Tɩntɩŋŋaa 19

Pɔɔl mʋ Ɛfɛsɩs tinteeŋ

1Apɔlɔs fa sɩ hɛ Kɔrɩntɩ lɛ ŋɩɩ, Pɔɔl bɩra gɔllɛ ŋɩɩ a kɔ Ɛfɛsɩs, a na nɩaa dɔnsʋŋ sɩ laa Yesu wɩaa dii. 2Ŋɩɩ nɛ Pɔɔl pɩɛsɛba, “Wɩa joŋ ʋ Dɩŋ-zɔmʋŋ hɛ ma lɛ nɛɛ bʋa-la lɛ ma sɩ laa Yesu wɩaa dii?” Ŋɩɩ nɛ ba sɩ, “Aɩ, la ha bɩ Wɩa Dɩŋ-zɔmʋŋ wɩaa nɩa.” 3Ŋɩɩ nɛ Pɔɔl bɩra pɩɛsɛba, “Wɩɩchʋɔlɛ lɩɩ bɛɛ doho nɛ ba foma?” Ŋɩɩ nɛ ba bʋl, “Jɔɔŋ sɩɩ fo nɩaa Wɩɩchʋɔlɛ lɩɩ-la nɛ la fo.” 4Ŋɩɩ nɛ Pɔɔl bɩra bʋl, “Nɩalɩŋ sɩ bɩrɩma lɩɩ ba wʋbɔŋŋɔɔ lɛ nɛ, Jɔɔŋ fufo Wɩɩchʋɔlɛ lɩɩŋ. Ʋ fa bʋla pɩba arɩ nʋʋ jaŋ kɔ ʋ harɩŋ, ʋ yɩrɩŋ nɛ Yesu, dɩ ʋ nɛ kɔ ba laa ʋ wɩaa dii.” 5Ba sɩ nɩɩ wɩɩŋ deeŋ Pɔɔl sɩ bʋla, ba ŋaa ba foba Wɩɩchʋɔlɛ lɩɩŋ La Tɩɩna Yesu yɩrɩŋ lɛ. 6Ŋɩɩ nɛ Pɔɔl joŋ ʋ nɩsaa daŋ ba lɛ. Ʋ sɩ ŋaa ŋɩɩ, Wɩa Dɩŋ-zɔmʋŋ kʋ tuu hɛ ba lɛ. Ba suomo bʋbʋl yikori wogusuŋ ba sɩ bɩ jɩŋ, a bʋl Wɩa wɩaa Wɩa Dɩŋ-zɔmʋŋ doluŋ lɛ ma. 7Nɩaa deemba kala fa ŋaa arɩ baalaa fii arɩ balɩa nɛ.

8Pɔɔl sɩ hɛ Ɛfɛsɩs lɛ, ʋ vɛnɛ jʋjʋʋ Wɩɩchʋɔlɛ dɩa chɛnsɩŋ batori nɛ, a chaasa bʋbʋl Wɩa kuorii-la wɩaa arɩ nyuduoŋ. Ba dɩ nɩaa kɛŋ wɩalɩŋ lɩlɛrɛ, ʋ wʋwalɩmɛ dɩ ba sɛɩ ʋ wɩɩŋ. 9Ama nɩalɩŋ dɔnsʋŋ nyuŋ fa dolie, ba vɩa dɩ ba laa wɩɩ-la dii, aŋ bʋl wʋbɔŋŋɔɔ nɩaa tʋɔŋ, a kɛŋ La Tɩɩna Yesu wombii-la tonuŋ chichei. Pɔɔl lemba aŋ kɛŋ nɩalɩŋ sɩ laa Yesu wɩaa dii kaa mʋ. Ba jʋʋ baal kʋbala baa yɩrɛ Tɩranas dɩɩ-bal kʋbala. Pɔɔl arɩ nɩaa yie vʋvʋʋrɛ wɩaa nɩmɛ tapʋlɩɩ-na kala. 10Ba vɛnɛɛ ŋaa ŋɩɩ a yi jɩsɩŋ balɩa nɛ. Juu tɩŋŋaa arɩ Giriik tɩŋŋaa kala sɩ hɛ Esia tinteeŋ lɛ wuo nɩɩ La Tɩɩna Yesu wɩaa.

Sɩkɩɩva biiriŋ gɔllɔ kiri jɩŋ-bɔŋŋɔɔ

11Wɩa fa joŋ dol-bal kʋbala nɛ a pɩ Pɔɔl, ʋ ŋɩŋaa wʋkpuŋkperisiŋ. 12Gɛnnɩŋ arɩ gɛrɩpɛ biisi-la ma sɩ digi Pɔɔl yaraa, nɩaa yie paa nɛ a kaa mʋ pɩ nyanyal tɩŋŋaa ba duduori. Dɩ jɩŋ-bɔŋŋɔɔ nɛ kɛŋ nʋʋ ma, ba lɩɩ tɩɩna lɛ. 13Juu tɩŋŋaa dɔnsʋŋ ma fa hɛ nɩmɛ a gɔllɛ a kikiri jɩŋ-bɔŋŋɔɔ nɩaa lɛ. Ba wʋwalɩmɛ dɩ ba ŋaa ŋɩɩ La Tɩɩna Yesu yɩrɩŋ lɛ. Ba bʋla pɩ jɩŋ-bɔmɔ-la “Mɩ sɩ, má lɩɩ, Yesu, nɩɩ-la wɩaa Pɔɔl sɩɩ bʋl yɩrɩŋ lɛ.” 14Baalaa balɩpɛ nɛ faa ŋaa ŋɩɩ. Ba nyɩmma yɩrɩŋ nɛ Sɩkɩɩva. Ʋ fa ŋaa Juu tɩŋŋaa Wɩɩsʋllɩ sɩpaalaaraa kʋhɩaŋ dɔŋɔ nɛ. 15Tapʋlɩɩ kʋbala jɩŋ-bɔmʋŋ bʋla pɩba, “Mɩ jɩŋ Yesu nɛ, a jɩŋ Pɔɔl ma, aŋ ka ma ma nɛ kʋbɛɛba?” 16Ŋɩɩ nɛ jɩŋ-bɔmʋŋ sɩ kɛŋ baal-la sii fɩla jɩlba a wuoba, a ŋmooba woruŋ a pɩrɛba kala. Ba gɛnnɩŋ kala kɩɛsɛ, ka ba kɛŋ yarɩ-biree fá lɩɩ dɩa-la tʋɔŋ. 17Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa arɩ nɩalɩŋ kala sɩ hɛ Ɛfɛsɩs lɛ nɩɩ wɩɩŋ deeŋ. Fawʋllʋŋ kɛmba kala. Ba dɛnnɛ La Tɩɩna Yesu woruŋ. 18Nɩalɩŋ ma dɔnsʋŋ sɩ laa Yesu wɩaa dii yʋga kɔ, a dagɛ ba wʋbɔmɔ-la ba sɩ ŋaa a pɩ Pɔɔl, nɩaa tʋɔŋ. 19Ba tʋɔŋ nɩaa yʋga a faa ŋaa hɩl wɩaa. Ba kala paa tenni-la ba fa sɩ karɩma a ŋɩŋaa wɩalɩŋ kʋ lɩɩ nyɩgɛ nʋʋkala na. Ba sɩ kɛŋ tenni-la kala yalɩŋ pɛ dɔŋɔ lɛ, ʋ ŋaa siidi bʋɩ bʋɩ bʋɩ nɛ. 20Ŋɩɩ nɛ La Tɩɩna niiŋ wɩaa teeli leriŋ kala a dol woruŋ.

Nɩaa hɛ yuosuŋ Ɛfɛsɩs lɛ

21Wɩaa deemba kala sɩ ŋaa harɩŋ lɛ nɛ, Pɔɔl bɩɩnɛ dɩ ʋ to Masidoonia tinteeŋ arɩ Giriisi tinteeŋ a mʋ Jerusalɛm. Ŋɩɩ nɛ ʋ bʋl, “Dɩ mɩ nɛ mʋ nɩmɛ, ʋ maga dɩ mɩ mʋ Rom ma.” 22Ŋɩɩ nɛ Pɔɔl tɩŋ nɩalɩŋ balɩa fa sɩɩ pɛ ʋ lɛ, Timoti arɩ Ɩrasɩtas dɩ ba mʋ Masidoonia. Aŋ ka ʋ tɩtɩa hɔŋ Ɛfɛsɩs lɛ Esia tinteeŋ a dieni mʋa.

23Bʋa-la lɛ yuo-bal nɛ fa sii Ɛfɛsɩs lɛ a tɩgɛ La Tɩɩna Yesu wombii-la tonuŋ wɩaa. 24Libiru kʋbala nɛ fa hɛ nɩmɛ. Ʋ yɩrɩŋ nɛ Dɛmɩɩtɩas. Ʋ fa kɛŋ sɛlɩmɛ nɛ a kaa lilibi kɩaa, ba nagɛ ba taŋ veŋ-balɩŋ Atɛmɩs. Tɩntɩmɩŋ deeŋ lɛ ba dɩ ʋ tɩntɩnnaa na moribiee kɩŋkɛŋ nɛ. 25Chɛɛ kʋbala ʋ yɩrɛ ʋ tɩntɩnnaa arɩ nɩalɩŋ ma sɩɩ tɩŋ ʋ tɩntɩmɩɩ-la doho a bʋla pɩba, “Mɩ nandɔmba, ma jɩma arɩ tɩntɩmɩŋ deeŋ lɛ nɛ la na didii. 26Ma tɩtɩa nɩa nɛ a nɩna wɩalɩŋ ma Pɔɔl sɩɩ bʋl. Ʋ sɩ: Vʋɩya-la nuhuobiinee sɩɩ libu, ba bɩ wɩa ŋaa. Ʋ saa wuo kɛŋ nɩ-daŋ nyusuŋ bɩrɩmɛ ba sɛɩ wɩɩ-la. Ʋ ŋaa ŋɩɩ Ɛfɛsɩs deeŋ arɩ Esia tinteeŋ jesiŋ kala lɛ nɛ. 27Wɩɩ-la mɩ-na sɩɩ fá nɛ ŋ-la: Nɩaa jaŋ chei la tɩntɩmɩŋ deeŋ yɩrɩŋ. La bɩraa fá arɩ la veŋ-balɩŋ Atɛmɩs dɩa jaŋ kʋ ŋaa ku-tɔɔ. Nɩaa bɩra bɩ jaŋ joŋu dɩ ʋ ŋaa kʋŋ. Lɛɛlɛ Esia nɩaa arɩ dʋnɩa nʋʋkala nɩɩ kpaarʋ.”

28Nɩalɩŋ sɩ nɩɩ wɩɩ-la, ba baanɩŋ sii. Ba ŋaa goŋ a bʋbʋl, “La veŋ-balɩŋ Atɛmɩs sɩ hɛ Ɛfɛsɩs lɛ nɛ kɛŋ doluŋ.” 29Ŋɩɩ nɛ ba kɛŋ taŋ-la kala hosi. Nɩ-daŋ-la kɛŋ Gayas arɩ Arɩsɩtakʋs sɩ lɩɩ Masidoonia a tuto Pɔɔl harɩŋ. Ba lɛrɛba kaa mʋ lee-la taŋ-la nɩaa sɩ yie hihilimi. 30Pɔɔl fa cho dɩ ʋ mʋ jʋʋ nɩ-daŋ-la tʋɔŋ, ama nɩalɩŋ sɩ laa Yesu wɩaa dii bɩ sɛyɛ. 31Esia tinteeŋ kʋhɩasɩŋ dɔnsʋŋ sɩ dii Pɔɔl nandɔnsʋŋ tɩŋ dɩ ba sʋlʋ dɩ ʋ sɩ́ nɩalɩŋ tʋɔŋ jʋʋ.

32Nɩalɩŋ kala sɩ hilime bɩ jɩŋ wɩɩ-la tʋɔŋ ba sɩ hɛ. Dɔnsʋŋ ŋaa goŋ a bʋl ŋ-la nɛ, dɔnsʋŋ ma sɩ wɩɩŋ deeŋ nɛ. Ba jesiŋ kala paala fa bɩ jɩŋ wɩɩ-la sɩ tɩɩ ba kʋ hilimi. 33Baal kʋbala ma nɛ fa hɛ nɩalɩŋ tʋɔŋ, baa yɩrɛ Alɛkɩzanda. Juu tɩŋŋaa leŋ ʋ lɩɩ chɩŋ ba sɩpaaŋ dɩ ʋ bʋl wɩaa pɩ nɩ-daŋ-la. Ŋɩɩ nɛ Alɛkɩzanda kɛŋ ʋ nɩsɩŋ vigi dɩ ba kɛŋ goŋ, aŋ wʋwalɩmɛ dɩ ʋ bʋla pɩ nɩalɩŋ arɩ ʋ dɩ ʋ toori dɔnsʋŋ bɩ wɩɩ cheye. 34Ba sɩ kʋ jɩŋ dɩ ʋ ŋaa Juu tɩɩna nɛ, ba kala bɩra ŋaa goŋ a hɛ dɔŋɔ lɛ a yi hawaba balɩa aa bʋl, “La veŋ-balɩŋ Atɛmɩs sɩ hɛ Ɛfɛsɩs lɛ nɛ kɛŋ doluŋ.”

35Ŋɩɩ nɛ ba taŋ kerichi-hɩaŋ-la kʋ lɩɩ a wuo ŋaa ba kɛŋ goŋ kala, ka ʋ bʋla pɩba, “Ɛfɛsɩs tɩmma, nʋʋkala nɛ jɩma arɩ la taŋ Ɛfɛsɩs nɛ tɩɩ la veŋ-balɩŋ Atɛmɩs arɩ ʋ dɩa kala, a pɛ tabɩɩ-la sɩ́ lɩɩ wɩa-nyuŋ kʋ tuu tel, la kpʋkpaarɛ lɛ. 36Nʋʋkala bɩ jaŋ wuo kɛŋ wɩɩŋ deeŋ kaa lɛrɛ. Ŋɩɩ wɩaa, má leŋ goŋ aŋ sɩ́ wɩɩ-la sɩ bɩ bʋbʋɔ kɛnɛ ŋaa. 37Nɩaa deemba bɩ kʋŋ gaa joŋ la veŋ-balɩŋ dɩa lɛ, ba bɩra bɩ wɩɩ bʋla tʋʋsɛ veŋ-balɩŋ ma, ka ma kɛmba kaa kɔ daha. 38Dɩ Dɛmɩɩtɩas arɩ ʋ tɩntɩnnɩ dɔnsʋŋ nɛ kɛŋ wɩɩ arɩ nʋʋ, sarɩya kɛŋ ʋ tapʋl-diilii nɛ, ma taŋ kʋhɩasɩŋ ma hɛ nɩmɛ dɩ ba dii sarɩya. Má leŋ dɩ ba mʋ nɩmɛ bʋl wɩalɩŋ ba sɩ kɛnɛ. 39Ama dɩ wɩɩ dɔŋ ma nɛ hɛ nɩmɛ maa chɛ dɩ ma bʋl, má kaa mʋ taŋ kʋhɩasɩ-la sɩ yie kʋ hilimi teeŋ dɩ ba bʋla wasɛ. 40Ama ʋ sɩ nagɛ ŋ-la, la tinteeŋ kʋhɩaŋ jaŋ wuo bʋl la teeŋ a tɩŋ jɩnɩŋ yuosuŋ deeŋ wɩaa. Ŋɩɩ wɩaa la bɩ jaŋ wuo bʋl wɩɩkala a mʋ tɩgɛ yuosu-la lɛ, bɛɛ wɩaa ʋ bɩ bʋbʋa kala kɛnɛ.” 41Ʋ sɩ bʋl ŋɩɩ dɛrɛ, ʋ ŋaa nɩalɩŋ fa sɩ hilime sii viiri.

Currently Selected:

Tɩntɩŋŋaa 19: SIS

Highlight

Copy