Tɩntɩŋŋaa 20

Pɔɔl mʋ Masidoonia arɩ Giriisi tinteeŋ

1Ŋɩɩ nɛ yuosu-la dɛrɛ. Ka Pɔɔl yɩrɛ nɩalɩŋ sɩ laa Yesu wɩaa dii Ɛfɛsɩs lɛ a bʋl wɩaa pɩba ba nyuŋ nyaasɛ. Ʋ sɩ bʋl wɩalɩŋ dɛrɛ, ʋ taba aŋ sii mʋ Masidoonia tinteeŋ. 2Ʋ gɔllɛ Masidoonia tinteeŋ kala a bʋl wɩaa yʋgɛ pɩba dɩ ba nyuŋ nyaasɛ. Ŋɩɩ nɛ ka ʋ lɩɩ nɩmɛ a mʋ Giriisi tinteeŋ. 3Ʋ hɛ Giriisi tinteeŋ lɛ chɛnsɩŋ batori. Ŋɩɩ nɛ ʋ kɛŋ ʋ tɩtɩa hɛ dɔŋɔ dɩ ʋ jʋʋ lɩɩŋ daboro a mʋ Siiria tinteeŋ. Bʋa deeŋ lɛ nɛ ʋ nɩɩ dɩ Juu tɩŋŋaa vʋʋra dɩ ba kpʋʋ. Ŋɩɩ nɛ ʋ kɛŋ ʋ tʋɔbɩɩnaa bɩrɩmɛ a mɩɩra sii to Masidoonia tinteeŋ. 4Nɩaa deemba nɛ fa to ʋ harɩŋ: Dɔŋɔ yɩrɩŋ nɛ Sopata a lɩɩ Biriya. Ʋ fa ŋaa Pɩras nanʋala nɛ, a pɛ Arɩsɩtakʋs arɩ Sɛkʋndas sɩ lɩɩ Tɛsalonaaka, arɩ Gayas sɩ lɩɩ Dɛɛbɩ, arɩ Timoti, a pɛ Takɩkas arɩ Tʋrɔfɩmɔs sɩ lɩɩ Esia lɛ. 5Ba nɛ laa sɩpaaŋ a mʋ gbɛrɛla Tʋrɔwas lɛ. 6La hɛ Fɩlɩpa lɛ nɛ, ka ba gbieli gbiele-la ba sɩ yie dii boroboro sɩ bɩ sɩbʋrʋŋ kɛnɛ dɛrɛ. Ŋɩɩ lɛ nɛ la lɩɩ jʋʋ lɩɩŋ daboro, a vɛŋ tapʋlaa banɔŋ aŋ-na mʋ puuba Tʋrɔwas lɛ. La hɛ nɩmɛ tapʋlaa balɩpɛ.

Pɔɔl mʋ Tʋrɔwas tinteeŋ

7Asibiri chɛɛŋ dɩdaanɩŋ la kala hɛ dɔŋɔ lɛ a dii kʋdiile-la Kirisito fa sɩ sɩ dɩ la didii a liliisi ʋ wɩaa. Ʋ taŋ nɩɩ pʋl dɩ Pɔɔl sii viiri. Ŋɩɩ nɛ ʋ bʋl wɩaa ŋɩɩ deeŋ deeŋ taŋ siesi. 8La fa hɔŋ lusuŋ nyuŋ dɩa lɛ nɛ a nyɩgɛ chaanaa yʋgɛ. 9Bapʋɔsɩ-bie kʋbala ma hɛ nɩmɛ, baa yɩrɛ Yutikas. Ʋ fa hɔŋ tokoro niiŋ nɛ. Pɔɔl sɩ bʋl wɩaa didieni ŋɩɩ, ʋ hɔnɔ dɩdɩɛgɛ doŋ a joŋo pɩŋ doŋ, a foro lɩɩ dɩɩ-suguloo batori nyuŋ a tuu tel. Ba tuu joŋu dɩ ʋ sʋba. 10Ŋɩɩ nɛ Pɔɔl sii tuu time chugili ʋ lɛ a guoru, aŋ bʋla pɩ nɩalɩŋ, “Má sɩ́ leŋe dɩ wɩɩ-la walɩmɛma, ʋ weye nɛ.” 11Ŋɩɩ nɛ ka Pɔɔl bɩra jɩl lusuŋ nyuŋ dɩa-la ba dii kʋdiile-la Kirisito fa sɩ sɩ ba dii a liliisi ʋ wɩaa. Ba sɩ dii dɛrɛ, ʋ bɩra kɛŋ wʋbʋlʋŋ halɩɩ taŋ pʋl, ʋ sii viiri. 12Nɩaa kɛŋ bapʋɔsɩ-bie-la kaa mʋ dɩa dɩ ʋ weye. Ba tʋɔŋ faasa tɔrɛ.

Pɔɔl sii Tʋrɔwas lɛ a mʋ Mɩlɩɩtas

13Ŋɩɩ nɛ la sii a mʋ jʋʋ lɩɩŋ daboro a duoro mʋ Asɔs. Pɔɔl fa bʋla pɩla dɩ ʋ jaŋ vɛŋ naasɩŋ lɛ kʋ jʋʋ lɩɩŋ daboro Asɔs lɛ. Ŋɩɩ nɛ la jʋʋ lɩɩŋ daboro a mʋ nɩmɛ dɩ la joŋu. 14Pɔɔl sɩ kʋ puula Asɔs lɛ, la joŋu arɩ lɩɩŋ daboro-la a mʋ to Mitilini. 15Taŋ sɩ pʋla, la sii nɩmɛ a duoro kɔ Kɩyɔs. Taŋ bɩra pʋl, la mʋ Samɔs. Taŋ bɩra sɩ pʋla, la sii mʋ Mɩlɩɩtas. 16Pɔɔl fa bɩ chɛ dɩ ʋ chɩŋ Ɛfɛsɩs lɛ, bɛɛ wɩaa ʋ bɩ chɛ dɩ ʋ dieni Esia tinteeŋ lɛ, ʋ faa chɛ dɩ ʋ mʋ Jerusalɛm lɩma lɩma nɛ a puu Pɛntɩkɔs chɛ-gbieli-la.

Pɔɔl bʋl wɩaa a pɩ nɩalɩŋ sɩ laa Yesu wɩaa dii aa hilimi kʋhɩasɩŋ Ɛfɛsɩs lɛ

17Ŋɩɩ nɛ la kiele kɔ Miliitas. Pɔɔl tɩma yɩrɛ nɩalɩŋ sɩ laa Yesu wɩaa dii aa hilimi kʋhɩasɩŋ Ɛfɛsɩs lɛ dɩ ba kɔ. 18Ba sɩ kɔ, ʋ bʋla pɩba, “Ma jɩŋ ŋɩɩ mɩ sɩ naga nɛ, a chɩŋ tapʋlɩɩ-la mɩ sɩ kɔ ma teeŋ Esia tinteeŋ lɛ a kaa kɔ jɩnɩŋ. 19Mɩ chaasa kɛŋ mɩ tɩtɩa muuri nɛ a tɩma pɩ La Tɩɩna, a yel sɩlɩɩrɩŋ mɩ tɩntɩŋŋaa lɛ, a na hɛɛŋ ma Juu tɩŋŋaa nɩsɩŋ lɛ a tɩŋ ba sɩ vʋʋra dɩ ba kpʋmɛ. 20Ma jɩma mɩ dagɛma wɩɩ-na kala sɩ jaŋ pɛ ma lɛ nɛ, mɩ bɩ kaa faama. Mɩ dagɛma Wɩa wɩaa, nɩaa tʋɔŋ arɩ ma dɩɩsɩŋ ma lɛ. 21Mɩ bʋla pɩ Juu tɩŋŋaa arɩ nɩalɩŋ sɩ bɩ Juu tɩŋŋaa ŋaa kala arɩ sɩɩfɩɛsɩŋ dɩ ba bɩrɩma lɩɩ ba wʋbɔŋŋɔɔ lɛ aŋ kʋ to Wɩa, a laa La Tɩɩna Yesu wɩaa dii.

22Lɛɛlɛ mɩ to Wɩa Dɩŋ-zɔmʋŋ niiŋ lɛ nɛ a mʋmʋ Jerusalɛm. Mɩ bɩ jɩŋ wɩɩ-la kala sɩ jaŋ ŋaa mɩ lɛ nɩmɛ. 23Mɩ ta jɩŋ nɛ arɩ taŋ-na kala lɛ mɩ sɩɩ mʋ, Wɩa Dɩŋ-zɔmʋŋ yie bʋla pɩmɛ sɩɩfɩɛsɩŋ arɩ wɩaa jaŋ jʋʋmɛ, dɩ ba kɛmmɛ tɔ dɩa ma. 24Ama mɩ sɩ yie beŋ mɩ mɩɩsɩŋ, ʋ bɩ kʋŋkala ŋaa mɩ teeŋ. Mɩ taa chɛ dɩ mɩ tɩŋ tɩntɩmɩɩ-la mɩ Tɩɩna Yesu sɩ sɩ mɩ tɩŋ nɛ a dɛrɛ. Tɩntɩmɩɩ-la nɛ dɩ mɩ bʋl Wɩa wʋzɔmɔ-la a pɩ nɩaa, a dagɛ ŋɩɩ Wɩa sɩ kɛŋ zile.

25Lɛɛlɛ mɩ jɩma arɩ ma nɩaa deemba mɩ sɩ yie gɔllɛ ma tʋɔŋ a bʋl Wɩa kuorii-la wɩaa pɩma, ma bɩra bɩ jaŋ kɔ dɩ ma namɛ. 26Ŋɩɩ wɩaa mɩ bʋla pɩpɩma jɩnɩŋ dɩ ma nʋʋkala nɛ kɔ dɩ ʋ lɛlɛ mɩ dee bɩ jaŋ laa cheeriŋ, 27bɛɛ wɩaa mɩ bʋl wɩalɩŋ kala Wɩa sɩɩ chɛ nɛ a pɩma. 28Má beŋ ma tɩtɩa nyuŋ woruŋ, aŋ pɛ beŋ nɩalɩŋ maa ʋ Dɩŋ-zɔmʋŋ sɩ joŋo hɛ ma nɩsɩŋ lɛ. Má beŋ nɩalɩŋ sɩ laa Yesu wɩaa dii a hihilimi nyuŋ, a nagɛ pie-daara sɩ yie beŋ ʋ piesee nyuŋ ŋɩɩ. Wɩa nɛ joŋ ʋ tɩtɩa bie chalɩŋ yɔɔba. 29Mɩ jɩma, dɩ mɩ nɛ lemma, nɩbɔŋŋɔɔ jaŋ kʋ jʋʋ ma tʋɔŋ, a nagɛ guŋgurusuŋ sɩ yie jʋʋ pʋsʋŋ tʋɔŋ ŋɩɩ. Nɩbɔmɔ-la bɩ jaŋ lemma, ba jaŋ walɩmɛma. 30Nɩaa jaŋ paala lɩɩ ma tʋɔŋ ma a kɛŋ wɩalɩŋ kaa bɩrɩmɛ, a nyɩsɛ nɩalɩŋ sɩ laa Yesu wɩaa dii dɩ ba mɩɩrɛ harɩŋ a toba. 31Ŋɩɩ wɩaa, má beŋ ma tɩtɩa nyuŋ woruŋ. Má liliisi arɩ mɩ dagɛma nʋʋkala jɩsɩŋ batori nɛ wɩɩhɛyɛ arɩ tɩtaŋɩŋ kala, a yel sɩlɩɩrɩŋ ma woruŋ ma wɩaa.

32Mɩ lɛɛlɛ jomma hɛ Wɩa nɩsɩŋ lɛ nɛ. Wɩa wʋzɔmɔ-la lahɔrɩmɔ lɛ ʋ jaŋ pɛ ma lɛ. Ʋ jaŋ wuo pɛ ma lɛ dɩ ma kɛŋ doluŋ a chɩŋ wɩalɩŋ ma sɩ laa dii lɛ. Ʋ jaŋ leŋ dɩ ma wuo dii kɩalɩŋ ʋ sɩ ŋaa bil nɩaa lɛ. 33Mɩ ha bɩ ma kʋŋkala moribiee koo gɛnnɩŋ bɩɩna dɩ mɩ kaa laa. 34Ma tɩtɩa jɩma mɩ tɩma nɛ woruŋ, a na kɩalɩŋ kala mɩ dɩ mɩ toori dɔnsʋŋ sɩɩ chɛ. 35Mɩ ŋaa ŋɩɩ dɩ mɩ wuo dagɛma dɩ ma faasa tɩŋ tɩntɩŋŋaa nɛ, la maga dɩ la pɛ puwuoloo lɛ a liliisi arɩ La Tɩɩna Yesu fa sɩ bʋl ŋɩɩ. Ʋ sɩ, ‘Ŋ sɩ joŋ kʋa pɩ nɩa, ʋ nɛ kɛŋ tʋɔtɔrʋŋ a kɩɩ ŋ sɩ laa kʋa nɩa teeŋ.’ ”

36Pɔɔl sɩ bʋl wɩaa dɛrɛ, ʋ dɩ ba kala tuu kpirimi ʋ chʋɔlɛ Wɩa a pɩba kala. 37Ba guoru a yel. 38Ba tʋɔŋ chei woruŋ, bɛɛ wɩaa ʋ fa bʋla pɩba arɩ ba bɩra bɩ jaŋ naʋ. Ŋɩɩ nɛ ba kɛnʋ kaa mʋ lɩɩŋ daboro leriŋ.

Currently Selected:

Tɩntɩŋŋaa 20: SIS

Highlight

Copy