Tɩntɩŋŋaa 14

Banabas arɩ Pɔɔl mʋ taŋ-la ba sɩɩ yɩrɛ Ikooniam

1Pɔɔl arɩ Banabas sɩ hɛ Ikooniam lɛ, ba jʋʋ Juu tɩŋŋaa Wɩɩchʋɔlɛ dɩa a bʋl Wɩa wɩaa. Ba sɩ chaasa bʋl Wɩa wɩaa ŋɩɩ, nɩ-daŋ kʋ laa Yesu wɩaa dii, Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala. 2Ama Juu tɩmma-la sɩ bɩ Yesu wɩaa laa dii, ba nyɩsɛ nɩalɩŋ sɩ bɩ Juu tɩŋŋaa ŋaa hɛ, a chei ba nyuŋ a mʋ tɩgɛ ba naambiiri-la sɩ laa Yesu wɩaa dii lɛ. 3Pɔɔl arɩ Banabas hɔŋ lee-la a dieni. Ba bʋl La Tɩɩna Yesu wɩaa arɩ nyuduoŋ. La Tɩɩna ma dagɛ arɩ wɩalɩŋ ba sɩɩ bʋl ŋaa wʋtɩtɩɩba nɛ, ʋ pɩba doluŋ ba ŋɩŋaa wʋmagɩlaa arɩ wʋkpuŋkperisiŋ. 4Nɩalɩŋ fa sɩ hɛ tabal-la lɛ kpaa balɩa. Dɔnsʋŋ tuto Juu tɩŋŋaa, dɔnsʋŋ ma tuto Yesu nanzɔɔba-la. 5Ŋɩɩ nɛ nɩalɩŋ sɩ bɩ Juu tɩŋŋaa ŋaa arɩ Juu tɩŋŋaa arɩ ba sɩpaalaaraa wʋwalɩmɛ dɩ ba dɔgɩsɛ Pɔɔl arɩ Banabas aa chɛ dɩ ba paa tabɩaa yagɛba. 6Ba kʋ jɩŋ a sii fá mʋ Lisita, a lɩɩ nɩmɛ a mʋ Dɛɛbɩ. Ba kala ŋaa tabalaa nɛ Likoonia tinteeŋ lɛ. Ba mʋ tabiisi-la ma sɩ golli Lakoonia tinteeŋ chu. 7Nɩmɛ kala nɛ ba bʋl Yesu wʋzɔmɔ-la wɩaa.

Banabas arɩ Pɔɔl hɛ Lisita arɩ Dɛɛbɩ lɛ

8Ba fa sɩ mʋ Lisita ŋɩɩ dɩ baal kʋbala gbɛrɩgɛ hɔŋ. Ba lʋlʋ dɩ ʋ gbɛrɩgɛ nɛ. Ʋ ha bɩ vɛnɛ na. 9Ʋ hɔnɔ jegile nɩɩ Pɔɔl fa sɩɩ bʋl wɩalɩŋ. Pɔɔl benu jim, a na dɩ ʋ laa dii arɩ Yesu jaŋ wuo vaarʋ. 10Ʋ faasa bʋla pʋ, “Sii chɩŋ ŋ naasɩŋ nyuŋ.” Ʋ guu sii chɩŋ ʋ naasɩŋ nyuŋ aa vɛŋ. 11Nɩ-daŋ-la fa sɩ na wɩɩ-la Pɔɔl sɩ ŋaa, ba kala kpɩkpɩa goŋ aa bʋl arɩ Likoonia yikoro lɛ, “Vesiŋ nɛ bɩrɩmɛ nuhuobiine a kʋ tuu la tʋɔŋ.” 12Ŋɩɩ nɛ ba kɛŋ Banabas yɩyɩrɛ Zuus. Zuus nɛ fa ŋaa ba veŋ-hɩaŋ. Pɔɔl ma nɛ fa nɩɩ-la sɩɩ bʋl wɩaa, ŋɩɩ nɛ tɩɩ ba kɛnʋ ma yɩrɛ Hɛɛmɩs, ba veŋ-hɩaŋ tɩndaara yɩrɩŋ nɛ ŋɩɩ. 13Ba vene Zuus dɩa fa chɩŋ ba tabal-la boi-baalɩŋ niiŋ nɛ. Vene tɩɩna kɛŋ nɛ-belliŋ arɩ tɩɩfɩɩlaa ba sɩ kaa guori kaa kɔ dɩa-la boiŋ niiŋ. Ʋ dɩ nɩ-daŋ-la faa chɛ dɩ ba kpaarɛ Yesu nanzɔɔba-la nɛ. 14Banabas arɩ Pɔɔl sɩ nɩɩ wɩɩ-la ba sɩɩ chɛ ba ŋaa, ba kɛŋ ba gɛnnɩŋ kɩɛsɛ, aa dagɛ arɩ ba bɩ sɛyɛ, aŋ fá jʋʋ nɩalɩŋ tʋɔŋ a faasa bʋl, 15“Nandɔmba, bɛɛ nɛ tɩɩ maa ŋaa ŋ-la? La ma ŋaa nuhuobiinee nɛ a nagɛ ma. La kɔ dɩ la bʋl La Tɩɩna Yesu wʋzɔmɔ-la nɛ a pɩma, dɩ ma wuo leŋ ma vʋɩyaa sɩ ŋaa kʋpɛɩba aŋ bɩrɩma to Wɩa sɩ weye. Ʋ nɛ ŋaa wɩa-nyuŋ, arɩ tinteeŋ, mʋgʋ-balaa arɩ fuonuŋ, arɩ kʋŋkala sɩ hɛ ba lɛ. 16Bumbuŋ Wɩa leŋe la naabalɩmaba tuto ba tɩtɩa wombiiŋ nɛ. 17Arɩ ŋɩɩ kala ʋ fa ŋaa wʋzɔŋŋɔɔ pɩpɩ nɩaa nɛ, a dɩdagɛba ŋɩɩ arɩ ʋ nɛ hɛ nɩmɛ. Ʋ ŋaa duonuŋ nɩnɩɩ a ŋaa baga kɩaa wʋwasɛ, a pɩma kʋdiilee yʋgɛ, a leŋ ma faasa kɛŋ tʋɔtɔrʋŋ.” 18Banabas arɩ Pɔɔl bʋl wɩaa deemba kala nɛ, ka nɩalɩŋ ha bɩ sɛyɛ aŋ chɩchɛ dɩ ba kpaarɛba.

19Dɩ Juu tɩŋŋaa dɔnsʋŋ lɩɩ Antɩɔk, Pisiidia tinteeŋ lɛ, a ma kɔ. Dɔnsʋŋ ma lɩɩ Ikooniam a kɔ. Ba kʋ kɛsɛ nɩalɩŋ pɛ ba tɩtɩa lɛ a yagɛ Pɔɔl arɩ tabɩaa, a kɛnʋ lɛrɛ lɩɩ ba tabal-la tʋɔŋ, a bɩɩnɛ arɩ ʋ sʋba nɛ. 20Ama Yesu harɩ-tooro-la sɩ mʋ gollu chu, ŋɩɩ nɛ ʋ sii a mɩɩra jʋʋ tabal-la tʋɔŋ. Taŋ sɩ pʋla, ʋ dɩ Banabas sii mʋ Dɛɛbɩ.

Ba mɩɩra lɩɩ Siiria a mʋ Antɩɔk

21Pɔɔl arɩ Banabas bʋl Yesu wʋzɔmɔ-la wɩaa Dɛɛbɩ lɛ, nɩaa yʋgɛ a laa wɩalɩŋ dii. Ŋɩɩ nɛ ba mɩɩra mʋ Lisita, a sii nɩmɛ a mʋ Ikooniam, a bɩra sii nɩmɛ a mɩɩra mʋ Antɩɔk, Pisiidia tinteeŋ. 22Leree deemba kala lɛ ba yie bʋl wɩaa pɩ nɩalɩŋ sɩ laa Yesu wɩaa dii, dɩ ba wasa kɛŋ wʋtɩtɩɩ a bʋl wɩaa nyaasɛ ba nyuŋ dɩ ba chɩŋ ŋɩɩ ba sɩ laa Wɩa dii lɛ. Ba bʋla pɩba, “La nɩalɩŋ sɩ laa Yesu wɩalɩŋ dii, jaŋ na hɛɛŋ kɩŋkɛŋ, aŋ-na jʋʋ Wɩa kuorii-la tʋɔŋ.” 23Lee-na kala nɩalɩŋ sɩ laa Yesu wɩalɩŋ dii aa hilimi, Pɔɔl arɩ Banabas yie lɩɩsɛ nɩaa ba tʋɔŋ dɩ ba ŋaa ba kʋhɩasɩŋ. Ba nɛ ŋaa ŋɩɩ, ba yie chʋɔlɛ Wɩa pɩba a vɔɔ niiŋ, aŋ jomba hɛ La Tɩɩna Yesu nɩsɩŋ lɛ, nɩɩ-la wɩaa ba sɩ laa dii.

24Ba sɩ gɔllɛ Pisiidia tinteeŋ kala dɛrɛ, ba lɩɩ mʋ Pamfiilia tinteeŋ. 25Nɩmɛ nɛ ba bʋl Wɩa niiŋ wɩaa taŋ kʋbala baa yɩrɛ Pɛɛga lɛ, a bɩra lɩɩ nɩmɛ a mʋ taŋ kʋbala baa yɩrɛ Atalɩa. 26Ba lɩɩ nɩmɛ a jʋʋ lɩɩŋ daboro, a mɩɩra kɔ Antɩɔk. Nɩmɛ nɛ ba fa jomba hɛ Wɩa nɩsɩŋ lɛ, ʋ lahɔrɩmɔ lɛ ba wuo tɩŋ ba tɩntɩŋŋaa dɛrɛ. 27Ba sɩ kɔ Antɩɔk, ba yɩrɛ nɩalɩŋ kala sɩ laa Yesu wɩaa dii a hilimi, a bʋl wʋzɔmɔ-la kala Wɩa sɩ to ba lɛ a ŋaa pɩba, a dagɛba ŋɩɩ Wɩa sɩ wuo suri wombiiŋ a pɩ nɩalɩŋ sɩ bɩ Juu tɩŋŋaa ŋaa, ba ma wuo laa Yesu wɩaa dii. 28Ba hɔŋ nɩalɩŋ sɩ laa Yesu wɩaa teeŋ a dieni nɩmɛ.

Currently Selected:

Tɩntɩŋŋaa 14: SIS

Highlight

Copy