩɩna Yesu fa sɩ bʋla. Ʋ fa sɩ,

‘Jɔɔŋ sɩɩ fo nɩaa Wɩɩchʋɔlɛ lɩɩŋ, lɩɩŋ dʋndʋŋa nɛ ʋ kaa fo.

Ama mɩ-na jaŋ joŋ mɩ Dɩŋ-zɔmʋŋ a hɛ ma lɛ.’

17Wɩa sɩ joŋ ʋ Dɩŋ-zɔmʋŋ pɩla ŋɩɩ bʋa-la lɛ la sɩ kʋ laa Yesu Kirisito wɩaa dii, ŋɩɩ nɛ ʋ joŋo dii zile ba ma lɛ. Kʋbɛɛ nɛ saa ka mɩ dɩ mɩ bʋl Wɩa sɩ́ ŋɩɩ ŋaa?” 18Ba sɩ nɩɩ wɩɩŋ deeŋ, ba bɩra bɩ wɩɩkala wuo bʋl aŋ dɛnnɛ Wɩa a bʋl, “Wɩa paala pɩ nɩalɩŋ ma sɩ bɩ Juu tɩŋŋaa ŋaa wombiiŋ nɛ dɩ ba wuo bɩrɩma lɩɩ ba wʋbɔŋŋɔɔ lɛ aŋ kɛŋ mɩɩsɩŋ.”

Nɩalɩŋ sɩ laa Yesu wɩaa dii aa hilimi Antɩɔk lɛ

19Bʋa-la lɛ ba fa sɩ to naasɩŋ dʋdɔgɩsɛ nɩalɩŋ sɩ laa Yesu wɩaa dii a tɩŋ Sɩtɩɩvɩŋ wɩaa, ba pɩsɛ. Ba sɩ pɩsɛ ŋɩɩ, ba mʋ yi Fɔnɩɩsɩa arɩ Saapʋrɔs tinteeŋ arɩ taŋ-la ba sɩɩ yɩrɛ Antɩɔk, a bʋl Wɩa niiŋ wɩaa pɩpɩ Juu tɩŋŋaa dʋndʋŋa nɩmɛ. 20Ama nɩalɩŋ dɔnsʋŋ sɩ laa Yesu wɩaa dii a lɩɩ Saapʋrɔs arɩ Siriini sii mʋ Antɩɔk, a suomo bʋl La Tɩɩna Yesu wɩaa a pɩpɩ nɩalɩŋ ma sɩɩ bʋl Giriik wʋbʋlʋŋ. 21La Tɩɩna fa pɛ ba lɛ nɛ woruŋ, nɩaa yʋga a laa Yesu wɩaa dii a bɩrɩma tutou.

22Nɩalɩŋ sɩ laa Yesu wɩaa dii aa hilimi Jerusalɛm lɛ nɩɩ wɩɩŋ deeŋ. Ba tɩŋ Banabas dɩ ʋ mʋ Antɩɔk. 23Ʋ sɩ mʋa, ʋ na ŋɩɩ Wɩa sɩ pɛ nɩalɩŋ lɛ. Ʋ tʋɔŋ tɔrɛ. Ʋ bʋl wɩaa nyaasɛ ba nyuŋ woruŋ dɩ ba kɛŋ wʋtɩtɩɩ a to La Tɩɩna Yesu arɩ ba tʋɔŋ kala. 24Banabas fa ŋaa nɩpʋla nɛ a laa Wɩa dii woruŋ. Wɩa Dɩŋ-zɔmʋŋ ma hɛ ʋ lɛ woruŋ. Nɩaa fa yʋga a to ʋ lɛ a laa La Tɩɩna Yesu wɩaa dii. 25Ŋɩɩ nɛ Banabas sii mʋ Taasɩs dɩ ʋ chɛ Sɔɔl leriŋ. 26Ʋ sɩ naʋ, ʋ kɛnʋ ba kɔ Antɩɔk. Ba hɔŋ nɩmɛ jɩ-piliŋ a dagɛ nɩ-daŋ Wɩa wɩaa. Ba dɩ nɩalɩŋ sɩ laa Yesu wɩaa dii yie hihilimi. Antɩɔk lɛ nɛ ba suomo kɛŋ Yesu harɩ-tooro-la kaa yɩyɩrɛ Kirisitiamba.

27Bʋa-la lɛ nɛ, Wɩa wʋlaabʋllaa dɔnsʋŋ lɩɩ Jerusalɛm a kɔ Antɩɔk. 28Ba dɔŋɔ yɩrɩŋ nɛ Agabɔs. Ʋ sii chɩŋ a bʋl wɩaa, Wɩa Dɩŋ-zɔmʋŋ doluŋ lɛ dɩ losuŋ jaŋ jʋʋ dʋnɩa kala. Losu-la kʋ jʋʋ dɩ Kɩlaadɩa nɛ fa ŋaa Rom tinteeŋ kuoru-balɩŋ. 29Ŋɩɩ nɛ Yesu harɩ-tooro-la vʋʋrɛ a sɛɩ dɩ ba jaŋ kɩɛsɛ moribiee a joŋo tɩŋ, dɩ ba kaa mʋ pɛ ba naambiiri-la sɩ hɛ Judiya lɛ, dɩ nʋʋkala tɩa magɛ ŋɩɩ kala ʋ sɩ jaŋ wuo. 30Ba kɩɛsɛ moribie-la, a joŋo tɩŋ Banabas arɩ Sɔɔl, ba kaa mʋ pɩ nɩalɩŋ sɩ laa Yesu wɩaa dii kʋhɩasɩŋ Judiya lɛ.

Currently Selected:

Tɩntɩŋŋaa 11: SIS

Highlight

Copy