Tɩntɩŋŋaa 16

Timoti to Pɔɔl arɩ Saalas harɩŋ

1Ŋɩɩ nɛ Pɔɔl arɩ Saalas sii mʋ Dɛɛbɩ, a lɩɩ nɩmɛ a mʋ Lisita. Yesu harɩ-tooru kʋbala fa hɛ nɩmɛ, baa yɩrɛ Timoti. Ʋ naaŋ ŋaa Juu tɩɩna nɛ a ma fa laa Yesu wɩaa dii, aŋ ka ʋ nyɩmma fa ŋaa Giriik tɩɩna. 2Nɩalɩŋ sɩ laa Yesu wɩaa dii Lisita arɩ Ikooniam kala lɛ bɩbɛsɛ Timoti lɛ. 3Pɔɔl faa chɛ dɩ Timoti to ʋ harɩŋ. Ama a tɩŋ Juu tɩŋŋaa sɩ hɛ lere-la wɩaa Pɔɔl leŋ ba keri ʋ peniŋ, bɛɛ wɩaa ba kala jɩma arɩ ʋ nyɩmma ŋaa Giriik tɩɩna nɛ. 4Ba sɩɩ mʋ tasɩ-la ŋɩɩ, ba bʋl wɩaa a pɩ nɩalɩŋ sɩ laa Yesu wɩaa dii nɩmɛ. Ba bʋl wɩalɩŋ Yesu nanzɔɔba-la arɩ nɩalɩŋ sɩ laa Yesu wɩaa dii kʋhɩasɩŋ sɩ hɛ Jerusalɛm lɛ sɩ bile dɩ ba tuto. 5Ŋɩɩ nɛ nɩalɩŋ sɩ laa Yesu wɩaa dii aa hilimi wasa laa Wɩa dii, a pʋŋaa pɛ tapʋlɩɩ kala.

Pɔɔl na wɩaa arɩ duosoo tʋɔŋ Tʋrɔwas lɛ

6Pɔɔl arɩ Saalas gɔllɛ ŋɩɩ halɩɩ a to Firijia arɩ Galiisia tinteeŋ, bɛɛ wɩaa Wɩa Dɩŋ-zɔmʋŋ bɩ ba wombiiŋ pa dɩ ba bʋl Wɩa niiŋ wɩaa Esia tinteeŋ lɛ. 7Ba joŋ wombiiŋ a mʋ yi Mɩɩsɩa. Nɩmɛ nɛ ba walɩmɛ dɩ ba jʋʋ Bitiinia tinteeŋ, ama Yesu Dɩŋ-zɔmʋŋ bɩ ba wombiiŋ pa. 8Ŋɩɩ nɛ ba to Mɩɩsɩa tinteeŋ a mʋ yi Tʋrɔwas. 9Nɩmɛ, tɩtaŋɩŋ Pɔɔl na arɩ duosoo tʋɔŋ dɩ baal kʋbala sɩ lɩɩ Masidoonia chɩna aa sʋlʋ dɩ ʋ kɔ Masidoonia tinteeŋ a pɛ ba lɛ. 10Pɔɔl sɩ na ŋɩɩ dɛrɛ, la kɛŋ la tɩtɩa hɛ dɔŋɔ dɩ la mʋ Masidoonia, bɛɛ wɩaa la jɩma arɩ Wɩa nɛ sɛnɛ dagɛla dɩ la mʋ bʋl ʋ wʋzɔmɔ-la a pɩba.

Haal kʋbala baa yɩrɛ Lidia laa Yesu wɩaa dii Fɩlɩpa lɛ

11La bɩra sii nɩmɛ a jʋʋ lɩɩŋ daboro, a duoro tegi tegi a mʋ Saamɔtas. Ʋ taŋ sɩ pʋla la bɩra sii a mʋ Niapolis. 12La bɩra lɩɩ nɩmɛ a vɛnɛ mʋ Fɩlɩpa. Ʋ fa ŋaa tabal nɛ Masidoonia sɛmɛ dɔŋɔ a tuto Rom tinteeŋ. La hɔŋ taŋ-la lɛ tapʋlaa baŋmɛnɛ. 13Chɛ-wiesii-la chɛɛŋ sɩ yie, la lɩɩ taŋ-la tʋɔŋ a mʋ fuoŋ niiŋ. La fa bɩɩna la jaŋ na Wɩa dɩ-chʋɔlʋŋ nɩmɛ. Ŋɩɩ nɛ la hɔŋ nɩmɛ a bʋl wɩaa pɩpɩ haala-la fa sɩ hilime lee-la. 14Haala-la sɩ jegile nɩɩ wɩalɩŋ tʋɔŋ dɔŋɔ yɩrɩŋ nɛ fa Lidia. Ʋ lɩɩ Taataya tinteeŋ nɛ, a biri gɛnnɩŋ yɩyallɛ. Ʋ faa chʋɔlɛ Wɩa nɛ woruŋ. Ʋ sɩ nɩɩ wɩalɩŋ Pɔɔl fa sɩɩ bʋl, Wɩa suri ʋ tʋɔŋ, ʋ laa wɩalɩŋ dii. 15Ba fo ʋ dɩ ʋ dɩa nɩaa Wɩɩchʋɔlɛ lɩɩŋ. Ŋɩɩ nɛ haal-la sʋlla a bʋl, “Dɩ ma nɛ bɩɩna dɩ mɩ sɛnɛ laa Yesu wɩaa dii nɛ, má kʋ jʋʋ chʋa mɩ dɩa lɛ.” Ʋ sɩ sʋlla dieni ŋɩɩ, la mʋ chʋa.

Ba kɛŋ Pɔɔl arɩ Saalas tɔ dɩa Fɩlɩpa lɛ

16Chɛɛ kʋbala la bɩra mʋ Wɩa dɩ-chʋɔlʋŋ. Yoŋ toli-bie kʋbala kʋ chenla. Jɩma nɛ kɛnʋ, ʋ vʋga pɩpɩ nɩaa. Ʋ vʋga na moribiee yʋgɛ a pɩ nɩalɩŋ sɩ tɩɩʋ. 17Ʋ to la dɩ Pɔɔl harɩŋ a yie faasaa bʋl, “Nɩaa deemba Wɩa sɩ kɩɩ kʋŋkala tɩntɩnnaa nɛ. Ba bʋlaa pɩma ŋɩɩ ma sɩ jaŋ ŋaa dɩ Wɩa laama ta nɛ.” 18Ʋ fa vɛnɛɛ ŋaa wɩɩŋ deeŋ a dieni nɛ. Tapʋlɩɩ kʋbala Pɔɔl baanɩŋ sii, ʋ mɩɩra bɩrɩma chaasɛ tolo-la, aŋ bʋla pɩ jɩma-la, “Yesu Kirisito yɩrɩŋ lɛ mɩ sɩ, ŋŋ lɩɩ aŋ leŋ tolo-la.” Jɩma-la guu lɩɩ tolo-la lɛ.

19Tolo-la tɩŋŋaa sɩ na arɩ ba bɩra bɩ jaŋ nɩna moribiee, ba kɛŋ Pɔɔl arɩ Saalas a lɛrɛ mʋ ba taŋ kʋhɩasɩŋ teeŋ ba sɩ yie hihilimi lee-la. 20Ba kɛmba kaa mʋ ba Rom kʋhɩasɩŋ teeŋ, a bʋla pɩba, “Nɩaa deemba ŋaa Juu tɩŋŋaa nɛ aŋ kɛŋ wɩaa vʋvʋgɩmɛ la tabalɩŋ tʋɔŋ. 21Baa dagɛla dɩ laa ŋaa wɩalɩŋ la Rom tɩŋŋaa sɩɩ kɩsʋ nɛ.” 22Nɩ-daŋ-la kala fa sɩ hilime, ba sii pɛ ba nɩhɩasɩ-la lɛ a kɛŋ Pɔɔl arɩ Saalas. Ŋɩɩ nɛ Rom tɩŋŋaa kʋhɩasɩŋ ŋaa ba wuri ba gɛnnɩŋ aŋ vɩɩrɛba. 23Ba faasa vɩɩrɛba aŋ kɛmba tɔ dɩa, aŋ bʋla pɩ nɩtɔɔrɩ dɩa bibennu-la dɩ ʋ tɔba woruŋ dɩ ba sɩ́ wuo lɩɩ. 24Ʋ nɩɩ ba niiŋ a kɛŋ Pɔɔl arɩ Saalas a kaa kiele jʋʋ sɩpaaŋ dɩa tʋɔŋ, a kɛŋ ba naasɩŋ balɩamɩŋ kala hɛ kuruŋ.

25Tɩta-siesee Pɔɔl arɩ Saalas chʋchʋɔlɛ Wɩa a yɩɩ yɩɩlaa a dɩdɛnnɛ Wɩa. Nɩalɩŋ ba sɩ kaa tɔ dɩa kʋkaanaa ma jijegili. 26Ŋɩɩ nɛ tinteeŋ guu zigili a kɛŋ nɩtɔɔrɩ dɩa-la ma kala kaa zigili. Borusuŋ kala guu suri. Nʋʋkala kuruŋ ma lɩɩ tel. 27Nɩtɔɔrɩ dɩa bibennu-la hirige sii doŋ lɛ a na dɩ nɩtɔɔrɩ dɩa-la borusuŋ kala suro. Ʋ bɩɩna nɩalɩŋ kala ba sɩ kaa tɔ dɩa lɩɩ fá viiri nɛ. Ʋ lɩɩsɛ ʋ tokobii dɩ ʋ kpʋ ʋ tɩtɩa. 28Ŋɩɩ nɛ Pɔɔl faasa kpɩa a bʋla pʋ, “Sɩ́ ŋ tɩtɩa kpʋ. La kala nɛ hɛ daha.” 29Sarɩka bibennu-la ŋaa ba kɛŋ chaanɩŋ kaa kɔ. Ʋ laa fá jʋʋ, a tuu tel Pɔɔl arɩ Saalas naasɩŋ lɛ a chichel. 30Ʋ kɛmba kaa lɩɩ a pɩɛsɛba, “Mɩ nandɔnsʋŋ, ɛɛ nɛ mɩ jaŋ ŋaa dɩ Wɩa laamɛ ta?” 31Ŋɩɩ nɛ ba bʋla pʋ, “Laa La Tɩɩna Yesu wɩaa dii, dɩ Wɩa laa ŋ dɩ ŋ dɩa nɩaa kala ta.” 32Ŋɩɩ nɛ ba bʋl La Tɩɩna Yesu niiŋ wɩaa pɩ ʋ dɩ nɩalɩŋ kala sɩ hɛ ʋ dɩa lɛ. 33Tɩtaŋ-la tɩtɩa nɛ nɩtɔɔrɩ dɩa bibennu-la kɛmba a chɛsɛ ba yaraa naawɩɩlaa, ka ba fo ʋ dɩ ʋ dɩa nɩaa kala Wɩɩchʋɔlɛ lɩɩŋ. 34Nɩtɔɔrɩ dɩa bibennu-la kɛŋ Pɔɔl arɩ Saalas a kaa mʋ ʋ dɩa, a pɩba kʋdiilee ba dii. Ʋ dɩ ʋ dɩa nɩaa kala ŋaa tʋɔtɔrʋ arɩ ba sɩ laa Wɩa wɩaa dii.

35Taŋ sɩ pʋla, Rom nɩhɩasɩŋ tɩŋ ba porisi kʋhɩasɩŋ dɩ ba mʋ bʋla pɩ nɩtɔɔrɩ dɩa bibennu-la dɩ ʋ lɩɩsɛ Pɔɔl arɩ Saalas. 36Ŋɩɩ nɛ nɩtɔɔrɩ dɩa bibennu-la bʋla pɩ Pɔɔl, “Rom nɩhɩasɩ-la tɩma dɩ ba bʋla pɩmɛ arɩ mɩ lɩɩsɛ ŋ dɩ Saalas. Ŋɩɩ wɩaa ma mʋ arɩ yarɩfɩɛlaa.” 37Ŋɩɩ nɛ Pɔɔl bʋla pɩ porisi-hɩasɩ-la, “La ŋaa Rom tɩmma nɛ ka ba vɩɩrɛla nɩaa tʋɔŋ, a kɛnla tɔ dɩa aŋ bɩ la sarɩya die a dagɛ wɩɩ-la la sɩ cheye. Ka lɛɛlɛ baa chɛ dɩ la lʋara viiri. Aɩ, la bɩ sɛɩ. Ʋ maga dɩ Rom nɩhɩasɩ-la tɩtɩa kɔ daha nɛ a kʋ lɩɩsɛla.” 38Ŋɩɩ nɛ porisi kʋhɩasɩ-la mʋ bʋla pɩ Rom nɩhɩasɩ-la arɩ Pɔɔl arɩ Saalas ma ŋaa Rom tɩmma nɛ. Ba sɩ nɩɩ ŋɩɩ, fawʋllʋŋ kɛmba. 39Ŋɩɩ nɛ ba sii mʋ sʋlba arɩ ba cheye nɛ aŋ lɩɩsɛba nɩtɔɔrɩ dɩa lɛ, aŋ sʋlba dɩ ba lɩɩ ba taŋ lɛ. 40Ba sɩ lɩɩ nɩtɔɔrɩ dɩa lɛ, ba mʋ Lidia dɩa. Nɩmɛ nɛ ba na nɩalɩŋ dɔnsʋŋ sɩ laa Yesu wɩaa dii, a bʋl wɩaa nyaasɛ ba nyuŋ, aŋ viiri.

Currently Selected:

Tɩntɩŋŋaa 16: SIS

Highlight

Copy