Tɩntɩŋŋaa 12

Ba wasa to naasɩŋ dɔgɩsɛ Yesu nanzɔɔba

1Kuoro kʋbala nɛ fa hɛ nɩmɛ a bibeŋ Juu tɩŋŋaa tinteeŋ. Ʋ yɩrɩŋ nɛ Hɛrɔd. Bʋa deeŋ lɛ ʋ suomo to naasɩŋ dʋdɔgɩsɛ nɩalɩŋ dɔnsʋŋ sɩ laa Yesu wɩaa dii aa hilimi. 2Ʋ ŋaa ba joŋ tokobiiŋ a kpʋ Jɔɔŋ naambie Jeems. 3Ʋ sɩ na dɩ Juu tɩŋŋaa tʋɔŋ tɔrɛ wɩɩ-la ʋ sɩ ŋaa lɛ, ʋ ŋaa ba kɛŋ Pɩɩta ma tɔ dɩa. (Wɩɩŋ deeŋ ŋaa ba gbieli-bal-la lɛ nɛ ba sɩ yie dii boroboro sɩ bɩ sɩbʋrʋŋ kɛnɛ.) 4Ba sɩ kɛŋ Pɩɩta, ba kɛnʋ kaa mʋ tɔ dɩa. Nɩmɛ nɛ ba ŋaa laalɩyuoroo fii arɩ balɩdʋ bibenu. Banɛsɛ yie benu mʋa, banɛsɛ ma bɩra kʋ laaba lɛ. Hɛrɔd fa bɩɩna dɩ dɩɩsɩŋ kiele bal gbiele-la nɛ bal, ka ʋ kɛnʋ lɩɩ pɩ nɩalɩŋ dɩ ba dii ʋ sarɩya. 5Pɩɩta fa sɩ hɛ nɩtɔɔrɩ dɩa lɛ ŋɩɩ, nɩalɩŋ sɩ laa Yesu wɩaa dii aa hilimi chʋɔlɛ Wɩa pʋpʋ arɩ sɩɩfɩɛsɩŋ.

Ba lɩɩsɛ Pɩɩta nɩtɔɔrɩ dɩa lɛ

6Tɩtaŋ kʋbala Pɩɩta fa pɩŋ doŋ laalɩyuoro-la balɩamɩŋ sɩɩ benu pɛgɛ. Ba fa kɛŋ chɔrʋmɔɔ balɩa nɛ a kaa vɔɔ ʋ nɩsaa lɛ, ka laalɩyuoroo balɩa ma chɩŋ nɩtɔɔrɩ dɩa-la boiŋ niiŋ a pɔ. Ʋ taŋ nɩɩ pʋl dɩ Hɛrɔd fa kɛnʋ kaa lɩɩ nɩalɩŋ tʋɔŋ dɩ ba dii ʋ sarɩya. 7Ŋɩɩ nɛ Wɩa tɩndaarʋ kʋbala guu kʋ chɩŋ nɩmɛ. Pʋlʋmʋŋ chaanɛ nɩtɔɔrɩ dɩa-la tʋɔŋ. Wɩa tɩndaarʋ-la kʋ pɛɛsɛ Pɩɩta vaaŋ lɛ a chɩsʋ, a bʋla pʋ dɩ ʋ sii lɩma. Chɔrʋmɔ-la guu lɩɩ Pɩɩta nɩsaa lɛ a tuu tel. 8Ŋɩɩ nɛ Wɩa tɩndaarʋ-la bʋla pʋ dɩ ʋ paa ʋ gɛnnɩŋ laalɛ a hɛ ʋ nɛntɛŋŋɛɛ. Pɩɩta ŋaa ŋɩɩ Wɩa tɩndaarʋ-la sɩ bʋla pʋ. Ʋ bɩra bʋla pʋ dɩ ʋ joŋ ʋ gɛrɩ-balɩŋ laalɛ a to ʋ harɩŋ. 9Ʋ to ʋ harɩŋ a lɩɩ nɩtɔɔrɩ dɩa-la tʋɔŋ. Ʋ sɩɩ to Wɩa tɩndaarʋ-la harɩŋ ŋɩɩ, ʋ fa ha bɩ jɩŋ wɩɩ-la Wɩa tɩndaarʋ-la sɩɩ ŋaa, ŋaa wʋtɩtɩɩ. Ʋ bɩɩna ʋ na arɩ duosoo tʋɔŋ nɛ. 10Ba mʋ kieli laalɩyuoro-la sɩ chɩŋ sɩpaaŋ a bibeŋ nɩtɔɔrɩ dɩa-la, a bɩra mʋ kieli laalɩyuoro-la dɔnsʋŋ ma sɩ chɩŋ harɩŋ a ma ha bibeŋ nɩtɔɔrɩ dɩa-la, a mʋ yi hɔɔŋ boro-la sɩ tɔ boi-baalɩŋ a jʋjʋʋ tabal-la. Boi-la suri ʋ tɩtɩa lɛ, ba lɩɩ a joŋ wombii kʋbala aa vɛŋ. Ba sɩ mʋ mʋa, Wɩa tɩndaarʋ-la joŋ Pɩɩta ta. 11Ŋɩɩ nɛ Pɩɩta lɛɛlɛ jɩŋ arɩ wɩɩ-la sɩ ŋaa ʋ lɛ ŋaa wʋtɩtɩɩ nɛ. Ʋ bʋl, “Mɩ lɛɛlɛ jɩma arɩ Wɩa nɛ tɩŋ ʋ tɩndaara ʋ kʋ laamɛ ta Hɛrɔd nɩsɩŋ lɛ arɩ wɩalɩŋ kala Juu tɩŋŋaa fa sɩ bɩɩna ba ŋaa mɩ lɛ.”

12Pɩɩta sɩ kʋ jɩŋ wɩɩŋ deeŋ nɛ ŋaa ʋ lɛ, ʋ mʋ Jɔɔŋ Maak naaŋ Mɛɛrɩ dɩa. Ʋ mʋ nɩmɛ, dɩ nɩaa fa yʋga a hilimee chʋɔlɛ Wɩa. 13Pɩɩta ŋmoo boro. Toli-bie kʋbala baa yɩrɛ Roda, ʋ fa ŋaa ketii nɛ dɩa-la lɛ. Ʋ kɔ dɩ ʋ na. 14Ʋ sɩ kʋ nɩɩ Pɩɩta yikoro, ʋ wuo jɩŋ dɩ Pɩɩta nɛ. Ʋ tʋɔŋ tɔrɛ woruŋ. Ʋ bɩ boi-la suro aŋ mɩɩra fá jʋʋ bʋla pɩ nɩaa dɩ Pɩɩta nɛ chɩŋ dɩ-jalɩŋ. 15Ba sɩ toli-bie-la nyuŋ tuo. Ka ʋ-na ha bʋl dɩ wʋtɩtɩɩ nɛ. Ŋɩɩ nɛ ba bɩra bʋl, ʋ nɩdɩma nɛ ʋ na. 16Ka Pɩɩta ma ha chɩŋ a ŋmuŋmoo boro. Ŋɩɩ nɛ ba kʋ kɛŋ boro-la suri a naʋ. Ʋ ŋaaba wʋkpuŋkpere. 17Ŋɩɩ nɛ Pɩɩta kɛŋ ʋ nɩsɩŋ vigi dɩ ba kɛŋ goŋ, aŋ bʋla pɩba ŋɩɩ Wɩa sɩ kɛnʋ kaa lɩɩ nɩtɔɔrɩ dɩa-la tʋɔŋ. Ʋ sɩ dɩ ba bʋl wɩɩŋ deeŋ a pɩ Jeems arɩ ʋ naambiiri-la ma dɔnsʋŋ sɩ laa Yesu wɩaa dii. Ʋ sɩ bʋl ŋɩɩ dɛrɛ, ʋ lɩɩ to lee dɔŋ mʋ.

18Taŋ sɩ pʋla, laalɩyuoro-la sɩ pɔ nɩtɔɔrɩ dɩa-la bɩ Pɩɩta na. Ba tʋɔbɩɩnaa kala vʋgʋmɛ. Ba pɩpɩɛsɛ dɔŋɔ dɩ ba na wɩɩ-la sɩ ŋaa Pɩɩta lɛ. 19Ŋɩɩ nɛ Hɛrɔd bʋl dɩ ba chɛ kɛnʋ kaa kɔ. Ba chɛʋ lɔl. Hɛrɔd pɩɛsɛ laalɩyuoro-la dɩ ba na wɩɩ-la kala sɩ ŋaa, aŋ ŋaa ba kpʋba. Ŋɩɩ nɛ Hɛrɔd sii lɩɩ Judiya tinteeŋ, a mʋ Sɩzarɩya a hɔŋ nɩmɛ.

Kuoro Hɛrɔd sʋba

20Bʋa deeŋ lɛ Hɛrɔd fa na baanɩŋ woruŋ Taaya arɩ Sɩdɔŋ nɩaa nyuŋ. Ba sii hɛ dɔŋɔ lɛ a mʋ dɩ ba sʋlʋ, a laa sɩpaaŋ a na Bilasitas, nɩɩ-la sɩɩ beŋ kuoro dɩa nɛ, dɩ ʋ pɛ ba lɛ. Ʋ pɛ ba lɛ. Ŋɩɩ nɛ ba mʋ Hɛrɔd teeŋ a sʋlʋ dɩ ʋ leŋ dɩ ba sɩŋ, bɛɛ wɩaa ba nɩaa kʋdiilee ka lɩɩ kuoro tinteeŋ nɛ. 21Hɛrɔd hɛ tapʋlʋŋ dɩ ba kɔ. Tapʋlɩɩ-la sɩ yie, Hɛrɔd sii laalɛ ʋ kuori-gɛnnɩŋ a hɔŋ ʋ kuoru kpasa nyuŋ, a bʋl wɩaa pɩpɩ nɩalɩŋ. 22Ŋɩɩ nɛ nɩalɩŋ faasa ŋɩŋaa goŋ a bʋl, “Wɩa nɩɩ bʋl ŋɩɩ, nuhuobiine dee.” 23Ba sɩ bʋl ŋɩɩ, Hɛrɔd bɩ Wɩa zile pa. Ŋɩɩ nɛ tɩɩ Wɩa tɩndaara kʋ tuu a guu joŋ nyanyalaa hɛ ʋ lɛ nanchʋɔlaa diiu, ʋ sʋʋ.

24Ka Wɩa niiŋ wɩaa ha teeli leriŋ. Nɩaa yʋga a nɩɩ a laa dii. 25Banabas arɩ Sɔɔl sɩ tɩŋ tɩntɩmɩɩ-la ba sɩ sɩ dɩ ba mʋ tɩŋ Jerusalɛm lɛ a dɛrɛ, ba mɩɩra mʋ Antɩɔk, a pɛ kɛŋ Jɔɔŋ Maak ma pɛ ba lɛ mʋ.

Currently Selected:

Tɩntɩŋŋaa 12: SIS

Highlight

Copy