Tɩntɩŋŋaa 21

Pɔɔl mʋ Jerusalɛm

1La ta dɔŋɔ aŋ jʋʋ lɩɩŋ daboro. La duoro tegi tegi a mʋ lee kʋbala baa yɩrɛ Kɔs, a bɩra sii nɩmɛ. Taŋ sɩ pʋla la mʋ lee kʋbala baa yɩrɛ Roodis, a bɩra lɩɩ nɩmɛ a mʋ Patara. 2Nɩmɛ nɛ la na lɩɩŋ daboro dɩ ʋʋ mʋ Fɔnɩɩsɩa. La jʋʋ mʋ. 3La sɩɩ mʋ ŋɩɩ, la na lee kʋbala la nagʋa, baa yɩrɛ Saapʋrɔs. La kieli nɩmɛ a mʋ yi Siiria tinteeŋ. La mʋ chɩŋ taŋ kʋbala lɛ baa yɩrɛ Taaya. Nɩmɛ nɛ lɩɩŋ daboro-la chɛ dɩ ʋ chɩŋ dɩ ba chaarɛ chʋgʋsʋŋ. 4La chɛ mʋ na nɩalɩŋ sɩ laa Yesu wɩaa dii nɩmɛ. La hɔŋ ba teeŋ tapʋlaa balɩpɛ. Ba bʋla pɩ Pɔɔl Wɩa Dɩŋ-zɔmʋŋ doluŋ lɛ dɩ ʋ sɩ́ Jerusalɛm mʋ. 5La sɩ hɔŋ nɩmɛ tapʋlaa balɩpɛ ŋɩɩ, la bɩra lɩɩ nɩmɛ a joŋ la wombiiŋ. Baalaa arɩ ba haalaa arɩ ba biiriŋ kɛnla kaa lɩɩ taŋ-la tʋɔŋ. La kala tuu kpirimi lɩɩŋ niiŋ a chʋɔlɛ Wɩa. 6La ta dɔŋɔ nɩmɛ aŋ jʋʋ lɩɩŋ daboro, ka ba ma mɩɩra mʋ dɩa.

7La lɩɩ Taaya lɛ a joŋ la wombiiŋ a mʋ taŋ kʋbala baa yɩrɛ Pitolimiiyas. La mʋ chʋɔlɛ nɩalɩŋ sɩ laa Yesu wɩaa dii nɩmɛ aŋ chʋa. 8Ʋ taŋ sɩ pʋla, la sii a mʋ Sɩzarɩya, a mʋ jʋʋ baal kʋbala baa yɩrɛ Fɩlɩp dɩa. Ʋ fa gɔllɔ bʋl Wɩa wɩaa nɛ aa pɩ nɩaa. Ʋ fa ŋaa nɩalɩŋ balɩpɛ dɔŋɔ nɛ ba fa sɩ lɩɩsa Jerusalɛm lɛ. 9Ʋ fa kɛŋ toloo banɛsɛ nɛ. Ba fa bɩ balaba jaa aŋ fa bʋbʋl Wɩa wɩaa Wɩa doluŋ lɛ. 10La hɛ nɩmɛ ŋɩɩ tapʋlaa baŋmɛnɛ, dɩ baal kʋbala lɩɩ Judiya tinteeŋ a ma kɔ, baa yɩrɛ Agabɔs. Ʋ fa ŋaa Wɩa wʋlaabʋllʋ nɛ. 11Ʋ kɔ la teeŋ a laa Pɔɔl damɛrɛ a kaa vɔɔ ʋ tɩtɩa naasɩŋ arɩ ʋ nɩsaa aŋ bʋl, “Ŋ-la nɛ Wɩa Dɩŋ-zɔmʋŋ bʋl: ‘Juu tɩŋŋaa jaŋ kɛŋ damɛrɛ deeŋ tɩɩna a vɔbʋ ŋ-la Jerusalɛm lɛ, a joŋu hɛ nɩalɩŋ sɩ bɩ Juu tɩŋŋaa ŋaa nɩsɩŋ lɛ.’ ”

12La sɩ nɩɩ wɩɩŋ deeŋ, la dɩ nɩalɩŋ fa sɩ hɛ nɩmɛ sʋl Pɔɔl dɩ ʋ sɩ́ Jerusalɛm mʋ. 13Ŋɩɩ nɛ Pɔɔl bʋla pɩba, “Bɛɛ nɛ tɩɩ ma yiyel ŋ-la a ŋaa mɩ tʋɔŋ chichei? Dɩ ba nɛ jaŋ kɛmmɛ vɔɔ, koo dɩ ba nɛ kpʋmɛ ma Jerusalɛm lɛ a tɩŋ mɩ Tɩɩna Yesu wɩaa, mɩ sɛyɛ nɛ.” 14Ʋ sɩ bʋl ŋɩɩ, la na arɩ la bɩ ʋ wuo nyagaa bil. Ŋɩɩ nɛ la leŋ aŋ bʋl, “Wɩa jaŋ leŋ dɩ wɩɩkala ʋ sɩɩ chɛ, ʋ ŋaa dɩ ʋ ŋaa.”

15Ŋɩɩ nɛ aŋ ka la kɛŋ la tɩtɩa hɛ dɔŋɔ a sii mʋ Jerusalɛm. 16Nɩalɩŋ dɔnsʋŋ sɩ laa Yesu wɩaa dii a lɩɩ Sɩzarɩya ma to la harɩŋ a mʋ, a kɛnla kaa mʋ jʋʋ baal kʋbala dɩa baa yɩrɛ Mineesiŋ. Ʋ lɩɩ Saapʋrɔs nɛ. Ʋ laa Yesu wɩaa dii bʋa-la lɛ ba fa sɩ suomo bʋbʋl Yesu wɩaa pɩpɩ nɩaa nɛ.

Pɔɔl mʋa dɩ ʋ na Jeems

17La sɩ yi Jerusalɛm, nɩalɩŋ sɩ laa Yesu wɩaa dii nɩmɛ chaga laala woruŋ. 18Taŋ sɩ pʋla, la dɩ Pɔɔl mʋ dɩ la na Jeems. La mʋa dɩ nɩalɩŋ kala sɩ laa Yesu wɩaa dii kʋhɩasɩŋ kala hɛ nɩmɛ. 19Ŋɩɩ nɛ Pɔɔl chʋɔlɛba aŋ bʋla pɩba ŋɩɩ kala Wɩa sɩ pɛ ʋ lɛ ʋ tɩŋ tɩntɩŋŋaa nɩalɩŋ sɩ bɩ Juu tɩŋŋaa ŋaa tʋɔŋ.

20Ba sɩ nɩɩ wɩɩŋ deeŋ, ba dɛnnɛ Wɩa aŋ bʋla pɩ Pɔɔl, “La naambii, bee na Juu tɩŋŋaa yʋga a laa Yesu wɩaa dii. Ba yi nɩaa bʋɩ bʋɩ bʋɩ a kala tuto wɩalɩŋ woruŋ Mosis fa sɩ ŋmʋnsa bil dɩ nɩaa tuto. 21Ba nɩɩ ŋ wɩaa nɛ. Ba sɩ ŋ dagɛ Juu tɩmma-la kala sɩ hɛ nɩalɩŋ sɩ bɩ Juu tɩŋŋaa ŋaa tʋɔŋ dɩ ba vɩa wɩalɩŋ Mosis fa sɩ ŋmʋnsa bil dɩ nɩaa tuto nɛ, a bɩra bʋl dɩ ŋ sɩ dɩ ba sɩ́ ba biiriŋ penee keru a sɩ́ Juu tɩŋŋaa naabalɩmaba wɩaa to. 22Ba jaŋ nɩɩ arɩ ŋ kɔ. Bɛɛ nɛ saa la jaŋ ŋaa? 23To la niiŋ a ŋaa wɩɩ-la la sɩ sɩ ŋŋ ŋaa. Baalaa banɛsɛ nɛ hɛ daha. Ba ta niiŋ nɛ Wɩa teeŋ. 24To ba harɩŋ a ma pɩɩsɛ ŋ disiniŋ ta, a tiŋ moribiee dɩ ba wuo pɩɩsɛ ba disiniŋ ta aŋ fʋŋ ba nyusuŋ ma. Dɩ ŋ nɛ ŋaa ŋɩɩ nʋʋkala jaŋ wuo to ŋɩɩ lɛ jɩŋ arɩ wɩalɩŋ kala ba sɩ bʋla a tɩgɛ ŋ lɛ bɩ wʋtɩtɩɩ ŋaa. Ba jaŋ na arɩ ŋ ma tɩtɩa ka to wɩalɩŋ Mosis fa sɩ ŋmʋnsa bil dɩ nɩaa tuto nɛ. 25Ama nɩalɩŋ sɩ laa Yesu wɩaa dii aŋ bɩ Juu tɩŋŋaa ŋaa, la ŋmʋnsɛ teniŋ pɩba arɩ la sɛyɛ dɩ ba bɩra sɩ́ vʋɩŋ kɩaa dii, dɩ ba bɩra sɩ́ pʋsʋŋ chalɩŋ ma dii, a sɩ́ pʋsʋŋ sɩ sʋʋ pimee dii, a lɩɩsɛ ba tɩtɩa bachɔrʋŋ arɩ hachɔrʋŋ wʋŋaalaa lɛ.” 26Ba sɩ bʋl ŋɩɩ, taŋ pʋl, Pɔɔl kɛŋ baala-la banɛsɩmɩŋ mʋ, ba kala pɩɩsɛ ba disiniŋ ta, aŋ jʋʋ Wɩa dɩa ʋ dagɛ Wɩɩsʋllɩ sɩpaalaaraa tapʋlaa magɛ ŋɩɩ ba sɩ jaŋ pɩɩsɛ ba disiniŋ ta, ka dɩ ba kpʋ pʋsʋŋ pɩ Wɩa ba kʋŋkala-nyuŋ lɛ.

Ba kɛŋ Pɔɔl Wɩa dɩɩ-balɩŋ lɛ

27Tapʋlaa balɩpɛ-la sɩɩ yi, Juu tɩŋŋaa dɔnsʋŋ sɩ lɩɩ Esia na Pɔɔl dɩ ʋ hɛ Wɩa dɩɩ-bal-la lɛ. Ba nyɩsɛ nɩ-daŋ hɛ ba kɛŋ Pɔɔl. 28Ba faasa kpɩa, “Iziral tɩmma, má kʋ pɛ la lɛ. Baal-la sɩ gɔllɛ lee-kala a dɩdagɛ wɩaa lee-na kala a chichei la nɩaa sɩɩ to wombii-la, aa chei Mosis fa sɩ ŋmʋnsɛ wɩalɩŋ bil dɩ nɩaa tuto maa, a bʋl wʋbɔŋŋɔɔ a tɩgɛ Wɩa dɩɩ-balɩŋ deeŋ ma lɛ, ʋ nɩɩ kɔ daha ŋɩɩ. Ʋ paala kɛŋ Giriik tɩŋŋaa kaa kʋ jʋʋ Wɩa dɩɩ-bal-la, a ŋaa leriŋ deeŋ sɩ bɩ disiniŋ kɛnɛ kɛŋ disiniŋ.” 29Wɩɩ-la sɩ tɩɩ ba bʋl wɩɩŋ deeŋ nɛ: Ba fa na baal kʋbala dɩ ʋ to Pɔɔl harɩŋ taŋ-la lɛ. Ʋ yɩrɩŋ nɛ Tʋrɔfɩmɔs a lɩɩ Ɛfɛsɩs. Ba fa bɩɩna Pɔɔl kɛnʋ jʋʋ Wɩa dɩɩ-bal-la nɛ. 30Ŋɩɩ nɛ ba hɛ taŋ-la kala lɛ, nɩalɩŋ kala to dɔŋɔ a kɛŋ Pɔɔl a kɛnʋ kaa lɛrɛ lɩɩ Wɩa dɩɩ-bal-la lɛ, aŋ guu kɛŋ Wɩa dɩɩ-bal-la boiŋ-niiree tɔ. 31Ba sɩɩ walɩmɛ dɩ ba kpʋʋ, Rom laalɩyuoroo kʋhɩaŋ nɩɩ arɩ yuosuŋ sii Jerusalɛm kala lɛ. 32Ʋ guu lɩɩsɛ laalɩyuoroo dɔnsʋŋ arɩ ba kʋhɩasɩŋ, ba fá mʋ yuosu-la leriŋ. Nɩalɩŋ sɩ na laalɩyuori-hɩaŋ-la arɩ ʋ laalɩyuoro-la, ba leŋ Pɔɔl ŋmobuŋ. 33Laalɩyuori-hɩaŋ-la mʋ kɛŋ Pɔɔl, a ŋaa ba kɛŋ chɔrʋmɔɔ balɩa kaa vɔbʋ. Ŋɩɩ nɛ ʋ pɩɛsɛ nɩalɩŋ, “Kʋbɛɛ nɛ nɩa deeŋ? Bɛɛ nɛ ʋ ŋaa chei?” 34Ba kala ŋaa goŋ. Dɔnsʋŋ bʋbʋl wɩɩŋ deeŋ, dɔnsʋŋ ma bʋl wɩɩŋ deeŋ. Nɩaa fa sɩɩ ŋaa goŋ ŋɩɩ, laalɩyuori-hɩaŋ-la bɩ wɩɩ-la sɩ paala ŋaa wuo jɩŋ. Ŋɩɩ nɛ ʋ ŋaa ʋ nɩaa kɛŋ Pɔɔl kaa mʋ laalɩyuoroo dɩɩ-duoŋ. 35Ba sɩ yi dɩa-la lusuŋ choluŋ, nɩalɩŋ kɛŋ Pɔɔl lɩlɛrɛ a wʋwalɩmɛ dɩ ba kpʋʋ, ŋɩɩ nɛ laalɩyuoro-la joŋu chʋŋ. 36Nɩalɩŋ kala to ʋ harɩŋ a ŋaa goŋ a bʋbʋl, “Má kpʋʋ.”

Pɔɔl bʋl wɩaa dɩ ʋ laa ʋ tɩtɩa

37Ba sɩ jɩl lusuŋ chol-la a chɩchɛ dɩ ba jʋʋ dɩa-la, ŋɩɩ nɛ Pɔɔl sʋl laalɩyuori-hɩaŋ-la, “Leŋ dɩ mɩ bʋl wɩɩ pɩŋ.” Ŋɩɩ nɛ laalɩyuori-hɩaŋ-la pɩɛsɛ Pɔɔl, “Ŋɩɩ-na ŋ nɩɩ Giriik wʋbʋlʋŋ nɛɛ? 38Ŋ dee Ijipiti tɩŋŋaa baal-la fa sɩ hɛ yuosuŋ aŋ kɛŋ yuo-hɛɛrɛɛ bʋɩ banɛsɛ kaa mʋ gɩrɩ-bine tʋɔŋ ŋɩɩ?” 39Pɔɔl sɩ, “Aɩ, mɩ ŋaa Juu tɩɩna nɛ a lɩɩ Taasɩs, Siliisia tinteeŋ tabalɩŋ. Mɩ tabalɩŋ ŋaa sɩɩfɩaŋ tabal nɛ. Mɩɩ sʋlʋŋ dɩ ŋ leŋ dɩ mɩ bʋl wɩaa pɩ nɩalɩŋ.” 40Ŋɩɩ nɛ ʋ pʋ wombiiŋ. Pɔɔl chɩŋ lusuŋ chol-la lɛ, aŋ kɛŋ ʋ nɩsɩŋ viisi dɩ nɩalɩŋ kɛŋ goŋ. Ŋɩɩ nɛ ba kala ŋaa fʋɩɩ, ka Pɔɔl bʋl wɩaa pɩba Juu tɩŋŋaa yikoro lɛ.

Currently Selected:

Tɩntɩŋŋaa 21: SIS

Highlight

Copy