Tɩntɩŋŋaa 13

Ba lɩɩsɛ Banabas arɩ Sɔɔl a tɩmba dɩ ba mʋ leree dɔnsʋŋ a bʋl Wɩa wɩaa

1Nɩalɩŋ sɩ laa Yesu wɩaa dii aa hilimi Antɩɔk lɛ, Wɩa wʋlaabʋllaa arɩ nɩalɩŋ sɩɩ dagɛ nɩaa fa hɛ ba tʋɔŋ nɛ. Ba yɩraa nɛ: Banabas, arɩ Simioŋ ba sɩɩ yɩrɛ nɩ-bine, arɩ Lusias sɩ lɩɩ Siriini, arɩ Sɔɔl arɩ Maneyaŋ. (Tintee-la kuoro Hɛrɔd nɛ dɩɛsɛ Maneyaŋ.) 2Nɩaa deemba fa sɩ chʋɔlɛ Wɩa a vʋvɔɔ niiŋ, ŋɩɩ nɛ Wɩa Dɩŋ-zɔmʋŋ bʋla pɩba, “Má lɩɩsɛ Banabas arɩ Sɔɔl pɩmɛ dɩ ba tɩŋ tɩntɩmɩɩ-la mɩ sɩ yɩrɛba dɩ ba tɩŋ.” 3Ba sɩ chʋɔlɛ Wɩa a vɔɔ niiŋ ŋɩɩ, ba joŋ ba nɩsaa daŋ ba lɛ, aŋ taba.

Banabas arɩ Pɔɔl hɛ Saapʋrɔs lɛ

4Wɩa Dɩŋ-zɔmʋŋ sɩ tɩmba ŋɩɩ, ba sii mʋ Sɛlʋsɩa, a lɩɩ nɩmɛ a jʋʋ lɩɩŋ daboro, a mʋ tintee kʋbala lɩɩŋ sɩ gollo chu baa yɩrɛ Saapʋrɔs. 5Ba sɩ yi nɩmɛ, ba mʋ Saapʋrɔs taŋ dɔŋɔ baa yɩrɛ Salamɩs. Ba bʋl Wɩa niiŋ wɩaa Juu tɩŋŋaa Wɩɩchʋɔlɛ dɩɩsɩŋ lɛ nɩmɛ. Ba kɛŋ Jɔɔŋ Maak ma pɛ kɔ dɩ ʋ pɛ tɩŋ tɩntɩmɩɩ-la. 6Ba gɔllɛ tintee-la kala lɩɩŋ sɩ gollo chu, a mʋ yi taŋ kʋbala baa yɩrɛ Paafɔs. Nɩmɛ nɛ ba na daalusuŋ tɩɩna kʋbala baa yɩrɛ Baa-Yesu. Ʋ fa ŋaa Juu tɩɩna nɛ aŋ nyɩɛ wɩaa arɩ ʋ ŋaa Wɩa wʋlaabʋllʋ nɛ. 7Ʋ fa hɛ ba taŋ-la kuoro ba sɩɩ yɩrɛ Saajas Pɔɔlɔs dɩa lɛ nɛ. Kuoru-la fa ŋaa wʋjɩnnʋ nɛ. Ʋ tɩŋ ba yɩrɛ Banabas arɩ Sɔɔl kɔ ʋ sɩpaaŋ. Ʋ faa chɛ dɩ ba bʋl Wɩa niiŋ wɩaa nɛ a pʋ dɩ ʋ nɩɩ. 8Daalusuŋ tɩɩna Ɛlɩmas lɩɩ ba harɩŋ aa walɩmɛ dɩ kuoru-la sɩ́ Yesu wɩalɩŋ laa dii. (Giriik lɛ ba kɛŋ Baa-Yesu yɩyɩrɛ Ɛlɩmas nɛ.) 9Ŋɩɩ nɛ Wɩa Dɩŋ-zɔmʋŋ kʋ hɛ Sɔɔl lɛ. Ba fa kɛnʋ kaa yɩyɩrɛ Pɔɔl ma nɛ. Ʋ chaarɛ sɩaa pɛ daalusuŋ tɩɩna-la lɛ 10a bʋla pʋ, “Ŋ-na Sɩtaanɩ bie deeŋ, ŋ ŋaa wʋzɔŋ kala dʋndɔŋ nɛ. Ŋŋ nyɩsɛ nɩaa nɛ, a ŋɩŋaa wʋbɔŋŋɔɔ kɩŋkɛŋ. Wɩa wombii-tɩtɩɩba-la ŋ kaa golibi nɛ. 11Bee na, Wɩa jaŋ kʋ tuu ŋ lɛ, ŋ jaŋ nyʋlɩmɛ, a magɛ magɩna kʋbala ŋ bɩ jaŋ na pʋlʋmʋŋ.” Ʋ sɩ bʋl ŋɩɩ, birimiŋ guu kʋ tɔʋ, ʋ sɩaa bɩra bɩ na. Ʋ gɔllɔ chɩchɛ nʋʋ dɩ ʋ kɛŋ ʋ nɩsɩŋ lɛ. 12Kuoru-la sɩ na wɩɩ-la sɩ ŋaa, ʋ laa Yesu wɩaa dii. Wɩalɩŋ ba sɩ daga a tɩgɛ La Tɩɩna Yesu lɛ ŋaaʋ wʋkpuŋkpere.

Banabas arɩ Pɔɔl hɛ Antɩɔk lɛ, Pisiidia tinteeŋ

13Pɔɔl arɩ ʋ nandɔnsʋŋ sii jʋʋ lɩɩŋ daboro a lɩɩ Paafɔs, a kiele mʋ taŋ kʋbala baa yɩrɛ Pɛɛga a hɛ Pamfiilia tinteeŋ lɛ. Jɔɔŋ Maak taba nɩmɛ aŋ mɩɩra mʋ Jerusalɛm. 14Ba sii nɩmɛ a mʋ Antɩɔk, Pisiidia tinteeŋ lɛ. Chɛ-wiesii-la chɛɛŋ, ba mʋ jʋʋ Wɩɩchʋɔlɛ dɩa a hɔŋ. 15Ba sɩ hɔŋ ŋɩɩ, nʋʋ karɩmɛ wɩalɩŋ Mosis fa sɩ ŋmʋnsa bil dɩ nɩaa tuto, arɩ Wɩa tenni-la Wɩa wʋlaabʋllaa fa sɩ ŋmʋnsa. Ba sɩ karɩma dɛrɛ, Wɩɩchʋɔlɛ dɩa-la kʋhɩasɩŋ tɩŋ dɩ ba bʋla pɩba, “La naambiiriŋ, dɩ ma nɛ kɛŋ wɩɩ ma sɩ jaŋ bʋla pɩ nɩaa deemba dɩ ba nyuŋ nyaasɛ, má bʋl.”

16Ŋɩɩ nɛ Pɔɔl sii chɩŋ a kɛŋ ʋ nɩsɩŋ vigi dɩ ba kɛŋ goŋ, aŋ suomo bʋbʋl, “Mɩ naambiiriŋ Iziral tɩmma arɩ ma nɩalɩŋ sɩ bɩ Juu tɩŋŋaa ŋaa a hɛ daha a fɩfá Wɩa, má jegile nɩɩ mɩ teeŋ. 17Wɩa-la ma Iziral tɩŋŋaa deemba sɩɩ to, ʋ nɛ lɩɩsɛ la naabalɩmaba a ŋaa ba pʋŋ a yʋgɛ, bʋa-la lɛ ba fa sɩ ŋaa nʋhʋɔraa Ijipiti tinteeŋ lɛ. Ʋ doluŋ lɛ nɛ ʋ kɛmba kaa lɩɩ Ijipiti tinteeŋ lɛ. 18Ʋ bemba arɩ kenyiri jɩsɩŋ mahɩŋ balɩa tintee-hɩlɩŋ tʋɔŋ. 19Ʋ leŋe ba yuo dii tinteyee balɩpɛ nɛ Kɛnaŋ tinteeŋ lɛ a laa tintee-la tɩɩ. 20Ba hɔŋ nɩmɛ jɩsɩŋ zɔɔ-banɛsɛ arɩ mahɩŋ balɩa arɩ fii nɛ.

Ŋɩɩ harɩŋ nɛ Wɩa lɩɩsɛ sɩpaalaaraa pɩba dɩ ba bibeŋ ba tinteeŋ. Ba vɛnɛɛ ŋaa ŋɩɩ nɛ a kʋ yi bʋa-la lɛ Wɩa wʋlaabʋlla Samʋɛl sɩ kɔ. 21Ŋɩɩ nɛ ba bʋla pɩ Samʋɛl dɩ ʋ lɩɩsɛ kuoro. Ŋɩɩ nɛ Wɩa lɩɩsɛ Sɔɔl pɩba. Sɔɔl fa ŋaa Kɩs nanʋala nɛ a lɩɩ Bɛnjamɩŋ doho nɩaa tʋɔŋ. Ʋ fa dii kuoruŋ jɩsɩŋ mahɩŋ balɩa nɛ. 22Ŋɩɩ nɛ Wɩa kiri Sɔɔl kuoruŋ lɛ aŋ ŋaa Devit dii kuoruŋ. Ʋ bʋl wɩaa a tɩgɛ Devit lɛ a bʋl, ‘Jesi nanʋala Devit nɛ ŋaa mɩ tʋɔtɔrʋ nɩa. Ʋ jaŋ ŋaa wɩɩkala mɩ sɩɩ chɛ dɩ ʋ ŋaa.’ 23Devit doho nɩaa tʋɔŋ nɛ Yesu lɩɩ. Wɩa ŋaa ʋ kʋ ŋaa Iziral nɩaa Laataara, arɩ ʋ fa sɩ hɛ niiŋ ŋɩɩ. 24Ka dɩ Yesu-na kɔ, Jɔɔŋ bʋl Wɩa wɩaa pɩ Iziral tɩŋŋaa kala nɛ, a bʋl dɩ ba bɩrɩma lɩɩ ba wʋbɔŋŋɔɔ lɛ aŋ ka dɩ ʋ foba Wɩɩchʋɔlɛ lɩɩŋ. 25Jɔɔŋ tɩntɩŋŋaa sɩ kpagɛ dɛrɩŋ, ʋ pɩɛsɛ nɩaa, ‘Kʋbɛɛ nɛ ma bɩɩnɛ dɩ mɩ ŋaa? Mɩ dee nɩɩ-la ma sɩɩ gbɛrʋ dɩ ʋ kɔ. Ʋ jaŋ kɔ mɩ harɩŋ. Nɩɩ-la-na mɩ paala bɩ maga dɩ mɩ kɛŋ ʋ nɛntɛŋŋɛɛ ŋmɛnɩŋ a puri!’

26Mɩ naambiiriŋ Abɩraham doho nɩaa arɩ ma nɩalɩŋ sɩ bɩ Juu tɩŋŋaa ŋaa a hɛ daha a fɩfá Wɩa, la wɩaa nɛ ba tɩŋ dɩ ba bʋl wɩaa deemba sɩ jaŋ wuo laala ta. 27Yesu sɩ kɔ, nɩalɩŋ sɩ hɛ Jerusalɛm lɛ arɩ ba kʋhɩasɩŋ fa bɩ jɩŋ arɩ ʋ nɛ ŋaa la Laataara. Ba bɩ Wɩa wʋlaabʋllaa wʋbʋlɩɩ-la bʋbʋɔŋ jɩŋ, wɩalɩŋ ba sɩ yie karɩmɛ chɛ-wiesii-la chɛɛŋ kala. Ama ba ha leŋe Wɩa wʋlaabʋllaa niiŋ wɩalɩŋ kʋ ŋaa wʋtɩtɩɩ, a kpʋ Yesu. 28Ba paala bɩ wɩɩkala na ʋ sɩ ŋaa chei a magɛ dɩ ba kpʋʋ, ka ba sʋl Paalɩt dɩ ʋ leŋ dɩ ba kpʋʋ. 29Ba sɩ ŋaa wɩalɩŋ kala ba sɩ ŋmʋnsa Wɩa teniŋ tʋɔŋ a mʋ tɩgɛ Yesu lɛ dɛrɛ, ba soru daagɛsɛ nyuŋ a joŋu hugi. 30Ama Wɩa chɩsʋ sʋʋŋ lɛ. 31Ʋ sɩ sii sʋʋŋ lɛ, ʋ kɛŋ ʋ tɩtɩa kʋ dagɛ ʋ dɩ nɩalɩŋ fa sɩ lɩɩ Galilii a mʋ Jerusalɛm. Ba naʋ tapʋl daŋ nɛ. Ba nɛ lɛɛlɛ saa bʋl ʋ wɩaa pɩpɩ Iziral tɩŋŋaa. 32La ma saa kɔ dɩ la bʋl Wɩa wʋzɔmɔ-la nɛ pɩma, wɩɩla Wɩa fa sɩ hɛ niiŋ a pɩ la naabalɩmaba arɩ ʋ jaŋ ŋaa. 33Lɛɛlɛ ʋ ŋaa wɩɩ-la pɩla nɛ, la nɩalɩŋ sɩ ŋaa ba doho nɩaa. Wɩa chɩsɛ Yesu sʋʋŋ lɛ nɛ ʋ kɛŋ mɩɩsɩŋ. Ba fa ŋmʋnsɛ ŋɩɩ nɛ Wɩa teniŋ sɛmɛ dɔŋɔ lɛ ba sɩɩ yɩrɛ Wɩa yɩɩlaa teniŋ tʋɔŋ. Ba ŋmʋnsa a tɩgɛ Yesu lɛ a bʋl,

‘Ŋ ŋaa mɩ Bii nɛ.

Mɩ nɛ lʋlʋŋ jɩnɩŋ.’

34Wʋtɩtɩɩ, Wɩa chɩsɛ Yesu sʋʋŋ lɛ nɛ dɩ ʋ sɩ́ pʋa. Ba ŋmʋnsɛ Wɩa teniŋ tʋɔŋ arɩ Wɩa sɩ,

‘Mɩ jaŋ sɛnɛ to ʋ lɛ a pɛ ma lɛ woruŋ

arɩ mɩ fa sɩ bʋl ŋɩɩ a pɩ Devit.’ 35Wɩa teniŋ baa yɩrɛ Wɩa yɩɩlaa teniŋ sɛmɛ dɔŋɔ maa ba bɩra ŋmʋnsa:

‘Ŋ bɩ jaŋ leŋ dɩ ŋ tʋɔpʋl Tɩɩna sʋʋ a pʋa.’

36Devit fa ŋaa wɩalɩŋ Wɩa sɩɩ chɛ dɩ ʋ ŋaa nɛ. Ʋ ŋaa ŋɩɩ ʋ mɩɩsɩŋ lɛ aŋ sʋʋ. Ba joŋu hugi ʋ naabalɩmaba tʋɔŋ, ʋ pʋa. 37Ama nɩɩ-la Wɩa sɩ chɩsa sʋʋŋ lɛ, ʋ-na bɩ pʋa. 38Mɩ naambiiriŋ, mɩɩ chɛ dɩ ma kala jɩŋ woruŋ arɩ baala deeŋ wɩaa nɛ tɩɩ la wuo bʋbʋl arɩ Wɩa jaŋ joŋ ma wʋbɔŋŋɔɔ chɛma. 39Nʋʋkala sɩ laa ʋ wɩaa dii, ʋ laa ʋ wʋbɔŋŋɔɔ kala ta nɛ, wʋbɔmɔ-la kala wɩalɩŋ Mosis fa sɩ ŋmʋnsa bil dɩ nɩaa tuto sɩ bɩ wuo laa ta. 40Má fɩɛlɛ ma sɩaa dɩ wɩalɩŋ Wɩa wʋlaabʋllaa sɩɩ bʋl, sɩ́ ma lɛ ŋaa. Ba sɩ,

41‘Ma nɩalɩŋ sɩɩ mɔŋ Wɩa,

má bee na tɩntɩmɩɩ-la mɩ sɩ jaŋ tɩŋ ma mɩɩsɩŋ bʋa lɛ.

Dɩ nʋʋ nɛ bʋla pɩma, ma bɩ jaŋ laa dii dɩ ʋ sɛnɛ ŋaa wʋtɩtɩɩ.

Ʋ jaŋ ŋaama wʋkpuŋkpere a leŋ dɩ ma sʋʋ.’ ”

42Pɔɔl arɩ Banabas sɩ bʋl wɩaa deemba kala dɛrɛ, ba sii lɩɩ Wɩɩchʋɔlɛ dɩa lɛ. Ba sɩɩ mʋ, nɩalɩŋ sʋlba dɩ ba mɩɩra kɔ harɩŋ chɛ-wiesii-la chɛɛŋ, a bɩra bʋl wɩaa deemba pɩba. 43Ŋɩɩ nɛ nɩalɩŋ kala lɩɩ Wɩɩchʋɔlɛ dɩa lɛ. Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa aŋ tuto Juu tɩŋŋaa Wɩɩchʋɔlɛ wombiiŋ, ba yʋga a to Pɔɔl arɩ Banabas harɩŋ. Pɔɔl arɩ Banabas bʋl wɩaa pɩba a sʋsʋlba dɩ ba chɩŋ Wɩa wʋzɔmɔ-la lɛ a sɩ́ joŋo ta.

44Harɩŋ chɛ-wiesii-la sɩ yie, nɩaa jesiŋ kala sɩ hɛ tabal-la lɛ nɛ mʋ Wɩɩchʋɔlɛ dɩa dɩ ba jegile nɩɩ La Tɩɩna niiŋ wɩaa. 45Juu tɩŋŋaa fa sɩ na nɩ-daŋ-la hilime ŋɩɩ, ba yaraa bibieri. Ba kɛŋ wɩalɩŋ Pɔɔl fa sɩɩ bʋl chichei aŋ tʋtʋʋsʋ. 46Ŋɩɩ nɛ Pɔɔl arɩ Banabas bʋl wɩaa arɩ nyuduoŋ a bʋl, “Ʋ fa maga dɩ la laa sɩpaaŋ bʋl Wɩa niiŋ wɩaa pɩ ma Juu tɩŋŋaa nɛ, ka ma vɩaba ta aŋ bɩɩnɛ ma bɩ maga dɩ ma kɛŋ mɩɩsɩ-la sɩ bɩ dɛrɛ. La jaŋ lemma aŋ mʋ nɩalɩŋ sɩ bɩ Juu tɩŋŋaa ŋaa teeŋ. 47Wɩa nɛ bʋla pɩla dɩ la ŋaa ŋɩɩ. Ʋ bʋl wɩɩŋ deeŋ Wɩa teniŋ sɛmɛ dɔŋɔ. Ʋ sɩ,

‘Mɩ nɛ lɩɩsɩŋ dɩ ŋ ŋaa nɩalɩŋ sɩ bɩ Juu tɩŋŋaa ŋaa pʋlʋmʋŋ.

Ŋ jaŋ bʋl Wɩa niiŋ wɩaa dʋnɩa sɛmɛ-na kala, dɩ Wɩa laa nɩalɩŋ ta.’ ”

48Nɩalɩŋ sɩ bɩ Juu tɩŋŋaa ŋaa sɩ nɩɩ wɩɩŋ deeŋ, ba tʋɔŋ kala tɔrɛ, ba bʋl dɩ La tɩɩna niiŋ wɩaa sɩma kɩŋkɛŋ. Nɩalɩŋ Wɩa sɩ lɩɩsa dɩ ba kɛŋ mɩɩsɩ-la sɩ bɩ dɛrɛ, ba laa wɩalɩŋ dii. 49La Tɩɩna Yesu niiŋ wɩaa teeli lee-la kala. 50Ama Juu tɩŋŋaa nyɩsɛ tabal-la nɩhɩasɩŋ arɩ haala-la sɩ ŋaa nɩbalaa a fɩfá Wɩa a hɛ. Ba dɩ Juu tɩŋŋaa suomo to naasɩŋ dʋdɔgɩsɛ Pɔɔl arɩ Banabas, a ŋaa ba lɩɩ ba tinteeŋ lɛ. 51Pɔɔl arɩ Banabas kpesi ba nɛntɛŋŋɛɛ hagɩla ta a dagɛ arɩ ba chei wɩɩ nɛ, aŋ lɩɩ mʋ Ikooniam. 52Ka nɩalɩŋ sɩ laa Yesu wɩaa dii Antɩɔk lɛ tʋɔŋ kala tɔrɛ. Wɩa Dɩŋ-zɔmʋŋ ma hɛ ba lɛ woruŋ.

Currently Selected:

Tɩntɩŋŋaa 13: SIS

Highlight

Copy