Tɩntɩŋŋaa 17

Pɔɔl arɩ Saalas mʋ Tɛsalonaaka tinteeŋ

1Ba sɩɩ viiri ŋɩɩ, ba mʋ to taŋ kʋbala baa yɩrɛ Amfiipolis, a bɩra sii nɩmɛ a to taŋ dɔŋɔ maa baa yɩrɛ Apoloonia, a lɩɩ nɩmɛ a mʋ taŋ kʋbala baa yɩrɛ Tɛsalonaaka. Juu tɩŋŋaa Wɩɩchʋɔlɛ dɩa fa hɛ nɩmɛ. 2Pɔɔl mʋ jʋʋ Wɩɩchʋɔlɛ dɩa-la arɩ ʋ sɩ vɛnɛɛ ŋaa ŋɩɩ lee-na kala. Ʋ dɩ nɩalɩŋ joŋ chɛ-wiesie-la batori a kɛŋ Wɩa teniŋ a magɩsɛ wɩaa a pɩpɩ dɔŋɔ. 3Ʋ karɩmɛ Wɩa teniŋ aŋ dagɛba arɩ Kirisito, Nɩɩ-la Wɩa sɩ lɩɩsa maga dɩ ʋ na hɛɛŋ a sʋʋ aŋ sii sʋʋŋ lɛ. Pɔɔl bɩra sɩ, “Yesu deeŋ wɩaa ʋ sɩ bʋlaa pɩma nɛ ŋaa Kirisito.” 4Juu tɩmma-la dɔnsʋŋ laa wɩalɩŋ dii a pɛ Pɔɔl arɩ Saalas lɛ. Ba tʋɔŋ Giriik tɩmma-la sɩɩ fá Wɩa arɩ haala-la sɩ ŋaa nɩbalaa ba taŋ lɛ ma yʋga a laa wɩalɩŋ dii a pɛ ba lɛ. 5Ŋɩɩ nɛ Juu tɩŋŋaa yaraa bibieri. Ba chɛ kɛsɛ nyu-duo tɩŋŋaa sɩ yie bɩbaarɛ wombiee arɩ yɔɔsʋŋ tʋɔŋ a pɛ ba tɩtɩa lɛ dɩ ba kɛŋ jaŋ-la hosi. Ba mʋ jʋʋ Jaasɩŋ dɩa dɩ ba chɛ kɛŋ Pɔɔl arɩ Saalas a kaa kʋ lɩɩ nɩ-daŋ-la tʋɔŋ. 6Ama ba bɩ ba na, ŋɩɩ nɛ ba kɛŋ Jaasɩŋ arɩ nɩalɩŋ dɔnsʋŋ sɩ laa Yesu wɩaa dii a lɛrɛba lɩɩ ba taŋ kʋhɩasɩŋ teeŋ, aŋ ŋɩŋaa goŋ a bʋl, “Nɩaa deemba chei lee-kala nɛ aŋ lɛɛlɛ kɔ la jaŋ. 7Ka Jaasɩŋ laaba bil ʋ dɩa lɛ. Ba kala chei wɩɩ-la la kuoru-balɩŋ sɩ bile nɛ aŋ bʋl dɩ kuoru dɔŋ nɛ hɛ nɩmɛ, baa yɩrɛ Yesu.” 8Wɩaa deemba ba sɩ bʋla leŋ nɩalɩŋ arɩ ba taŋ kʋhɩasɩŋ kala bɩ jɩŋ wɩɩ-la kala ba sɩ jaŋ ŋaa. 9Ŋɩɩ nɛ taŋ kʋhɩasɩŋ ŋaa Jaasɩŋ arɩ ʋ dɔnsʋ-la sɩ laa Yesu wɩaa dii tiŋ moribiee, aŋ ka ba lemba.

Pɔɔl arɩ Saalas mʋ Biriya tinteeŋ

10Taŋ sɩ bire, nɩalɩŋ sɩ laa Yesu wɩaa dii ŋaa Pɔɔl arɩ Saalas lɩɩ mʋ taŋ kʋbala baa yɩrɛ Biriya. Ba sɩ yi nɩmɛ, ba mʋ jʋʋ Juu tɩŋŋaa Wɩɩchʋɔlɛ dɩa. 11Juu tɩmma-la sɩ hɛ Biriya lɛ nɛ kɛŋ mɛlɛ a kɩɩ Juu tɩmma-la fa sɩ hɛ Tɛsalonaaka lɛ. Ba chaga laa Wɩa niiŋ wɩalɩŋ arɩ na-kparɩba nɛ, a kɩkarɩmɛ Wɩa teniŋ arɩ sɩɩfɩɛsɩŋ tapʋlɩɩ-na kala, dɩ ba na wɩalɩŋ Pɔɔl sɩ bʋla ŋaa wʋtɩtɩɩba nɛ. 12Ba tʋɔŋ nɩaa yʋga nɛ a laa Yesu wɩaa dii. Giriik tɩŋŋaa haala-la sɩ ŋaa nɩbalaa arɩ ba baalaa kala laa Yesu wɩaa dii.

13Juu tɩmma-la sɩ hɛ Tɛsalonaaka lɛ sɩ nɩa dɩ Pɔɔl bɩra bʋl Wɩa wɩaa Biriya ma lɛ. Ba sii mʋ nɩmɛ ma a nyɩsɛ nɩ-daŋ-la hɛ. 14Ŋɩɩ nɛ nɩalɩŋ sɩ laa Yesu wɩaa dii ŋaa Pɔɔl lɩɩ a mʋ mʋgʋ-balɩŋ niiŋ, ka Saalas arɩ Timoti bɩ mʋa aŋ hɛ Biriya lɛ. 15Nɩaa dɔnsʋŋ lɩɩ Biriya a to Pɔɔl harɩŋ, a kɛnʋ kaa mʋ Atɛŋ. Pɔɔl mɩɩra tɩmba dɩ ba mʋ bʋla pɩ Saalas arɩ Timoti dɩ ba kʋ chemu lɩma.

Pɔɔl mʋ Atɛŋ tinteeŋ

16Pɔɔl sɩ hɔŋ Atɛŋ lɛ a gbɩgbɛrɛ Saalas arɩ Timoti, ʋ na dɩ tɔŋŋɔɔ su taŋ-la kala. Ʋ tʋɔŋ faasa chei. 17Ŋɩɩ nɛ Pɔɔl mʋ Juu tɩŋŋaa Wɩɩchʋɔlɛ dɩa, ʋ dɩ nɩalɩŋ sɩ bɩ Juu tɩŋŋaa ŋaa aŋ fɩfá Wɩa, magɩsɛ wɩaa pɩpɩ dɔŋɔ. Ʋ yie jʋʋ yɔbɔ ma chɛɛ-na kala a bʋl Wɩa wɩaa a pɩ nɩalɩŋ sɩ kɔ nɩmɛ. 18Kerichiba-la dɔnsʋŋ sɩɩ to Epikuuras wombiiŋ arɩ Sɩtɔɩk kerichiba dɔnsʋŋ ma kʋ naʋ a kɛŋ wɩaa lɩlɛrɛ ʋ teeŋ. Ba dɔnsʋŋ pɩɛsɛ, “Bɛɛ kɩaa wɩaa nɛ nɩyaarɩŋ deeŋ ma chɩnaa bʋl?” Dɔnsʋŋ ma sɩ, “Ʋ naga veŋ-falɩɩ wɩaa nɛ ʋ bʋbʋl.” Pɔɔl sɩ yie bʋl Yesu wɩaa arɩ ʋ sii sʋʋŋ lɛ nɛ tɩɩ ba bʋl ŋɩɩ. 19Ŋɩɩ nɛ ba kɛnʋ kaa mʋ ba sɩ yie hilimi dɩa-la lɛ baa yɩrɛ Arɩyɔpagɩs a bʋl, “La cho dɩ la nɩɩ wʋfalɩŋ deeŋ wɩaa ŋ sɩɩ dagʋ nɛ. 20Wɩalɩŋ dɔnsʋŋ ŋ sɩɩ bʋl ŋaa wʋfalɩa nɛ la teeŋ. La saa cho dɩ la nɩɩ ba bʋbʋɔŋ nɛ woruŋ.” 21Atɛŋ nɩaa arɩ ba nʋhʋɔraa kala fa bɩ wɩɩkala kɛnɛ a pɛ wʋfalaa nɩɩnɩŋ arɩ ba bʋlʋŋ lɛ.

22Ŋɩɩ nɛ Pɔɔl sii chɩŋ nɩalɩŋ fa sɩ hilime tʋtʋɔbaanɩŋ a bʋla pɩba, “Atɛŋ tɩmma, mɩ sɩ kɔ daha, mɩ na arɩ ma cho vʋɩyaa kpaarɩŋ nɛ woruŋ. 23Mɩ sɩɩ gɔllɛ ma taŋ lɛ, mɩ na ma vesiŋ. Mɩ bɩra na koruŋ ma ma sɩ saa. Ŋ-la nɛ ma tuuro hɛ ʋ lɛ:

‘WƖA-LA LA SƖ BƖ JƖŊ DƖ-KPAARƖŊ NƐ Ŋ-LA.’ ”

Ŋɩɩ nɛ Pɔɔl bɩra bʋl, “Wɩa-la ma sɩɩ chʋɔlɛ aŋ bɩ ʋ jɩŋ, ʋ wɩaa nɛ mɩ bʋlaa pɩma ŋɩɩ. 24Wɩa-la sɩ ŋaa dʋnɩa arɩ kʋŋkala sɩ hɛ ʋ lɛ, a ŋaa wɩa-nyuŋ arɩ tinteeŋ kala Tɩɩna, ʋ bɩ lere-la nuhuobiine sɩ saa aa kpaarɛ vʋɩyaa ka jʋʋ. 25Ʋ bɩ naga ʋ sɩ chɛ kʋŋ ka nɛ tɩɩ ʋʋ chɛ nuhuobiinee tɩma pʋ. Ʋ nɛ pɩ nuhuobiinee mɩɩsɩŋ arɩ wiese arɩ kʋŋkala. 26Wɩa ta nɩbala nɛ bumbuŋ-la. Nɩbala-la lɛ nɛ dʋnɩa tinteyee kala to kɔ, a hɔŋ dʋnɩa sɛmɛ kala. Ka dɩ ʋ ŋaaba, ʋ nɛ dagɛ bʋa-la ba sɩ jaŋ kɛŋ mɩɩsɩŋ, arɩ lere-la kala ba sɩ jaŋ hɔŋ. 27Wɩa ŋaaba ŋɩɩ dɩ ba wuo bee chɛʋ a lɩlaarɛ lee-kala dɩ ba naʋ. Ama Wɩa saa bɩ dɩ-bolii hɛ. Ʋ kpagɛla kʋŋkala nɛ. 28Nʋʋ kʋbala nɛ bʋla arɩ ʋ doluŋ lɛ nɛ la kɛŋ mɩɩsɩŋ a vɩvɛŋ a hɛ nɩmɛ. Ʋ saa ŋaa wʋtɩtɩɩ. Ma gɔgʋ-dɩndɛnnɛɛ dɔnsʋŋ ma fa bʋla arɩ la ŋaa ʋ biiriŋ nɛ. 29La saa sɩ ŋaa ʋ biiriŋ, ʋ bɩ maga dɩ la bɩɩnɛ arɩ Wɩa nagɛ kɩalɩŋ nuhuobiine sɩ kɛŋ sɛlɩmɛ kaa mɛ nɛ, koo kʋ-la ba sɩ kɛŋ hɔɔŋ koo tabɩɩŋ kaa ŋaa nɛ. Ʋ bɩ naga kɩaa deemba nuhuobiine sɩ kɛŋ ʋ jɩma kaa ŋaa nɛ. 30Bʋa-la lɛ nuhuobiinee sɩ bɩ ʋ jɩŋ, ʋ fa tɔrɩkɔ nɛ ba nyuŋ. Ama lɛɛlɛ ʋ bʋla pɩpɩ nʋʋkala lee-na kala dɩ ba bɩrɩma lɩɩ ba wʋbɔŋŋɔɔ lɛ, 31bɛɛ wɩaa ʋ hɛ tapʋlɩɩ nɛ ʋ sɩ jaŋ dii dʋnɩa nɩaa kala sarɩya arɩ wʋtɩtɩɩ. Ʋ jaŋ to nuhuobiiŋ-la ʋ sɩ lɩɩsa lɛ nɛ a dii sarɩya-la. Nɩɩ-la sɩ sʋba, ʋ chɩsʋ sʋʋŋ lɛ a leŋ nʋʋkala jɩŋ arɩ wʋtɩtɩɩ nɛ.”

32Nɩalɩŋ sɩ nɩa arɩ Pɔɔl bʋl sʋʋŋ siiniŋ lɛ wɩaa, ba dɔnsʋŋ mʋmɔmʋ, ama dɔnsʋŋ ma sɩ, “La jaŋ cho dɩ ŋ maachie bɩra bʋl wɩɩŋ deeŋ pɩla.” 33Ŋɩɩ nɛ Pɔɔl sii a lɩɩ lee-la ba sɩ hilime. 34Nɩaa dɔnsʋŋ laa wɩalɩŋ dii a to ʋ harɩŋ. Ba tʋɔŋ dɔŋɔ yɩrɩŋ nɛ Dayɔnaasɩas. Ʋ fa hɛ nɩalɩŋ sɩɩ hilimi Arɩyɔpagɩs dɩa-la tʋɔŋ nɛ. Haal kʋbala ma baa yɩrɛ Damarɩs arɩ nɩaa dɔnsʋŋ ma laa wɩalɩŋ dii.

Currently Selected:

Tɩntɩŋŋaa 17: SIS

Highlight

Copy