Tɩntɩŋŋaa 18

Pɔɔl mʋ Kɔrɩntɩ tinteeŋ

1Ŋɩɩ harɩŋ nɛ Pɔɔl sii Atɛŋ lɛ a mʋ taŋ kʋbala baa yɩrɛ Kɔrɩntɩ. 2Dɩmɛ nɛ ʋ na Juu tɩɩna kʋbala baa yɩrɛ Akuila. Ʋ lɩɩ Pɔntɔs sɩ hɛ Rom tinteeŋ lɛ nɛ. Ʋ dɩ ʋ haala Pɩrɩsɩla sɩ lɩɩ Rom kɔ, ʋ bɩ diene. Kuori-balɩŋ ba sɩɩ yɩrɛ Kɩlaadɩa fa bʋla pɩ Juu tɩŋŋaa kala dɩ ba lɩɩ Rom lɛ. Ŋɩɩ nɛ tɩɩ ba sii kɔ. Pɔɔl mʋ ba dɩa dɩ ʋ chʋɔlɛba. 3Ʋ mʋ jʋʋ ba dɩa a chʋchʋa nɩmɛ, bɛɛ wɩaa ba kala tɩŋ tɩntɩŋ-bala nɛ. Ba fa kɛŋ teniŋ yɛrɛ lɛŋŋɛɛ nɛ aa yallɛ. 4Chɛ-wiesii-la chɛɛŋ kala ʋ yie mʋ ba Wɩɩchʋɔlɛ dɩa. Ʋ dɩ Juu tɩŋŋaa arɩ Giriik tɩŋŋaa magɩsɛ wɩaa pɩpɩ dɔŋɔ. Ʋ wʋwalɩmɛ dɩ ba sɛɩ ʋ wɩɩŋ.

5Ŋɩɩ nɛ Saalas arɩ Timoti lɩɩ Masidoonia kɔ. Bʋa-la lɛ ba sɩ kɔ, Pɔɔl joŋ ʋ nyuŋ kala hɛ aa bʋl Wɩa wɩaa, a dagɛ woruŋ a pɩ Juu tɩŋŋaa arɩ Yesu nɛ ŋaa Kirisito. 6Ŋɩɩ nɛ Juu tɩmma-la lɩɩ Pɔɔl harɩŋ aŋ tʋʋsʋ. Ba sɩ ŋaa ŋɩɩ, ʋ kpesi ʋ gɛnnɩŋ kʋŋkɔlʋŋ hɛ ba lɛ aŋ bʋla pɩba, “Ma wʋbɔŋŋɔɔ jaŋ nyʋa ma nyuŋ lɛ. Mɩ wɩɩ dee. A lɩɩ jɩnɩŋ mɩ jaŋ mʋ a bʋl Wɩa wɩaa pɩ nɩalɩŋ sɩ bɩ Juu tɩŋŋaa ŋaa.” 7Ʋ bʋl ŋɩɩ aŋ sii mʋ jʋʋ baal kʋbala ba sɩɩ yɩrɛ Taatɩs Jasɩtɩs dɩa. Ʋ faa to Wɩa nɛ. Ʋ dɩa kpagɛ Wɩɩchʋɔlɛ dɩa nɛ. 8Baal kʋbala baa yɩrɛ Kɩrɩsɩpas nɛ fa ŋaa Wɩɩchʋɔlɛ dɩa-la kʋhɩaŋ. Ʋ dɩ ʋ dɩa nɩaa kala laa La Tɩɩna Yesu wɩaa dii. Nɩaa ma yʋga Kɔrɩntɩ lɛ a nɩɩ Wɩa wɩalɩŋ a laaba dii, ba foba Wɩɩchʋɔlɛ lɩɩŋ. 9Tɩtaŋ kʋbala Pɔɔl na arɩ duosoo tʋɔŋ dɩ Wɩa bʋla pʋ, “Sɩ́ fawʋllʋŋ fá. Ha bʋl wɩaa pɩpɩ nɩaa a sɩ́ leŋ. 10Mɩ chɩŋ ŋ harɩŋ nɛ. Nʋʋkala bɩ jaŋ wuo kɛnɩŋ a ŋaaŋ wʋbɔŋ kala, bɛɛ wɩaa mɩ nɩaa yʋga taŋ deeŋ lɛ.” 11Ŋɩɩ nɛ Pɔɔl hɔŋ nɩmɛ ŋɩɩ jɩna arɩ kpaa magɛ dɔŋɔ a dɩdagɛ nɩalɩŋ Wɩa wɩaa.

12Bʋa-la lɛ baal kʋbala baa yɩrɛ Galio nɛ fa chɩŋ Rom kuoru balɩŋ naasɩŋ lɛ aa beŋ Giriisi tinteeŋ. Ŋɩɩ nɛ Juu tɩŋŋaa sii hɛ dɔŋɔ a kɛŋ Pɔɔl kaa mʋ ba sarɩya dɩ-diiliŋ. 13Ba sɩ, “Baala deeŋ walɩmɛ dɩ nɩaa sɛɩ a chʋchʋɔlɛ Wɩa wombii-la sɩ jaŋ chei wombii-la la sɩɩ to nɛ.” 14Pɔɔl sɩ ŋaa dɩ ʋ bʋl wɩaa, ŋɩɩ nɛ Galio bʋla pɩ Juu tɩmma-la, “Juu tɩmma, dɩ baala deeŋ nɛ fa ŋaa wʋbɔŋ koo a ŋaa wɩɩ dɔŋ chei, ʋ fa jaŋ kɛŋ wombii dɩ mɩ kɛŋ kenyiri a jegile nɩɩ ma teeŋ. 15Ama ʋ sɩ ŋaa wʋbʋlɩɩ nɛ ma kaa lɛrɛ arɩ yɩraa wɩaa, arɩ ma tɩtɩa wombiee ma sɩɩ to wɩaa nɛ, ʋ maga dɩ ma tɩtɩa kaa mʋ bʋla wasɛ nɛ dɩa lɛ. Mɩ bɩ jaŋ wuo laa wɩɩŋ deeŋ jɩŋ.” 16Ʋ kiriba ta ba lɩɩ sarɩya dɩ-diiliŋ. 17Ba kala lɩɩ gollo kɛŋ Sɔsɩtɛnɛs, nɩɩ-la fa sɩ ŋaa Wɩɩchʋɔlɛ dɩa kʋhɩaŋ, a ŋmobu sarɩya dɩ-diiliŋ boiŋ niiŋ. Ama Galio sɩpaa kala fa tuo nɩmɛ.

Pɔɔl mɩɩra mʋ Antɩɔk tinteeŋ

18Pɔɔl hɛ Kɔrɩntɩ lɛ a dieni. Ŋɩɩ nɛ ʋ ta nɩalɩŋ sɩ laa Yesu wɩaa dii Kɔrɩntɩ lɛ aŋ lɩɩ. Ʋ dɩ Pɩrɩsɩla arɩ Akuila kala sii mʋ a jʋʋ lɩɩŋ daboro dɩ ba mʋ Siiria tinteeŋ. Ka dɩ ba-na jʋʋ lɩɩŋ daboro-la, Pɔɔl fʋŋ ʋ nyuŋ taŋ kʋbala baa yɩrɛ Keŋkiriya lɛ, a tɩŋ ʋ sɩ ta niiŋ Wɩa teeŋ. 19Ba mʋ yi taŋ kʋbala baa yɩrɛ Ɛfɛsɩs. Nɩmɛ Pɔɔl leŋ Pɩrɩsɩla arɩ Akuila aŋ mʋ jʋʋ Wɩɩchʋɔlɛ dɩa. Ʋ dɩ Juu tɩŋŋaa magɩsɛ wɩaa pɩpɩ dɔŋɔ. 20Nɩalɩŋ dɔnsʋŋ bʋl dɩ ʋ hɔŋ ba teeŋ dieni, ka ʋ bɩ sɛyɛ. 21Ʋ sɩ sii nɩmɛ, ʋ bʋla pɩba, “Dɩ Wɩa nɛ pɩmɛ wombiiŋ, mɩ jaŋ mɩɩra kɔ ma teeŋ.”

Ŋɩɩ nɛ ʋ sii mʋ jʋʋ lɩɩŋ daboro a lɩɩ Ɛfɛsɩs lɛ, 22a mʋ yi taŋ kʋbala ba yɩyɩrɛ Sɩzarɩya. Ʋ sii nɩmɛ a mʋ Jerusalɛm, a mʋ chʋɔlɛ nɩalɩŋ sɩ laa Yesu wɩaa dii aa hilimi nɩmɛ. Ʋ bɩra sii nɩmɛ a mʋ Antɩɔk. 23Ʋ hɔŋ nɩmɛ a dieni mʋa a bɩra sii, a to Galiisia arɩ Firijia tinteeŋ, a bʋl wɩaa pɩpɩ nɩalɩŋ sɩ laa Yesu wɩaa dii nɩmɛ dɩ ba wasa chɩŋ ŋɩɩ ba sɩ laa Wɩa dii naaŋ lɛ.

Apɔlɔs mʋ Ɛfɛsɩs arɩ Kɔrɩntɩ tinteeŋ

24Juu tɩɩna ma nɛ fa hɛ nɩmɛ, baa yɩrɛ Apɔlɔs, ʋ lɩɩ Alɛkɩzandɩrɩa nɛ. Ʋ sii kɔ Ɛfɛsɩs. Ʋ fa jɩŋ wɩaa bʋlʋŋ nɛ woruŋ, a jɩŋ Wɩa teniŋ ma woruŋ. 25Ba fa dagʋ La Tɩɩna Yesu wombii-la tonuŋ nɛ. Ʋʋ dagɛ Yesu wɩaa woruŋ arɩ sɩɩfɩaŋ. Wɩalɩŋ kala ʋ sɩ bʋla aa tɩgɛ Yesu lɛ ŋaa wʋtɩtɩɩba nɛ. Arɩ ŋɩɩ kala, Jɔɔŋ sɩɩ fo nɩaa Wɩɩchʋɔlɛ lɩɩŋ ŋɩɩ dʋndʋŋa wɩaa nɛ ʋ jɩŋ. 26Ʋ sɩ hɛ Ɛfɛsɩs lɛ, ʋ bʋl Wɩa wɩaa arɩ nyuduoŋ Wɩɩchʋɔlɛ dɩa lɛ. Pɩrɩsɩla arɩ Akuila hɛ nɩmɛ a nɩɩ wɩalɩŋ ʋ sɩɩ bʋl. Ŋɩɩ nɛ ba kɛnʋ kaa mʋ ba dɩa a wasa dagʋ Wɩa wombii-la woruŋ. 27Ŋɩɩ nɛ Apɔlɔs chɩchɛ dɩ ʋ mʋ Giriisi tinteeŋ. Nɩalɩŋ sɩ laa Yesu wɩaa dii Ɛfɛsɩs lɛ pɛ ʋ lɛ a ŋmʋnsɛ teniŋ a pɩ nɩalɩŋ sɩ laa Yesu wɩaa dii Giriisi lɛ, a bʋla pɩba dɩ ʋ nɛ kɔ, ba kɛnʋ woruŋ. Ʋ sɩ mʋ yi nɩmɛ, nɩalɩŋ sɩ laa Yesu wɩaa dii Wɩa lahɔrɩmɔ lɛ, ʋ chaasa pɛ ba lɛ. 28Ʋ dɩ Juu tɩŋŋaa faasa kɛŋ wɩaa lɩlɛrɛ nɩaa tʋɔŋ. Ʋ bʋla loba, aŋ dagɛ Wɩa teniŋ tʋɔŋ arɩ Yesu nɛ ŋaa Kirisito.

Currently Selected:

Tɩntɩŋŋaa 18: SIS

Highlight

Copy