Tɩntɩŋŋaa 15

Yesu nanzɔɔba arɩ nɩalɩŋ sɩ laa Yesu wɩaa dii kʋhɩasɩŋ hilime Jerusalɛm lɛ

1Baalaa dɔnsʋŋ ma lɩɩ Judiya a kɔ Antɩɔk, a suomo dɩdagɛ ba naambiiri-la sɩ laa Yesu wɩaa dii a bʋl, “Wɩa bɩ jaŋ wuo laama ta, see dɩ ma keri ma penee, arɩ Mosis wombie-la ʋ fa sɩ ŋmʋnsa bil dɩ la tuto fa sɩ dagɛ ŋɩɩ.” 2Ŋɩɩ nɛ Pɔɔl arɩ Banabas bɩ wɩɩ-la sɛyɛ. Ba dɩ nɩalɩŋ sɩ lɩɩ Judiya kɛŋ wɩɩ-la lɩlɛrɛ. Ba vʋʋrɛ dɩ Pɔɔl arɩ Banabas arɩ nɩalɩŋ dɔnsʋŋ sɩ lɩɩ Antɩɔk, dɩ ba mʋ Jerusalɛm a na Yesu nanzɔɔba-la arɩ nɩalɩŋ sɩ laa Yesu wɩaa dii aa hilimi kʋhɩasɩŋ nɩmɛ, a mʋ tɩgɛ wɩɩŋ deeŋ lɛ. 3Nɩalɩŋ sɩ laa Yesu wɩaa dii aa hilimi taba ba mʋ. Ba sɩɩ mʋ ŋɩɩ, ba to Fɔnɩɩsɩa arɩ Samarɩa tinteeŋ a bʋla pɩ nɩalɩŋ sɩ laa Yesu wɩaa dii nɩmɛ ŋɩɩ nɩalɩŋ sɩ bɩ Juu tɩŋŋaa ŋaa sɩ bɩrɩma tuto Wɩa. Ba sɩ bʋl wʋzɔmʋŋ deeŋ ŋɩɩ, nɩalɩŋ tʋɔŋ tɔrɛ kɩŋkɛŋ. 4Ba sɩ mʋ yi Jerusalɛm, Yesu nanzɔɔba-la arɩ nɩalɩŋ kala sɩ laa Yesu wɩaa dii aa hilimi arɩ ba kʋhɩasɩŋ, ba kɛmba woruŋ. Ba bʋl wɩalɩŋ kala Wɩa sɩ to ba lɛ ŋaa a pɩba. 5Ama nɩalɩŋ dɔnsʋŋ ma sɩ laa Yesu wɩaa dii aa to nɩalɩŋ ba sɩɩ yɩrɛ Farisii tɩŋŋaa, ba sii chɩŋ a bʋla pɩba, “Ʋ maga dɩ ba keri nɩalɩŋ sɩ bɩ Juu tɩŋŋaa ŋaa penee nɛ, aŋ ŋaa dɩ ba tuto wɩalɩŋ Mosis fa sɩ bile dɩ nɩaa to.”

6Yesu nanzɔɔba-la arɩ nɩalɩŋ sɩ laa Yesu wɩaa dii kʋhɩasɩŋ bɩra hilimi dɩ ba kɛŋ wɩɩŋ deeŋ chɔgɩsa na. 7Ba hɔnɔ kɛŋ wɩɩ-la a lɛrɛ dieni. Ŋɩɩ nɛ Pɩɩta sii chɩŋ a bʋl, “Mɩ naambiiriŋ, ma jɩma arɩ faafaa kala nɛ Wɩa lɩɩsɛmɛ ma tʋɔŋ dɩ mɩ bʋl ʋ wʋzɔmɔ-la a pɩ nɩalɩŋ sɩ bɩ Juu tɩŋŋaa ŋaa, dɩ ba ma wuo laa Yesu wɩaa dii. 8Mɩ mʋ bʋla pɩba. Ŋɩɩ nɛ Wɩa sɩ jɩŋ nʋʋkala tʋɔŋ joŋ ʋ Dɩŋ-zɔmʋŋ hɛ ba lɛ arɩ ʋ fa sɩ joŋo hɛ la lɛ ŋɩɩ, ŋɩɩ dagɛ arɩ ʋ maga dɩ ba ma laa Yesu wɩaa dii nɛ. 9Ʋ bɩ nɩalɩŋ sɩ ŋaa Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kaa pɔrɛ. Nɩalɩŋ sɩ bɩ Juu tɩŋŋaa ŋaa ma laa Yesu wɩaa dii nɛ, ŋɩɩ nɛ tɩɩ ʋ joŋ ba ma wʋbɔŋŋɔɔ chɛba. 10Bɛɛ nɛ tɩɩ ma joŋ chʋgʋ-balɩŋ aa chʋŋ nɩalɩŋ sɩ bɩ Juu tɩŋŋaa ŋaa aŋ laa Yesu wɩaa dii, aa magɩsɛ Wɩa ŋɩɩ? La dɩ la naabalɩmaba kala, la fa bɩ chʋga deeŋ wuo chʋŋ. 11La laa dii arɩ La Tɩɩna Yesu dʋndʋŋa lahɔrɩmɔ lɛ Wɩa jaŋ laa la kala ta arɩ ʋ sɩ laaba ta ŋɩɩ.”

12Ŋɩɩ nɛ nɩalɩŋ kala fa sɩ hilime ŋaa fʋɩɩ, aŋ jijegili Banabas arɩ Pɔɔl teeŋ. Ba bʋl wʋmagɩla-la arɩ wʋkpuŋkperisi-la Wɩa sɩ to ba lɛ ŋaa nɩalɩŋ sɩ bɩ Juu tɩŋŋaa ŋaa tʋɔŋ. 13Ba sɩ bʋl wɩalɩŋ dɛrɛ, Jeems ma bʋl, “Mɩ naambiiriŋ, má jegile nɩɩ mɩ teeŋ. 14Saamɔŋ Pɩɩta bʋla pɩma ŋɩɩ Wɩa sɩ laa sɩpaaŋ cho nɩalɩŋ sɩ bɩ Juu tɩŋŋaa ŋaa, a lɩɩsɛ nɩaa ba tʋɔŋ dɩ ba ŋaa ʋ nɩaa. 15Wɩa wʋlaabʋllaa fa sɩ bʋl wɩalɩŋ arɩ wɩɩŋ deeŋ ŋaa kʋbala nɛ, arɩ ŋɩɩ ba sɩ ŋmʋnsɛ Wɩa teniŋ tʋɔŋ

16‘Mɩ jaŋ mɩɩra kɔ a chʋʋlɛ Devit dɩa-la sɩ tele.

Mɩ jaŋ wasa taasɛ je-kɩɛrɩ-la dɩ ʋ chɩŋ woruŋ.

17Mɩ jaŋ ŋaa ŋɩɩ dɩ dʋnɩa nɩaa nɩkaanaa ma kʋ chɛmɛ a tomi,

nɩalɩŋ mɩ sɩ tʋɔsa nɩalɩŋ sɩ bɩ Juu tɩŋŋaa ŋaa tʋɔŋ dɩ ba ŋaa mɩ nɩaa.

Ba ma jaŋ kʋ chɛ mɩ a tomi.’

18Wɩa bʋl ŋɩɩ faafaa kala nɛ dɩ nɩaa jɩŋ.” 19Ŋɩɩ nɛ Jeems bʋl, “Wɩɩ-la mɩ-na sɩ bɩɩna nɛ, ʋ bɩ maga dɩ la walɩmɛ nɩalɩŋ sɩ bɩ Juu tɩŋŋaa ŋaa aŋ bɩrɩma tuto Wɩa. 20Ama má leŋ dɩ la ŋmʋnsɛ teniŋ pɩba a bʋla pɩba dɩ ba bɩra sɩ́ vʋɩyaa kɩaa dii, a sɩ wʋlɩɩlɩŋ ŋaa, a sɩ́ pʋsʋŋ sɩ sʋʋ pimee dii, a sɩ́ pʋsʋŋ chalɩŋ ma dii. 21Ba dagɛ wɩalɩŋ Mosis fa sɩ bile dɩ la tuto tabiisi-la kala lɛ nɛ. Ba ŋaa ŋɩɩ faafaa kala nɛ a kaa kɔ jɩnɩŋ. Ba ma yie karɩmɛ wɩalɩŋ Wɩɩchʋɔlɛ dɩɩsɩŋ lɛ chɛ-wiesii-la chɛɛ na kala nɛ.”

Ba ŋmʋnsɛ teniŋ pɩ nɩalɩŋ sɩ bɩ Juu tɩŋŋaa ŋaa aŋ laa Yesu wɩaa dii

22Yesu nanzɔɔba-la arɩ kʋhɩasɩ-la arɩ nɩalɩŋ sɩ laa Yesu wɩaa dii aa hilimi, ba vʋʋrɛ a lɩɩsɛ ba tʋɔŋ nɩaa, a tɩmba dɩ ba dɩ Pɔɔl arɩ Banabas mʋ Antɩɔk. Ba lɩɩsɛ Judas ba sɩɩ yɩrɛ Basabas arɩ Saalas. Nɩaa deemba balɩa fa ŋaa nɩalɩŋ sɩ laa Yesu wɩaa dii sɩpaalaaraa nɛ. 23Ba joŋ teniŋ tɩmba. Teŋ-la lɛ ba fa ŋmʋnsɛ ŋ-la nɛ, “La nɩalɩŋ sɩ ŋaa Yesu nanzɔɔba arɩ la kʋhɩasɩŋ, ma naambiiriŋ, laa chʋɔlɛ ma nɩalɩŋ sɩ laa Yesu wɩaa dii aŋ bɩ Juu tɩŋŋaa ŋaa a hɛ Antɩɔk arɩ Siiria arɩ Siliisia lɛ.

24La nɩa arɩ la nɩaa dɔnsʋŋ kɔ ma teeŋ a walɩmɛma, a kɛŋ ma tʋɔbɩɩnaa vʋgʋmɛ. Ka la dee bɩ ba hɛ. 25Ŋɩɩ wɩaa la hilime nɛ a vʋʋra sɛɩ a lɩɩsɛ nɩaa a tɩmba ma teeŋ, ba dɩ la nandɔnsʋŋ Banabas arɩ Pɔɔl nɛ jaŋ kɔ. 26Nɩaa deemba joŋ ba mɩɩsɩŋ a yɔɔ sʋʋŋ nɛ a tɩŋ La Tɩɩna Yesu Kirisito tɩntɩŋŋaa wɩaa. 27La saa tɩŋ Judas arɩ Saalas nɛ, ba jaŋ bʋl wɩalɩŋ tɩtɩa la sɩ ŋmʋnsa a pɩma. 28La na dɩ ʋ zɔmɔ a pɩ la dɩ Wɩa Dɩŋ-zɔmʋŋ kala nɛ arɩ la bɩ jaŋ joŋ chʋgʋ yuŋii kala chʋmma. Ama ʋ maga dɩ ma to kɩsɩnɩŋ deemba la sɩɩ dagɛma nɛ. Ba nɛ ŋ-la: 29Má sɩ́ vʋɩyaa nammɩa chaŋ, má sɩ́ kʋŋkala chalɩŋ dii, má sɩ́ pʋna-kala sɩ sʋʋ pimee chaŋ, a sɩ́ bachɔrʋŋ arɩ hachɔrʋŋ wɩaa ŋaa. Dɩ ma nɛ lɩɩsɛ ma tɩtɩa wɩaa deemba lɛ, ma ŋaa woruŋ nɛ. Ma jaŋ hɔŋ woruŋ.”

30Ŋɩɩ nɛ ba ta nɩalɩŋ ba sɩ lɩɩsa. Ba sii mʋ Antɩɔk. Ba sɩ mʋ nɩmɛ, ba yɩrɛ nɩalɩŋ kala sɩ laa Yesu wɩaa dii aa hilimi, a joŋ teŋ-la pɩba. 31Ba sɩ karɩmɛ teŋ-la, ba tʋɔŋ tɔrɛ wɩalɩŋ lɛ ba nyuŋ nyaasɛ. 32Judas arɩ Saalas fa ŋaa Wɩa wʋlaabʋlla nɛ. Ba bʋl wɩaa yʋgɛ a pɩ nɩalɩŋ, ba nyuŋ nyaasɛ, ba wasa kɛŋ doluŋ. 33Ba sɩ dieni mʋa Antɩɔk lɛ, ŋɩɩ nɛ nɩalɩŋ sɩ laa Yesu wɩaa dii taba dɩ Wɩa kɛmba mɩɩra mʋ nɩalɩŋ sɩ tɩmba teeŋ arɩ yarɩfɩɛlaa. [ 34Ama Saalas na arɩ ʋ zɔmɔ nɛ a maga dɩ ʋ ka Antɩɔk lɛ.] 35Ŋɩɩ nɛ Pɔɔl arɩ Banabas ma ka Antɩɔk lɛ. Nɩaa yʋgɛ a pɛ ba lɛ ba bʋl La Tɩɩna Yesu niiŋ wɩaa a pɩ nɩaa a dɩdagɛba.

Pɔɔl arɩ Banabas pɔrɛ dɔŋɔ lɛ

36Ʋ ŋɩɩ harɩŋ nɛ Pɔɔl bʋla pɩ Banabas, “Leŋ la mɩɩra mʋ tasɩ-la kala lɛ la sɩ bʋl Yesu niiŋ wɩaa, a na ŋɩɩ la naambiiri-la hɔnʋŋ sɩ naga.” 37Banabas faa chɛ dɩ ʋ kɛŋ Jɔɔŋ ba sɩɩ yɩrɛ Maak kaa pɛ mʋ. 38Ŋɩɩ nɛ Pɔɔl bʋl arɩ ʋ bɩ wombii ŋaa dɩ ba pɛ kɛnʋ mʋ, bɛɛ wɩaa ʋ vɩa dɩ ʋ pɛ ba lɛ a tɩŋ tɩntɩŋŋaa nɛ Pamfiilia lɛ, lee-la ba fa sɩ laa sɩpaaŋ mʋ dɩ ba tɩŋ, aŋ mɩɩrɛ. 39Ba faasa kɛŋ wɩɩŋ deeŋ kaa lɛrɛ kɩŋkɛŋ, a pɔrɛ dɔŋɔ lɛ. Ŋɩɩ nɛ Banabas kɛŋ Jɔɔŋ Maak, ba jʋʋ lɩɩŋ daboro a duoro mʋ Saapʋrɔs. 40Ka Pɔɔl ma kɛŋ Saalas. Ŋɩɩ nɛ nɩalɩŋ sɩ laa Yesu wɩaa dii jomba hɛ Wɩa nɩsɩŋ lɛ dɩ ba jʋʋ ʋ lahɔrɩmɔ. 41Ŋɩɩ nɛ ba sii to Siiria arɩ Siliisia tinteeŋ, a bʋl wɩaa pɩ nɩalɩŋ sɩ laa Yesu wɩaa dii aa hilimi nɩmɛ, dɩ ba chɩŋ ŋɩɩ ba sɩ laa Wɩa wɩaa dii lɛ.

Currently Selected:

Tɩntɩŋŋaa 15: SIS

Highlight

Copy